OMU mwahichile myaka 5, Choong Keon naJulie valunga napwevo vaze valimbata vahetesele myaka yakusemuka kafwe 35, vaputukile kuzata upayiniya washimbu yosena munganda yaSydney yamulifuchi lyaAustralia. Choong Keon ahanjikile ngwenyi “Twapwile namulimo wakukaye wakuzata shimbu jimwe najimwe, kaha twapwile nakuyoya kanawa. Kuchihela twatwaminenga kakwapwilenga liyena chipwe chishika chikumako, ngachize twayoyelenga kanawa. Twevwilenga kuwaha hakupwa hamwe navisemi namasepa jetu.” Chipwe ngocho, Choong Keon naJulie chivezu chavo chavayanjishilenga. Mwomwo ika? Mwomwo numba tuhu chiyoyelo chavo chavetavishile kuzata milimo yayivulu muliuka lyaYehova, oloze vapwile nakulangisa kwalumunako chiyoyelo chavo.

Hakukunguluka changalila mu 2009, kwapwile chihande chimwe chize chavakwachile kumichima. Muka-kuhanjika chihande apwile nakukafwa vaze vanahase kutohwesako mulimo wavo wakwambulula. Ahanjikile ngwenyi: “Achishinganyekenu nyamutekenya hakusaka atalise minyau kuchimoswe chipwe kuchilyo, kuvanga minyau yili nakutambuka. Nayetu hakusaka Yesu atutwaminyine tutohwese mulimo wetu wakwambulula kuvanga tuli nakutambuka, kulihakaho nangolo mangana tutesemo vyuma vize tunalitomena kulinga.” * Ava vandumbwetu vakulimbata vevwile kwijiva nge uze muka-kuhanjika chihande ali nakwamba vakiko. Hakukunguluka kanechi, vehwojwole vamishonali vakulimbata vaze vazachila mulifuchi lyaTaiwan. Vapwile nakuhanjika hakuwaha vapwile nakulivwisa mumulimo wavo, kaha vafwililile kutwalililaho. Mazu kana alingishile cheka vaChoong Keon naJulie vevwenga kwijiva nge apwile nakwamba vakiko.

Julie ambile ngwenyi. “Omu twafumine hakukunguluka kanechi, twalombele kuli Yehova atukolezeze tuyenga nakuzachila kulifuchi lyaTaiwan.” Atwalilileho ngwenyi: “Oloze twevwilenga woma. Twevwile kwijiva nge tuli nakwingila muchijiva mwamusuku halwola lwatete.” Chisoneka chavakafwile vayenga nakuzata mulimo kana shina chaMuka-kwambulula 11:4 chize chahanjika ngwacho: “Ou mwalama peho keshi kukuvako, kahou mwatala mavwi keshi kukahako.” Choong Keon ahanjikile ngwenyi:  “Twalikashile mumichima yetu kuhona ‘kukakasana nakutala,’ oloze twatele kuputuka ‘kukuva nakwaha.’” Valombele chikuma kuli Yehova nakutanga mijimbu yakuyoya chavamishonali, nakulitumina mikanda navaze vayile nakuzachila kulifuchi lyaTaiwan, valanjishile minyau yavo navitwamo vyavo, ngachize vahetele mulifuchi lyaTaiwan omu mwahichile tukweji vatatu.

Vandumbwetu vamalunga namapwevo vakufuma kumafuchi eka vakuhambakana 100 vali nakuzachila mulifuchi lyaTaiwan mujingalila muze muli nakusakiwa vaka-kwambulula vavavulu. Vandumbwetu kana vafuma kumafuchi akufwana nge Australia, Britain, Canada, France, Japan, Korea, Spain, naUnited States, kaha myaka yavo yakusemuka yaputuka kufuma ha 21 nakuheta ku 73. Hakachi kavo hali navandumbwetu vamapwevo vavajike vakuhambakana 50. Uno vyuma muka vinakafwe ava vandumbwetu vahase kuzata mulimo wavo wakwambulula kumafuchi eka? Tutalenu vyuma vize vinavakafwe.

