1, 2. (a) Vyuma muka vyasolola nge chikungulwilo chamuKolose chapwile naukalu wakuhona kulinunga? (b) Paulu akafwile ngachilihi vandumbwenyi vamuKolose mangana vatwaleho lika kulinunga?

CHIKUNGULWILO chavaka-Kulishitu vamulikulukaji lyamyaka lyakulivanga muKolose chapwile naukalu wakuhona kulinunga. Vaka-Kulishitu vamwe vapwile nakwamba ngwavo vosena muchikungulwilo vatelelele kukavangiza Jishimbi jaMose. Kaha veka vapwile nakukundwiza kunangula chamangana autu. Paulu avahuhumwine haponde yatwama hakushinganyeka vyuma kanevi vyakuhenga, ambile ngwenyi: “Mwatela kumona ngwenu kakweshi mutu umwe mwamitwala muundungo namangana akayeko, nakutangisa chamokomoko nge omu mwaya vilika vyavatu, nge omu mwaya vyuma vyamaputukilo vyakaye, oloze keshi nge omu atwala Kulishituko.”—Kolo. 2:8.

² Nge vaka-Kulishitu vawavisa vakavangijile “vyuma vyamaputukilo vyakaye,” kachi vakanyine kutokwa chakupwa vana vaKalunga. (Kolo. 2:20-23) Hakusaka vatwaleho lika kulama usoko wavo naKalunga, Paulu avalwezele ngwenyi: “Hakenu vishinganyeka vyenu kuvyuma vyamwilu, keshi kuvyuma vyahamavuko.” (Kolo. 3:2) Ava vaka-Kulishitu vawavisa vatelele kushinganyeka halutalililo lwavo lwakukayoya haya myaka yosena mwilu.—Kolo. 1:4, 5.

3. (a) Lutalililo muka vatwama nalwo vaka-Kulishitu vawavisa? (b) Vihula muka natushimutwila muchihande chino?

 ³ Makumbi ano navaka-Kulishitu vawavisa veji kuhakanga muchima kuvyuma vyaWangana waKalunga nalutalililo lwavo lwakukapwa “vaswana vakuswana naKulishitu hamwe.” (Loma 8:14-17) Nyi ngachilihi vaka-Kulishitu vaze vakwechi lutalililo lwakukatwama hamavu? Vanahase kukavangiza ngachilihi mazu aPaulu? Vanahase kuhaka ngachilihi vishinganyeka vyavo “kuvyuma vyamwilu”? (Yowa. 10:16) Apalahama naMose vahakilenga vishinganyeka vyavo “kuvyuma vyamwilu” namulwola lwaukalu. Kaha tunahase kuvalondezeza ngachilihi?

4. Mikoko veka vanahase kuhaka ngachilihi vishinganyeka vyavo kuvyuma vyamwilu?

⁴ Vaze vosena vali nalutalililo lyakukayoyela hano hamavu vatela kuhaka vishinganyeka vyavo kuvyuma vyamwilu. Mujila muka? Veji kulinga ngocho hakuhaka vyaWangana waKalunga kulutwe mukuyoya chavo chosena. (Luka 10:25-27) Omu mukiko alingile naYesu, ngocho nayetu nawa twatela kumulondezeza. (Petu. 1, 2:21) Ngana muze chapwile kuli vaka-Kulishitu vamulikulukaji lyamyaka lyakulivanga, nayetu twatwama mukaye kaze mwatwama kunangula chamakuli, mangana autu nakufwila luheto. (Tangenu Wavaka-Kolinde 2, 10:5.) Twatela kulondezeza Yesu Kulishitu nakulihenda kuvyuma vyosena vize vinahase kwenyeka usoko wetu naYehova.

5. Tunahase kulihulisa vihula muka kutalisa kukufwila luheto?

⁵ Kutala tuli nakwitavisa shipilitu yakaye yakufwila luheto yituhungumwise tahi? Vishinganyeka vyetu vyeji kusololanga vyuma vize twazanga. Yesu ambile ngwenyi: “Kuze kuli luheto lwove, kwakuze vene nakupwanga namuchima wove nawa.” (Mateu 6:21) Chapwa chamwaza kulihulisanga etu vavene vyuma vize twamona kupwa vyavilemu. Twatela kulihulisa ngwetu: ‘Kutala ngweji kwenyekanga lwola lwaluvulu kukulizakamina vyajimbongo, kushinganyeka vyakuwana milimo yize nayingunehela jimbongo jajivulu chipwe kufwila kuyoya mujila yauhando tahi?’ Kutala ngweji kufwilanga kwashiwisako chiyoyelo chami nakuhaka mangana kuvyuma vyakushipilitu tahi? (Mateu 6:22) Yesu ambile ngwenyi nge ‘natulilunjikilanga luheto hano hamavu’ kaha usoko wetu naKalunga naufwa.—Mateu 6:19, 20, 24.

