OMU mwahichila myaka yivali shimbu kanda ukalu kana usoloke, ami naEvelyn Trabert twakumishile kulinangula Shikola yaNgileyate Yakulinangula Mbimbiliya yamuchiwana kwakamwihi nanganda yaIthaca mulifuchi lyaNew York. Kufumaho vatutumine kuya nakuzachila munganda yaSanta Ana. Oloze shimbu kanda ngutwaleho kwambulula mulimo wami uze ngunazate hamyaka kafwe 29, manenu ngumilweze ovyo vyangulingishile ngulisuule kuzata mulimo kana.

Ami ngwasemukile mumwaka wa 1923 mungalila yaSpokane munganda yaWashington, mulifuchi lyaU.S.A. Kaha visemi jami vaJohn naEva Olson vapwilenga vaka-chachi yaLutherans, oloze kavafwelelenga mukunangula chakwamba nge Kalunga wazangi eji kuyekelesanga vatu mukakahya kaheloko. (Yowa. 1, 4:8) Tata azachilenga muchitanda chakwochela jimbolo, kaha likumbi limwe naufuku mukwavo muvazachila amulumbunwinyine kufuma muMbimbiliya ngwenyi helo kachapwa chihela chakuyanjishila vatuko. Kutwala muze visemi jami vaputukile kulinangula Mbimbiliya naVinjiho jaYehova, kaha valinangwile vyuma yanangula Mbimbiliya kutalisa kukuyoya chamutu nge nafu.

Numba tuhu halwola kana ngwapwile kaha namyaka yakusemuka 9, oloze ngwevwilililenga kumuchano wamuMbimbiliya vapwilenga nakulinangula visemi jami. Vevwile kuwaha chikuma hakulinangula nge Kalunga lijina lyenyi ikiye Yehova, kaha nawa kakwatwama  Tulunga vatatuko. (Yowa. 8:32) Visemi jami vangunangwilenga vyuma vize valinangwilenga, ngachize ngwaputukile kuvikavangiza. Numba tuhu kulinangula Mbimbiliya changunehelelenga uli, oloze ngwalivwishilenga kuwaha kulinangula Mazu aKalunga. Kaha nawa numba tuhu ngwevwilenga sonyi, oloze nayami ngwayilenga hamwe navisemi jami mumulimo wakwambulula. Kuheta mu 1934, visemi jami vavambapachishile, kaha kuheta mu 1939, nayami vangumbapachishile omu ngwapwile namyaka yakusemuka 16.

Mumwaka wa 1940 mulwola lwanonga, visemi jami valanjishile zuvo, ngachize twalukilile kungalila yaCoeur d’Alene, Idaho nakuputuka kuzata upayiniya. Twafwetelelenga zuvo yize yapwilenga helu yachitanda chakuwahishila jiminyau. Muzuvo kana mukiko nawa twakungulukililenga. Halwola kana kwapwilenga kaha jiZuvo jaWangana jajindende, vandumbwetu vavavulu vakungulukililenga mujizuvo javandumbwetu chipwe jakufwetela.

Kaha kuheta mu 1941, ami navisemi jami twayile kukukunguluka chize chapwile munganda yaSt. Louis, Missouri. Likumbi lyaSondo valivulukile ngwavo “Likumbi lyaVanyike.” Halikumbi kaneli, vanyike vamyaka yakusemuka yakuputukila ha 5 nakuheta ku 18 vavalwezele kutwama kwakamwihi nautenda. Ndumbwetu Joseph F. Rutherford kumakumishilo achihande chenyi alwezele etu vanyike tuvosena twimane nge twetavilile “kwononoka Kalunga naMwangana wenyi.” Tuvosena twemanyine. Kaha ndumbwetu Joseph F. Rutherford avilikile ngwenyi: “Talenu vinjiho vaWangana vavahya vakuhambaka 15, 000!” Echi changulingishile ngusakule mulimo waupayiniya mukuyoya chami chosena.

