MUMYAKA yakalinwaha yinahichi kunyima, ndumbwetu Cesar napuwenyi Rocio, vapwile nakuyoya chauhando nakutwama muzuvo yayinene muCalifornia, muze Cesar apwile nakuzata milimo yakuwahisa makina akufutumuna peho, kaha puwenyi Rocio apwile nakuzachila kuofesi yandotolo. Ava valunga napwevo kavapwile navanako. Kutwala muze, kwapwile vyuma vimwe vize vyalumwine vishinganyeka vyavo. Uno vyuma muka vene evi?

MuOctober 2009, mutango waUnited States watumine mikanda kuvikungulwilo vyosena mulifuchi kana, wakulomba vandumbwetu vatachikiza milimo yapandama kukutunga mangana valisonekese kuya nakuzachila haMbetele hatando yayindende mangana vazane mumulimo wakutohwesa mutango waWallkill, muNew York. Navandumbwetu vaze vapwile namyaka yakuzomboka hamyaka yavaze vatela kulisonekesa kuya kuMbetele, vavetavishile kulisonekesa. Ndumbwetu Cesar naRocio vambile ngwavo: “Hakuwana nge tunakolo, elu lukiko lwola lwetu lwamakumishilo twatela kuya nakuzachila kuMbetele. Twatela kulisonekesa chikupu.” Chakuzeneka kukwata kumashinde, valisonekesele hahaze vene nakutuma mikanda kumutango.

Mwahichile mwaka umwe natukweji, kavavasanyikileko. Oloze vakivo vatwalileho lika kwashiwisa chiyoyelo chavo mangana vakazate kanawa mulimo kana. Ou ndumbwetu Cesar napuwenyi vambile ngwavo: “Twawahishile zuvo yize yapwile yakulamina minyau nakutungamo kapete kakusavala, kaha twalukililemo. Muzuvo yetu yayinene (200 sq m) twahakilemo vatu mangana vatufwetenga jimbongo. Twalukilile mukazuvo kakandende (25 sq m) muze jino twatwaminenga.” Ndumbwetu Cesar ambile nawa ngwenyi: “Echi chatukafwile mangana chitwashiwile kuya nakuzachila kuMbetele nge navatusanyika.” Jino vyuma muka vyasolokele? Puwenyi Rocio ahanjikile ngwenyi: “Omu twatwamine muze mukazuvo ketu kakandende kakweji umwe kaha, vatusanyikile kuya nakuzata mulimo wakutunga mutango waWallkill hatukweji vavandende. Twamwene jino ngwetu kwashiwisa chiyoyelo chetu chalingishile Yehova atukisule.”

Ngana mwandumbwetu Cesar naRocio, vandumbwetu vavavulu vanalisuula kuya nakutunga mutango wauhya kuNew York State. Vamwe vali nakukundwiza milimo yakutunga muWallkill, kaha veka vali nakutunga chikota kuWarwick. * Vandumbwetu vavavulu vanalisuula kuseza membo avo, namilimo yavo, navikumba vyavo mangana vakundwize milimo yaYehova. Kaha Yehova navakisula mwamunene.

Chakutalilaho, ndumbwetu Way, uze alinangula vyakakahya kakezi, napuwenyi Debra vaze vali namyaka yakuhambakana ha 55 valanjishile zuvo yavo navikumba mumbaka yaKansas, kaha valukilile kwakamwihi naWallkill mangana vayenganga nakuzachila haMbetele oku vali nakufuma hazuvo. * Numba tuhu chuma kana chasakiwile kulisuula chikuma, oloze vanamono ngwavo vanalingi chuma chamwaza. Ndumbwetu Debra ahanjikile hamilimo eji kuzatanga haMbetele ngwenyi: “Lwola lumwe ngweji kwivwanga ngwami nguli nakutunga jizuvo jamuPalachise ngana muze veji kusololanga mumikanda yetu.”

Ndumbwetu Melvin napuwenyi Sharon valanjishile zuvo yavo navikumba vyavo vyosena muSouth Carolina mangana vayenga nakukafwa milimo yakutunga muWarwick. Numba tuhu chasakiwile kulisuula chikuma hakulinga ngocho, oloze vali nakwivwa kuwaha hakwazana mumulimo kanou. Vambile ngwavo: “Tunakusuulukanga chikuma hakumona ngwetu tuli nakwazana mumulimo waliuka uze naukanganyalisa vandumbwetu mukaye kosena.”

