Kuzachila Hamwe NavaNdumbwetu Mukaye Kano Kali Nakuya naKunonga
“Tunapu tuvilyo vanungila hamwe navakwetu.”—EFWE. 4:25.
1, 2. Kalunga asaka vangamba jenyi vavakweze navakulwane vamulingilenga vyuma muka?
UNO mwapwa muvakweze tahi? Nge mukiko, kaha tachikizenu ngwenu mwapwa muvavalemu muliuka lyaYehova. Mumafuchi amavulu vakweze vakiko veji kumbapachisanga chikuma. Cheji kutukolezezanga chikuma kumona vakweze vavavulu vali nakufwila kuzachila Yehova.
2 Hakupwa muvakweze, kutala mweji kulivwisanga kuwaha kupwa hamwe navakwenu vakweze tahi? Pamo mweji kulivwisanga kuwaha. Twasaka kupwa hamwe namasepa jetu. Chipwe ngocho, Yehova asaka tuvosena tumulemesele hamwe. Asaka tupwenga vakulinunga chamokomoko namyaka yetu yakusemuka, nachisemwa chetu. Kaposetolo Paulu asonekele ngwenyi Kalunga ajina ngwenyi: “Vatu vosena vavalwile, ngwenyi, vapwenga nachinyingi chakwoloka chakutachikiza muchano.” (Chimo. 1, 2:3, 4) Mukanda waKusoloka 7:9 walumbununa nge vatu vosena vaze veji kulemesanga Kalunga veji kufumanga “kumafuchi osena nakumiyachi yosena nakuvatu veka naveka vosena nakumalimi osena.”
3, 4. (a) Muchima muka vatwama navo vakweze vavavulu makumbi ano? (b) Muchima muka uze watwama hamukanda Wavaka-Efwesu 4:25?
3 Hatwama chihandwa chachinene hakachi kavakweze vaze veji kulemesanga Yehova navaze kavamulemesako. Vakweze vavavulu vaze kavazachila Yehovako vahaka kaha mangana kuvyuma vyavo. Vaka-kuhehwojola vamwe vamba ngwavo vakweze veji kufwilanga kaha kulinga vyuma vyavo. Hanjikiso navwaliso yavo yeji kusololanga nge kavalemesa vakwavoko, chikumanyi vakulwane.
4 Muchima kanou watwama mukaye kosena, ngachize chasaka kuzata nangolo numba vandumbwetu vavakweze vahonese muchima kanou nakwivwisa Yehova kuwaha. Namulikulukaji lyamyaka lyakulivanga Paulu ahuhumwine vaka-Kulishitu valihende kushipilitu “yize yili nakuzata noholili muli vana vakulikanga.” (Tangenu Wavaka-Efwesu 2:1-3.) Tweji kwivwanga hakuwaha hakumona vakweze vamuchikungulwilo kaveshi namuchima kanako. Muchima kana walitombola namazu ahanjikile Paulu ngwenyi, “tunapu tuvilyo vanungila hamwe navakwetu.” (Efwe. 4:25) Omu tuli nakupandama kukukuma chakaye kano kakapi, twatela kuzachila hamwe navandumbwetu. Vyakutalilaho vyamuMbimbiliya vinakavangizaho navitukafwa tumone omu tunahase kuzachila hamwe navandumbwetu mukulinunga.
VALINUNGILE HAMWE
5, 6. Vyuma muka natulinangula kuli Lote natanga yenyi?
5 Kushikulu vangamba jaYehova vomikilenga muukalu waunene. Kaha Yehova avakingile omu valinungile nakulikafwa. Tuvosena vakweze navakulwane tunahase kulinangula kuvyakutalilaho kanevi vyamuMbimbiliya. Tuputukenu nachakutalilaho chaLote.
