1. Mwomwo ika twatela kusakwilila Yehova?

TWATELA kusakwilila Yehova uze apwa Muka-kuhana “mawana amwaza osena namawana akukupuka osena.” (Yako. 1:17) Apwa Kafunga wazangi uze eji kutuzakamanga kumujimba nakushipilitu. (Samu 23:1-3) Apwa ‘uchinyino wetu, kaha nawa Ikiye ngolo jetu’ nge tuli mulamba. (Samu 46:1) Chikupu vene twatela kusakwilila Yehova namichima yetu yosena ngana mwamuka-kwimba jisamu uze asonekele ngwenyi: “Musakwililenunga Yehova, mwomwo Ikiye wamwaza. Mwomwo likoji lyenyi lyahaya myaka yosena.”—Samu 106:1.

2, 3. (a) Ponde muka yatwama hakulelesa vyuma eji kutulingilanga Yehova? (b) Vihula muka natushimutwila muchihande chino?

² Mwomwo ika chapwila chachilemu kushinganyeka hakusakwilila Yehova? Ngana muze wahanjika upolofweto, vatu vakuhona kusakwilila vali nakuvulilako lika mumakumbi ano akukuminyina. (Chimo. 2, 3:2) Vatu vavavulu kaveshi nakusakwilila havyuma vavalingilako. Vaka-kusekasana muno mukaye vali nakukunyula vatu vafwile kupwa naluheto lwaluvulu muchishishisa chakusuuluka navyuma vali navyo. Twatela kuzangama kuchina nayetu natupwa  namuchima kanou wakuzeneka kusakwilila. Tunahase kupwa namuchima wakuhona kusakwilila nakulelesa usoko wetu naYehova navyuma vize atulingila ngana muze valingile vaIsalele.—Samu 106:7, 11-13.

³ Chikwavo nawa achishinganyekenu havyuma vinahase kusoloka omu natumona ukalu. Hajola jangana tunahase kushinganyeka kaha haukalu nakuvulyama vyuma atulingila Yehova. (Samu 116:3) Uno tunahase kusolola ngachilihi muchima wakusakwilila lwola lwosena? Kaha nawa vyuma muka navitukafwa tupwenga lika namuchima wamwaza nge tuli muvyeseko? Tushimutwilenu havihula kanevi.

4. Tunahase kusolola ngachilihi muchima wakusakwilila lwola lwosena?

⁴ Hakusaka tupwenga namuchima wakusakwilila lwola lwosena, twatela kwanuka vyuma atulingila Yehova nakuvishinganyekanga. Kaha nawa twatela kushinganyeka chikuma halikoji lyenyi. Omu muka-kwimba jisamu ashinganyekele havyuma kana, alikomokelele hakumona vyuma vyavivulu vize amulingililile Yehova.—Tangenu Samu 40:5; 107:43.

5. Vyuma muka natulinangula kuli kaposetolo Paulu hakusolola muchima wakusakwilila?

⁵ Tunahase kulinangula vyavivulu kuli kaposetolo Paulu hakusolola muchima wakusakwilila. Ashinganyekelenga chikuma havyuma amulingililile Yehova, kaha amusakwilililenga. Paulu atachikijile ngwenyi apwilenga ‘muka-kusaula, muka-kuyanjisa, kaha nawa muka-kasautu.’ Numba tuhu apwile navilinga kanevi vyavipi kunyima, oloze asakwililile Kalunga naKulishitu hakumusolwela likoji nakumuhana mulimo wakwambulula. (Tangenu WaChimoteu 1, 1:12-14.) Paulu amwene nawa vandumbwenyi vaka-Kulishitu kupwa vavalemu nakusakwilila chikuma Yehova hakuvakafwa vapwenga navilinga vyamwaza nakulisuula kuzata mulimo wenyi. (Fwili. 1:3-5, 7; Teso. 1, 1:2, 3) Omu apwile nawa muukalu, asakwililile chikuma Yehova hakumukafwa kuhichila muli vandumbwenyi vakushipilitu. (Vili. 28:15; Koli. 2, 7:5-7) Echi chikiko chalingishile Paulu asoneke mazu akukolezeza vaka-Kulishitu ngwenyi: “Sololenunga kusakwilila chenu . . . , nakulikolezezanga najisamu, namyaso yakwalisa Kalunga, namyaso yakushipilitu yakwimba nakukokweza.”—Kolo. 3:15-17.