Kenneth, uze azachilenga mulimo wakutunga jizuvo shimbu kanda atambule litayamende, napuwenyi Maureen, vapwile namyaka yamuji 55, vafumine kuCalifornia nakuya nakutunga ofesi yamutango kuWarwick. Hakuliwahisa vyakuya, valivwasanyine nandumbwetu wapwevo wamuchikungulwilo chavo mangana avalamine limbo lyavo nakulweza nawa vausoko wavo vavalamine ise yaKen uze apwile kashinakaji. Uno veji kuliveyanga hakulisuula kuya nakuzachila haMbetele tahi? Nduma. Ken ambile ngwenyi: “Tuli nakunganyala chikuma. Numba tuhu lwola lumwe tweji kumonanga ukalu, oloze chiyoyelo chetu chinapu chakusuuluka chikuma, kaha tuli nakukolezeza navandumbwetu veka vazate mulimo kanou.”

Vandumbwetu vavavulu vaze valisuula mujila kaneyi vahonesele vyeseko vize vyasakile kuvahonesa kuzata. Chakutalilaho, ndumbwetu William napuwenyi Sandra Vaze vali namyaka yamuji 60 vapwile nakulivwisa kuwaha chiyoyelo chavo muPennsylvania vapwile nakapani yavo yakutunga vihanda vyakumakina kaha vengishile milimo vatu 17. Vapwile muchikungulwilo  chize vanatwamenga putu vene kuwinyike wavo, kaha vausoko wavo vavavulu vatwaminenga mungalila kana. Jino omu vavasanyikile kuyanga nakuzachila kuWallkill, vejivile ngwavo navaseza vatu vosena vaze vatachikiza navyuma vyavo vyosena. William ambile ngwenyi: “Chuma chatukaluwilile chikuma shina kuseza chiyoyelo chetu chamwaza.” Kahomu valombele chikuma kuli Kalunga, ava valunga napwevo vakatukile nakuya, kaha kaveshi kuliveyako. William ambile ngwenyi: “Kuzachila haMbetele cheji kunehanga kuwahilila chikuma chize kaveshi kuhasa kwesekesa kukala chumako. Ami napuwami Sandra twapwa tuvakuwahilila chikuma kuhambakana muze twapwile kwimbo.”

Ricky, uze apwa muka-kutala milimo yosena muHawaii, vamusanyikile kuyanga nakukafwa kutunga mutango waMbetele muWarwick. Kaha puwenyi Kendra amukolezezele etavile kuya. Oloze valizakaminyine hali mwanavo Jacob uze apwile namyaka 11, hakushinganyeka numba nge mwakejilila kutwama kuchihela chachihya kuNew York State.

Ricky ambile ngwenyi: “Twashinganyekele kutonda chikungulwilo chachihya chize chapwile navanyike vavavulu vapwile nakuzovoloka kushipilitu, mangana mwanetu Jacob alikate navo.” Chikungulwilo kana katwachiwanyineko, oloze twawanyine kaha chize chapwile navanyike vavandende, navaka-Mbetele vavavulu. Ricky ambile nawa ngwenyi: “Omu twakumishile kukunguluka likumbi lyatete, ngwahulishile mwanami Jacob numba nge azangile chikungulwilo kana chize kachapwile navanyike vakulikata navoko.” Ikiye ambile ngwenyi: “Kanda mulizakaminako tata, masepa jami jino navapwa vaka-Mbetele vavakweze.”

Chapundu vene, nalikate jino navaka-Mbetele. Uno vanamukafwe ngachilihi? Ricky ambile ngwenyi: “Likumbi limwe naufuku, ngwamwene linongo linamunyika mukapete asavalilenga. Ngwashinganyekele ngwami pamo ali nakuhemena hakopyuta, kaha ngwayileko. Oloze ngwawanyine ali nakutanga Mbimbiliya. Angulwezele ngwenyi ‘Ami ngunapu jino ngumuka-Mbetele wakanyike, kaha nguli nakusaka kukumisa kutanga Mbimbiliya mumwaka wamuundu.’” Tanga kana yili nakuwahilila hakuwana nge Ricky nalisuula kwazana mumulimo wakutunga mutango muWarwick, kaha nawa chinalingisa mwanavo Jacob azovoloke kushipilitu.—Vishi. 22:6.