Omu mwahichile tukweji vavandende kufuma haze hakukunguluka, tuvosena mutanga vatutumine kuya nakuzachila munganda yaOxnard kusulo yaCalifornia. Vatutumine munganda kana kuya nakuputuka chikungulwilo chachihya. Muzuvo twatwaminenga mwapwile kahela kamwe kaha. Ufuku hiufuku twalilenga kahela kami hamesa yetu yakulila. Echi chapwile chachikalu chikuma kuhambakana muze ngwapwilenga nazuvo yami yakusavala.

Omu twahetele mulifuchi lyaCalifornia, lifuchi lyaJapan lyalukukile chau chaPearl Harbor mungalila yaHawaii haDecember 7, 1941. Kaha likumbi lyakavangijileho, lifuchi lyaUnited States lyengilile muJita yaKaye Yamuchivali. Halwola kana, jimbopolo jamulifuchi lyaJapan japwile hakamwihi nayetu, ngachize vatu vosena vaze vapwile kwakamwihi natunda vavalwezele vajime mimunyi naufuku. Ngocho, milima yavakafwile vahone kulukuka vaze vapwile hatunda.

Omu mwahichila tukweji vavandende, muSeptember 1942, twapwile kushikola yaNew World Theocratic Assembly munganda yaCleveland yamulifuchi lyaOhio. Twevwililile kuchihande chaNdumbwetu Nathan H. Knorr chize chapwile namutwe wakwamba ngwavo “Kutala Kuunda Chinahase Kushimbula Tahi?” Muchihande chenyi ashimutwilile mukanda waKusoloka 17 uze walumbununa ngwawo, ‘uze chisuma, apwileko, oloze keshiko chekako, kaha kalinwomu alovoke muwina wakuzeneka kukuma.’ (Kuso. 17:8, 11) Ndumbwetu Knorr alumbunwine ngwenyi uze “chisuma” emanyinyineko League of Nations yize yakumine mu 1939. Kaha avilikile ngwenyi mulifuchi namukapwa cheka kuunda. Ngocho, omu mukiko vene chapwile mu 1946 omu Jita yaKaye yamuchivali yakumine, kaha lifuchi lyaLeague of Nations valishishile kulifuchi lyaUnited States. Kufuma halwola kana, Vinjiho jaYehova vaputukile mulimo wakwambulula mujimbu wamwaza kwalenga kaye kosena. Mulimo kana watohwele chikuma.

Upolofweto kana wangukafwile ngutachikize ngwami kulutwe nakukapwa milimo yayivulu chikuma. Kahomu vavilikile ngwavo shikola yaNgileyate nayiputuka mwaka nawizaho, ngwafwilile kuya kushikola kana mangana ngukapwe ngukamishonali. Kaha mu  1943, vangutumine kuya nakuzachila upayiniya kulifuchi lyaOregon mungada yaPortland. Halwola kana twazachishilenga phonograph hakwambulila vatu mujimbu, kufumaho hikuvahana mikanda yakupendamina haMbimbiliya yize yahanjika haWangana waKalunga. Mwaka wosena ngwashinganyekelenga kaha mulimo waumishonali.

Kaha kuheta mu 1944, ami nasepa lyami Evelyn Trabert twevwile kuwaha chikuma hakutambula mukanda wakutusanyika kuya kuShikola yaNgileyate. Hatukweji vatanu, valongeshi jetu vatunangwile mwakulivwishila kuwaha kulinangula Mbimbiliya. Muchima wavo wakulinyisa watwivwishile kuwaha. Chakutalilaho, lwola lumwe halwola lwakulya ava valongeshi jetu vakiko vapwilenga nakutunehela vyakulya. Ngachize, twakumishile shikola kana haJanuary 22, 1945.

