1. Vyuma muka veji kushinganyekanga vatu vamwe kutalisa kuli vatu vaze veji kulemesanga Kalunga?

VATU vavavulu makumbi ano veji kwambanga ngwavo, mauka akwitava amuno mukaye kaweshi nakuvakafwako. Veka veji kushinganyeka ngwavo Kalunga ketavila mauka kanako mwomwo kawanangula muchano wakutalisa kuli Kalungako, kaha nawa veji kulinganga vyuma vyavipi. Kaha nawa vafwelela ngwavo eji kwitavilanga vatu vavilinga vyamwaza vamumauka akwitava osena. Kutala mukiko vene tahi? Nyi Kalunga asaka ngwenyi vatu vaze navamulemesa vatela kulihenda kukwitava chamakuli tahi? Tutalenu omu vakumbulula vihula kana hakukekesa vyuma yahanjika Mbimbiliya kutalisa kuli vaka-kulemesa Yehova vamuchano.

2. Veya vapwile vatu jaYehova, kaha chuma muka chavalingishile vapwenga nausoko wakulipwila naYehova? (Talenu muvwimbimbi wakulivanga.)

² Kafwe myaka 400 kunyima, Yehova asakwile lizavu lyavatu hano hamavu mangana vapwenga vatu jenyi. Apalahama  vamulumbununa muMbimbiliya ngwavo “sevo yavosena vaze vatwama nalufwelelo,” kaha nawa apwile mutwe watanga yayinene yize yapwile navangamba vavavulu. (Loma 4:11; Kupu. 14:14) Vatu vamulifuchi lyaKanane vamumwenenga kupwa “lihando” wamunene nakumuvumbika. (Kupu. 21:22; 23:6) Yehova alikashile lushiko naApalahama natanga yenyi. (Kupu. 17:1, 2, 19) Kalunga alwezele Apalahama ngwenyi: “Elu lukiko lushiko lwami ngunambe ngwami, mululamanga, elu ngunalishiki nayove navaka-tanga yove navakakukava. Vana vamalunga vosenava vali kuli enu vavajihane. . . . kaha nakupwanga katachikijilo kalushiko ngunalishiki nayenu.” (Kupu. 17:10, 11) Ngachize, Apalahama namalunga vosena vamutanga yenyi vavajihanyine. (Kupu. 17:24-27) Kujihana chalingishile tanga yaApalahama vapwenga nausoko wakulipwila naYehova.

3. Tanga yaApalahama yatohwele ngachilihi?

³ Muzukulu lyaApalahama Yakova chipwe ngwetu Isalele apwile navana 12. (Kupu. 35:10, 22b-26) Kutwala muze, ava vana vavulile nakupwa miyachi 12 yaIsalele. (Vili. 7:8) Yosefwe mwana Yakova vamutwalile kuEjipitu muundungo, kaha kutwala muze Fwalo amuhakile hachihela chachinene. Omu mulifuchi lyaEjipitu mwapwile zala yakalombolombo, Yosefwe vamuhanyine mulimo wakutala vyakulya vyalifuchi lyosena. Eyi zala yakalombolombo yalingishile Yakova natanga yenyi vayenga kuEjipitu. (Kupu. 41:39-41; 42:6) Tanga yaYakova yatohwele, kaha vayivulukile ngwavo “liwuka lyavatu veka naveka.”—Kupu. 48:4; tangenu Vilinga 7:17.

4. Usoko muka vapwile nawo vaEjipitu natanga yaYakova?

⁴ Tanga yaYakova yayoyele myaka 200 mungalila yaNgoshene muEjipitu. (Kupu. 45:9, 10) Fwalo asanyikile Yakova natanga yenyi vezenga nakutwama muEjipitu mwomwo atachikijile Yosefwe nakumuvumbika. (Kupu. 47:1-6) Yakova natanga yenyi vatwaminenga mukuunda muEjipitu hamyaka kafwe 100. Eyi tanga yatwaminenga mujingalila jajindende nakulama vimuna javo. Numba tuhu vatu vamuEjipitu vahungilenga vaze vapwile namikoko, oloze vononokele lushimbi lwaFwalo nakwechelela tanga kaneyi yaIsalele yitwame mulifuchi kana.—Kupu 46:31-34.

5, 6. (a) Chiyoyelo chavatu jaKalunga chalumukile ngachilihi? (b) Vyuma muka vyalingishile Mose vahone kumujiha, kaha Yehova alingilile ika vatu jenyi?

