VANDUMBWETU vavakweze valivwasanyine kuya kuzuvo yize veji kutalilanga mivwimbimbi mangana vakatale vindiyo. Mwomwo vakwavo vaka-shikola vavalwezele ngwavo vindiyo kana yamwaza. Omu vahetele kuze kuchihela kana vatalile vinjikizo vize vyapwile nakusolola vyuma vili mukachi kavindiyo kana, hapwile vitwa namapwevo vavwaliso yayipi. Uno ava vandumbwetu navalinga vyuma muka? Kutala navengila nakutala vindiyo kana tahi?

Chakutalilaho kana chinasolola nge vyuma tweji kusakulanga kulinganga hakumbi hakumbi vinahase kwivwisa Yehova kuwaha chipwe kupihya. Munahase kusaka kulinga vyuma vimwe oloze omu namushinganyekaho chikuma, munahase kwalumuna vishinganyeka vyenu nakulinga vyuma vyeka. Uno mweji kusakulanga vyakulinga vyavipi tahi mwalingaho lyehi vyuma vimwe vyakwoloka?

Muchima wetu wakuzanga Yehova weji kutulingisanga tulihane kuli ikiye nakutumbapachisa. Tweji kushinga Yehova ngwetu natupwanga lika vakushishika kuli ikiye nakutwalaho lika kulamanga lushiko kana. Oloze muka-kole wetu Satana Liyavolo afwila kutuhonesa tulame kulonga chetu. (Kuso. 12:17) Twasakwile kuzachila Yehova nakumwononoka. Nge natwalumuna vishinganyeka vyetu kaha natufwa.

Kafwe myaka 2,600, Mwangana Nevukataneza wamuMbavilone ajikile likombelo lyaulu nakuhana lushimbi ngwenyi vatu vosena vatela kulifukula kulikiko. Woshowo akanyine vamumbilile mulilunga lyakakahya. Shatalake naMeshake naAvete-nengo vapwile vakweze vaze vazachilile Yehova, ngachize vakanyine kukavangiza lushimbi kana, kaha vavambilile mulilungu lyakakahya. Yehova  avayowele mukukomwesa. Ava vakweze valisuuwile kufwa muchishishisa chakulikanga kuli Kalunga.—Ndanye. 3:1-27.

Kutwala muze kapolofweto Ndanyele amwene ngwenyi nge vatu navamumona ali nakulomba kuli Kalunga, kaha navamumbila muwina wavandumba. Oloze atwalilileho lika kulomba kuli Kalunga mapapa katatu halikumbi. Kalumwine vishinganyeka vyenyi vyakulemesa Kalunga wamuchanoko, ngachize Yehova amuyowele “kungolo javandumba.”—Ndanye. 6:1-27.

Vangamba jaKalunga makumbi ano navakiko veji kulamanga jishiko javo valishikile naYehova omu valihanyine kuli ikiye. Vakweze vavinjiho jaYehova mulitungu lyaAfrica, vakanyine kulifukula kulipandelo hachilika chahashikola, kaha vakulwane jashikola vavalwezele ngwavo navavahanga. Kutwala muze mukulwane washikola ashimutwilile nava Vinjiho vavakweze. Ava vandumbwetu kavevwile womako, kaha valumbunwine mukavumbi vyuma vafwelela kutalisa kukulifukula kulipandelo. Kufuma halwola kana chihande kana kachepuka chekako. Vanahase kuliyila kushikola chakuhona kuvashinjila valikangile kuli Yehova.

Ndumbwetu Joseph nayikiye amwene cheseko omu puwenyi afwile. Vaka-tanga yaJoseph vavumbikile vyuma afwelela Joseph kutalisa kuchipeji. Chipwe ngocho, vausoko wapwevo lyenyi kavapwa Vinjihoko, ngachize vasakile hakufunda mufu hapwenga vyuma vimwe vize vyalimbalaka najishimbi jamuMbimbiliya. Joseph ambile ngwenyi: “Hakuwana nge ngwakanyine kwalumuna vishinganyeka vyami, vasakile kwalumuna vishinganyeka vyavana vami, oloze vakanyine. Vausoko vasakila nawa kunyingama hachipeji, oloze ngwavalwezele nge navahona kukavangiza vyuma ngwavalwezele, kaha vatela kuya nakunyingamina kweka, keshi hembo lyamiko. Vatachikijile ngwavo kunyingama nachilimbalaka navyuma ngwafwelela chipwe navyuma afwelela puwami, ngocho hanyima nakushimutwila chihande kana, vayile nakunyingamina hembo lyeka.

“Halwola kana lwachipeji, ngwalembelelele Yehova angukafwe mangana vaka-tanga yami vahone kuhokola jishimbi jaYehova. Yehova evwile kulomba chami kaha atukafwile tutwaleho lika kupwa vakuzama chamokomoko nakutushinjila.” Joseph navana venyi kavalumwine vishinganyeka vyavo vyakwononoka Yehovako.

Mumwaka wa 32 C.E, pwevo uze kapwile kaIsaleleko alwezele Yesu afumise ndemone uze apwile nakuyanjisa mwanenyi wapwevo. Numba tuhu amulwezele mapapa kakavulu, oloze Yesu kamukumbulwileko. Alwezele tumbaji twenyi ngwenyi: “Ikiye akumbulwile ngwenyi: “Ami kavangutumine kuya kuli vatu vekako, oloze shina kuli mikoko vakujimbala vakuzuvo yaIsalele kaha.” Uze pwevo atwalilileho lika kulomba Yesu amukafwe, ngocho Yesu amulwezele ngwenyi: “Kachapwa chakwoloka kumbata kulya chavana nakuchimbila kuli vana vatuwako.” Uze pwevo asolwele lufwelelo hakukumbulula ngwenyi: “Mukiko vene Mwata, oloze navana vatuwa vene veji kulyanga ungululu wakuholoka kufuma kumesa yavakaka javo.” Yesu alumwine vishinganyeka vyenyi kaha afumishile ndemone uze apwile muli uze mwana.—Mateu 15:21-28.

