1. Yehova eji kwivwinga ngachilihi kutalisa kumilimo, kaha vyuma muka eji kulinganga?

YEHOVA eji kulivwisanga kuwaha kuzata milimo yenyi. (Samu 135:6; Yowa. 5:17) Asaka vangelo navatu navakiko valivwisenga kuwaha kuzata milimo yavo, ngachize avahana milimo yize navalivwisa kuwaha nakuvasuulwisa. Chakutalilaho, azachishile mwanenyi wakulivanga mangana atenge vyuma. (Tangenu Wavaka-Kolose 1:15, 16.) Mbimbiliya yatulweza ngwayo shimbu kanda Yesu ezenga hano hamavu apwilenga nakuzachila hamwe naKalunga mwilu kupwa “kuluwa muka-kuzata.”—Vishi. 8:30.

2. Vyuma muka vyasolola nge vangelo vanazatenga mulimo waulemu wakuvasuulwisa?

² Mbimbiliya yalumbununa nge Yehova nahanenga vangelo milimo yakuzata. Omu Alama naEve vafumine mupalachise mwomwo yakuvulumuna shili Kalunga “ahakile vaKeluve kumusamuko kumilemba yaEtene, namulangi wapoko yamukwale yakujingwomwoka kwosena nakulama jila yakumutondo wakuyoya.” (Kupu. 3:24) Kaha mazu atwama hamukanda waKusoloka 22:6 asolola nge Yehova ‘atumine kangelo kenyi mangana alwekese vandungo jenyi vyuma vize vyatela kulingiwa kalinwaha.’

3. Yesu alondezezele ngachilihi chakutalilaho chaIse omu apwile hano hamavu?

³ Omu Yesu apwile hano hamavu, alivwishilenga kuwaha kuzata milimo yize Yehova amuhanyine. Yesu alondezezele chakutalilaho chaIse hakuhana tumbaji twenyi milimo. Avalingishile valivwise kuwaha milimo yavo hakuvalweza ngwenyi: “Chamwenemwene, chamwenemwene, nangumilweza ngwami, Ou mwangwitavila, vilingevi ngweji kulingangAmi naikiye nawa mwakavilinganga, kaha mwakalinga vilinga vyakuhambakanevi, mwomwo Ami nanguya kuli Tata, shikaho.” (Yowa. 14:12) Yesu akafwile tumbaji twenyi mangana vamone ngwavo mulimo wavo wasakiwile kuuzata mukapachapacha, kaha ambile ngwenyi: “Twatela kuzata milimo yayauze angutumine shimbu kuchili musana; ufuku uli nakwiza omu mutu naumwe wauchi mwahasa kuzata.”—Yowa. 9:4.

4-6. (a) Mwomwo ika twatela kusakwilila milimo yize ateselemo Nowa naMose? (b) Milimo yize Kalunga eji kuhananga vatu yatwama nanganyo muka?

⁴ Shimbu kanda Yesu ezenga hano hamavu, Yehova ahanyine vatu milimo yakuvasuulwisa. Numba tuhu Alama naEve kavateselemo milimo vavahanyine kuli Yehovako, oloze vatu vavavulu vateselemo milimo yize vavalwezele kuzata. (Kupu. 1:28) Yehova ahanyine Nowa mulimo wakutunga wato mangana ikiye natanga yenyi vayovoke haLivaji. Nowa alingile vyuma vize amulwezele Yehova. Etu vatu tuliko oholyapwa mwomwo Nowa akavangijile jindongi amulwezele Yehova.—Kupu. 6:14-16, 22; Petu. 2, 2:5.

⁵ Yehova ahanyine Mose jindongi jamwakutungila tavanaku nakulongesa mulimo waupilishitu. (Kulo. 39:32; 40:12-16) Vyuma muka natulinangula kumuchima waMose wakwononoka? Kaposetolo Paulu alumbunwine ngwenyi tavanaku namulimo waupilishitu vyemanyinyineko “vyuma vyamwaza vize vyapwile nakwiza.”—Hepe. 9:1-5, 9; 10:1

⁶ Omu kujina chaKalunga chili nakutesamo, vangamba jenyi veji kuzatanga milimo yakulisezaseza. Numba tuhu milimo yimwe yinahase kwalumuka, oloze milimo kana yeji kutohwesanga Yehova nakunganyalisa vatu. Omu mukiko wapwile namulimo uze azachile Yesu mwilu nahamavu. (Yowa. 4:34; 17:4) Namakumbi ano nawa nge natuzata milimo yize mwatuhana Yehova, kaha natumutohwesa. (Mateu 5:16; tangenu Wavaka-Kolinde 1, 15:58.) Mwomwo ika tunahanjikila ngocho?

