Ndavichi asonekele ngwenyi “kangwamona lyehi muka-kwoloka vanasezeko, chipwe vaka-tanga yenyi hakutondatonda vyakulya.” Ngachize, Ndavichi ahanjikile mazu kana kweseka navyuma ahichilemo. Atachikijile kanawa muchima waKalunga wakuzakama vatu jenyi. (Samu 37:25) Mazu ahanjikile Ndavichi kawalumbununa nge ngamba yaKalunga katela kuyandako.

Lwola lumwe Ndavichi amwene vyeseko. Lwola lumwe achinyine Saulu. Vyakulya apwile navyo Ndavichi vyapwile vyavindende, ngachize alombele vamuhaneko mbolo alyenga navaze apwile navo. (Samwe. 1, 21:1-6) Ngocho, Ndavichi apwile ‘nakutondatonda vyakulya.’ Numba tuhu apwile muukalu kanou, oloze atachikijile ngweni Yehova kamuliwileko. Noho vasoneka ngwavo Ndavichi alombelenga vyakulya numba ayoye hauchi.

Hali Mateu 6:33, Yesu ahanjikile ngwenyi Kalunga mwazakamanga vangamba jenyi vakushishika vaze vahaka Wangana waKalunga kulutwe mukuyoya chavo. Yesu ahanjikile ngwenyi: “Ngocho, twalenuho lika kutondanga chatete Wangana wenyi nakwoloka chenyi, kaha vyuma vikwavo vyosena [vyakulya, navyakuvwala] navakamihanavyo.” Oloze Yesu ahanjikile nawa ngwenyi ‘vandumbwenyi’ navakafwanga zala mwomwo yakuvayanjisa. (Mateu 25:35, 37, 40) Kaposetolo Paulu naikiye amwene ukalu kana. Shimbu jimwe afwilenga zala nalipwila.—Koli. 2, 11:27.

Yehova atulweza ngwenyi navatuyanjisanga mujijila jakulisezaseza. Nahase kutwechelela tumone ukalu mangana tumukafwe kukumbulula chihula chize anehele Liyavolo. (Yopa 2:3-5) Chakutalilaho, vandumbwetu vamwe vakufwana nge vaze vahakile muvilombo vyakulamina vafunge muchiyulo chaNazi vafwilenga zala mwomwo yakuvayanjisa. Kuhona vyakulya yapwile jila yimwe yize vazachishile mangana vahokole kulonga chaVinjiho. Vinjiho vakushishika vatwalileho lika kwononoka Yehova; ngocho avakafwile. Yehova avetavishile vamone ukalu kanou ngana muze eji kwitavisanga vaka-Kulishitu vosena vamone ukalu wakulisezaseza. Oloze twafwelela chikupu ngwetu Yehova eji kukafwanga vosena vaze veji kuyanjishilanga halijina lyenyi. (Koli. 1, 10:13) Mukanda Wavaka-Fwilipi 1:29 wahanjika ngwawo: “Enu vanamihane kutokwa kanechi hali Kulishitu, keshi nge kumufwelela kahako, nduma, oloze nakuyanjiwila nawa ikiye.”

Yehova ashika ngwenyi mwapwanga hamwe navangamba jenyi. Chakutalilaho, mukanda waIsaya 54:17 wahanjika ngwawo: “Vyeshovyo vitwa navakafula nakole nayove kavyeshi kukafukilako.” Lushiko kanelu najeka jasolola nge Yehova mwakinganga vatu jenyi mwalizavu. Oloze ngamba yenyi umwe nahase kumona vyeseko nakufwa.