Laura ndumbwetu wapwevo wamujike uze afuma kulifuchi lyaCanada apwa payiniya washimbu yosena kumulauko walifuchi lyaTaiwan. Oloze hamyaka 10 yahichilemo kunyima kazangilenga mulimo wakwambululako. Laura ambile ngwenyi, “Kangwalivwishilenga kuwaha kuya mumulimo wakwambululako, mwomwo kangwauzangileko.” Oloze masepa jenyi vamulifuchi lyaCanada vamulwezelenga ayenga navo kulifuchi lyaMexico nakwambulula mujimbu hakakweji wamuundu. Laura ambile ngwenyi, “Elu lukiko lwapwile lwola lwatete ami kuzata chikuma mumulimo wakwambulula, kaha ngwalikomokelele hakuwana nge mulimo kana wapwile wamwaza chiyovo.”

Kuwaha alivwishile Laura chamulingishile ayenga nakuzachila kuchikungulwilo chamulifuchi lyaCanada chize chazachisa lilimi lyeka. Kaha alisonekesele mushikola yize valinangwilenga lilimi lyaChinese, nakuzachila hamwe nalizavu lize lyazachishilenga chiChanese, kaha ayile nakuzachila kulifuchi lyaTaiwan muSeptember 2008. Laura ambile ngwenyi “Mwahichile mwaka wamuundu numba ngwijilile mungalila kana, Oloze oholili kangweshi cheka nakushinganyeka kuhiluka kulifuchi lyaCanadako.” Uno mulimo wakwambulula ali jino nakuumona ngachilihi? Ambile ngwenyi, “Ngweji kulivwisanga kuwaha chikuma mulimo kana. Cheji kutwivwisanga kuwaha chikuma hakumona omu vatu tweji kunangulanga vilongesa vyaMbimbiliya vanakwalumuna chiyoyelo chavo nakwiza kuli Yehova.  Kuzachila mulifuchi lyaTaiwan chinangulingisa ngupwenga wakuwahilila halwola lwaluvulu.”

Brian napuwenyi Michelle vaze vali namyaka yakusemuka 35 vafumine kulifuchi lyaUnited States nakuya kulifuchi lyaTaiwan myaka kafwe 8 yinahichimo. Hakavanga vamwenenga ngwavo mulimo wavo wamuwande kawalowelenga namihakoko. Oloze kamishonali umwe avalwezele ngwenyi: “Numba vene nge unahane mutu talakiti, watela kutachikiza ngwove lwola kana pamo lukiko lwatete mutu kana kutambula mujimbu wakuvuluka Yehova. Ngocho, nachisolola nge uli nakwazana mumulimo wakwambulila uze wapwa waulemu.” Mazu kana akolezezele Brian naMichelle vahone kulitwamina. Ndumbwetu mukwavo avalwezele ngwenyi: “Nge mutu uze ali nakulinangula lilimi mwalikekesanga hakumbi hakumbi amone nge ali nakuzovoloka, keshi kuhasa kumona nge ali nakuzovolokako, nahase vene nakuzeya. Oloze nge mwamona mazu nalinangula hakukunguluka chachihanda chosena, kaha mwamona ngwenyi ali nakuzovoloka.” Chikupu vene vanazovoloka nakupwa jino vapayiniya vakulindunuka.

Chuma muka chinahase kumilingisa mulinangule lilimi lyalihya? Chakavanga esekenu kuya kulifuchi kuze muli nakusaka kuya nakuzachila. Yenu kukukunguluka, likatenu navandumbwenu vamulifuchi kana nakuya navo hamwe mumulimo wamuwande. Brian ahanjikile ngwenyi: “Nge namumona ngwenu vatu vavavulu vali nakwitavila mujimbu wamwaza, kaha nawa vandumbwenu vali nakumisolwela zangi, kaha nachimilingisa muyenga nakuzachila mulifuchi muze vazachisa lilimi lyeka.”