7, 8. (a) Lumbununenu milimo yize vali nakuzata vaka-Kulishitu vamuchano makumbi ano. (b) Muchima muka twatela kupwa nawo kutalisa kumilimo yize mwatuhana Yehova?

⁷ Chapwa hikutokwa chikuma hakutachikiza ngwetu Yehova alweza vatu vakuhona kukupuka mwosena vazachile hamwe milimo. (Koli. 1, 3:9) Vandumbwetu vamwe vatwama namulimo wakutunga jizuvo ngana muze chapwile kuli Nowa naMose. Vandumbwetu vamwe vazata milimo yakutunga jiZuvo jaKukunguluka Chachinene, jiZuvo jaWangana, najiofesi jamitango. Mwatela kumona mulimo wenu kupwa waulemu numba upwa wakutungulula Zuvo yaWangana chipwe kutunga chikota chetu chakuWarwick, munganda yaNew York. (Talenu muvwimbimbi wakulivanga.) Mulimo kana wapwa wajila. Numba tuhu vandumbwetu vamwe vanahase kuzata milimo kaneyi, oloze tuvosena tukwechi mulimo wakushipilitu. Mulimo kana shina kwambulula mujimbu uze weji kutohwesanga Yehova nakunganyalisa vatu. (Vili. 13:47-49) Liuka lyaKalunga likiko lyeji kutetekelanga mulimo wakwambulula. Lwola lumwe liuka linahase kutuhana milimo yeka.

⁸ Vangamba jaYehova vakushishika vanakavangizanga jindongi jamuliuka lyaYehova. (Tangenu WavaHepeleu 13:7, 17.) Numba tuhu katwatachikijile ovyo vanatuhanyina milimo yekako, oloze tweji kwononokanga mwomwo twatachikiza ngwetu kwalumuka  kana chinafumu kuli Yehova mangana tunganyale.

9. Chakutalilaho muka chize vakulwane veji kusololanga muchikungulwilo?

⁹ Vakulwane veji kusololanga muchima wakuzachila Yehova omu veji kutwaminyinanga muchikungulwilo. (Koli. 2, 1:24; Teso. 1, 5:12, 13) Vakulwane vafwila kuzata nangolo hakukavangiza jishimbi jamuliuka, nakuzachisa jijila jajihya jakwambulwilamo mujimbu wamwaza. Veji kumonanga mihako yamwaza yeji kufumangamo omu veji kulongesanga jijila jakwambulwila hashinga, chakutulukila nechi chahasanga numba tuhu vandumbwetu vamwe vanapunga nakuhuhwasana numba nge jijila kana najizata kanawa hakwambulila vatu. Chakutalilaho, vapayiniya vawana vamulifuchi lyaGermany vapwile nakwambulila muvihela vyakusekasanyina muze kanda lyehi vambulilengamo mujimbu wamwaza. Hali vapayiniya kana ava, payiniya umwe walijina lyaMichael ambile ngwenyi vapwilenga nawoma kuzachisa jila kaneyi mwomwo kavayizachishile hamyaka yayivuluko. Ambile nawa ngwenyi: “Atela kupwa Yehova amwene ukalu kanou, ngachize atukafwile tulivwise kuwaha mulimo kanou. Twevwile kuwaha chikuma hakukavangiza jila vatuhana muMulimo Wetu waWangana nakupendamina hali Yehova atukafwe.” Kutala muli nakufwila kuzachisa jijila jajihya hakwambulila mungalila yenu tahi?