6 Lote natanga yenyi vapwile muponde mwomwo Yehova asakile kunongesa Sotome nganda yize vatwaminenga. Yehova atumine vangelo kuya nakulweza Lote aseze nganda nakuchinyina kujipili. Vamulwezele ngwavo: “China, ulwile mwono wove.” (Kupu. 19:12-22) Lote natanga yenyi vononokele jindongi vavalwezele. Oloze chaluvinda, vamwe mutanga yaLote vakanyine jindongi kana. Omu Lote alwezele malunga vaze vahuhwile vana venyi mangana vafume munganda, vaze malunga vashinganyekele ngwavo Lote “ali nakutuhenda.” Vaze malunga vafwile omu vanongesele nganda. (Kupu. 19:14) Lote navana venyi kaha vakiko valovokele.
7. Yehova akafwile ngachilihi vaIsalele vaze vafumine muEjipitu?
7 Tutalenu nawa hachakutalilaho chavaIsalele. Omu vafumine muEjipitu, kavalipangunwine mumazavu amandende nakuya ava najila yavo nakwingila muLifuchi lyaLushikoko. Oloze vatambukilile hamwe mukulinunga. Omu Yehova ahandunwine meya amuKalungalwiji Uchila, Mose kengilile mukalungalwiji ukawenyi chipwe navaIsalele vavandendeko. Muyachi wavaIsalele wosena wayile hamwe naMose kaha Yehova avakingile. (Kulo. 14:21, 22, 29, 30) Navatu vaze kavapwile vaIsaleleko vasakwile kuzachila Yehova ngocho vafumine muEjipitu nakuya hamwe navaIsalele. Vatu vosena valinungile hamwe. (Kulo. 12:38) Kachi chapwile chauleya lizavu lyalindende lyavaIsalele kuya mujila yavo yize vasakile vavene. Nge mutu ayile jila yaukawenyi kachi Yehova kamukingileko.—Koli. 1, 10:1.
8. Vatu jaKalunga valinungile ngachilihi hamwe mumakumbi aMwangana Yehoshafwate?
8 Mumakumbi aMwangana Yehoshafwate, lizavu lyalinene lyamaswalale vangolo lyejile nakulukuka vatu jaKalunga. (Miji. 2, 20:1, 2) Uno vaIsalele valingile vyuma muka omu vavajingilikile kulizavu kaneli? Vafwelelele muli Yehova nakulomba avatwaminyine. (Tangenu Mijimbu 2, 20:3, 4.) VaIsalele kavafwilile kuhonesa ukalu halwavoko, oloze vazachilile hamwe. Mbimbiliya yahanjika ngwayo: “VaYuta vosena vemanyine kumeso aYehova navana vavo vavandende namapwevo javo navana vavo vakukola lyehi.” (Mijimbu 2, 20:13) VaIsalele vosena vanyike navakulwane vafwelelele muli Yehova nakulinga vyuma vize avalwezele. Vatwaminenga hamwe ngachize Yehova avakingile kuli vaka-kole javo. (Miji. 2, 20:20-27) Omu mukiko vatu jaKalunga vatela kuzachila hamwe nge vanavafumbukila.
9. Vyuma muka natulinangula kuli vaka-Kulishitu vamulikulukaji lyamyaka lyakulivanga?
9 Mulikulukaji lyamyaka lyakulivanga, vaka-Kulishitu valemeselenga Kalunga hamwe mukulinunga namukuunda. Chakutalilaho, omu vaYuleya navaze kavapwile vaYuleyako valumukile nakupwa vaka-Kulishitu, “vatwalileho lika nakukakachila kukunangula chavaposetolo, nakwazananga vyuma navakwavo, nakulyanga vyakulya, nakulombanga.” (Vili. 2:42) Kahomu vaka-Kulishitu vavayanjishile, vatwalileho lika kupwa vakulinunga hamwe. Halwola kana vasakiwile chikuma kuzachila hamwe. (Vili. 4:23, 24) Nge vali nakutuyanjisa, kaha nayetu twatela kuzachila hamwe nakulikafwa.
