Ovyo Tweji Kulingilanga Chilika chaKulya chaMwata chaChingoloshi
“Twalenuho lika kulinganga ngocho mungwanukilengaho ami.”—KOLI. 1, 11:24.
1, 2. Vyuma muka alingile Yesu hachingoloshi chaNyisane 14, 33 C.E.? (Talenu muvwimbimbi wakulivanga.)
LWOLA lumwe, likumbi muYelusalema lyalaukile, kaha kakweji amunyikile. Lyapwile likumbi lyaNyisane 14, 33 C.E. nachingoloshi. Yesu natumbaji twenyi vapwile nakwanuka chilika chaPaseka chize valingilenga vaIsalele hakwanuka omu vayovokele kufuma muEjipitu kafwe makulukaji 15 kunyima. Yesu navaposetolo jenyi vakushishika 11 valikungulwile nakulinga chilika chakulya, chize vatu navakanukilangaho kufwa chenyi nge vanamujihi halikumbi lyalize vene. *—Mateu 26:1, 2.
2 Yesu alombele nakuhana vaposetolo jenyi mbolo yakuzeneka chimbalwila, nakwamba ngwenyi: “Tambulenu, lyenu.” Kaha himwambata nawa lupasa lwavinyo nakulomba cheka, nakwamba ngwenyi: “Nwenumo muvosena.” (Mateu 26:26, 27) Yesu kahanyine cheka vyakulya vikwavo tumbaji twenyi vakushishikako, oloze avalwezele ngwenyi likumbi kana lyapwile lyalilemu chikuma.
3. Vihula muka navakumbulula muchihande chino?
3 Yesu ikiye aputukile chilika chaKwanuka Kufwa chaMwata chize vavuluka nawa ngwavo “Kulya chaMwata chaChingoloshi.” (Koli. 1, 11:20) Vatu vamwe veji kuhulisanga ngwavo: Mwomwo ika twatela kulingila chilika kana? Uno mbolo navinyo vyemanyinako ika? Vyuma muka twatela kulinga mangana tulizange vyachilika kana? Veya vatela kulya vifwanyisa kana? Kaha vaka-Kulishitu vamona ngachilihi lutalililo vatwama nalwo?
MWOMWO IKA TWEJI KULINGILANGA CHILIKA CHAKWANUKA KUFWA CHAYESU?
4. Kufwa chaYesu chatusokolwela vyuma muka?
4 Hakuwana nge twapwa tuvana vakufuma kuli Alama, tuvosena twaswana shili, kaha tweji kufwanga. (Loma 5:12) Kakweshi mutu wakuhona kukupuka mwosena mwahasa kulisokola ivene kukufwa chipwe kusokola vakwavoko. (Samu 49:6-9) Oloze Yesu hakupwa wakukupuka mwosena, ahanyine mujimba wenyi nakumwanga manyinga enyi mwachimuna wakuvatula kupwa ndando yakusokola vatu. Ngachize Yesu atusokolwela jila yakuyovoka kushili nakukufwa mangana tukayoye haya myaka yosena.—Loma 6:23; Koli. 1, 15:21, 22.
5. (a) Twatachikiza ngachilihi ngwetu Kalunga naKulishitu vazanga vatu? (b) Mwomwo ika twatela kukapwa kukwanuka kufwa chaYesu?
5 Kalunga hakutuhana mwanenyi kupwa ndando yakusokola hiunjiho wakusolola nge azanga chikuma vatu. (Yowa. 3:16) Kaha nawa Yesu hakulisuula kutufwila, chasolola nge nayikiye atuzanga. Shimbu kanda Yesu ezenga hano hamavu, apwile ‘kuluwa waKalunga muka-kuzata’ kaha ‘kuwahilila chenyi chapwilenga muli vana vavatu.’ (Vishi. 8:30, 31) Shikaho, nge natupwa namuchima wakusakwilila Kalunga naMwanenyi, kaha natuliwahisa mangana tukapwe kukwanuka kufwa chaYesu hakukavangiza lushimbi lwakwamba ngwavo: “Twalenuho lika kulinganga ngocho mungwanukilengaho ami.”—Koli. 1, 11:23-25.