Mukakweji waJune 1946, ami naEvelyn, naLeo, naEsther Mahan twahetele munganda yaSanta Ana mulifuchi lyaEl Salvador. Omu twahetele twawanyine wande ‘unatomasana lyehi nakutela kwaha’ jimbuto. (Yowa. 4:35) Kahomu mwahichile tukweji vavandende, twalanyine vatu kuya kukukunguluka chachihanda chatete, kaha twevwile kuwaha hakumona vatu kafwe 500 vaneza kukukunguluka kana. Kaha vatwamina vamukwitava chamakuli vapihililile namulimo wetu wakwambulula, ngachize omu mwahichile chalumingo chimwe, vawahishile lizavu lyavatu kwiza nakutulukuka kweseka namuze ngunahanjika kukuputuka chamujimbu uno. Muchishishisa chakuchina munganda kana, oloze etu twafwililile kutwama mangana tukafwe vatu vamichima yamwaza. Numba tuhu vatwamina vamukwitava chamakuli valwezele vatu valitwamine kutanga Mbimbiliya, kaha nawa vatu vavandende kaha vakiko vahashilenga kulanda Mbimbiliya, oloze vavatu vapwilenga nazala yakushipilitu. Vevwile kuwaha hakuwana nge twalinangwile lilimi lyaSpanish mangana tuvanangule vyaYehova nalushiko lwenyi lwakukalumuna kano kaye kupwa palachise.

Pwevo walijina lyaRosa Ascencio naikiye apwile chilongesa chami chaMbimbiliya. Apwilenga nakutwama nalunga uze kavalimbatako. Oloze omu aputukile kulinangula Mbimbiliya, alihandunwine nauze lunga. Uze lunga naikiye aputukile kulinangula Mbimbiliya. Kutwala muze valimbachile, nakuvambapachisa, nakupwa jino Vinjiho jaYehova vatwima. Rosa ikiye apwile payiniya watete munganda yaSanta Ana. *

Rosa apwilenga nakachitanda kakandende. Omu ayilenga mumulimo wamuwande, asokelenga chitanda chenyi nakufwelela ngwenyi Yehova mwamuzakama. Kahomu asokolwelenga chitanda chenyi, vatu vavavulu vejilenga nakulanda vyuma. Amwene ngwenyi Yehova apwile nakumuzakama kweseka namuze ashika hali Mateu 6:33. Rosa apwile wakushishika kuli Yehova palanga nakukufwa chenyi.

Etu vamishonali tuvosena 6 twapwile nakutwama muzuvo yimwe yakufwetela yalunga umwe muka-kusekasana. Likumbi limwe, kapilishitu umwe ayile kuli uze mwenya-zuvo nakumulweza ngwenyi nge mwatwalaho lika kutwecha tutwame muze muzuvo, kaha mwamuhanga muchachi hamwe kaha napuwenyi. Uze lunga kevwile womako, amulwezele ngwenyi nge nazange avahange tuhu muchachi. Vilinga vyauze kapilishitu  vyamupihishile, ngachize kalizakaminyineko. Uze lunga atulwezele ngwenyi tunahase kutwama muze muzuvo hakala lwola tunasake.

Munganda yayinene yamulifuchi lyaSan Salvador, kamishonali mukwavo apwile nakulinangula Mbimbiliya napwevo lyamanjimela umwe walijina lyaBaltasar Perla. Uze lunga wamuchima wamwaza echele kufwelela Kalunga mwomwo vatwamina vamukwitava vavavulu vapwilenga vaka-kulyonga. Omu vaputukile kutunga ofesi yamutango yamulifuchi lyaEl Salvador, Baltasar azanyine mumulimo kana hawana wakanyombo numba tuhu halwola kana kanda achipwe Chinjiho chaYehova.

Baltasar alikachilenga naVinjiho jaYehova vavavulu omu vapwile nakuzata mulimo kanou, kaha amwene ngwenyi nawane chikupu kwitava chamuchano. Baltasar vamumbapachishile ha 22 July, 1955, kaha puwenyi Paulina vamumbapachishile naikiye omu mwahichile makumbi amandende. Vana vavo vosena vavali navakiko vali nakuzachila Yehova. Mwanavo walunga Baltasar Jr nazachila haMbetele yamulifuchi lyaUnited States hamyaka 49 mumulimo wakukundwiza mulimo wakwambulula kwalenga kaye kwosena, oholyapwa ali jino muKomiti yaMutango mulifuchi kaneli. *

Omu twaputukile kupwa nakukunguluka changalila mulifuchi lyaSan Salvador, Ndumbwetu Perla atukafwile tuwane chihela chachinene chakuhemena mangana tukungulukilemo. Hakavanga katwazalishile vitwamo vyosenako, oloze omu mwahichile myaka, Yehova atukiswile, ngachize vatu vavavulu vejilenga nakuzalisa vitwamo vyosena nakuhambakanaho. Hakukunguluka kanechi, ngwaliwanyine navatu vaze ngwalinangwilenga navo Mbimbiliya. Ngwevwile kuwaha chikuma omu vatu vaze ngwalinangwilenga navo Mbimbiliya vavambapachishile.

