1. Uno mukanda waVyavaLevi unahase kutukafwa ngachilihi?

MUMUKANDA waVyavaLevi, kujila vachivuluka chikuma kuhambakana mumikanda yeka yamuMbimbiliya. Kujila chikiko chuma chasakiwa kuli vaka-kulemesa Yehova vamuchano. Nge natwivwishisa nakusakwilila mukanda waVyavaLevi kaha nachitukafwa tupwenga vajila.

2. Vyuma muka vyatwama mumukanda waVyavaLevi?

² Mukanda waVyavaLevi vausonekele kuli kapolofweto Mose, wapwa hakachi ‘kaVisoneka vyosena’ uze wawahila kunangula. (Chimo. 2, 3:16) Lijina lyaYehova lyasoloka mapapa kafwe likumi mukapetulu hikapetulu mumukanda kanou. Kutachikiza kanawa mukanda waVyavaLevi nachitukafwa mangana tuhone kulinga kala vyuma vize navyenyeka usoko wetu naYehova. (Levi 22:32) Mazu akwamba ngwavo “Ami yami Yehova” aze vazachisa mapapa kakavulu mumukanda kanou eji kutwanukisanga twononokenga kuli Yehova. Muchihande chino nechi chinakavangizaho, natulinangula vishina vyavilemu vyamumukanda waVyavaLevi vize navitukafwa tupwenga vakujila omu natuzachila Kalunga.

3, 4. Uno kusana chaAlone navana venyi chemanyinako ika? (Talenu muvwimbimbi wakulivanga.)

³ Tangenu VyavaLevi 8:5, 6. Yehova atongwele Alone kupwa kapilishitu wakulitulaho wavaIsalele, kaha nawa vana venyi vatelele kupwa vapilishitu kwimanyinako muyachi wavaIsalele. Alone emanyinako Yesu Kulishitu kaha vana vaAlone vemanyinako vaka-Kulishitu vawavisa. Uno kusana chaAlone chemanyinako kutomesa Yesu tahi? Nduma, mwomwo Yesu apwile wakuzeneka shili kaha nawa ‘wakuzeneka katenga.’ (Hepe. 7:26; 9:14) Oloze kusana chaAlone chemanyinyineko Yesu uze apwa utoma kaha nawa wakwoloka. Nyi kusana chavana vaAlone chemanyinako ika?

⁴ Kusana chavana vaAlone chemanyinako kutomesa vawavisa vaze vasakula kukapwa vapilishitu mwilu. Uno echi kutomesa kana chatalisa kulumbapachiso tahi? Nduma, mwomwo lumbapachiso kalweshi kutomesa shiliko oloze lwapwa katachikijilo kakulihana kuli Yehova Kalunga. Vaka-Kulishitu vawavisa vavatomesa ‘namazu aKalunga,’ ngocho vatela kukavangiza kunangula chaYesu mukuyoya chavo. (Efwe. 5:25-27) Echi chavalingisa vapwenga vajila kaha nawa vatoma. Nyi ngachilihi “mikoko veka”?—Yowa. 10:16.

5. Mwomwo ika mikoko veka veji kuvatomesanga naMazu aKalunga?

⁵ Vana vaAlone kavemanyinako mikoko vekako. (Kuso. 7:9) Oloze mikoko veka veji kupwanga vajila kaha nawa vatoma kuhichila muMazu aKalunga. Omu vaze vakwechi lutalililo lwahamavu veji kutanganga vyuma yahanjika Mbimbiliya kutalisa kungolo jandando yakusokola yaYesu yakumwanga manyinga, cheji kuvalingisanga vazachile Yehova “mulimo wajila namusana naufuku.” (Kuso. 7:13-15) Kutomesa vawavisa namikoko veka cheji kutwalililangaho lika. Echi cheji kulingisa twamiso yavo yipwenga yitoma lwola lwosena. (Petu. 1, 2:12) Yehova eji kwivwanga kuwaha omu vangamba jenyi vosena veji kupwanga vatoma nakulinunga hamwe nakumwononoka nakukavangiza Yesu uze apwa Kafunga kavo.