UNO MBOLO NAVINYO VYEMANYINAKO IKA?
6. Uno twatela kumona ngachilihi mbolo navinyo vyakuzachisa haKwanuka Kufwa chaMwata?
6 Omu Yesu alingile chilika chaKwanuka Kufwa chenyi, kalumwine mbolo navinyo mujila yakukomowesa mangana vipwenga musonyi namanyingako. Oloze ahanjikile kutalikisa kumbolo ngwenyi: “Eyi yinemanyinako mujimba wami.” Kaha kulupasa lwavinyo nawa ahanjikile ngwenyi: “Elu lunemanyinako ‘manyinga ami achivwasano,’ aze navamwanga mangana vakonekele jishili javatu vavavulu.” (Mako 14:22-24) Chapundu vene, yize mbolo navinyo vyapwile kaha vifwanyisa.
7. Uno mbolo yize tweji kuzachisanga hachilika chaKwanuka Kufwa chaMwata yemanyinako ika?
7 Hachilika chachilemu chize chapwileko mumwaka wa 33 C.E., Yesu azachishile mbolo yakuzeneka chimbalwila yize yasalile kuchilika chaPaseka. (Kulo. 12:8) MuVisoneka lizu chimbalwila lwola lumwe lyatalisa kuvyuma vyavipi chipwe kushili. (Mateu 16:6, 11, 12; Luka 12:1) Chapwile chakutamo Yesu kuzachisa mbolo yakuzeneka chimbalwila mwomwo yemanyinyineko mujimba wenyi wakuzeneka shili. (Hepe. 7:26) Shikaho, chapwa chakutamo kuzachisa mbolo yakuzeneka chimbalwila hachilika chaKwanuka Kufwa chaMwata.
8. Uno vinyo tweji kuzachisanga haKwanuka Kufwa chaMwata vyemanyinako ika?
8 Vinyo vize azachishile Yesu halikumbi lyaNyisane 14, 33 C.E., vyemanyinyineko manyinga aYesu, kahomu mukiko chapwa namakumbi ano. Omu vamutwalile kuNgolongota kuweluka waYelusalema, manyinga enyi vawamwangile “mangana vakonekele jishili javatu vavavulu.” (Mateu 26:28; 27:33) Hakuwana nge mbolo navinyo tweji kuzachisanga haKwanuka Kufwa chaMwata vyemanyinako ndando yakusokola yize Yesu ahanyine vatu hawana wakanyombo, kaha nawa twasakwilila hakutuhana wana kana, ngocho tuvosena twatela kuliwahisa mangana tukapwe kuchilika chaKulya chaMwata chaChingoloshi.
VYUMA TWATELA KULINGA MANGANA TULIZANGE VYACHILIKA KANA
9. (a) Mwomwo ika chapwila chachilemu kutanga Visoneka vyahanjika haKwanuka Kufwa chaMwata? (b) Mweji kwivwanga ngachilihi handando yakusokola?
9 Jila yimwe yakuliwahishilamo shina kutanga nakushinganyeka haVisoneka vatunonekela mumukanda wetu waKutalatala Mazu-vasoneka Hakumbi Hakumbi, vize vyahanjika havyuma alingile Yesu shimbu kanda afwenga. Echi nachitukafwa tulizange mumichima yetu vyachilika chaKulya chaMwata chaChingoloshi. * Ndumbwetu umwe wapwevo asonekele ngwenyi: “Ngweji kutalililanga lwola lwaKwanuka Kufwa chaMwata. Lweji kupwanga lwola lwamwaza chikuma. Likumbi limwe omu ngwapwile hachipeji . . . ngwatalile tata nakumona kulema chandando yakusokola. . . . Numba tuhu ngwatachikijile visoneka vyosena namwakuvilumbunwina, oloze omu twafwishile nakwivwa omu kufwa cheji kukolanga kumuchima, ngwawahililile hakushinganyeka vyuma vyamwaza nayikatesamo ndando yakusokola kulutwe.” Chapundu vene, omu natuvandamina likumbi lyaKwanuka Kufwa chaMwata, twatela kushinganyeka omu ndando yakusokola yaYesu nayikatuyovola kushili nakukufwa.
