TENGI yetu avumbika vatu jenyi hakuvahana lisesa lyakulisakwila vyakulinga. Kaha nawa eji kukisulanga vaze veji kulisuulanga nakukundwiza kulemesa chamuchano, vaze veji kuzatanga nangolo nakujilika lijina lyenyi nakukundwiza vyuma ajina. Yehova kazanga vatu vamwononoke mwomwo yakulingila chilikako. Oloze azanga vatu vamwononoke mwomwo yakumuzanga nakumusakwilila.

Chakutalilaho, omu vaIsalele vapwile mupambo yaShinai, Yehova avalwezele vatunge chihela chakumulemesela. Ambile ngwenyi: “Mbatenu wana wakuhana kuli Yehova muli enu, veshovo vakwechi michima yakulyanukila vaunehe, wana waYehova.” (Kulo. 35:5) KaIsalele hikaIsalele ahanyinenga vyuma vize ahashile, kaha wana wosena vauzachishilenga kanawa hakutesamo vyuma ajina Kalunga. Uno vatu valingile ngachilihi?

“Mutu himutu uze wakatwile muchima wenyi, mutu himutu alyanukilile mushipilitu yenyi” anehele wana, “vosena vakwechi michima yakulyanukila.” Mapwevo namalunga valisuwile kuneha wana wakuzachisa kumulimo waYehova. Vanehele vinunga, natupata twakumatwitwi, natuzekeso twatutachikijilo, naulu, napalata, naunengu, nawanda ushikima nawou waungonyi nawou uchila, nawou wamwaza utoma, namangona avapembe, namalambu avizamba jamikoko akulomba achila, namalambu avambau, namutondo wamukesha, nambalasamu, namaji. Kutwala muze, ‘vyuma vize vapwile navyo vyaswile kumilimo yosena valingile, kaha vyalisalile nawa.’—Kulo. 35:21-24, 27-29; 36:7.

Vyuma vyevwishile Yehova kuwaha shina muchima wakulisuula vapwile nawo vaze vakundwijile kulemesa chamuchano, keshi mawanako. Vatu kana valisuwile nawa kuzachisa lwola lwavo nangolo javo. Vatulweza ngwavo, “Kaha mapwevo vosena vakwechi mangana mumichima vahosele namavoko avo.” Kaha nawa “mapwevo vosena vaze yakatwile michima yavo namangana vahosele mangona avapembe.” Yehova ahanyine nawa Mbezalele ‘mangana nakunangakana nachinyingi namuwino wosena.’ Enga, Kalunga ahanyine Mbezalele naOholyave uhashi wakuzata milimo yosena yize avahanyine.—Kulo. 35:25, 26, 30-35.

Omu Yehova alwezele vaIsalele vahane wana, ejivile chikupu ngwenyi “veshovo vakwechi michima yakulyanukila” navakundwiza kulemesa chamuchano. Kaha akiswile vaze valisuwile hakuvatwaminyina nakuvalingisa vapwenga vakuwahilila. Yehova asolwele nge eji kukisulanga vangamba jenyi vakulisuula nakuvalingisa vazate milimo nakutesemo mwaya kujina chenyi. (Samu 34:9) Ngachize, Yehova mwamikisula nge namulisuula nakumuzachila.