Kwalumuna vishinganyeka vyenyi chasolwele nge Yesu akavangijile Yehova. Chakutalilaho, omu vaIsalele vahonene kwononoka jishimbi jaYehova hakulemesa mwanangombe waulu, ashinganyekele kuvajiha. Oloze omu Mose alembelelele Yehova ahone kuvajiha, Yehova alumwine vishinganyeka vyenyi nakuhona kuvajiha.—Kulo. 32:7-14.

Ngana mwaYehova naYesu nakaposetolo Paulu alumwine vishinganyeka vyenyi. Haungeji wenyi watete Mako asezele Paulu naMbalanape. Echi chalingishile Paulu akane kuya naMako maungeji eka. Oloze kutwala muze Paulu amwene ngwenyi Mako apwile  jino wakuhya kaha nawa mwazata milimo yayivulu. Ngachize, Paulu alwezele Chimoteu ngwenyi: “Twaya naMako kuno, mwomwo mwangukafwako mumulimo.”—Chimo. 2, 4:11.

Vyuma muka natulinangula kuchuma kanechi? Numba tuhu Yehova apwa wakukupuka mwosena, oloze nahase kwalumuka mwomwo apwa wakeke nakutalilila chikoki, nazangi. Katwakupuka mwosena, ngachize katweshi kuhasa kumona vyuma vyosena kupwa vyakwolokako. Chakutalilaho, tunahase kwalumunako omu tweji kumonanga vakwetu nge natutachikiza omu vayoya.

Lwola lumwe chapwa chamwaza kwalumunako vishinganyeka vyetu kutalisa kuvyuma vyakushipilitu. Tunahase kulinangula Mbimbiliya nakuyanga nakukunguluka, oloze katute kutumbapachisa. Nyi pamo tuli nakungolo jakuzata upayiniya oloze tuchili nakulangisa. Ndumbwetu walunga nahase kukana kupwa muka-kuzachila chipwe mukulwane muchikungulwilo. (Chimo. 1, 3:1) Kutala nayenu mwashinganyekaho lyehi ngocho tahi? Kutala muli nakushinganyeka ngwenu mwatelelele kwalumunako vishinganyeka vyenu tahi? Yehova ali nakusaka mulivwise kuwaha kuzata milimo kaneyi hakumuzachila ikiye nakuzachila vakwenu.

Ndumbwetu Ella uze azachila hamutango wamulifuchi limwe lyamuAfrica ambile ngwenyi: “Omu ngwejile haMbetele kangwatachikijile ngwami nangushimbulahoko. Numba tuhu ngwasakila kuzachila Yehova namuchima wami wosena oloze ngwasakile lika kupandama kuli tanga yami. Hakavanga ngwapwilenga nakushinganyeka lika kushikama natanga yami. Oloze mukwetu ngwatwaminenga nenyi muzuvo yimwe angukolezezele, ngachize ngwatwamine. Omu ngwatwamine haMbetele myaka 10, ngwalivwile ngwami ngwatela kutwalaho lika kuzachila vandumbwami hakutwama haMbetele.”

Lwola lumwe twatela kwalumuna vishinganyeka vyetu. Chakutalilaho, Kena evwilile “matoto chikuma” songo yenyi. Kalunga amwene ngwenyi Kena mwalinga vyuma kaha amulwezele atulise muchima wenyi. Kalunga amulwezele ngwenyi shili “yinautama kuchikolo.” Muchishishisa chakwalumuna vishinganyeka vyenyi, Kena ahumbwile mazu amuhuhumwine Kalunga. Echi chalingishile Kena ajihe songo yenyi.—Kupu. 4:2-8.

Tunahase kulinangula vyuma vikwavo kuli Mwangana Ujiya. Hakavanga Ujiya apwile wakwononoka nakupwa nausoko wamwaza naYehova, oloze chaluvinda aputukile kulivwimba. Ayile mutembele nakuhana vyalivumba lyamwaza numba mulimo kana wapwile wavapilishitu. Vapilishitu vamukashile oloze akanyine kwalumuna muchima wenyi. Ujiya “akwachile matoto” nakuhona kukavangiza vyuma vamulwezele. Ngachize, Yehova amuzangamishile namusongo wambumba.—Miji. 2, 26:3-5, 16-20.

Lwola lumwe twatela kwalumunako vishinganyeka vyetu. Ndumbwetu Joachim alumwine vishinganyeka vyenyi kaha vamumbapachishile mumwaka wa 1955, oloze kuheta mumwaka wa 1978 vamufumishile muchikungulwilo. Kahomu mwahichile myaka 20 apihililile nakwalumuka nakupwa cheka Chinjiho chaYehova. Omu mukulwane umwe wamuchikungulwilo amuhulishile ovyo ashimbulilile kuweluka Joachim amukumbulwile ngwenyi: “Ngwapwile namatoto namuchima wakulivwimba. Ngweji kuliveyanga hakushimbula kuweluka. Omu ngwapwile kuweluka wachikungulwilo, ngwatachikijile ngwami Vinjiho jaYehova vangunangwile muchano.”

Nayetu lwola lumwe twatela kwalumunangako vyuma vimwe. Nge natulinga ngocho, kaha Yehova mwawahilila.—Samu 34:8.