1, 2. Yesu akolezezele ngachilihi tumbaji twenyi halikumbi lize asangukile?

TUMBAJI twaYesu vavali vapwile nakufuma kuYelusalema nakuya kungalila vavuluka ngwavo Emau tunda kafwe jikilomita 11. Vapwile nakulishona mwomwo vatachikijile ngwavo Yesu nafu oloze kavejivile nge Yesu nasangukako. Oloze kukasumuka Yesu nasoloka kuli vakiko nakuya navo hamwe. Yesu avendejekele ngachilihi tumbaji twenyi? “Avalumbunwinyine vyuma vyosena vize vahanjika hali ikiye muVisoneka vyosena, kuputukila vene kuMazu aMose naMazu aVapolofweto vosena.” (Luka 24:13-15, 27) Mazu kana avavendejekele kaha michima yavo yaputukile kupwa natwima mwomwo Yesu ‘avalumbunwinyine’ Visoneka.—Luka 24:32.

² Hachingoloshi vene chize vaze tumbaji vavali vakindulukile kuYelusalema. Omu tumbaji vahetele kuze vawanyine vaposetolo, kaha vavalwezele vyuma vyasolokele. Omu vapwile nakuhanjika, Yesu asolokele kuli vakiko. Vaposetolo vevwile woma nakuputuka kukakasana numba nge mutu kana apwile Yesu chikupu. Uno Yesu avajikijishile ngachilihi? Mbimbiliya yahanjika ngwayo: “Ajikwile vishinganyeka vyavo vamone kanawa mwalumbunukilile Visoneka.”—Luka 24:45.

3. Mwomwo ika tunahase kwivwa kumuchima kupihya hakuzachila Yehova, oloze vyuma muka vinahase kutukafwa tupwenga vakuwahilila?

 ³ Lwola lumwe tunahase kwivwa kumuchima kupihya ngana muze vevwile tumbaji twaYesu. Numba tuhu tuli nakukilikita nakuzachila Yehova, oloze tunahase kwivwa kumuchima kupihya nge vatu kaveshi nakwakula kanawa kumujimbu wetuko. (Koli. 1, 15:58) Nyi pamo tunahase kumona ngwetu vilongesa vyetu vyaMbimbiliya kavyeshi nakuzovolokako. Veka vanahase kukana kulinangula mazu aYehova. Tunahase ngachilihi kutwalaho kupwa vakuwahilila mumulimo wetu wamuwande? Chuma nachitukafwa shina kutachikiza kanawa mwalumbunukila vifwanyisa vyaYesu. Tushimutwilenu jino vifwanyisa vitatu navyuma natulinangulaho.

4. Chifwanyisa chaYesu chamuka-kukuva uze asavalile tulo chalumbununa ika?

⁴ Tangenu Mako 4:26-29. Chifwanyisa chaYesu chamuka-kukuva uze asavalile tulo chalumbununa ika? Muka-kukuva emanyinako vaka-kwambulula Wangana, kaha mbuto jemanyinako mujimbu waWangana uze tweji kwambulilanga vatu vamichima yamwaza. Muka-kukuva eji kulinganga ngana muze veji kulinganga vatu vosena, “mwasavala nakuhinduka, naufuku namusana.” Mbuto jeji kumbatanga lwola kufuma hakujitumba numba jikole nakuheta kulwola lwakwaha. Halwola kanelu “mbuto najisoka nakukula.” Mbuto jeji ‘kulisokeselanga jivene,’ chikoki chikoki. Namutu eji kuzovoloka kushipilitu nakupandama kuli Yehova chikoki chikoki. Omu mwazovoloka nakusaka jino kuputuka kuzachila Kalunga, eji kwimanga mihako nakuhana kuyoya chenyi kuli Yehova nakumumbapachisa.

5. Mwomwo ika Yesu azachishilile chifwanyisa chamuka-kukuva uze asavalile tulo?

⁵ Mwomwo ika Yesu azachishilile echi chifwanyisa? Yesu asaka etu tutachikize ngwetu Yehova ikiye eji kulingisanga muchano utande mumichima yavatu “yambwende.” (Vili. 13:48; Koli. 1, 3:7) Tweji kutumbanga nakutukumwina, oloze katweshi kushinjila mutu azovolokeko. Ngana mwalunga wamuchifwanyisa, katweshi kuhasa kutachikiza omwo mutu mwazovolokako. Lwola lumwe katweshi kuhasa kutachikiza omu mbuto jaWangana jili nakuzovoloka mumuchima wamutuko. Hakuhita chalwola, mutu kana nahase kwima mihako nakupwa kambaji nakuputuka kuzata nayetu hamwe mumulimo wakwaha.—Yowa. 4:36-38.