Hakuwana nge mulimo wakutunga muWallkill naWarwick kalinwaha ukume, ngocho ava vandumbwetu vali nakutunga vanatachikiza ngwavo kalinwomu mulimo wavo wakuzachila haMbetele ukume. Uno vali nakulizakamina hachiyoyelo chavo chakulutwe tahi? Nduma. Vavavulu vanetavila mazu vahanjikile vandumbwetu vavali namapwevo javo vakuFlorida vaze vapwile namyaka yamuji 50. John, uze apwa  mukulwane wamilimo yakutunga napuwenyi Carmen vaze vakafwilenga milimo yakutunga muWarwick vambile ngwavo: “Tunamono omu Yehova natukafwenga mukuyoya chetu, kaha katweshi kwamba ngwetu atusanyikile mangana atuzachise nakutumbila nge milimo yinakumuko.” (Samu 119:116) Kaha Luis uze atala vyakakahya napuwenyi Quenia vaze veji kuzachilanga haWallkill vambile ngwavo: “Tunalimwena nameso etu kapu omu Yehova natukafwenga vyuma vyakumujimba. Numba tuhu katwejivile omu natukayoyela kulutweko, oloze tunafwelela ngwetu Yehova mwatwalaho lika kutuzakama.”—Samu 34:10; 37:25.

Kwapwile vyuma vyavivulu vyatelele kulingisa vandumbwetu vaze vanazachilanga muNew York vahone kulisuula. Oloze vesekele Yehova ngana muze atulweza tuvosena tulingenga, ngwenyi: ‘Ngwesekenu mumone numba nge kangweshi kumisokolwela jinjanena jamwilu nakumihingunwina kuwahisa nomu namuhona mwakuchitambwila.’—Mala. 3:10.

Uno nayenu munahase kweseka Yehova nakumona omu mwamikisula tahi? Twatela kulomba kuli Yehova mangana atukafwe tupwenga namuchima wakulisuula kuzata kala mulimo mwatuhana, numba upwa wakutunga kuNew York chipwe kuvihela vyeka vyamukaye kosena. Kaha natumona omu mwatukisula.—Mako 10:29, 30.

Ndumbwetu Dale uze apwa manjimela wakutaka vyuma vyakulinga napuwenyi Cathy vakuAlabama, vakolezezele vandumbwetu valisuule kuzata milimo kana. Omu vapwile nakuzachila haWallkill vambile ngwavo: “Nge namulikaka nakuseza chiyoyelo chenu chamwaza, kaha namumona omu Yehova eji kuzachisanga shipilitu yenyi.” Uno vyuma muka mwatela kulinga numba mulisuule? Dale ambile ngwenyi: “Mutu atela kwashiwisa chikuma chiyoyelo chenyi, kaha keshi kukaliveyako.” Gary wakuNorth Carolina nazatenga mulimo wakutunga hamyaka 30. Ikiye napuwenyi Maureen vambile ngwavo chuma chimwe vali nakulivwisa kuwaha hakuzachila kuWarwick shina “kuliwana navandumbwetu vakulisezaseza vaze vanazachila Yehova haMbetele mukuyoya chavo chosena.” Gary ambile ngwenyi: “Kuzachila haMbetele chasakiwa mutu kwashiwisa chiyoyelo chenyi, kahechi chikiko kuyoya twatela kupwa nacho mumakumbi ano amapi.” Jason uze azachilile kukakahya kakezi naJennifer vakuIllinois, vambile ngwavo kuzachila haMbetele kuWallkill hijila yimwe yakutukafwa “twivwenga kwijiva nge tuli nakuzachila mulifuchi lyalihya.” Jennifer nawa ambile ngwenyi: “Tweji kusuulukanga chikuma hakwijiva ngwetu Yehova ali nakusakwilila milimo tunakuzata, nakumona ngwetu milimo kana yayilemu kumeso enyi. Kaha eji kutukisulanga mukuyoya chetu.”