Vandumbwetu Vavavulu vaze vanayinga nakuzachila kuze “kunakusakiwa vaka-kwambulula” mulifuchi lyaTaiwan vanalizakamanga vavene kumujimba hakunangula vatu lilimi lyaChingeleshi. Kristin naMichelle valanjishilenga vyakulya vyamukalungalwiji mangana vawane mwakuyoyela. Kristin ahanjikile ngwenyi, “Kanda lyehi ngulingengaho chuma kana, oloze echi changukafwile ngutwame mulifuchi kana.” Kutwala muze, lwola lwosena Kristin apwile navatu vaze valanjilenga vyuma alanjishilenga. Kahechi chamulingishile awaneko vyakulikafwanavyo napuwenyi, kaha nawa vawanyinenga lwola lwaluvulu lwakuzata mulimo wavo waupayiniya wakufuta vatu.

William naJennifer valunga napwevo vaze valimbata vafumine kulifuchi lyaUnited States nakuya nakutwama mulifuchi lyaTaiwan kafwe myaka 7 yinahichimo. William ahanjikile ngwenyi, “Lwola lumwe kulinangula lilimi, kuzata upayiniya, kuzakama chikungulwilo, nakuwanako jimbongo jakulikafwa najo cheji kuzeyesanga.” Vyuma muka vinavakafwe vatwalilileho nakupwa vakuwahilila? Valitomene kulinga vyuma vyamwaza. Chakutalilaho, kuhona kupwa namuchima wakufwelela ngwavo navatachikiza washi lilimi lyaChinese chavakafwile vahone kuzeya hakuwana nge kavatachikijile washi lilimi kanako

William anukile mazu amulwezele kalama umwe wakutambwojoka ngwenyi, “Nge tunalitomena lyehi vyakulinga, kaha twatela kulivwisa kuwaha vyuma kana vize navitukafwa tuvitesemo.” William ambile ngwenyi kukavangiza vyuma vavakafwile chavalingishile vapwenga namuchima wauvwovu, nakwitavila vyuma vavakafwilenga kuli vandumbwavo vamuze mungalila, nakwalumunako twamiso yavo mangana vazate kanawa mulimo wavo wakwambulula kungalila kuze vayile. Ahanjikile nawa ngwenyi, “Kaha nawa chatukafwile kuwanangako lwola lwakuya nakulivwisa kuwaha kutala vyuma atenga Kalunga mungalila muze twapwile nakuzachila.”

Ngana mwaWilliam naJennifer, naMegan ndumbwetu wapwevo wamujike uze afuma kulifuchi lyaUnited States ali ‘nakulivwisa kuwaha ungeji wenyi’ omu apwile nakufwila kuhanjika kanawa lilimi lyaChinese. Kusongo yachalumingo hichalumingo apwilenga nakuya navandumbwenyi vaze vapwilenga nakwambulila kuchau chajimbopolo chachinene chamungalila yaKaohsiung mulifuchi lyaTaiwan. Megan nambululanga mujimbu wamwaza kufuma kuwato hiwato kuli vaka-kuta vayishi vakumafuchi akufwana nge Bangladesh, India, Indonesia, Philippines Thailand, naVanuatul. “Hakuwana nge ava vaka-kuta vaishi vatwaminengako muchau halwola lwalundende kaha, ngocho twaputukilenga kulinangula navo chilongesa chaMbimbiliya hahaze vene. Hakusaka vosena nguvazukise,  ngwalinangwilenga navatu vawana halwola lumwe.” Ali nakwivwa ngachilihi hakulinangula lilimi lyaChinese? Eji kwambanga ngwenyi, “Ngwafwililile kutachikiza lilimi kana washi, oloze ngweji kwanukanga mazu angulwezele ndumbwami halwola lumwe ngwenyi: ‘Zata noho hakumina ngolo jove,kaha Yehova mwazakama vinalituluko.’”

Shimbu kanda Cathy uze afumine kulifuchi lyaBritain ayenga nakuzachila kumafuchi eka, avangilile kuhunanana awane mulimo wamwaza wakuya nakuzachila kumafuchi uze atela kuzata mujike wapwevo. Alombele kuli Yehova nakusonekela mikanda kujiofesi jamutango mangana vamulweze ponde yize yinahase kuwana vandumbwetu vamapwevo vavajike. Kufumaho akekesele havyuma vamukumbulwile, kaha amwene ngwenyi kuya nakuzachila kulifuchi lyaTaiwana chinawahe.