Zachisenu vinoma vamiwahishila mangana mulizange kukapwa kuchilika chaKwanuka Kufwa chaMwata (Talenu palangalafu 9)
10. Uno kuliwahisa vyaKwanuka Kufwa chaMwata chatela kutulingisa tuzate ngachilihi muwande?
10 Jila yikwavo nawa yakuliwahishilamo vyaKwanuka Kufwa chaMwata shina kushinganyeka chakukazata chikuma muwande, pamo kukazatako upayiniya wakukafwa mungonde yakwanuka kufwa chamwata. Omu natukalanya Vilongesa vyaMbimbiliya navatu veka vakeze kuchilika chaKulya chaMwata chaChingoloshi, natukawahilila hakuhanjika vyaKalunga, naMwanenyi, navyuma vyamwaza vize Yehova mwakalingila vatu vosena vaze veji kumwivwisanga kuwaha nakumwalisa.—Samu 148:12, 13.
11. Vaka-Kolinde vamwe valile ngachilihi vifwanyisa?
11 Omu natuliwahisa vyaKulya chaMwata chaChingoloshi, twatela kushinganyeka havyuma vize kaposetolo Paulu asonekelele vaka-Kulishitu vamuchikungulwilo chamuKolinde. (Tangenu Wavaka-Kolinde 1, 11:27-34.) Paulu avulukile ngwenyi nge mutu mwalya mbolo nakunwa mulupasa okunyi katelemoko, kaha “mwapwa namulonga hamujimba waMwata Yesu Kulishitu nahamanyinga enyi.” Shikaho, mutu vawavisa “atela kulikekesa amone nge natemo,” numba jino alyenga vifwanyisa. Nge pimbi kaha “ali nakulya nakunwa chakutwala kukumusopesa.” Mwomwo yakupwa navilinga vyavipi, vaka-Kolinde vavavulu vapwile ‘vakuzeya kaha nawa vakuvizaviza, kaha vavavulu vasavalile tulo twakufwa kushipilitu.’ Pamo vamwe valile nakunwa chikuma shimbu kanda lwola lwaKwanuka Kufwa chaMwata chipwe halwola lwachilika kana, ngocho kavapwile vakuvanguluka kushipilituko. Ngachize valile vifwanyisa chakuhona kutamo kaha Kalunga kavevwilile uselewako.
12. (a) Paulu afwanyishile Kwanuka Kufwa chaMwata kuvyuma muka, kaha mazu muka ahuhumwine vaka-kulya? (b) Vyuma muka atela kulinga muka-kulya vifwanyisa uze navulumuna mulonga washili waunene?
12 Paulu afwanyishile chilika chaKwanuka Kufwa chaMwata kukulya chize tunahase kulya navakwetu. Ahuhumwine vaze vatela kulyako ngwenyi: “Enu kamwatela kunwanga lupasa lwaYehova nalupasa lwavandemoneko; enu kamwatela kulyanga ‘kumesa yaYehova’ nakumesa yavandemoneko.” (Koli. 1, 10:16-21) Nge mutu uze eji kulyanga vifwanyisa kana navulumuna mulonga washili waunene, kaha atela kuya kuli vakulwane vamukafwe. (Tangenu WaYakova 5:14-16.) Kaha nge ou vawavisa nalovola ‘mihako yize nayisolola kupihilila nakwalumuka,’ kaha keshi nakusaula ndando yakusokola yaYesu hakulya vifwanyisa kanako.—Luka 3:8.
13. Mwomwo ika chapwila chamwaza kulomba nakushinganyeka havyuma mwakatulingila Kalunga kulutwe?
13 Omu tuli nakuliwahisa vyachilika chaKwanuka Kufwa chaMwata, tunahase kunganyala nge natulomba nakushinganyeka chikuma havyuma vyamwaza vyakulutwe vize mwakatulingila Kalunga. Kakwatela kupwa ngamba yaYehova naMwanenyi uze mwalelesa ndando yakusokola yaYesu hakulya vifwanyisa okunyi katelemo kupwa muka-Kulishitu vawavisako. Jino mutu nahase kwijiva ngachilihi ngwenyi atela kulya vifwanyisa chipwe chiku?
VEYA VATELA KULYA VIFWANYISA KANA?