6. Vyuma muka mweji kusakwililanga Yehova?

⁶ Tunahase kulondezeza ngachilihi chakutalilaho chaPaulu chakusolola muchima wakusakwilila? Twatela kushinganyeka chikuma havyuma atulingila Yehova ngana mwaPaulu. (Samu 116:12) Munahase kukumbulula ngachilihi nge vanamihulisa ngwavo, ‘Vyuma muka amilingila Yehova vize mweji kumusakwililanga?’ Pamo munahase kumusakwilila hakupwa nausoko naikiye, chipwe hakumikonekela milonga yashili kuhichila mundando yakusokola yaMwanenyi. Nyi pamo munahase kuvuluka majina avandumbwetu vaze vamikafwile mulwola lwaukalu. Munahase nawa kuvuluka muka-mahyenu navana venu, navyuma vyeka nawa. Nge natushinganyeka havyuma vyamwaza atulingila Tengi wazangi Yehova, nachitulingisa tupwenga namuchima wakumusakwilila makumbi osena.—Tangenu Samu 92:1, 2.

7. (a) Mwomwo ika twatela kulombanga nakusakwilila Yehova? (b) Vyuma muka natunganyala nge natusakwililanga Yehova mukulomba?

⁷ Nge natushinganyekanga havyuma atulingila Yehova, kaha nachitukafwa tulombenga kuli Yehova nakumusakwilila. (Samu 95:2; 100:4, 5) Vatu vavavulu vamona kulomba nge hijila yakulwezelamo kaha Kalunga avakafwe. Twejiva chikupu ngwetu Yehova eji kuwahililanga  nge natumusakwilila havyuma atuhana. MuMbimbiliya mwatwama mijimbu yavatu vavavulu vaze vasakwililile Yehova mukulomba chavo, vakufwana nge Hana naHezekiya. (Samwe. 1, 2:1-10; Isa. 38:9-20) Twatela kulondezeza ava vangamba jaYehova vakushishika vasolwele muchima wakusakwilila. Eyo, twatela kusakwililanga Yehova havyuma atulingila. (Teso. 1, 5:17, 18) Nge natulinga ngocho, kaha natunganyala vyuma vyavivulu vyakufwana nge kuwahilila mumichima yetu, nakuzanga chikuma Yehova, nakupandama kuli ikiye.—Yako. 4:8.

8. Vyuma muka vinahase kutulingisa tuhone kusakwilila Yehova havyuma atulingila?

⁸ Mwomwo ika twatela kuzangama kuchina michima yetu yakusakwilila Yehova hamuchima wenyi wamwaza nayimbumbula? Mwomwo twaswana muchima wakuhona kusakwilila. Achishinganyekenu havisemi jetu vatete, vaAlama naEve vaze vahakile mumilemba yapalachise. Kalunga avahanyine vyuma vyosena vyasakiwile mukuyoya chavo nakutwama mukuunda haya myaka yosena. (Kupu. 1:28) Oloze kavasakwililile vyuma avalingililileko. Vaputukile kupwa namuchima walifwi wakusaka vyuma vyavivulu. Kutwala muze vajimbalishile vyuma vyosena. (Kupu. 3:6, 7, 17-19) Nayetu nawa twatela kuzangama kuchina natuhona kusakwilila vyuma atulingila Yehova mwomwo twatwama mukaye kaze kanazale navatu vakuhona kusakwilila. Tunahase kuputuka kulelesa usoko wetu naYehova. Kutwala muze tunahase kumona kutokwa chawanawakwetu atuhana Yehova wamukaye kosena kupwa wamokomoko. Kaha nawa tunahase kundupukila muvyuma vyamuno mukaye kaze kali nakuhita. (Yowa. 1, 2:15-17) Nge natusaka tulihende kumuchima kanou, twatela kushinganyekanga chikuma havyuma atulingila Yehova nakumusakwililanga hakutwitavila tupwenga vatu jenyi.—Tangenu Samu 27:4.