6. Mwomwo ika twatela kulikekesanga lwola lwosena?

⁶ Vyuma muka natulinangula kulushimbi luze vahanyine vapilishitu vavaIsalele lwakulitomesa kumujimba? Vatu vavavulu vaze tweji kunangulanga navo Mbimbiliya veji kumonanga ngwavo, twapwa vaunyoji kumujimba kaha nawa chihela chetu chakulemesela Kalunga tweji kuchilamanga mujila yaunyoji. Ngocho vaze navasaka kulemesa Yehova vatela kupwa “namuchima utoma.” (Tangenu Samu 24:3, 4; Isa. 2:2, 3.) Ngocho, twatela kuzachila Yehova navishinganyeka vitoma, namichima yitoma, namijimba yitoma. Shikaho twatela kulikekesanga etu vavene lwola lwosena. Shimbu jimwe twatela kwalumunako vyuma vimwe vyavinene mukuyoya chetu numba tupwenga vajila. (Koli. 2, 13:5) Chakutalilaho, ndumbwetu wakumbapachisa uze eji kutalanga mivwimbimbi yauselesele atela kulihulisa ngwenyi, ‘Kutala ngweji kupwanga nguwajila tahi?’ Kaha atela kuya kuli vandumbwenyi muchikungulwilo vamukafwe mangana ahonese tato kana.—Yako. 5:14.

7. Kweseka nachisoneka chaVyavaLevi 8:22-24, chakutalilaho muka chize Yesu ahanyine?

⁷ Omu vahakilenga mutu haupilishitu muIsalele, manyinga amwana mukoko vawakwichilenga kusongo yalitwitwi lyaAlone lyachilyo, nakumunwe washina wakumavoko enyi, nakumunwe washina wakumahinji enyi, omu mukiko valingilenga nakuli  vana venyi vamalunga. (Tangenu VyavaLevi 8:22-24.) Kuzachisa manyinga mujila kaneyi, chasolwele nge vapilishitu navazata mulimo wavo namuchima wakwononoka. Chochimwe nawa naKapilishitu Wakulitulaho Yesu, ahanyine chakutalilaho chamwaza kuli vaka-Kulishitu vawavisa nakuli mikoko veka. Evwilililenga kuvyuma vize Ise amunangwilenga, alingilenga mwaya muchima waYehova nakupwa nachiyoyelo chitoma.—Yowa. 4:31-34.

8. Vyuma muka vatela kulinga vangamba jaYehova vosena?

⁸ Vaka-Kulishitu vawavisa namikoko veka vatela kukavangiza Kapilishitu Wakulitulaho Yesu uze alamine kulonga chenyi kuli Yehova. Vangamba jaYehova vosena vatela kwononoka jishimbi jaYehova jize jatwama muMbimbiliya, nge navalinga ngocho kaha navahona kunyengetesa shipilitu yajila. (Efwe. 4:30) Vatela kufwila ‘kusungamisa jijila jakutambukamo navilyachilo vyavo.’—Hepe. 12:13.

9. Vyuma muka vize vahanjikile vandumbwetu vatatu, kaha vyuma vahanjikile navimikafwa ngachilihi?

⁹ Tutalenu hamazu vahanjikile vandumbwetu vamalunga vatatu vaze vanazachilanga hamwe navandumbwetu vamuLizavu Lyakutwaminyina hamyaka yayivulu. Ndumbwetu umwe ahanjikile ngwenyi: “Mulimo tweji kuzatanga wapwa wakulipwila, twapwa vakulinunga lwola lwosena hakuzachila hamwe navandumbwetu vawavisa numba tuhu kavakupuka mwosenako. Oloze chuma ngunafwilanga hamyaka yosena eyi shina, kwononoka kuli vaze vanakutwaminyina.” Ndumbwetu mukwavo ahanjikile ngwenyi: “Chisoneka chakufwana nge Wavaka-Kolinde 2, 10:5 chize chahanjika kutalisa ‘kukulyononona kuli Kulishitu,’ chinangukafwenga kwononoka nakuzachila hamwe navaze vanakutwaminyina muliuka. Kwononoka kana chatela kufuma kumuchima.” Ndumbwetu wamuchitatu ahanjikile ngwenyi: “Kuzanga vyuma vize azanga Yehova nakuhunga vyuma vize ahunga, nakukavangizanga jishimbi jenyi nakulinga vyuma vize vyeji kwivwisanga Yehova kuwaha, chalumbununa kwononoka kuliuka lyaYehova navaze ali nakuzachisa vatesemo kujina chenyi hano hamavu.” Ou ndumbwetu anukile chakutalilaho chandumbwetu Nathan Knorr uze atwama muLizavu Lyakutwaminyina, uze etavilile vyuma vahanjikile muKaposhi Kakutalila kamu 1925 hamutwe wakwamba ngwavo “Birth of the Nation.” Kwononoka kanechi chevwishile kuwaha ou ndumbwetu. Kushinganyeka hamazu vahanjikile ava vandumbwetu vatatu nachimikafwa mwononokenga Kalunga nakupwa vajila.