14. Chivwasano chachihya chakwata ngachilihi hali vaze veji kulyanga vifwanyisa vyaKwanuka Kufwa chaMwata?
14 Vaze veji kulyanga vifwanyisa haKwanuka Kufwa chaMwata vatachikiza namichima yavo yosena ngwavo vatwama muchivwasano chachihya. Yesu ahanjikile kutalisa kuvinyo ngwenyi: “Elu lupasa lunemanyinako chivwasano chachihya hamanyinga ami.” (Koli. 1, 11:25) Kalunga ahanjikile kuhichila muli kapolofweto Yelemiya ngwenyi mwakalishika chivwasano chachihya chize chalihandununa naLushiko lwamuJishimbi luze ashikile vaIsalele. (Tangenu Yelemiya 31:31-34.) Kalunga alikashile chivwasano chachihya navaIsalele vakushipilitu. (Ngale. 6:15, 16) Chivwasano kana vachizamisa nandando yakusokola yaKulishitu kaha chili nakuzata kuhichila mumanyinga enyi aze amwangalile. (Luka 22:20) Yesu apwa Muka-kuwanyisa chivwasano chachihya, kaha vawavisa vakushishika vaze vatwama muchivwasano kana navakayoyela mwilu.—Hepe. 8:6; 9:15.
15. Veya vatwama muchivwasano chaWangana, kaha vyuma muka navakatambula nge navatwalaho lika kushishika?
15 Vaze veji kulyanga vifwanyisa vatachikiza ngwavo navakiko vatwama muchivwasano chaWangana. (Tangenu Luka 12:32.) Vaka-kumukavangiza Yesu vakuwavisa vaze vanononokanga nakukakachila kuli ikiye nakuyanjila nenyi hamwe, navapwanga vaka-kuyula hamwe naYesu mwilu. (Fwili. 3:10) Hakuwana nge vatwama muchivwasano chaWangana, vaka-Kulishitu vawavisa navakapwa vamyangana nakuyula hamwe naYesu mwilu haya myaka yosena. (Kuso. 22:5) Vatu kana ava vakiko veji kulyanga vifwanyisa haKulya chaMwata chaChingoloshi.
16. Lumbununenu mukavatu omu watalikisa mukanda Wavaka-Loma 8:15-17.
16 Vaze vakwechi unjiho washipilitu wakuvalweza nge vapwa vana vaKalunga, vakiko kaha vatela kulya vifwanyisa. (Tangenu Wavaka-Loma 8:15-17.) Nyingililenu ngwenu Paulu azachishile lizu lyachiAlamayiki “Apa” lize lyalumbununa “Ove Tata!” Mwana nahase kuzachisa lizu kana hakusanyika ‘ise,’ mwomwo lyapwa lizu lyakusolola zangi hali chisemi namwana. Vaze vatambula ‘shipilitu yakuvetavila kupwa vana’ vapwa vana vaKalunga asakula. Shipilitu yenyi yeji kuhanjikanga nashipilitu yavo nakuvalweza ngwavo vapwa vana vaYehova vaze awavisa. Kachapwa chuma chakulisakwila mutu yivene mwomwo ngwenyi kasakile kutwama hano hamavuko. Vawavisa vafwelela namichima yavo yosena ngwavo navakapwa vaswana naYesu hamwe muWangana waKalunga mwilu nge navashishika palanga nakukufwa chavo. Oholyapwa kuli kaha vaka-kukavangiza Kulishitu vavandende hali vaze 144,000, vaze ‘vawavisa kuli uze ajila’ Yehova. (Yowa. 1, 2:20; Kuso. 14:1) Veji kusanyikanga ngwavo “Apa, Ove Tata!” kuhichila mushipilitu yenyi. Ou hiusoko wamwaza chikupu vatwama nawo naKalunga.
VAKA-KULISHITU VAMONA NGACHILIHI LUTALILILO VATWAMA NALWO?