TWATELA KULINUNGASANA SHIMBU KANDA LIKUMBI LYAYEHOVA LIZENGA
10. Lwola muka twatela kukapwa vakulinunga hamwe?
10 Kalinwomu tumone lamba. Kapolofweto Yowele avulukile lamba kana ngwenyi: “likumbi lyamilima lyakajimbavenyi.” (Yowe. 2:1, 2; Zefwa. 1:14) Halwola kana vatu jaKalunga vatela kukalinunga hamwe. Anukenu mazu aYesu aze ahanjikile ngwenyi: “Weshowo wangana naulimbalaka uvene naunonga.”—Mateu 12:25.
11. Vyuma muka vize vatu jaKalunga vatela kulinangula kukulinunga hamwe vize vyatwama hamukanda waSamu 122:3, 4? (Talenu muvwimbimbi wakulivanga.)
11 Omu kano kaye kali nakukuma, twatela kupwa vakulinunga. Kulinunga chetu hamwe kushipilitu tunahase kuchifwanyisa kujizuvo jize vatungile muYelusalema yakushikulu. Jizuvo kana jalihachile chikuma, ngachize muka-kwimba jisamu avulukile nganda yaYelusalema ngwenyi, limbo “vananungu hamwe.” Vatu valivwile kupwa vakukingiwa mwomwo jizuvo jalihachile chikuma. Echi chavakafwile valikafwe nakulikinga. Kulihata chajizuvo chanukishile muka-kwimba jisamu omu miyachi yavaIsalele valikungulwile hamwe nakulemesa Yehova. (Tangenu Samu 122:3, 4.) Oholyapwa nalwola lwalukalu luze luli nakwiza kulutwe, nayetu twatela kutwalaho lika ‘kulinunga hamwe.’
12. Vyuma muka navitukafwa tukayovoke omu Ngonge mwakafumbukila vatu jaKalunga?
12 Mwomwo ika chapwila chachilemu ‘kukalinunga hamwe’ kulutwe? Mukanda waEzekele kapetulu 38 wapolofwetele ngwawo “Ngonge, wakulifuchi lyaMangonge” mwakanyemukila vatu jaKalunga. Lwola kana kalweshi kukapwa lwakwechelela kala chuma chituhandununeko. Nachikapwa kulimbenja chikuma kushinganyeka ngwetu kaye kaSatana nakatukinga kulutwe. Oloze twatela kupandama chikuma kuli vandumbwetu. Kuyovoka chetu kacheshi kukapendamina kaha hakulinunga mwalizavuko. Oloze mutu himutu atela kufwelela muli Yehova nakukavangiza jishimbi jenyi. Echi chikiko nachikalingisa Yehova naYesu vakatukinge omu navakatufumbukila nakukatwingisa mukaye kakahya. (Yowele 2:32; Mateu 28:20) Twatela nawa kutwalaho lika kulinungasana hamwe navatu jaKalunga. Uno muli nakushinganyeka ngwenu Yehova mwakakinga vaze vasaka kulitakilika mujila yaukawavo tahi?—Mika 2:12.
13. Vakweze navalinangula vyuma muka kuvyuma tunashimutwila?
13 Nge muvakweze, kaha kutala munamono ngwenu chapwa chachilemu kupandama kuli vandumbwenu tahi? Lihendenu kumuchima wakulikatanga kaha namazanga jenu, chipwe kulihandula kuli vandumbwenu. Tuli nakupandama kulwola luze twatela tuvosena kulinunga hamwe. Oholyapwa tuzamisenu usoko wetu navandumbwetu vosena hakuzachila hamwe Yehova. Nge namukalinunga hamwe navatu jaKalunga kulutwe kaha namukayovoka.
“TUNAPU TUVILYO VANUNGILA HAMWE NAVAKWETU”
14, 15. (a) Mwomwo ika Yehova ali nakutunangwila tupwenga vakulinunga hamwe? (b) Mazu muka atukafwa Yehova mangana tupwenga vakulinunga hamwe?