10. Mwomwo ika chapwila chachilemu kwononoka kulushimbi lwaKalunga lwakutalisa kumanyinga?

¹⁰ Tangenu VyavaLevi 17:10. Yehova alwezele vaIsalele kuhonanga kulya “manyinga.” Navaka-Kulishitu vavalweza valihendenga kumanyinga avatu, nawa atunyama. (Vili. 15:28, 29) Cheji kwivwisanga ushona nge natulinga vyuma vize navilingisa Kalunga atuhunge nakutuhanga muchikungulwilo. Twazanga Yehova nakufwila kumwononokanga. Numba tuhu chiyoyelo chetu chili muponde, oloze katweshi kwitavila vatuhungumwise kuli vatu vaze kavatachikiza Kalunga mangana tuhokole jishimbi jenyiko. Twatachikiza ngwetu vatu vamwe navatutombanga mwomwo yakukana kutuhaka manyinga, oloze twafwila kwononoka Kalunga. (Yuta 17, 18) Vyuma muka navitukafwa tuhone kulya chipwe kukana kutuhaka manyinga?—Lushi. 12:23.

11. Mwomwo ika chilika chaLikumbi lyaKulinga Chakufwika haShili chahamwaka himwaka chapwile chachilemu?

 ¹¹ Vyuma alingilenga kapilishitu wakulitulaho haLikumbi lyaKulinga Chakufwika haShili chatukafwa tumone manyinga ngana muze awamona Kalunga. Manyinga vawazachishilenga nge kuli mulimo umwe waulemu. Vawazachishilenga hakukonekela milonga yashili yavaIsalele mangana vapwenga nausoko wamwaza naYehova. Manyinga angombe wakuji, nawa apembe vawasapwilile kulutwe lwachifwiko chachikasha chalushiko. (Levi 16:14, 15, 19) Kusapula manyinga chalingishile Yehova akonekele jishili javaIsalele. Kaha nawa Yehova alwezele vaIsalele ngwenyi, nge mutu mwajiha kanyama kaha atela kuhichisa manyinga auze kanyama nakuwashikila mavu, mwomwo “myono yavakwechi mijimba vosena, manyingavo himyono yavo.” (Levi 17:11-14) Jishimbi kaneji kajapwile jamokomokoko. Kumyaka yakunyima, Kalunga akanyishile Nowa natanga yenyi kuhona kulyanga manyinga. (Kupu. 9:3-6) Vyuma muka navalinangulako vaka-Kulishitu?

12. Kweseka namazu asonekele Paulu, manyinga azata mulimo muka?

¹² Kaposetolo Paulu alumbunwine ngwenyi, manyinga atwama angolo jakutomesa jishili javatu hakusoneka ngwenyi: “Kweseka nomu mwaya Jishimbi, vyuma vyosena veji kuvitomesanga namanyinga, kaha kuvanga manyinga vawamwange mokomoko jishili kaveshi kujikonekelako.” (Hepe. 9:22) Oloze wana wavimuna vakuvatula wapwile wakatando kakandende kaha. Paulu alumbunwine ngwenyi, wana kana wanukishile vaIsalele nge vapwile vaka-shili, kaha nawa kwasakiwile wana uze wahashile kutomesa jishili javo haya myaka yosena. Jishimbi japwile “muvwimbimbi wavyuma vyamwaza vize vyapwile nakwiza keshi nge vyuma viveneko.” (Hepe. 10:1-4) Uno kukonekela jishili chapwile ngachilihi chachashi?