Mu 2004 Cathy, ahetesele myaka yakusemuka 31, kaha ayile kulifuchi lyaTaiwan kuze akapwile nachiyoyelo chachashi. Ambile ngwenyi: “Ngwahulishile vandumbwami vangulweze kujingalila kuze veji kulanjisanga mihako namafwo akulya handando yayindende. Vandumbwami vangukafwile namwakulamina jimbongo kahechi changulingishile ngutwalilileho namulimo wami.” Vyuma muka vyamukafwile apwenga nachiyoyelo chachashi? Cathy ahanjikile ngwenyi: “Lwola lwosena ngwalombelenga kuli Yehova mangana angukafwe ngusuuluke navyakulya vize ngwalilenga navyakuvwala vize ngwapwile navyo. Ngwashinganyekela ngwami Yehova nakumbulula kulomba chami hakungunangula vyuma vyavilemu vyamukuyoya nakungukafwa ngusuuluke navyuma nguli navyo numba tuhu kangwapwilenga navyuma vyosenako.” Atwalilileho ngwenyi: “Ngwalivwishile kuwaha chiyoyelo chachashi chize ngwapwile nacho mwomwo changukafwile ngutwaleho kulinga vyuma vyakushipilitu vize ngwalitomenene kulinga.”

Numba tuhu chiyoyelo chaCathy chapwile chachashi, oloze apwile wakuwahilila. Ambile ngwenyi: “Ngwambulwilenga mujimbu kuvihela kuze vatu vavavulu vetavililenga muchano. Echi changwivwishilenga kuwaha chikuma.” Halwola ahetele mulifuchi lyaTaiwan, mungalila muze apwile nakuzachila upayiniya mwapwile kaha vikungulwilo vivali vyaChinese, oloze oholyapwa muli vikungulwilo vyakuheta ku 7. Cathy ambile ngwenyi: “Kulimwena nameso ami kapu omu mulimo wakwaha uli nakuzovoloka cheji kungulingisanga nguzate mulimo kana nakuwahilila.”

Vyuma muka vize vali nakulinga oholyapwa vaChoong Keon naJulie vaze vanavuluka kumaputukilo achihande chino? Hakavanga Choong Keon ashinganyekele ngwenyi mazu amandende alilimi lyaChinese aze alinangwile kaweshi kuhasa kumukafwa chikuma muchikungulwiloko. Oloze omu keshi mukiko vashinganyekele vandumbwetu vamuchikungulwilo kanako. Choong Keon ambile ngwenyi, “Omu chikungulwilo chetu vachihandunwine nakutunga vikungulwilo vivali, vanguhanyine milimo yayivulu hakuwana nge ngwapwile ngumuka-kuzachila. Halwola kana ngwalivwile ngwami nguli chikupu nakuzachila kuze kuli nakusakiwa kukafwa. Ahanjikile oku ali nakumwesamwesa ngwenyi, “Chapwile chuma chamwaza chikuma hakungutonda nayami.” Oholyapwa apwa jino mukulwane muchikungulwilo. Julie nayikiye ahanjikile ngwenyi: “Tunapu vakusuuluka chikuma hakutesamo mulimo kanou, nakuwaha chize kanda twivwengangaho lyehi. Twejile kuno nakukafwa, oloze kuwahilila chinatukafwe. Tuli nakusakwilila Yehova hakutwitavisa kwiza nakuzachila kuno.”

Kumafuchi amavulu kuli nakusakiwa vaka-kwaha vakushipilitu vavavulu. Kutala munakumisa shikola, kaha munakushinganyeka vyuma mwatela kulinga mukuyoya chenu tahi? Kutala muvajike kaha munakutonda vamizachise kuliuka lyaYehova tahi? Kutala muli nakusaka kuhana chakutalilaho chamwaza kuli vakatanga yenu kutalisa kuvyuma vyakushipilitu tahi? Kutala mwafuma lyehi hamilimo, kaha muli navyakuliwana navyo vyamwaza vize mwatela kulwezako vakwenu tahi? Chikupu vene kukisula chachinene chili nakumivandamina nge namusaka kutohwesako mulimo wenu wakuzachila Yehova hakuya nakuzachila kuze kuli nakusakiwa vaka-kwambulula Wangana vavavulu.