9. Mwomwo ika twatela kushinganyeka havyuma atulingila Yehova nge tuli muukalu?

⁹ Kupwa namuchima wakusakwilila chinahase kutukafwa tumike muukalu. Tunahase kuhomba chikuma nge ukalu unatutohwela wakufwana nge muka-mahyetu nahono kupwa wakushishika, tuli namisongo yayinene, chipwe tunafwisa mutu twazanga chikuma. Hajola kaneji twatela kushinganyeka havyuma vyamwaza atulingila Yehova mangana vituvendejeke nakutujikijisa. Tushimutwilenu jino havyakutalilaho vimwe.

10. Irina anganyalile ngachilihi hakushinganyeka havyuma eji kungulingilanga Kalunga?

 ¹⁰ Irina * uze apwa payiniya washimbu yosena kuNorth America, asombokele kuli kalama muchikungulwilo uze ahonene kushishika, kaha amusezele ukawenyi navana. Vyuma muka vyakafwile Irina atwaleho lika kuzachila Yehova nakashishi? Ambile ngwenyi: “Ngwasakwilila chikuma Yehova hakunguzakama. Ngweji kushinganyekanga havyuma eji kungulingilanga Yehova, kahechi cheji kungukafwanga ngumone nge Setu wamwilu angutachikiza nakunguzanga chikuma. Ngwejiva ngwami keshi kukangusezako.” Numba tuhu Irina nahichi muukalu wauvulu mukuyoya, oloze muchima wenyi wakuwahilila weji kumuzamisanga nakukolezeza vakwavo nawa.

11. Vyuma muka vyakafwile Kyung-sook omike kumusongo waunene?

¹¹ Kyung-sook uze atwama muAsia azachile mulimo waupayiniya hamwe nalunga lyenyi hamyaka yakuhambakana 20. Kutwala muze vamuwanyine namusongo wakasa kumahuyungu, kaha vamulwezele ngwavo mwayoya tukweji vatatu chipwe vatanu naumwe. Numba tuhu ikiye nalunga lyenyi vapwilenga naukalu weka wauvulu, oloze kavahombele chikumako. Kyung-sook ambile ngwenyi: “Musongo kana wangutohwelelele kaha ngwevwile woma ngwami nangufwa.” Vyuma muka vyamukafwile omike? Ahanjikile ngwenyi: “Hakumbi hakumbi naufuku shimbu kanda ngusavale, ngweji kuyanga hamulungu wazuvo yetu nakulomba nalizu lyakutambakana nakusakwilila Yehova havyuma vitanu vize angulingililile kufuma halikumbi lize vanguwanyine namusongo. Kaha ngweji kwivwanga kumuchima hwo nakuzanga chikuma Yehova.” Uno Kyung-sook nanganyala ngachilihi hakulomba chenyi? Ambile ngwenyi: “Ngunamono ngwami Yehova eji kuhananga ngolo mulwola lwaukalu, kaha nawa vyuma atulingila vyapwa vyavivulu kuhambakana ukalu tweji kumonanga mukuyoya.”

12. Vyuma muka vyavendejekele Jason omu afwishile puwenyi?

¹² Jason uze azachila haofesi yamutango umwe muAfrica, nazatenga mulimo washimbu yosena hamyaka yakuhambakana 30. Ambile ngwenyi, munahichi jino myaka 7 kufuma haze afwililile puwami, oloze ngweji kwivwanga lika kukola kumuchima. Ngweji kulinyenganga chikuma hakushinganyeka omu puwami apinjilenga namusongo wakasa.” Vyuma muka vinakafwe Jason omike? Ambile ngwenyi: “Likumbi limwe ngwatwamine nakushinganyeka halwola lumwe luze twalivwishile kuwaha napuwami. Kaha ngwasakwililile Yehova hakutuhana lwola kana luze twalivwishile kuwaha. Ngwevwile kumuchima hwo, kaha ngwaputukile kusakwililanga Yehova havyuma vyamwaza vyakunyima. Kupwa namuchima wakusakwilila chinangukafwe chikuma mukuyoya chami. Numba tuhu noholyapwa nguchili nakulishona hakufwa chapuwami, oloze ngweji kusakwililanga Yehova hamyaka ngwalivwishile kuwaha muulo nalwola twapwile nakumuzachila hamwe napuwami uze azangile Yehova.”