6. Vyuma muka twatela kutachikiza kutalisa kukuzovoloka chachilongesa chetu chaMbimbiliya?

⁶ Vyuma muka natulinangula kuchifwanyisa kanechi? Chatete, twatela kutachikiza ngwetu katweshi kuhasa kulingisa chilongesa chetu chaMbimbiliya azovoloke kushipilituko. Numba tuhu natuzata nangolo mangana tukafwe chilongesa chetu chaMbimbiliya, oloze katwatela kumushinjila vamumbapachiseko. Oloze twatachikiza ngwetu atela kulisakwila ivene nakuhana kuyoya chenyi kuli Kalunga. Yehova eji kwitavilanga kulihana chetu kuli ikiye kuvanga kaha nge twamuzanga chikupu.—Samu 51:12; 54:6; 110:3.

7, 8. (a) Vyuma muka vikwavo natulinangula kuchifwanyisa chaYesu chamuka-kukuva uze asavalile tulo? Hanjikenu chakutalilaho. (b) Chifwanyisa kana chatunangula vyuma muka kutalisa kuli Yehova naYesu?

⁷ Chamuchivali, kutachikiza mwalumbunukila chifwanyisa kanechi, nachitukafwa tuhone kuzeya nge hakavanga katwamwene mihako yamulimo wetu wakunangulako. Twatela kupwa namuchima wakutalilila chikoki. (Yako. 5:7, 8) Nge tunazate nangolo jetu josena hakukafwa chilongesa chetu chaMbimbiliya, oloze nge muchano kaweshi nakumuheta kumuchima wenyiko, kaha katwatela kumona nge katwejiva kunangulako. Yehova kaha ikiye eji kulingisanga jimbuto jamuchano jitande mumuchima wamutu wakulinyisa. (Mateu 13:23) Ngachize, katwatela kushinganyeka ngwetu kuneha vatu vavavulu  mumuchano chalumbununa nge tuli nakuzata nangolo mumulimo wamuwandeko. Yehova kamona ngwenyi hakusaka tufukile mumulimo wetu wakwambulula, kuvanga kaha vatu vakule kanawa kumulimo wetuko. Oloze amona kukilikita chetu kupwa chachilemu.—Tangenu Luka 10:17-20; Wavaka-Kolinde 1, 3:8.

⁸ Chamuchitatu, shimbu jimwe katweshi kuhasa kumona omu mutu ali nakwalumukako. Chakutalilaho, valunga napwevo vakulimbata vaze vapwile nakulinangula Mbimbiliya nakamishonali umwe, vamulwezele ngwavo vali nakusaka kupwa vaka-kwambulula vakuzeneka kumbapachisa. Uze kamishonali alwezele ava valunga napwevo ngwenyi hakusaka mupwenga muvaka-kwambulula vakuzeneka kumbapachisa, kuvanga mwechenga kunwa makanya. Alikomokelele chikuma hakumulweza ngwavo twechele lyehi kunwa makanya. Vyuma muka vyavalingishile vechenga kunwa makanya? Mwomwo vatachikijile ngwavo numba tuhu navanwa makanya kupenge Yehova mwavamona kaha nawa ahunga vaka-kulyonga. Ngachize, vajinyine kusakulaho kunwa makanya oku uze kamishonali navamono chipwe kwecha kunwa makanya. Numba tuhu uze kamishonali atachikijile ngwenyi ava valunga napwevo vaneche kunwa makanya, oloze kuzanga chikuma Yehova chavakafwile vasakule vyuma vyamwaza.

9. Chifwanyisa chaYesu chalyoji lyachikokela chalumbununa ika?

⁹ Tangenu Mateu 13:47-50. Chifwanyisa chaYesu chalyoji lyachikokela chalumbununa ika? Yesu afwanyishile mulimo wakwambulula mujimbu waWangana kuli vatu vosena kulyoji lyachikokela lyalinene lize vanafutu mukalungalwiji. Ngana muze lyoji lyachikokela lyeji kwozanga “vaishi vamiyachi yosena,” namulimo wetu wakwambulula weji kukokanga vatu vavavulu vakumiyachi yosena. (Isa. 60:5) Mayongomena avatu vaze veji kwizanga kukukunguluka changalila nakuchilika chaKwanuka Kufwa chaMwata veji kuvakokanga kumujimbu wamwaza. Havatu kana, vamwe vanafwane nge vaishi “vamwenemwene” vaze veji kwizanga muliuka lyaYehova. Kaha veka vanafwane nge vaishi “vamokomoko” mwomwo Yehova katevo.