⁵ Kutwala muze vaka-Ejipitu valingishile vaIsalele kupwa vandungo javo. Mbimbiliya yahanjika ngwayo: “Jino kuEjipitu kwaswanyine mwangana weka, ikiye katachikijile Yosefweko. Ambile kuli vatu jenyi ngwenyi, ‘Talenu, vatu ava vana vaIsalele vanatuhambakanetu kuvula nangolo.’ VaEjipitu vavazachishilenga vana vaIsalele nakuvahokola, vavalishilenga nachikela nakuvazachisa milimo yayikalu, nayeyi yandambo, nayeyi yatumenga, namilimo yamumawande yosena, milimo yavo yosena yize vavazachishilenga nakuvahokola.”—Kulo. 1:8, 9, 13, 14.

⁶ Fwalo wamuhya akashile lushimbi ngwenyi, vana vamalunga vavaIsalele vaze navasemuka vatela kuvajiha. (Kulo. 1:15, 16) Halwola kana pwevo wakaIsalele Yokevete asemene Mose. Omu Mose apwile natukweji vatatu kufuma hakusemuka, naye amuswekele mumahongo amuKalwiji Nyile. Kaha kutwala muze mwanaFwalo wapwevo amuwanyine nakumumbata nakuputuka kumulela. Ahanyine ou mwana kuli naye yaMose mangana amulele palanga nomu mwakola. Kutwala muze Mose apwile ngamba yaYehova wakushishika. (Kulo. 2:1-10; Hepe. 11:23-25) Omu Yehova amwene ngwenyi vangamba jenyi vali nakumona lamba, alwezele  Mose avafumise muEjipitu. (Kulo. 2:24, 25; 3:9, 10) Ngachize, Yehova ‘asokwele’ vaIsalele.—Kulo. 15:13; tangenu Lushimbi lwamuchivali 15:15.

7, 8. Yehova alingishile ngachilihi vatu jenyi kupwa muyachi wajila?

⁷ Numba tuhu halwola kana Yehova kanda alingise vaIsalele kupwa muyachi, oloze avamwene kupwa vatu jenyi. Echi chikiko chalingishile alweze Mose naAlone vahanjikile kuli Fwalo ngwavo: “Yehova Kalunga kavaIsalele nambe ngwenyi, ‘Suwula vatu jami, mangana vaye mupambo vakangulingile chiwanyino.’”—Kulo. 5:1.

⁸ Oloze Fwalo kasakile kusuula vaIsaleleko. Yehova hakusaka asokole vatu jenyi, anehele vipupu 10 mulifuchi lyaEjipitu, kaha kutwala muze ajihile Fwalo namaswalale jenyi muKalungalwiji Uchila. (Kulo. 15:1-4) Omu mwahichile tukweji vatatu, Yehova alikashile lushiko navaIsalele haPili Shinai hakuhanjika ngwenyi: “Kachi nge namwononokanga vene mulizu lyami nakulamanga lushiko lwami, kaha namupwanga muluheto lwami lwakusakula muli vatu vosena, . . . mumuyachi wajila.”—Kulo. 19:5, 6.

9, 10. (a) Kweseka namukanda waLushimbi lwamuchivali 4:5-8, Jishimbi jahandunwine ngachilihi vaIsalele navatu veka? (b) Vyuma muka vize vatelele kulinga vaIsalele hakusaka vapwenga ‘vatu vajilila Yehova’?

⁹ Hamyaka yayivulu vangamba jaYehova vavayulilenga kumitwe yajitanga vaze vapwile vaka-kuvayula kaha nawa vapilishitu. Omu vaIsalele vapwile muEjipitu, vakavangijilenga chiyulo kana shimbu kanda vapwenga vandungo. (Kupu. 8:20; 18:19; Yopa 1:4, 5) Oloze omu Yehova avafumishile muundungo, avahanyine jishimbi jize javahandunwine kuli vaka-mafuchi eka. (Tangenu Lushimbi lwamuchivali 4:5-8; Samu 147:19, 20.) Jishimbi kana jahakileko vapilishitu, kaha nawa javulukile nge “vakulwane” vaze vavumbikilenga mwomwo yachinyingi namangana avo vapwenga vaka-kuyula. (Lushi. 25:7, 8) Jishimbi jakafwilenga vaIsalele mwakulemesela Kalunga namwakutwamina mukuyoya.

