1-3. Ukalu muka veji kumonanga vaze valimbata? (Talenu muvwimbimbi wakulivanga.)

LUNGA umwe uze natwame napuwenyi muulo hamyaka 38 ambile ngwenyi: “Nge mutu mwafwila kupwa naulo wakufukila, kaha atela kufwelela ngwenyi Yehova mwamukafwa chikupu.” Enga, lunga napwevo vanahase kupwa vakuwahilila muulo wavo nge navalikafwanga namulwola lwaukalu.—Vishi. 18:22.

² Oloze twatela kwanuka ngwetu vaze valimbata veji kumonanga “malwa mumusonyi wavo.” (Koli. 1, 7:28) Mwomwo ika? Mwomwo mukuyoya mwatwama ukalu wauvulu wakufwana nge kulifutwisa kumichima, kuhona kulivwishisa, chipwe kuhanjika vyuma vyavipi mwomwo yakuzeneka kukupuka mwosena. (Yako. 3:2, 5, 8) Vavavulu vali nakulipika naukalu wakulela vana mwomwo yakuhona milimo yakuzata mukaye. Veka vali nakulizakaminanga chikuma nakuhomba nakuvalingisa jino vahone kutwama hamwe navaka-mahyavo mangana vazamise ulo wavo. Kaha ukalu wakufwana nge kuviza, kuhona jimbongo naukalu weka wangana uli nakulingisanga vatu vahone kulizanga nakulivumbika muulo. Kaha nawa ulo wakukola unakulyenyekanga ‘navilinga vyamusonyi,’ vyakufwana nge ujila, navilinga vyakuzunguma, najikole,  navikokojola, namasungu, namatoto nakulikindwojokela.—Ngale. 5:19-21.

³ Kaha nawa “makumbi akukuminyina” anakuneha vilinga vyavipi vyakufwana nge lizangamina nakuhona kuzanga Kalunga vize vyeji kwenyekanga malo. (Chimo. 2, 3:1-4) Kwatwama nawa muka-kole uze asaka kutangula malo avatu. Kaposetolo Petulu atulweza ngwenyi: “Muka-kole wenu Liyavolo eji kukulijizanga nge ndumba wakutahwoka, nakutonda mutu wose mwawana amulye.”—Petu. 1, 5:8; Kuso. 12:12.

4. Vyuma muka vinahase kulingisa valunga napwevo vapwenga naulo wakukola wakuwahilila?

⁴ Lunga umwe wakuJapan ambile ngwenyi: “Ngwahombele chikuma mwomwo yakuhona jimbongo. Hakuwana nge kangwalwezele puwamiko, naikiye ahombele oku nawa apwile nakuviza. Evi vyatulingishilenga lwola lumwe tuhone kulihanjikisa mujila yamwaza.” Enga, muulo mweji kupwa vene ukalu, oloze kamwatela kuwechelela utohweko. Yehova nahase kukafwa valunga napwevo vatwame mukuwahilila nakulinunga nakuzamisa ulo wavo. (Tangenu Samu 127:1.) Tutalenu jino havyuma vitanu vize vinahase kulingisa ulo upwenga wakukola, wakwilila. Kaha natushimutwila omu zangi yinahase kuzamisa ulo.

5, 6. Vyuma muka vatela kulinga valunga napwevo numba Yehova apwenga muulo wavo?

⁵ Vyuma vyavilemu vize vyeji kuzamisanga ulo shina kulyononona nakuliluula kuli Uze ahakileko ulo. (Tangenu Muka-kwambulula 4:12.) Malunga namapwevo vakulimbata vanahase kuhaka Yehova muulo nge navakavangizanga jishimbi jenyi. Mbimbiliya yahanjika kutalisa kuli vatu jenyi vakushikulu ngwayo: “Matwitwi enu nawakevwa lizu munyima yenu lyakwamba ngwalyo, Eyi yeyi jila, tambukenungamo, omu namukatalisa kulivoko lyachilyo nomu namukatalisa kulivoko lyachimoswe.” (Isa. 30:20, 21) Makumbi ano vaze valimbata vanahase ‘kwivwa’ lizu lyaYehova hakutanganga Mazu enyi. (Samu 1:1-3) Vanahase kuzamisa ulo wavo kuhichila muKulemesa Kalunga mwaTanga. Kahechi nachivalingisa vawahilile nakulihizumuna kushipilitu. Kulombela hamwe nawa chapwa chachilemu muulo mwomwo chinahase kuzamisa ulo wavo nakuhonesa vyeseko vyamukaye kano kaSatana.