13. Uno manyinga aze Yesu ahanyine kuli Yehova atunganyalisa ngachilihi?

¹³ Tangenu Wavaka-Efwesu 1:7. Yesu  afwile nakupwa ndando yakusokola vatu vosena, kahechi chaneha nganyo kuli vaze veji kuzanganga ikiye naIse. (Ngale. 2:20) Oloze vyuma vize alingile Yesu hanyina yakumusangula, vikiko vyatulingisa tusokoke kushili ngana muze valingilenga haLikumbi lyaKulinga chaKufwika haShili. Omu kapilishitu wakulitulaho engililenga Muze Mwajila Chikuma, chapwile kwijiva nge nengila muchihela muze apwile Kalunga. Muchihela kana mukiko ahanyine manyinga atunyama kuli Kalunga. (Levi 16:11-15) Omu mukiko alingile naYesu. Hanyima yakusanguka, ayile mwilu nakuhana manyinga aze asokwele vatu nakuwahana kuli Yehova mujila yachifwanyisa. (Hepe. 9:6, 7, 11-14, 24-28) Twapwa vakutokwa chikuma hakutukonekela jishili jetu nakupwa nachivezu chitoma mwomwo yakufwelela mumanyinga aYesu.

14, 15. Mwomwo ika chapwila chachilemu kutachikiza, nakwononoka lushimbi lwaYehova lwakutalisa kumanyinga?

¹⁴ Twatachikiza jino kanawa ovyo Yehova atukanyishila kulya ‘kala manyinga.’ (Levi 17:10) Twatachikiza ovyo vyalingisa manyinga kupwa ajila kuli Kalunga. Eyo mwomwo manyinga emanyinako kuyoya. (Kupu. 9:4) Twafwelela chikupu ngwetu natumonanga manyinga ngana muze awamona Kalunga nakukavangiza lushimbi lwenyi lwakulihenda kumanyinga. Jila yayinene tunahase kupwa nausoko wamwaza naYehova shina kufwelela mundando yakusokola yaYesu nakutachikiza ngwetu Tengi yetu amona manyinga kupwa amalemu.—Kolo. 1:19, 20.

¹⁵ Tuvosena twatela kulisakwila etu vavene numba nge natwitavila kutuhaka manyinga, chipwe kala jila yakukilamo yakuzachisa manyinga chipwe chiku. Shikaho chapwa chachilemu kulombanga kuli Yehova, kuhehwojolanga mumikanda yetu, nakusakula chimweza jila vanahase kutukilamo shimbu kanda ukalu usoloke. Echi chinahase kutukafwa tulihende kumanyinga. Katweshi nakusaka twivwise Yehova kumuchima kupihya hakulinga vyuma vize kasakako. Makumbi ano vandotolo vavavulu navatu veka veji kutushinjilanga vatuhake manyinga mangana tuyoye. Oloze hakupwa tuvatu vajila, twatachikiza ngwetu Yehova kaha ikiye akwechi lisesa lyakutulweza mwakuzachishila manyinga. Yehova amona ‘kala manyinga’ kupwa ajila. Ngachize, twatela kwononoka lushimbi lwahanjika hamanyinga. Kaha nawa vilinga vyetu vitoma vyatela kusolola nge twamona manyinga aYesu kupwa amalemu. Manyinga aYesu kaha akiko alingisa vatukonekele jishili jetu nakukapwa nakuyoya chahaya myaka yosena.—Yowa. 3:16.

16. Mwomwo ika vatu jaYehova vatela kupwa vajila?

¹⁶ Omu Yehova asokwele vaIsalele kufuma muundungo muEjipitu, avalwezele ngwenyi: “Ami yami Yehova ngwamilowele mulifuchi lyaEjipitu mangana ngupwenga nguKalunga kenu. Shikaho pwenunga mwajila, mwomwo Ami ngwajila.” (Levi 11:45) Yehova asakile vaIsalele vapwenga vajila mwomwo ikiye apwa wajila. Nayetu Vinjiho jaYehova twatela kupwa vajila. Mukanda waVyavaLevi wahanjika hatoma ngwawo twatela kupwa vajila.

17. Munakwivwa ngachilihi havyuma tunashimutwila mumukanda waVyavaLevi?

¹⁷ Chikupu vene tunanganyala vishina tunashimutwila mumukanda waVyavaLevi. Mukanda kana unamikafwe mutachikize ovyo chapwila chachilemu kupwa vajila. Vyuma muka vikwavo tunahase kulinangula kumukanda waVyavaLevi? Uno ou mukanda unahase kutukafwa ngachilihi tuzachile Kalunga mujila yitoma? Vihula kana natuvishimutwila muchihande chinakavangizaho.