¹⁰ Shimbu kanda vaIsalele vengile muLifuchi lyaLushiko, Yehova avalwezele cheka jishimbi jenyi. Mose alwezele vaIsalele ngwenyi: “Likumbi lyalelo Yehova nalishiki nayenu mupwenga muvatu valuheto lwenyi, nge omu namishiki lyehi, mangana mulamenga jishimbi jenyi josena, kaha mangana akamizundule helu lyavaka-mafuchi vosena vaze natenge, nahakumyalisa, nahalijina, nahaulemu, mangana mupwenga muvatu mwajilila Yehova Kalunga kenu, nge omu nahanjika.”—Lushi. 26:18, 19.

11-13. (a) Veya vaputukile kulemesela hamwe Kalunga navaIsalele? (b) Vyuma muka atelele kulinga mutu weka uze asakile kulemesa Yehova?

¹¹ Numba tuhu Yehova asakwile vaIsalele kupwa muyachi wenyi hano hamavu, oloze etavilile navatu veka vatwame hamwe navaIsalele. Chakutalilaho, Mbimbiliya yahanjika ngwayo vatu vavavulu chikuma kuhakilako navaka-Ejipitu vayile hamwe navaIsalele omu Kalunga avalowele mulifuchi lyaEjipitu. (Kulo. 12:38; kwinyikila chamwishi) Havatu kana hapwile navangamba jaFwalo vaze vononokele mazu aMose omu kwejile vipupu 7.—Kulo. 9:20.

¹² Omu vaIsalele valingile shimbu kanda vazauke Kalwiji Yotau nakwingila mulifuchi lyaKanane, Mose avalwezele ngwenyi ‘zangenunga vaze vanazuzumana’ mukachi kenu. (Lushi. 10:17-19) Nge mutu weka alisuwile kwononoka jishimbi jaMose, kaha vaIsalele vavalwezele kutwama namutu kana. (Levi 24:22) Chakutalilaho, Lute apwile  kaMowave uze asakile kuzachila Yehova, kaha alwezele nayewenu Nowemi ngwenyi: “Vakwenu vatu navakapwanga vakwetu vatu, Kalunga kove mwapwanga Kalunga kami.” (Lute 1:16) Vaze vatu veka valumukile nakupwa vaYuleya, kaha malunga vavajihanyinenga. (Kulo. 12:48, 49) Yehova evwile kuwaha kuvalingisa kupwa vatu jenyi asakula.—Kula. 15:14, 15.

¹³ Kulomba chaSolomone chasolola nawa nge Yehova etavilile navatu veka vamulemese. Omu vakunjikile tembele, Solomone alombele ngwenyi: “Hakuvuluka vatu veka, ava vakuzeneka kupwa vatu jove vaIsalele, omu navakeza kufuma mulifuchi lili kwakusuku halijina lyove lyalinene nahalivoko lyove lyangolo nahalivoko lyove lyakwolola, omu navakeza nakulomba chakutalisa kuzuvo yino, kahOve ukevwe omwo mwilu muutwamo wove, ukalinge nge kutesa namwosenomu navakakusanyikila vatu veka, mangana vatu vahamavu veka naveka vosena vakatachikize lijina lyove vakakwivwenga woma nganomu valingila vatu jove vaIsalele, mangana vakatachikize zuvo eyi ngunatungu ngwavo, vayivuluka halijina lyove.” (Miji. 2, 6:32, 33) Namumakumbi aYesu, vatu veka vaze vasakile kulemesa Yehova valingilenga vene ngocho chikalu kaha vazachilile hamwe navatu jenyi vaze asakula.—Yowa. 12:20; Vili. 8:27.

14-16. (a) Mujila muka vaIsalele vapwile muyachi waVinjiho jaYehova? (b) Uno vatu jaYehova vamakumbi ano vavalweza kulinga vyuma muka?

¹⁴ VaIsalele valemeselenga Kalunga kavo Yehova, oloze vatu veka valemeselenga tulunga twavo. Kwapwile chihula chachilemu chize vatelele kukumbulula chakwamba nge, uno iya apwile Kalunga wamuchano? Mumakumbi aIsaya Yehova ambile ngwenyi chihula kanechi vatelele kuchikumbulula ngana muze navakumbulula chihula muzango yakusopela. Ambile ngwenyi kachi nge tulunga vamafuchi vapwile vamuchano, kaha kwatelele kupwa vinjiho vaze navavahakwila. Ambile ngwenyi: “Vaka-mafuchi osena valihomene hamwe, vatu veka naveka vosena vakunguluke. Muli vakivo muli iya  mwahasa kwambululechi chinakutwivwisa vyuma vyakulivanga? Vanehe vinjiho javo mangana vavasambise, mokomoko vevwilile, vambe ngwavo, ‘Mwamuchano vene.’”—Isa. 43:9.