10. Vyuma muka vanalumunangako muliuka lyetu?

¹⁰ Lwola lumwe haMbetele vyuma vyeji kwalumukanga. Chakutalilaho, hamyaka yakalinwaha jiofesi jamitango jajindende vanajisoko kaha milimo yahamitango kana vali nakuyizata hamitango yayinene. Echi chinalumuna milimo vapwile nakuzata vandumbwetu hamitango kaneyi yayindende. Numba tuhu ava vandumbwetu valumwine vyuma vimwe mukuyoya chavo, oloze kwalumuka kana chanehele nganyo. (Kwambu. 7:8) Ava vandumbwetu vapwa vakuwahilila kuzata milimo muliuka lyaYehova makumbi ano.

11-13. Ukalu muka vanamononga vandumbwetu vamwe mwomwo yakwalumuka chavyuma vyamuliuka lyaYehova?

¹¹ Tunahase kulinangula vyuma vimwe kuli vandumbwetu vaze vapwile nakuzachila hajiofesi jamitango jize vafutwile. Vandumbwetu vamwe vazachilile hamitango kana hamyaka yayivulu. Valunga napwevo vaze valimbata vaze vapwile nakuzachila haMbetele yayindende yakungalila yaCentral America vavalwezele kuya nakuzachila haMbetele yayinene chikuma yamulifuchi lyaMexico. Ndumbwetu umwe walijina lyaRogelio ambile ngwenyi: “Kuseza tanga namasepa jami chapwile chachikalu chikuma.” Ndumbwetu mukwavo walunga walijina lyaJuan uze valwezele kuya nakuzachila kulifuchi lyaMexico ambile ngwenyi: “Ngwevwile kwijiva nge ngunasemuka kamuchivali. Chasakiwa kutunga cheka masepa vavahya nakukavangiza chisemwa chakulifuchi kana nakushinganyeka mujila yeka.”

¹² Omu mitango yamulifuchi lyaEurope vayifutakanyine, vaka-Mbetele vavavulu vavalwezele kuya nakuzachila haofesi yamutango yamulifuchi lyaGermany. Vakamwene ukalu mwomwo kachapwa chachashi mutu kuseza lifuchi lyenyiko. Vandumbwetu vamwe vaze vafumine mulifuchi lyaSwitzerland vasezele jipili jamwaza, kaha nawa vandumbwetu vaze vafumine kulifuchi lyaAustria vasezele chiyoyelo chamwaza chize valivwishilenga kuwaha haMbetele yayindende.

¹³ Vandumbwetu vaze veji kufumanga kumutango umwe nakuvatwala kumutango ukwavo veji kusakiwanga kwalumunako vyuma vimwe mukuyoya chavo. Vatela kwijilila kuchihela kana, nakuputuka kuzata navandumbwetu veka, namilimo yeka. Kaha nawa vatela kwijilila chikungulwilo vali, nangalila yachikungulwilo kana, nalilimi veji kuzachisanga mungalila kana. Numba tuhu chapwa chachikalu kulinga ngocho, oloze vaka-Mbetele vavavulu vanalumuna chiyoyelo chavo nakukavangiza vyuma kana. Mwomwo ika? Twivwililenu kuvyuma vahanjikile vandumbwetu vamwe.

14, 15. (a) Vandumbwetu vamwe vanasololanga ngachilihi nge vamona mulimo wakuzachila hamwe naYehova kupwa waulemu? (b) Tunahase kulondezeza ngachilihi chakutalilaho chavo chamwaza?

 ¹⁴ Ndumbwetu Grethel ambile ngwenyi: “Ngwetavile kuya nakuzachila kulifuchi lyeka mwomwo yakuzanga Kalunga nakumona mulimo uze anguhanyine kupwa waulemu chikuma.” Ndumbwetu Dayska ambile ngwenyi: “Omu ngwatachikijile ngwami Yehova ikiye angutumine, ngwetavilile namuchima wakusuuluka.” Kaha nawa ndumbwetu André naGabriela vambile ngwavo: “Kutuzachisa kuli Yehova chapwile chachilemu chikuma kuhambakana vyuma twafwila mukuyoya chetu.” Twalyambile ngwetu, ‘Nge vyuma vimwe vinalumuka muliuka lyaYehova, kaha nachipwa chamwaza kuvikavangiza muchishishisa chakuvikana.’