⁶ Gerhard wakuGermany ahanjikile ngwenyi: “Mazu aKalunga eji kutukafwanga chikuma tulikonekele nakulitalilila chikoki nge tuli muukalu chipwe tunalifutwisa kumuchima. Vilinga kanevi vyamwaza vyeji kulingisanga ulo ufukile.” Nge valunga napwevo navazata nangolo nakuhaka Kalunga muulo wavo, nakulingila hamwe vyuma vyakushipilitu, kaha navapandama chikuma kuli Kalunga nakuli muka-mahyavo.

7. Uno malunga vatela kutwaminyina ngachilihi jitanga javo?

⁷ Nge lunga mwatwaminyina kanawa tanga yenyi, kaha ulo wavo nauzama nakupwa wakuwahilila. Mbimbiliya yamba ngwayo: “Mutwe walunga hilunga apwa Kulishitu; kaha mutwe wapwevo apwa lunga lyenyi.” (Koli. 1, 11:3) Mazu awa asolola jila yamwaza yize malunga vatela kutwaminyina jitanga javo ngana muze eji kulinganga Kulishitu. Yesu kashinyinyikilenga vatu chipwe kuvatenukilako, oloze avatwaminyinyinenga muzangi, nalikoji, nakutetela, nakuvevwila keke.—Mateu 11:28-30.

8. Vyuma muka atela kulinga lunga mangana puwenyi amuzange nakumuvumbika?

⁸ Ngana mwaKulishitu, malunga kavatela kutenukilanga mapwevo javo mangana ngwavo vavavumbikeko. Oloze vatela ‘kutwalaho lika kutwamanga namapwevo javo  mwaya chinyingi.’ Veji ‘kuvavumbikanga nge chitenga chakuhehela chikuma, chakuzeya.’ (Petu. 1, 3:7) Malunga veji kuvumbikanga mapwevo javo nakuvahana kalemesa kupenge chipwe kumeso avatu nakusolola nge vapwa vavalemu. (Vishi. 31:28) Echi cheji kulingisanga pwevo azange lunga lyenyi nakumuvumbika, kaha Kalunga eji kukisulanga ulo wavo.

9. Pwevo nahase kuliluula ngachilihi kuli lunga lyenyi?

⁹ Kuzanga Yehova namuchima wosena chatela kutukafwa tulinyise mwishi yalivoko lyenyi lyangolo. (Petu. 1, 5:6) Jila yimwe yayilemu yize pwevo eji kuliluwilangamo kuwata waYehova shina kukundwiza lunga lyenyi nakuzachila hamwe natanga. Mbimbiliya yamba ngwayo: “Enu mapwevo, liluulenunga kumalunga jenu, nganomu chatela muli Mwata.” (Kolo. 3:18) Lwola lumwe vyuma nakase lunga vinahase kupwa vyavikalu kuvikavangiza kuli pwevo. Oloze nge vyuma kana kavyalimbalakile najishimbi jaKalungako, kaha pwevo atela kuliluula nakwitavila vyuma kana.—Petu. 1, 3:1.

10. Mwomwo ika chapwila chachilemu pwevo kupwa wakuliluula?

¹⁰ Pwevo apwa wamulemu hakupwa “mukwavo” muvazachila hamwe nalunga lyenyi. (Mala. 2:14) Pwevo naIkiye eji kuhanjikanga vyamangana nge tanga yili nakusaka kusakula vyakulinga. Kaha eji kulinganga ngocho mukalemesa nakupwa lika wakuliluula kuli lunga lyenyi. Lunga wamangana eji kwivwililanga kanawa kuvyuma mwahanjika puwenyi. (Vishi. 31:10-31) Nge pwevo mwapwa wakuliluula, kaha tanga yeji kupwanga yakuwahilila, nakutwama mukuunda nakulinunga hamwe. Echi cheji kulingisanga lunga napwevo vapwenga vakusuuluka muulo hakutachikiza ngwavo vali nakwivwisa Kalunga kuwaha.—Efwe. 5:22.