¹⁵ Tulunga vavaka-mafuchi kavapwile naunjiho wakusolola nge vapwile vamuchanoko. Vapwile kaha nge tuponya vaze navahona kuhanjika, chipwe kutambuka kuvanga kaha nge mutu navambate. (Isa. 46:5-7) Oloze Yehova alwezele vatu jenyi vaIsalele ngwenyi: “Enu yenu vinjiho jami, nangamba yami nawa ou ngunasakula, mangana mutachikize mungwitave chimilumbunukile ngwenu, Ikiye vene. Kavalivangile kutenga kalunga kulutwe lwamiko, kaha kakweshi kukapwa umwe munyima yamiko. Yami, yami vene Yehova, kaha kakweshi muka-kulwila weka nayAmi hamweko. . . . Shikaho enu yenu vinjiho jami, . . . KahAmi yami Kalunga.”—Isa. 43:10-12.

¹⁶ Ngana muze vinjiho veji kuhakwilanga mutu muzango yakusopela, navatu jaYehova veji kuhakwilanga Yehova ngwavo ikiye kaha Kalunga wamuchano. Kalunga avavuluka ngwenyi “vatu jami ava ngunalitengela mangana vahitengamo mukungwalisa.” (Isa. 43:21) Vatu kana vavejivile kupwa vatu jaYehova mwomwo avasokwele kufuma muEjipitu, asakile vamwononokenga nakutohwesa Wata wenyi. Kapolofweto Mika avulukile muchima uze vatelele kupwa nawo hakwamba ngwenyi: “Vatu veka naveka vosena veji kutambukanga mutu himutu mulijina lyakalunga kenyi, kahetu natukatambukanga mulijina lyaKalunga ketu Yehova haya myaka yosena.”—Mika 4:5.

17. Mwomwo ika Yehova amwene vaIsalele kupwa muvinyo waupi?

¹⁷ Chaluvinda, vaIsalele valikangile kuli Kalunga. Vaputukile kulondezeza vaka-mafuchi eka vaze valemeselenga tulunga vamitondo namalolwa nakutunga majiko amavulu akulemesela tulunga vamakuli. Mulikulukaji lyamyaka lyakusokesa 8 B.C.E., kapolofweto Hozeya ambile ngwenyi: “Isalele napu muvinyo wakutanda . . . Mwanavulishila majiko enyi akulumbila. . . . Vali namichima yivali. Jino navavapayisa.” (Hoze. 10:1, 2) Omu mwahichile myaka kafwe 150, Yelemiya naikiye afwanyishile vaIsalele vakulikanga kuvinyo. Avalumbunwine kupwa muvinyo wamwaza uze walumukile nakupwa waupi. Yelemiya asonekele ngwenyi: “Tulunga twenu ava munalitengela vali kulihi? Vakatuke numba nge navahasa kumilwila hamwaka namumona lupi . . . Vatu jami vanangujimbala.”—Yele. 2:21, 28, 32.

18, 19. (a) Yehova apolofwetele ngachilihi ngwenyi mwakapwa navatu jenyi asakula hano hamavu? (b) Vyuma muka natushimutwila mumutwe unakavangizaho?

¹⁸ VaIsalele kavasolwele mihako yamwazako mwomwo kavalemeselenga Yehova mujila yakwolokako. Muchishishisa chakutwalaho lika kupwa vinjiho jaYehova, oloze vakiko valemeselenga tuponya. Ngachize, Yesu alwezele vatwamina vavaYuleya vavapi muchima ngwenyi: “Wangana waKalunga navakamitambulawo nakukauhana kumuyachi uze naukalovolanga mihako yawo.” (Mateu 21:43) Vatu vaze Yehova asakwile kupwa vatu jenyi vakiko kaha muyachi wauhya, vaIsalele vakushipilitu. Alikashile navo “lushiko lwaluhya.” Yehova avambile ngwenyi: “Nangukapwanga nguKalunga kavo kaha vakivo navakapwanga vatu jami.”—Yele. 31:31-33.

¹⁹ Omu vaIsalele vahonene kwononoka Yehova, Yehova asakwile vaIsalele veka vakushipilitu nakupwa vatu jenyi mulikulukaji lyamyaka lyakulivanga. Uno veya vapwa vatu jenyi hano hamavu makumbi ano? Uno vatu vaze vali nakusaka kuzachila Yehova vanahase kutachikiza ngachilihi vaka-kulemesa Yehova vamuchano? Chihande kana chikiko natushimutwila mumutwe unakavangizaho.