10. Mwomwo ika Yesu azachishilile chifwanyisa chalyoji lyachikokela?

¹⁰ Mwomwo ika Yesu azachishilile echi chifwanyisa? Kuhandununa vaishi vamuchifwanyisa kanechi kachatalisa kukusopesa chamakumishilo chahamalwa amaneneko. Oloze chatalisa kuvyuma vize vili nakusoloka makumbi ano akukuminyina. Yesu ambile ngwenyi keshi nge vosena vaze navasaka mujimbu waWangana navapwa vangamba jaYehovako. Vatu vavavulu vaze veji kwizanga kukukunguluka chetu chipwe vaze tweji kulinangulanga navo Mbimbiliya kavahanyine kuyoya chavo kuli Yehovako. (Vamya. 1, 18:21) Kaha veka valitwamina kwizanga nakukunguluka. Vakweze vamwe vasemukila mujitanga jaVinjiho, oloze kavazanga kukavangiza jishimbi jaYehovako. Yesu ashindakanyine ngwenyi mutu himutu atela kulisakwila livene kuzachila Yehova chipwe nduma. Nge natusakula kulinga vyuma vyamwenemwene, kaha Yehova mwatwivwila “chipepa.”—Hangai 2:7.

11, 12. (a) Vyuma muka tunahase kunganyala kuchifwanyisa chalyoji lyachikokela? (b) Chifwanyisa kana chatunangula vyuma muka kutalisa kuli Yehova naYesu?

¹¹ Vyuma muka tunahase kunganyala kuchifwanyisa chalyoji lyachikokela? Kutachikiza mwalumbunukila chifwanyisa kana nachitukafwa tuhone kupihilila nge chilongesa chetu chipwe mwanetu kate kuzachila Yehova. Nahase kukana numba tuhu tunakilikita nangolo jetu josena kumukafwa. Mutu keshi kuhasa kupwa sepa lyaYehova mwomwo yakwitavila kaha chilongesa chaMbimbiliya chipwe mwomwo yakusemukila mutanga yaVinjihoko. Vatu vaze veji kukananga  kukundwiza wata waYehova kaveshi kupwa vangamba jaKalungako.

¹² Uno echi chalumbununa nge vatu vaze vanaseze muchano kaveshi kukakinduluka cheka muchikungulwiloko tahi? Nyi chalumbununa nge mutu kanda alihane kuzachila Yehova kaha keshi kukapwa ngamba yaYehovako tahi? Nduma. Achili nalwola lwakupwa sepa lyaYehova shimbu kanda malwa amanene aputuke. Yehova eji kuvasanyikanga ngwenyi: “Kindulukenu kuli Ami kaha nangukinduluka kuli enu.” (Mala. 3:7) Mazu kana vawashindakanya muchifwanyisa chikwavo chaYesu chamwana wakujimbala.—Tangenu Luka 15:11-32.

13. Chifwanyisa chaYesu chamwana wakujimbala chalumbununa ika?

¹³ Chifwanyisa chaYesu chamwana wakujimbala chalumbununa ika? Chisemi wamuchima wakutetela wamuchifwanyisa kanechi emanyinako Setu wazangi Yehova. Mwana uze enyekele luheto lwenyi emanyinako vatu vaze veji kusezanga liuka lyaYehova. Vatu kana veji kupwanga kukaye kaSatana kaze kanafwane nge kuya “kulifuchi lyeka lyakwakusuku” naYehova. (Efwe. 4:18; Kolo. 1:21) Kutwala muze vatu kana veji kushinganyekanga jino ngwavo vanalimbenje chikuma, ngachize veji kusakanga kukinduluka cheka kuli Yehova. Echi chasaka kuzata nangolo, oloze mwomwo yakulinyisa nakupihilila nakwalumuka, Yehova eji kuvakonekelanga nakuvatambula cheka namavoko avali.—Isa. 44:22; Petu. 1, 2:25.