6. Tunahase kufungulula ngachilihi vishinganyeka vyavipi?

⁶ Hakuwana nge katwakupuka mwosenako, chapwa chachashi kulinga vyuma vyakuhenga. (Tangenu Wavaka-Loma 7:21-25.) Nge natuhona kupendamina hashipilitu yajila, kaha tunahase kwazana “muviwanyino vyaliuya namukupenda . . . mukulisavala mujila yakuhenga namuvilinga vyakuzunguma.” (Loma 13:12, 13) Tweji kulipikanga navishinganyeka vyavipi. Hakusaka tufungulule vishinganyeka kana twatela kuhaka vishinganyeka vyetu kuvyuma vyamwilu. Echi chasaka kuzata nangolo ngana muze ahanjikile kaposetolo Paulu ngwenyi: “Ngweji kulukulanga mujimba wami nakuwingisa muundungo.” (Koli. 1, 9:27) Nayetu twatela kulukulanga mujimba wetu. Tushimutwilenu havyakutalilaho vivali vyavatu vaze ‘vevwishile Kalunga kuwaha.’—Hepe. 11:6.

7, 8. (a) Apalahama naSala vamwenenga ukalu muka? (b) Apalahama ahakilenga vishinganyeka vyenyi havyuma muka?

⁷ Omu Apalahama vamulwezele kuli Yehova kuya natanga yenyi kulifuchi  lyaKanane etavilile. Yehova alikashile lushiko naApalahama mwomwo yakusolola lufwelelo nakwononoka. Yehova amulwezele ngwenyi: “Nangukakulingisa kupwa umuyachi waunene, nangukakuwahisa.” (Kupu. 12:2) Mwahichile myaka chakuhona Apalahama napuwenyi Sala kupwa namwana. Kutala Apalahama kafwelelele ngwenyi Yehova keshi kukatesamo lushiko lwenyiko tahi? Halwola kana luze chiyoyelo mulifuchi lyakanane chakaluhwile. Apalahama natanga yenyi vasezele nganda yavo yaluheto yaUle nakuya kunganda yaMesopotamya. Atambukile tunda yajikilomita 1,600 numba vahete ku Kanane kuze vatwaminenga mujimbalaka kaha nawa kavapwile kulya chachivuluko, kaha nawa lwola lumwe vapwilenga nakuvalukuka kuveji. (Kupu. 12:5, 10; 13:18; 14:10-16) Chipwe ngocho, kavafwililile cheka kuhiluka kulifuchi lyaUleko.—Tangenu WavaHepeleu 11:8-12, 15.

⁸ Apalahama “asolwele lufwelelo muli Yehova” nakuhona kuhaka vishinganyeka vyenyi “kuvyuma vyahamavuko.” (Kupu. 15:6) Lwola lwosena ashinganyekelenga hajishiko jaKalunga. Yehova amwene lufwelelo lwaApalahama, kaha ambile ngwenyi: “‘Tala jino kwilu, ulave vatanganyika, numba nge nauhasa kuvalava.’ Kaha amwambile ngwenyi: ‘Mukiko vene munavakapwa vaka-tanga yove.’” (Kupu. 15:5) Omu Apalahama vamulwezele mazu kana, amulingishile afwelele ngwenyi Yehova mwakatesamo lushiko lwenyi. Lwola lwosena omu atalilenga vatanganyika mwilu chamulingishile anuke ngwenyi Yehova mwakamuhana vana vavavulu kulutwe. Kaha mukuhita chamyaka Apalahama apwile namwana ngana muze amushikile Kalunga.—Kupu. 21:1, 2.