17. Lutalililo muka vatwama nalwo vawavisa, kaha veji kulumonanga ngachilihi?
17 Nge mwapwa hali vaze vawavisa, kaha mweji kulombanga nakushinganyeka chikuma halutalililo lwenu lwakukayoyela mwilu. Omu Mbimbiliya yahanjika ‘vyakushika kuhangisa mwenga’ kuli Mwenyamwenga Yesu Kulishitu, mwatela kumona nge vashika yenu kaha mwatalilila kukapwa “mwenga” waKulishitu. (Koli. 2, 11:2; Yowa. 3:27-29; Kuso. 21:2, 9-14) Omu Kalunga eji kuhanjikanga kuhichila muMazu enyi ngwenyi azanga vana venyi vakushipilitu, mwatela kwitavila ngwenu, “Ali nakuhanjika kuli ami.” Kahomu Yehova eji kuhananga jindongi kuli vana venyi vawavisa kuhichila muMazu enyi, shipilitu yajila yatela kumikunyula mwononoke nakwitavila mumuchima wenu ngwenu, “Ali nakuhanjika kuli yami.” Ngocho, shipilitu yaKalunga nashipilitu yenu yeji kusololanga unjiho wakumilweza nge mwatwama nalutalililo lwamwilu.
18. Lutalililo muka vatwama nalwo “mikoko veka,” kaha veji kwivwanga ngachilihi halutalililo kana?
18 Tuyokutuyoku nawa nge mwatwama ‘muliyongomena lyalinene’ chipwe mulizavu ‘lyamikoko veka,’ kaha Kalunga amihana lutalililo lwakukayoyela hano hamavu. (Kuso. 7:9; Yowa. 10:16) Mwasaka kukayoyela muPalachise haya myaka yosena, kaha mweji kwivwanga kuwaha hakushinganyeka havyuma vize Mbimbiliya yatushika kukatulingila kulutwe. Chapundu vene muli nakutalilila kukatwama mukuunda hamwe kaha natanga yenu navatu veka vakwoloka. Muli nakutalilila omu navikalisala vyakulya, nomu navakafumisako ukalu wosena uze uli nakuyanjisa vatu, wakufwana nge uhutu, nakuyanda, nakuviza nakufwa. (Samu 37:10, 11, 29; 67:6; 72:7, 16; Isa. 33:24) Muli nakufwila kukasambilila vatu vaze navakasanguka, vaze navakapwa nalutalililo lwakukayoyela hamavu myaka yosena. (Yowa. 5:28, 29) Tuli nakusakwilila chikuma Yehova hakutushika kukatulingila vyuma vyamwenemwene hano hamavu kulutwe. Numba tuhu kamweshi nakulya vifwanyisa haKwanuka Kufwa chaMwatako, oloze munahase kusolola nge mwasakwilila Yehova hakumihana ndando yakusokola yaYesu Kulishitu hakupwa kuchilika kana.
KUTALA NAMUKAPWAKO TAHI?
19, 20. (a) Vyuma muka mwatela kulinga mangana mukalivwise kuwaha vyuma mwatalilila? (b) Mwomwo ika mwatela kukapwa kuchilika chaKulya chaMwata chaChingoloshi?
19 Numba mwatalilila vyuma vyahamavu chipwe vyamwilu, mwatela kufwelela Yehova Kalunga, naYesu Kulishitu nandando yakusokola numba mukavimone. Nge namukapwa kuchilika chaKwanuka Kufwa chaMwata, nachikamikafwa mukashinganyeke chikuma halutalililo mwatwama nalwo nomu chalema kufwa chaYesu. Shikaho, liwahisenu mangana nayenu mukalinunge hamwe namayevuyevu avatu vaze navakapwa kuchilika chaKulya chaMwata chaChingoloshi hakulembalemba chalikumbi lyaChitanu, haApril 3, 2015 kujiZuvo jaWangana chipwe kuvihela vyeka mukaye kosena.
20 Kupwa kuchilika chaKwanuka Kufwa chaMwata nachikamikafwa mukamone kulema chandando yakusokola yaYesu. Omu namukevwilila kuchihande nachikapwako, nachikamikafwa mukasolole zangi yenu hakwambulwila vakwenu vyuma namukalinangula kupandama kuzangi yaYehova navyuma ajina kukalingila vatu. (Mateu 22:34-40) Shikaho liwahisenu mangana mukapwe kuchilika chaKulya chaMwata chaChingoloshi.