14 Yehova ali nakutukafwa ‘tumuzachilenga namuchima umwe’ hamwe navandumbwetu. (Zefwa. 3:8, 9) Ali nakutunangula mangana kulutwe akakungulwile “cheka vyuma vyosena hamwe muli Kulishitu.” (Tangenu Wavaka-Efwesu 1:9, 10.) Yehova ajina kunungasana vyuma vyakutenga vyamwilu navyahamavu kupwa tanga yimwe yize nayimulemeselanga hamwe. Twafwelela ngwetu omu mukiko mwakalinga Yehova kulutwe. Enu vakweze munahase kupwa mutanga kana haya myaka yosena. Kutala muli nakusaka kulinunga hamwe naliuka lyaYehova tahi?
15 Yehova ali nakutunangula tupwenga vakulinunga hamwe oholyapwa mangana tukatwame mukuunda navakwetu mukaye kakahya. Eji kutunangulanga ‘tulizakamenga kanawa navakwetu, nakulizanga chikuma navakwetu, kulivendejeka navakwetu, nakulikolezeza navakwetu.’ (Koli. 1, 12:25; Loma 12:10; Teso. 1, 4:18; 5:11) Yehova atachikiza ngwenyi hakuwana nge katwakupuka mwosenako, lwola lumwe cheji kutukaluhwilanga kulinunga hamwe. Echi chikiko atulwezela ‘tulikonekelanga navakwetu.’—Efwe. 4:32.
16, 17. (a) Mwomwo ika tweji kuyilanga kukukunguluka? (b) Vyuma muka vakweze navalinangula kuchakutalilaho chaYesu?
16 Kukunguluka yapwa jila yikwavo yize Yehova eji kutukafwanga mangana tupwenga vakulinunga. Chisoneka chaWavaHepeleu 10:24, 25 chatulweza omu kukunguluka chapwila chachilemu. Cheji kutukafwanga ‘tulihakenga michima navakwetu mangana tulisangumwine kuzangi nakuvilinga vyamwenemwene.’ Kukunguluka chapwa chachilemu mwomwo cheji kutukafwanga ‘tulikolezezenga navakwetu, chikumanyi omu tunamono ngwetu likumbi kana linapandama kwakamwihi.’
17 Yesu ahana chakutalilaho chamwaza mwomwo azangilenga kulikungulwila hamwe navatu jaKalunga. Omu apwile namyaka yakusemuka 12, ayile navisemi jenyi kukukunguluka chachinene chize chapwile hatembele. Halwola lumwe visemi jenyi vahonene kumuwana. Uno ayile nakushikama navakwavo vanyike tahi? Nduma. Visemi jenyi vamuwanyine ali navaka-kunangula vahatembele, anakushimutwila vyuma vyamuVisoneka.—Luka 2:45-47.
18. Uno kulombelako vandumbwetu cheji kuzamisanga ngachilihi kulinunga chetu?
18 Tunahase nawa kuzamisa kulinunga chetu hakulombelangako vakwetu mangana Yehova avakafwe muukalu vanakuhitamo. Kulombelako vandumbwetu cheji kusololanga nge twavazanga. Chapwa chachilemu chikuma kuzanganga vandumbwetu, kuvakolezeza hakukunguluka nakuvalombelangako. Enu vakweze kutala munakweseka kulinga vyuma kana mangana mupwenga masepa vamwenemwene kuli vandumbwenu muchikungulwilo tahi? Hakusaka mangana tukayovoke twatela kupandama kuli vandumbwetu, keshi kukaye kano kaSatanako.
Tuvosena tunahase kulombelako vandumbwetu (Talenu palangalafu 18)
OMU TUNAHASE KUSOLOLA NGE TWAPWA “TUVILYO VANUNGILA HAMWE NAVAKWETU”
19-21. (a) Mujila muka tunahase kusolola nge twapwa “tuvilyo vanungila hamwe navakwetu”? Hanenu vyakutalilaho. (b) Vyuma muka munalinangula kuli vandumbwetu vaze vakafwile vandumbwetu vaze vapwile muukalu?