9. Tunahase kulondezeza ngachilihi Apalahama?

⁹ Ngana mwaApalahama nayetu tuli nakuvandamina omu Kalunga mwakatesamo jishiko jenyi. (Petu. 2, 3:13) Nge natuhona kuhaka vishinganyeka vyetu kuvyuma vyamwilu, kaha tunahase kushinganyeka ngwetu jishiko jaYehova jinahono kutesamo washi, kaha chinahase kutulingisa tuhone kuzachila Yehova natwima. Chakutalilaho, pamo kunyima mwalisuwilenga kuzata upayiniya chipwe kuzata milimo yeka yakushipilitu. Kutala muchima kana muli nawo lika tahi? Mwatala kutachikiza ngwenu Apalahama avandaminyine “nganda yize yapwile navihela vyazuvo vivene.” (Hepe. 11:10) Apalahama “asolwele lufwelelo muli Yehova, kaha vamumwene kupwa wakwoloka.”—Loma 4:3.

10. Chiyoyelo muka apwile nacho Mose?

¹⁰ Mose apwile ngamba yaKalunga mukwavo uze ahakile vishinganyeka vyenyi kuvyuma vyamwilu. Vamulelelele munganda yamwangana muEjipitu halwola luze Ejipitu yapwile chiyulo changolo mukaye. Mbimbiliya yavuluka ngwayo “Mose vamunangwile mwayile mangana avaEjipitu osena.” Vyuma alinangwile vyalingishile Mose apwenga “wangolo mumazu enyi namuvilinga vyenyi.” (Vili. 7:22) Kumunangula mangana avaEjipitu kachi chamulingishile apwenga mutu wamulemu muEjipitu. Oloze Mose ahakile mangana kuvyuma vyavilemu chikuma, kulinga mwaya muchima waKalunga.

11, 12. Kulinangula muka chize Mose amwene kupwa chachilemu, kaha twejiva ngachilihi ngocho?

¹¹ Omu Mose apwile kanyike, naye Yokevete amunangwile Kalunga wavaHepeleu. Kutachikiza Yehova chalingishile Mose amone kulinga mwaya muchima waYehova kupwa chachilemu kuhambakana vyuma vyosena. Alisuwile kuseza luheto nawata mangana alinge mwaya muchima waKalunga. (Tangenu WavaHepeleu 11:24-27.)  Chikupu vene kumunangula vyuma vyakushipilitu nakufwelela muli Yehova chalingishile Mose ahake vishinganyeka vyenyi kuvyuma vyamwilu.

¹² Numba tuhu Mose vamunangwile mangana avaEjipitu oloze kulinangula kana kachamulingishile ayenga puho, kupwa naluheto chipwe kuzata milimo yayinene muEjipituko. Oloze Mbimbiliya yavuluka ngwayo Mose “akanyine kumuvulukanga ngwavo mwana wamwanaFwalo wapwevo, asakwileho kumuyanjishila hamwe navatu jaKalunga, mukutela kulivwisa kuwaha viseke vyashili hatando yayindende.” Chikupu vene Mose azachishile vyuma alinangwile kushipilitu mangana atwaminyine vatu jaYehova.

13, 14. (a) Vyuma muka vyakafwile Mose atengamo kuzata mulimo uze vamuhanyine kuli Yehova? (b) Ngana mwaMose, twatela kupwa navilinga muka?

¹³ Mose azangile chikuma Yehova navatu jenyi. Omu Mose apwile namyaka yakusemuka 40 alizangile kusokola vana vaIsalele kufuma muundungo muEjipitu. (Vili. 7:23-25) Oloze shimbu kanda Yehova amuhane mulimo kana, Mose atelelele kulinga vyuma vyeka vikwavo. Atelelele kupwa navilinga vyakufwana nge kulinyisa, kutalilila chikiko, kuvova, nakulyononona. (Vishi. 15:33) Mose vatelelele kumunangula numba akahase kuhonesa ukalu waunene uze mwakamona kulutwe. Kupwa kafunga hamyaka 40 chamukafwile apwenga navilinga vyamwaza.

¹⁴ Uno mulimo waufunga wamukafwile tahi? Eyo mwomwo Mbimbiliya yahanjika ngwayo Mose “apwile wakulinyisa chikuma kuhambakana vatu vakwilu lyamavu vosena.” (Kula. 12:3) Kupwa namuchima wakulinyisa chakafwile Mose atalilile vatu chikoki nomu vamunehelelenga ukalu. (Kulo. 18:26) Nayetu nawa twatela kupwa navilinga vize navitukafwa mangana tukayovoke “mumalwa amanene” nakukengila mukaye kakahya kakwoloka. (Kuso. 7:14) Kutala tweji kutwamanga kanawa navatu kuhakilako navaze veji kupihililanga washi tahi? Mazu asonekele kaposetolo Petulu nawatukafwa akwamba ngwenyi: “Vumbikenunga vatu vosena, zangenunga vanavakwenu vosena.”—Petu. 1, 2:17.