¹⁵ Nge jiofesi jamitango jimwe vanajifutula, kaha vaka-Mbetele vamwe veji kuvatumanga mumulimo waupayiniya. Vaka-Mbetele vamulifuchi lyaDenmark, naNorway naSweden navakiko vavatutwile namutango waScandinavia. Valunga napwevo vaze valimbata vaFlorian naAnja vambile ngwavo: “Tweji kuwahililanga namulimo wetu wauhya numba tuhu chapwa chachikalu. Twamona kutuzachisa kuli Yehova kupwa hikutokwa chamokomoko nokwo mwatutuma. Chikupu vene twapwa vakutokwa.” Numba tuhu etu vamwe katweshi nakuzachila Yehova mujila kanako, oloze tunahase kulondezeza muchima wakulisuula wavava vandumbwetu tunavuluka nakuhaka chatete Wangana kulutwe mukuyoya chetu. (Isa. 6:8) Yehova eji kukisulanga vangamba jenyi vaze navamonanga mulimo wakuzachila hamwe nayikiye kupwa waulemu chamokomoko nokwo vali nakuzachila.

16. (a) Mukanda Wavaka-Ngalesha 6:4 watulweza tulingenga vyuma muka? (b) Mulimo muka uze kala mutu nahase kuzata?

¹⁶ Kuhona kukupuka mwosena cheji kutulingisanga tulyesekese navakwetu. Oloze mazu aKalunga atulweza tuhake kaha muchima kuvyuma vize natuhasa kulinga. (Tangenu Wavaka-Ngalesha 6:4.) Etu vamwe katweshi kupwa tuvakulwane muchikungulwilo, vapayiniya,  vamishonali chipwe vaka-Mbeteleko. Chikupu vene eyi yapwa himilimo yamwaza, oloze twatela kutachikiza ngwetu kwatwama mulimo waulemu chikuma uze vatu vosena vanahase kuzata. Mulimo kana shina kuzachila hamwe naYehova hakwambulula mujimbu wamwaza,. Twatela kumona mulimo kana kupwa waulemu chikuma.

17. Vyuma muka vili nakusoloka makumbi ano, kaha mwomwo ika katwatela kuzeyako?

¹⁷ Mumyaka yino yakukuminyina, katweshi kuhasa kuzachila Yehova kuheta hasetoko yize tunasakeko. Tunahase kupwa naukalu umwe uze katweshi kuhasa kukumisako wakufwana nge kulama tanga chipwe kuhona kulikangula kumujimba. Chipwe ngocho, katwatela kuzeyako. Chamokomoko nakala ukalu tuli nawo, tunahase kutwalaho lika kwambulula vyalijina lyaKalunga naWangana wenyi. Chuma chachilemu chikuma shina kuzachila Yehova noho hakumina ngolo jetu nakulombelangako vandumbwetu vaze vali nakuzata chikuma kuhambakana etu. Twatela kutachikiza ngwetu mutu wosena uze ali nakutohwesa lijina lyaYehova apwa wamulemu kumeswenyi.

18. Vyuma muka tuli nakutalilila kulutwe, kaha kutokwa muka twatwama nacho makumbi ano?

¹⁸ Numba tuhu katwakupuka mwosenako, oloze Yehova atulweza tuzachile nenyi hamwe. Ocho kutokwa kana twatwama nacho vayaya hakuzachila hamwe naYehova mumakumbi ano akukuminyina! Tuli nakutalilila kulutwe omu natukapwa nakulivwisa kuwaha “kukuyoya chivene,” chahaya myaka yosena mukuwahilila, nakutwama mukuunda.—Chimo. 1, 6:18, 19.

19. Vyuma muka vize Yehova atushika kukatulingila kulutwe?

¹⁹ Kalinwomu twingile mukaye kakahya kaKalunga. Shinganyekenu mazu aze Mose alwezele vaIsalele shimbu kanda vengile muLifuchi lyaLushiko, ambile ngwenyi: “Yehova Kalunga kenu mwakamihana vyakulisala kumilimo yamavoko enu yosena.” (Lushi. 30:9) Omu nayikakuma jita yaAlamangetone, Yehova mwakahana kaye kakahya kuli vangamba jenyi vaze vanazachilanga hamwe milimo ngana muze ashikile. Kufumaho natukapwa namulimo wauhya wakuwahisa mavu kupwa palachise.