14. Mwomwo ika Yesu azachishilile chifwanyisa chamwana wakujimbala?

¹⁴ Mwomwo ika Yesu azachishilile echi chifwanyisa? Yesu asolwele nge Yehova asaka vatu vosena vaze vanaseze muchano vakinduluke cheka kuli ikiye. Chisemi wamuchifwanyisa kana afwelelele ngwenyi mwanenyi mwakakinduluka cheka. Omu amwene ali nakwiza numba tuhu “achipwile kwakusuku,” ise alahile nakumusambilila. Uze chisemi asakile mwanenyi atachikize ngwenyi amuzanga. Chifwanyisa kanechi chatela kukafwa vaze vanaseze muchano vakinduluke kuli Yehova chakuzeneka kukwata kumashinde. Vanahase kuzeya kushipilitu, nakwivwa sonyi kukinduluka, oloze chasaka kuzata nangolo. Nge vanakinduluka kuli Yehova, kaha Yehova, Yesu navangelo navawahilila chikuma.—Luka 15:7.

15, 16. (a) Vyuma muka tunahase kunganyala kuchifwanyisa chamwana wakujimbala? Hanjikenu vyakutalilaho. (b) Chifwanyisa kana chatunangula vyuma muka kutalisa kuli Yehova naYesu?

¹⁵ Vyuma muka tunahase kunganyala kuchifwanyisa chamwana wakujimbala? Twatela kulondezeza chakutalilaho chaYehova.  Nge mutu nakinduluka muchikungulwilo, kaha katwatela kupwa ‘vaka-kwoloka chikuma’ nakulitwamina kumusambililako. Echi chinahase kujiha usoko wetu naYehova. (Kwambu. 7:16) Chuma chikwavo natulinangulaho shina kumona mutu uze nafumu muchikungulwilo kupwa “mukoko wakujimbala” uze nahase kukinduluka cheka. (Samu 119:176) Nge tunaliwane namutu uze vafumisa muchikungulwilo, kaha tunahase kumukafwa ngachilihi mangana akinduluke? Kutala tunahase kulweza vakulwane mangana vakafwe mutu kana akinduluke cheka muchikungulwilo tahi? Tunahase kulinga ngocho nge natwijiva mwalumbunukila chifwanyisa chaYesu chamwana wakujimbala.

¹⁶ Vaze veji kukindulukanga veji kuvazanganga nakuvatetela kuli Yehova nakuvazakama kuchikungulwilo. Ndumbwetu walunga uze vafumishile muchikungulwilo hamyaka 25 ambile ngwenyi: “Kufuma haze vanguhilwishile muchikungulwilo ngunapunga lika wakuwahilila mwomwo ngwapwile “nalwola lwakulihizumuna” lwakufuma kuli Yehova. (Vili. 3:19) Vandumbwami vosena veji kunguzakamanga nakunguzanga. Oholyapwa jino nguli natanga yamwaza yakushipilitu.” Ndumbwetu wapwevo uze akindulukile cheka muchikungulwilo omu mwahichile myaka 5 kufuma haze vamufumishile muchikungulwilo ambile ngwenyi: “Ngwevwile kuwaha chikuma omu vandumbwami vangusolwelele zangi yize ahanjikile Yesu. Kupwa muliuka lyaYehova chapwa hikutokwa chikuma.”

17, 18. (a) Vyuma muka vyamwaza vize tunalinangula kuvifwanyisa kanevi vitatu? (b) Vyuma muka twatela kulinga?

¹⁷ Vyuma muka vyamwaza vize tunalinangula kuvifwanyisa kanevi vitatu? Chatete, twatela kutachikiza ngwetu katwatela kushinjila chilongesa chetu azovoloke kushipilituko. Mulimo kana twatela kuuseza mumavoko aYehova. Chamuchivali, katwatela kushinganyeka ngwetu vosena vaze tunakunangula Mbimbiliya navapwa vangamba jaYehovako. Chamuchitatu numba tuhu vamwe navaseza Yehova, oloze twatela kufwelela ngwetu navakakinduluka cheka. Kaha nge vanakinduluka twatela kuvatambokesa mujila yize nayisolola zangi yaYehova.

¹⁸ Tuvosena tutwalenuho lika kutondanga chinyingi, kunangakana, namangana. Omu natutanga vifwanyisa vyaYesu, tulihulisenu ngwetu: ‘Uno echi chifwanyisa chalumbununa ika? Mwomwo ika vachisonekela muMbimbiliya? Nangukavangiza ngachilihi vyuma vilimo? Vyuma muka nangulinangula kuchifwanyisa kana kutalisa kuli Yehova naYesu? Nge natukavangiza vyuma kanevi, kaha nachisolola nge twatachikiza mwalumbunukila mazu aYesu.