15, 16. (a) Mwomwo ika chapwila chachilemu kuhaka vishinganyeka vyetu kuvyuma vyamwaza? (b) Mwomwo ika chapwila chachilemu kuli vaka-Kulishitu kupwanga lika natwamiso yamwaza?

¹⁵ Tuli nakutwama ‘mumakumbi amakalu.’ (Chimo. 2, 3:1) Echi chikiko chapwila chachilemu kuhakanga vishinganyeka vyetu kuvyuma vyamwaza numba tupandame kuli Kalunga. (Teso. 1, 5:6-9) Tutalenu hajijila jitatu jize jinahase kutukafwa tulinge ngocho.

¹⁶ Twamiso yetu: Petulu alumbunwine ngwenyi chapwa chachilemu kupwa natwamiso yamwaza, hakwamba ngwenyi: “Twamiso yenu muli vaka-mafuchi yipwenganga yamwenemwene, mangana . . . vapwenga vakaleho kumilimo yenu yamwenemwene, nakuhasa kumutohwesa Kalunga.” (Petu. 1, 2:12) Numba tuli hembo, kumilimo, kushikola, nakuhema chipwe mumulimo wamuwande, twatela kupwa natwamiso yamwaza mangana tutohwese Kalunga. Hakuwana nge katwakupuka mwosenako tuvosena tweji kuvulumunanga. (Loma 3:23) Oloze nge natutwalaho lika kulwa “jita yamwenemwene yalufwelelo,” kaha tunahase kufungulula tutenga twetu.—Chimo. 1, 6:12.

17. Tunahase kulondezeza ngachilihi muchima apwile nawo Yesu Kulishitu? (Talenu muvwimbimbi wakulivanga.)

¹⁷ Muchima wetu: Hakusaka tupwenga natwamiso yamwaza twatela kupwa namuchima wamwaza. Kaposetolo Paulu ambile ngwenyi: “Lamenunga muchima ou apwilenga nawo Kulishitu Yesu nawa.” (Fwili. 2:5)  Yesu apwile namuchima muka? Apwile namuchima wakulinyisa. Muchima wakulinyisa wamulingishile ambulule mujimbu wamwaza waWangana waKalunga. (Mako 1:38; 13:10) Yesu amwenenga mazu aKalunga kupwa amalemu chikuma. (Yowa. 7:16; 8:28) Atangilenga Mazu-vasoneka Ajila, kahechi chamukafwile kwanukanga Mazu-vasoneka, nakuwahakwila nakuwalumbununa. Nge natupwa vakulinyisa, kwambulula mujimbu wamwaza natwima, nakupwanga nachilongesa chahauka, kaha natupwa namuchima ngana uze apwile nawo Yesu Kulishitu.

18. Mujila muka tunahase kukafwa mulimo WaYehova?

¹⁸ Kukafwa: Yehova ajina ngwenyi “mulijina lyaYesu, mambuli osena akafukame—avaze vali mwilu, navaze vali hamavu.” (Fwili. 2:9-11) Numba tuhu Yesu atwama nachihela chachilemu oloze eji kulyonononanga kuli ise, omu mukiko twatela kulinga nayetu. (Koli. 1, 15:28) Mujila muka? Tunahase kulinga ngocho hakukundwiza mulimo wakutunga “tumbaji kuvatu vakumafuchi osena.” (Mateu 28:19) Kaha nawa twatela ‘kuzatanga vyuma vyamwaza kuli vosena,’ kuli vavakwetu twatunga navo nakuli vandumbwetu.—Ngale. 6:10.

19. Vyuma muka twatela kufwila kulinga?

¹⁹ Twapwa vakutokwa chikuma hakutulweza kuli Yehova tuhake vishinganyeka vyetu kuvyuma vyamwilu. Shikaho “tulahenu nalukakachila mukulaha chize vanatutomena.” (Hepe. 12:1) Tuvosena twatela kuzata “namwono wosena, nge kumuzachila Yehova,” nge natulinga ngocho kaha setu wamwilu mwakatufweta hakukilikita chetu.—Kolo. 3:23, 24.