11. Mwomwo ika chapwila chachilemu kulikonekelanga?

¹¹ Chuma chachinene cheji kulingisanga ulo ushimbule shina kulikonekelanga. Valunga  napwevo veji kulizanganga nakulinunga chikuma muulo nge ‘navatwalaho lika kwitavilanga tutenga twavakwavo, nakulikonekelanga namuchima wakusuuluka.’ (Kolo. 3:13) Oloze nge valunga napwevo navalilamina koko nakwanukanga vyuma vyamwaka apihishile mukwavo, kaha ulo weji kuzeyanga nakuhona kufukila. Ngana muze myaji yinahase kupuzula zuvo, nakulilamina koko nawa chinahase kutohwa mumuchima nakulingisa mutu ahone kukonekela muka-mahyenyi. Oloze nge vaze valimbata navalikonekelanga ngana muze eji kuvakonekelanga Yehova, kaha ulo wavo nauzama mbe.—Mika 7:18, 19.

12. Zangi yeji kufwika ngachilihi “jishili jajivulu”?

¹² Zangi yamwenemwene “kayeshi kulama kokoko.” Oloze “yeji kufwikanga jishili jajivulu.” (Koli. 1, 13:4, 5; tangenu WaPetulu 1, 4:8.) Mujila yikwavo tunahase kwamba ngwetu mutu wazangi keshi kulava milonga yingahi atela kukonekela mukwavoko. Omu kaposetolo Petulu ahulishile Yesu amulweze mapapa kangahi atela kukonekela mukwavo, Yesu amukumbulwile ngwenyi: “Mapapa 77.” (Mateu 18:21, 22) Yesu hano alumbunwine nge kakwatwama seteko yize muka-Kulishitu atela kukonekela vakwavoko.—Vishi. 10:12. *

13. Tunahase kuhonesa ngachilihi tato yakuhona kulikonekelanga?

¹³ Annette ambile ngwenyi: “Nge valunga napwevo navahona kulikonekela, kaha chijindo nakuhona kulifwelela nachitohwa kaha vyuma kanevi vyeji kwenyekanga ulo. Kulikonekelanga cheji kuzamisanga ulo nakulingisa valunga napwevo valizange chikuma.” Hakusaka mangana vahonese tato yakuhona kulikonekelanga, valunga napwevo vatela kulisakwililanga. Mwatela kulisangejekanga namuchima wosena. (Kolo. 3:15) Nge namulikonekelanga kaha namutwamanga mukuunda nakulinunga, ngocho Kalunga mwamikisula chikuma.—Loma 14:19

14, 15. Uno Lushimbi Lwalulemu lukiko luka? Kaha lwalema ngachilihi muulo?

¹⁴ Mutu himutu azanga vakwavo vamuvumbikenga nakumumona kupwa wamulemu. Tweji kwivwanga kuwaha nge vakwetu navetavila vyuma natuvalweza nakuvimona kupwa vyavilemu. Oloze vatu vamwe veji kwambanga ngwavo, “Sambanjinga linga mwalinga mukwenu.” Numba tuhu vasaka kulinga ngocho, oloze Mbimbiliya yamba ngwayo: ‘Kanda ukambako ngwove, Mwanangulingilami, mukiko munangumulingila ikiye.’ (Vishi. 24:29) Yesu atulweza jila yamwaza yakukumishilamo ukalu, yize vavuluka ngwavo Lushimbi Lwalulemu. Vasoneka ngwavo “Muze muli nakusaka ngwenu vatu valingemo kuli enu, nayenu nawa lingenumo kuli vakivo.” (Luka 6:31) Hano Yesu alumbunwine nge twatela kulinga mwamwaza kuli vakwetu ngana muze natusaka vatulingenga, muchishishisa chakuvalinga mwamupi nge vakivo vanatulingi mwamupi. Namuulo nawa, mutu atela kulingila muka-mahyenyi vyuma vize mwasaka naIkiye vamulingile.

¹⁵ Ulo weji kuzamanga nge mutu mwevwishisa omu ali nakwivwa muka-mahyenyi. Lunga umwe wakuSouth Africa ambile ngwenyi: “Tweji kufwilanga kuzachisa Lushimbi Lwalulemu muulo wetu. Numba tuhu lwola lumwe tweji kulifutwisanga kumichima, oloze tweji  kufwilanga kulivumbika nakulinga mwamwaza ngana muze natusaka vakwetu valingenga kuli yetu.”