13. Vyuma muka vyakafwile Sheryl omike muukalu wakufwisa tanga yenyi?

¹³ Omu peho yanyamanganda wamunene (Super Typhoon Haiyan) yakatwile meya nakwenyeka litungu lyaPhilippines mu 2013, Sheryl uze apwile namyaka 13 halwola kana atokesele tanga yenyi navyuma vyosena. Ambile ngwenyi: “Vatanga jami vafwile kaha nawa zuvo yetu yapuzukile.” Vaise nanaye navandumbwenyi vosena vafwile. Vyuma muka vyamukafwile omike muukalu kanou chakuzeneka kuhomba chikuma? Apwile namuchima wakusakwilila nakushinganyeka havyuma vyamwaza vize amulingila Yehova. Ambile nawa ngwenyi: “Ngwamwene vyuma vyosena valingile vandumbwami vakushipilitu hakungukafwa nakungukolezeza.  Ngwatachikijile nawa ngwami vandumbwami mukaye kosena vali nakungulombelangako. Ngwasakwilila chikuma Yehova hakupwa Kalunga kami. Eji kutuhananga vyuma vize vyasakiwa mukuyoya chetu.” Enga, kushinganyekanga havyuma vyamwaza cheji kulingisanga mutu akeheseko ushona. Muchima wakusakwilila weji kutukafwanga tutwaleho lika kumika chamokomoko naukalu natumona.—Efwe. 5:20; tangenu Wavaka-Fwilipi 4:6, 7.

14. Vyuma muka vyamwaza tuli nakuvandamina kukamona? (Talenu muvwimbimbi wakulivanga.)

¹⁴ Kufuma vene kushikulu, vatu jaYehova vanawahililanga havyuma vyamwaza avalingila Kalunga. Chakutalilaho, omu vaIsalele vavayowele kuli Fwalo namaswalale jenyi haKalungalwiji Uchila, vembile myaso yakwalisa Yehova nakumusakwilila. (Kulo. 15:1-21) Makumbi ano twatokwa chikuma omu Kalunga atufwelelesa ngwenyi mwakatuyovola kuvyuma vyosena vize vyeji kutuyanjisanga mukuyoya. (Samu 37:9-11; Isa. 25:8; 33:24) Achishinganyekenu ocho kuwaha natukevwa omu Yehova mwakanongesa vaka-kole jenyi nakutwingisa mukaye kakahya muze mwatwama kuunda nakwoloka. Likumbi kana natukasakwilila chikupu Yehova.—Kuso. 20:1-3; 21:3, 4.

15. Vyuma muka muli nakufwila kulinga mumwaka wa 2015?

¹⁵ Tuli nakutalilila vyuma vyamwaza vyakushipilitu vize Yehova natuwahishila mu 2015. Numba tuhu natumona ukalu, oloze tunafwelela ngwetu Yehova keshi kutusezako. (Lushi. 31:8; Samu 9:9, 10) Mwatwalaho lika kutuhana vyuma vili nakusakiwa mukuyoya chetu mangana tumuzachile nakashishi. Shikaho, tufwilenu kupwa namuchima wakusakwilila ngana mwakapolofweto Hambakuke uze ambile ngwenyi: “Chipwe mukuyu kaweshi kukafukulako, chipwe kumuvinyo kakweshi kukapwa mihakoko, chipwe milimo yamilive nayikahona, chipwe mawande kaweshi kukema kulyako, chipwe vimuna vavandende navakavatetamo mulimba, chipwe mumatanga kamweshi kukapwa vangombeko, chipwe ngocho ami nangulisambanga muli Yehova, nangukinyinyinanga muli Kalunga waulwilo wami.” (Hamba. 3:17, 18) Ngachize, mwaka wosena uno tushinganyekenu chikuma havyuma vyamwaza atulingila Yehova nakumusakwilila ngana muchinahanjika chisoneka chamwaka wa 2015 chakwamba ngwacho: “Musakwililenunga Yehova, mwomwo Ikiye wamwaza.”—Samu 106:1.