19 Kuli vyakutalilaho vyavivulu vize vyasolola nge vangamba jaKalunga makumbi ano ‘vapwa vilyo vanungila hamwe navakwavo.’ (Loma 12:5). Nge vandumbwetu vali muukalu wakulijila tweji kuvevwilanga keke nakufwila kuvakafwa. Mukakweji waDecember 2011, kwasolokele nyamanganda halitungu lyaMindanao mulifuchi lyaPhilippines. Haufuku umwe kaha jizuvo jakuheta ku 40,000 jengilile mumeya kuhakilako najizuvo javandumbwetu. Ofesi yamutango yahanjikile nge “shimbu kanda komiti yakukafwa yamungalila kana yiliwane, vandumbwetu vakujingalila jeka vaputukile kutuma vyuma vyakulikafwa navyo.”
20 Mulifuchi lyaJapan vandumbwetu vayanjile chikuma omwo mundenda nanyamanganda wamunene vyalukukile mutamba wakumusamuko mulifuchi kana. Vavavulu vajimbalishile vyuma vyavo vyosena. Chakutalilaho, zuvo yandumbwetu Yoshiko yapuzukile. Atwaminenga kwakusuku chikuma naZuvo yaWangana, jikilomita kafwe 40. Kaha ahanjikile ngwenyi: “Ngwalikomokelele chikuma mwomwo likumbi lyakavangijileho kufuma haze wasolokele mundenda, kalama wakujinguluka nandumbwetu weka vejile nakututonda.” Ahanjikile oku ali nakumwesamwesa ngwenyi: “Tweji kusakwililanga chikuma chikungulwilo hakutuzakama kushipilitu. Kaha nawa vandumbwetu vatuhanyinenga jikochi, jisapato, jingonga jakumbachila, nauvwalo wakusavala nawo.” Ndumbwetu umwe wamukomiti yakukafwa ambile ngwenyi: “Vandumbwetu vosena muJapan vazachililile hamwe, nakulikafwa umwe namukwavo. Vandumbwetu vamwe vafuminenga nakulifuchi lyaUnited States mangana vakafwe vandumbwavo.” Kahomu vavahulishilenga ngwavo mwomwo ika munatambukila tunda yayisuku ngana, vakumbulwile ngwavo, ‘Twapwa tuvakulinunga hamwe navandumbwetu vamuJapan, kaha nawa vanakusakiwa kuvakafwa.’” Kutala mweji kuwahililanga kupwa muliuka muze vatu veji kusololanga zangi yamwenemwene tahi? Chikupu vene Yehova mwevwa chikuma kuwaha hamuchima kanou wakulinunga navandumbwetu.
21 Nge natulinunga hamwe navandumbwetu makumbi ano, kaha nachitukafwa tupwenga vakulizanga kuvyeseko vili nakwiza kulutwe. Numba tuhu katweshi kukalinunga navandumbwetu vamwe vamumafuchi ekako mwomwo yavyeseko, oloze twatela kukalinunga navandumbwetu vamuvikungulwilo. Kupwa namuchima wakulinunga nachikatukafwa tukalipike naukalu unakwiza kulutwe omu navakanongesa kano kaye. Ndumbwetu wapwevo Fumiko wamulifuchi lyaJapan uze ahichile muukalu wanyamanganda ambile ngwenyi: “Kukuma chili hakamwihi. Twatela kutwalaho lika kukafwa vandumbwetu omu tuli nakutalilila lwola luze nakukahona kupwa ukalu wakulijila.”
22. Nganyo muka yayinene yatwama hakulinunga navandumbwetu?
22 Tupwenu vakulizanga vyalikumbi lyaYehova hakuzata nangolo mangana tupwenga vakulinunga navandumbwetu. Omu kaye kano kaSatana navakakanongesa Yehova mwakayovola vatu jenyi ngana muze alingile kunyima. (Isa. 52:9, 10) Nge muchili muvakweze chipwe muvakulwane oloze tuvosena twatela kulinunga navandumbwetu mangana tukayovoke. Muchihande chinakavangizaho natukashimutwila omu tunahase kumona uswana wetu wakushipilitu kupwa waulemu.