16. Vyuma muka vize kavatela kulinga vaze valimbata?

¹⁶ Chijila kuvulukanga tutenga twamuka-mahyenu kumeso avatuko, numba vene hakuseseka. Anukenu ngwenu ulo kawapwa nge vatu vaze vali nakufwila kumona iya atwama nangolo chikuma, chipwe muka-kuhanjika chikuma, chipwe iya atwama nakasautu chikumako. Enga, tuvosena twatwama natutenga, kaha nawa tweji kwivwisanga vakwetu kupihya lwola lumwe. Oloze echi kachatela kutulingisa tuhanjikenga mazu akasautu kuli vaka-mahyetu chipwe kulivetako.—Tangenu Vishimo 17:27; 31:26.

17. Mujila muka malunga vanahase kuzachisa Lushimbi Lwalulemu muulo wavo?

¹⁷ Muvisemwa vimwe, malunga vaze veji kuvetanga mapwevo javo vavamona kupwa vindume. Oloze Mbimbiliya yamba ngwayo: ‘Ou wakushipwokela kutenuka nawahe kuhambakana chindume, kahou eji kwonononanga shipilitu yenyi nawahe kuhambakanou mwatambula limbo.’ (Vishi. 16:32) Twatela kukilikita nangolo mangana tulondezeze mutu wamulemu Yesu Kulishitu uze apwile wakushipwokela mumuchima. Lunga uze eji kusaulanga chipwe kuveta puwenyi nahase kwenyeka usoko wenyi naYehova. Muka-kwimba jisamu Ndavichi uze apwile chindume ambile ngwenyi: “Chikimenu woma, kanda muvulumunako, lihanjikisenu mumichima yenu hatuhela twenu, holenu kulu.”—Samu 4:4.

18. Mwomwo ika chapwila chachilemu kupwa nazangi muulo?

¹⁸ Tangenu Wavaka-Kolinde 1, 13:4-7. Kupwa nazangi chapwa chachilemu chikuma muulo. Mbimbiliya yamba ngwayo: “Vwalenu muchima wakeke, nalikoji, nakulinyisa, nakuvova, nakutalilila chikoki. Oloze kuvyuma vyosenevi, vwalenunga zangi, mwomwo yikiko yeji kununganga vatu hamwe mujila yakukupuka.” (Kolo. 3:12, 14) Lunga napwevo vatela kulizanga chikuma muulo nakupwa vakulisuula ngana muze alingile Kulishitu. Vilinga kana tunahase kuvifwanyisa kundaka yize yeji kununganga tumenga hakutunga zuvo. Ulo wangana weji kuzamanga chikuma, chamokomoko naukalu unahase kuvawana wakufwana nge kulifutwisa kumuchima, namisongo, nauhutu chipwe ukalu weka wamutanga.

19, 20. (a) Valunga napwevo vanahase kuzamisa ngachilihi ulo wavo mangana ufukile? (b) Vyuma muka natushimutwila muchihande chinakavangizaho?

¹⁹ Hakusaka ulo ufukile, vaze valimbata vatela kulizanga chikuma nakulifwelela. Muchishishisa chakujiha ulo nge vali nakumona ukalu, valunga napwevo vatela kufwila kukumisa ukalu kana nakuzamisa ulo wavo mangana utwaleho lika. Vaka-Kulishitu valimbata vaze valihana kuli Yehova nakuli vaka-mahyavo vazanga Kalunga navaka-mahyavo. Echi chikiko cheji kuvakafwanga vakumise ukalu wavo, mwomwo “zangi kayakumako.”—Koli. 1, 13:8; Mateu 19:5, 6; Hepe. 13:4.

²⁰ Hakuwana nge tuli nakuyoyela ‘mulwola lwalukalu,’ vatu vavavulu vali nakuchiwana kupwa chachikalu kutunga malo akukola, akuwahilila. (Chimo. 2, 3:1) Oloze Yehova eji kukafwanga vatu jenyi vapwenga namalo amwenemwene. Chipwe ngocho, valunga napwevo vatela kuzata nangolo mangana vahonese vilinga vyavipi vinalisale mukaye. Chihande chinakavangizaho nachishimutwila vyuma vatela kulinga valunga napwevo mangana vakinge ulo wavo kuvilinga vyavipi.