Hakukunguluka chimwe chachihanda, ndumbwami umwe ejile kuli ami nakulikonekela, oloze ami kangwamutachikijileko. Ambile ngwenyi: “Ngwapwile havanyike vamalunga vaze vamyashile malolwa munganda yaSanta Ana.” Ngwevwile kuwaha chikuma hakuwana nge ali jino nakuzachila Yehova. Echi changulingishile ngutachikize ngwami mulimo wakwambulula wapwa waulemu chikuma mukuyoya chamutu.

Ngwazachile mulimo waumishonali mulifuchi lyaEl Salvador hamyaka kafwe 29. Ngwazachilile munganda yaSanta Ana, muSonsonate, muSanta Tecla, kaha namuSan Salvador. Mumwaka wa 1975, ngwechele mulimo wami waumishonali nakuhiluka kulifuchi lyaSpokane mangana ngukalame visemi jami mwomwo hivanakolo lyehi jino.

Omu tata afwile mu 1979, ngwaputukile kulama mama hamyaka yikwavo 8. Mama kapwile najingolo jakuzata kala milimoko mwomwo ashinakajiwile chikuma. Ngocho, afwile omu apwile namyaka yakusemuka 94. Echi changuhombesele chikuma. Kaha ngwavijile namusongo wavimbulu mumujimba. Oloze Yehova angukafwile ngumike cheseko kana. Chapwile kwijiva nge Yehova ahanjikile ngwenyi, ‘palanga nomu naukapwa najivwi . . . , nangukumbatanga, nangukuzundulanga nakukuyovola.’—Isa. 46:4.

Mumwaka wa 1990, ngwayile nakutwama kunganda yaOmak, munganda yaWashington. Kuchihela kana ngwalivwishilenga kuwaha kuzachila mungalila yize vahanjika lilimi lyaSpanish, kaha vilongesa jami vaMbimbiliya vamwe vavambapachishile. Kuheta muNovember 2007, ngwalukilile cheka muzuvo yimwe yamukamwihi yize yapwile munganda yaChelan munganda yaWashington. Vandumbwami vamuchikungulwilo chalilimi lyaSpanish vapwile nakunguzakama, ngachize ngwivwile kuwaha chikuma. Hakuwana nge ami yami kaha ngwapwile nguChinjiho wakashinakaji, vandumbwami vosena “vangumona” nge “ngukaka” yavo.

Numba tuhu kangwasakile kusomboka nakuhona kupwa natanga mangana nguzate chikuma mulimo wakwambulula ‘chakuzeneka chuma chakungutangula,’ oloze ngwatwama navana vakushipilitu vavavulu. (Koli. 1, 7:34, 35) Ngwamwene ngwami mukaye kano, kangweshi kuhasa kupwa navyuma vyosenako. Shikaho ngwahaka kulutwe kuzachila Yehova namuchima wami wosena. Mukaye kakahya natukapwa nalwola lwaluvulu lwakulinga vyuma vyamwaza vyavivulu. Chisoneka chami ngwazanga shina Samu 145:16 chize Yehova atufwelelesa ngwenyi ‘mwakasuulwisa vaka-kuyoya vosena omu vanevwila kuwaha.’

Nguli jino namyaka yakusemuka 91, nguchili najingolo jakutwalaho lika kuzata upayiniya. Mulimo waupayiniya weji kunguhananga jingolo nakungujikijisa. Omu ngwahetele mulifuchi lyaEl Salvador, ngwawanyine mulimo wakwambulula uchili nakuputuka. Numba tuhu Satana ali nakutufumbukila, oloze mulifuchi kana muli jino vaka-kwambulula vakuhambakana 39, 000. Echi chajikijisa lufwelelo lwami. Chikupu vene shipilitu yajila yaYehova yili nakukafwa vatu jenyi.