GUY HOLLIS PIERCE, wamuLizavu Lyakutwaminyina lyaVinjiho jaYehova, akumishile kuyoya chenyi chahano hamavu lyaChivali, March 18, 2014 omu apwile namyaka yakusemuka 79. Hakupwa muka-Kulishitu vawavisa, vamusangwile nakutambula fweto yenyi mwilu.—Hepe. 2:10-12; Petu. 1, 3:18.

Guy Pierce asemukilile muAuburn, California, U.S.A., haNovember 6, 1934, kaha vamumbapachishile mu 1955. Ambachile puwenyi Penny, mu 1977 nakusema vana. Apwile nawa nge chisemi kuli vatu vavavulu. Kuheta mu 1982, ikiye napuwenyi Penny vapwile nakuzata natwima mumulimo waupayiniya, kaha mu 1986 aputukile kuzata mwakalama wakujinguluka. Vazachile mulimo kanou hamyaka 11 mulifuchi lyaUnited States.

Mu 1997, Guy Pierce napuwenyi Penny vaputukile kuzachila haMbetele yamuUnited States. Ndumbwetu Pierce azachilile muLipatimende lyaMulimo, kaha mu 1998 vamutongwele kupwa muka-kukafwa muKomiti Yatala haJitanga jaMbetele yamuLizavu Lyakutwaminyina. Ndumbu Pierce vamuvilikile ngwavo napu jino muLizavu Lyakutwaminyina haOctober 2, 1999, hakuliwana chamwaka himwaka chaliuka lyaWatch Tower Bible and Tract Society of Pennsylvania. Mumyaka yakalinwomu, ou ndumbwetu nazachilanga mukomiti Yatala haJitanga jaMbetele, naYakusoneka Mikanda, naYakupulita naKutunga Mikanda, naYakuwanyisa.

Vatu vakumiyachi yakulisezaseza vevwilenga kuwaha kupwa naNdumbu Pierce mwomwo yachisambo chenyi nakusehaseha. Oloze vyuma vyamulingishile vamuzange chikuma shina zangi, nakulinyisa chenyi, nakuvumbika jishimbi najindongi jaKalunga, nalufwelelo lwenyi lwakukola muli Yehova. Kakavulu Guy Pierce ahanjikilenga ngwenyi likumbi pamo nalihona kututuka, oloze jishiko jaYehova kajeshi kuhona kutesamoko, kaha asakile vatu vosena mukaye kosena vatachikize muchano waKalunga.

Ndumbu Pierce azachililile Yehova nangolo jenyi josena, mwomwo ahindukilenga chimenemene, kaha kakavulu azachilenga swi namukachi kaufuku. Atambukilenga mukaye kosena nakuya nakukolezeza vandumbwenyi vaka-Kulishitu, kaha nawa awanyinengako lwola lwakushimutwila navandumbwetu vasakilenga kuvakafwa. Vandumbwetu veji kwanukanga zumbu nachisambo chenyi nomu avakolezezele naVisoneka numba tuhu munahichi myaka yayivulu.

Ou ndumbwetu kaha nawa sepa lyetu naseze puwenyi, navana venyi 6, navazukulu jenyi natukwatambuli. Naseze nawa vana vakushipilitu vavavulu vaze anangwile Mbimbiliya. Ndumbwetu Mark Sanderson, mukwavo wamuLizavu Lyakutwaminyina ikiye ahanjikile chihande chakwanuka Ndumbu Pierce haMbetele yamuBrooklyn lyaSateli, March 22, 2014. Ahanjikile halutalililo lwamwilu lwaNdumbu Pierce nakutanga mazu aYesu akwamba ngwavo: “Muzuvo yaTata muli mautwamo amavulu . . Nge ngunayi nakumiwahishila chihela chenu, nangwiza cheka nakumitambula mwize kumahyami kuli ami lyavene, mangana kuze nguli ami nayenu nawa mukatwamengako. Kaha okwo nguli nakuya, jila mwayitachikiza.”—Yowa. 14:2-4.

Chikupu vene, natumwanukanga Ndumbwetu Pierce. Chipwe ngocho, twawahilila hakuwana nge ‘atachikijile jila’ yakuya ‘kuutwamo wenyi.’