Uno Vatu Vanahase Kupwa naZangi yaMuchano Tahi?
“[Zangi yinapu nge] miveso yakakahya, ukiko mulangi waYehova.”—MWASO 8:6.
1, 2. Veya vanahase kunganyala hakukekesa Mwaso waSolomone, kaha mwomwo ika? (Talenu muvwimbimbi wakulivanga.)
KALAMA umwe uze ahanjikile chihande chawenga amwene omu valizangile nakulitala vaze valimbachile. Chasolokele hatoma nge valizangile chikupu. Omu avamwene vali nakukina nakulisamba kuchihela chakuhemena, alihulishile ngwenyi, Uno ulo kana naukelila tahi? Omu namuhita myaka, kutala navakalizanga lika tahi nyi zangi yavo nayikahola? Nge navatwalaho lika kulizanga, kaha zangi kana nayikapwa yamwenemwene. Hakuwana nge malo amavulu ali nakufwa, ngocho vatu vamwe vanahase kuhulisa ngwavo uno vatu vanahase kutwalaho lika kulizanga muulo tahi?
2 Nakunyima vene mumyaka yaMwangana Solomone, vatu kavalisolwelelenga zangi yamuchanoko. Solomone ahanjikile omu chapwile mumyaka yize ngwenyi: “Ngunawane lunga umwe mulikombakaji, oloze kanda nguwane pwevo muli vosenovo. Tala, ngunawanechi kaha ngwami, Kalunga avatengele vatu vakusungama, oloze vakivo vanatondo vyuma vyakutaka vyavivulu.” (Kwambu. 7:26-29) Mumyaka yenyi, mapwevo vavavulu vakumafuchi eka vandupukilile mukulemesa Mbale, kaha vilinga vyavo vyapihile chikuma. Shikaho chapwile chachikalu kuwana lunga chipwe pwevo wavilinga vyamwaza. * Chipwe ngocho mwaso asonekele Solomone kafwe myaka 20 kunyima, wasolwele nge lunga napwevo vanahase kupwa nazangi yakwilila. Wasolwele nawa omu yapwa zangi kana nomu vanahase kuyisolola. Ngocho, vangamba jaYehova valimbata navajike vanahase kulinangula vyazangi kana nge navakekesa mukanda kanou wamuMbimbiliya.
VATU VANAHASE KUPWA NAZANGI YAMUCHANO
3. Mwomwo ika valunga napwevo vanahase kupwa lika nazangi yamuchano?
3 Tangenu Mwaso waSolomone 8:6. Mazu akwamba ngwavo “mulangi waYehova” veji kuwazachisa hakulumbununa zangi yamuchano. Zangi yamuchano yapwa “mulangi waYehova” mwomwo ikiye ayihakileko. Atengele mutu muchifwanyisa chenyi namuchima wakusolola zangi. (Kupu. 1:26, 27) Omu Kalunga ahanyine pwevo wakulivanga Eve kuli lunga watete kutenga Alama, Alama ahanjikile mazu akusolola nge amuzangile. Chapundu vene Eve nayikiye azangile Alama mwomwo ‘vamufumishile kuli ikiye.’ (Kupu. 2:21-23) Hakuwana nge Yehova ikiye atengele vatu namuchima wakulizanga navakwavo, ngocho valunga napwevo vanahase kutwalaho lika kulizanga.
4, 5. Lumbununa mukavatu mujimbu waMwaso waSolomone.
4 Zangi yavatu vausonyi wakulihandununa kayapwa kaha yakwililako, oloze yatwama namihako yayivulu. Mihako yimwe vayilumbununa kanawa muMwaso waSolomone. Mujimbu watwamamo wasolola zangi yamwanapwevo wakuShuneme chipwe Shulame, nakafunga uze azangilenga. Ou mwanapwevo apwile wamwaza kaha apwile nakulama wande wamivinyo. Jino omu Solomone atungile chilombo chenyi kwakamwihi, akunyukile, kaha alwezele vatu jenyi vamunehe muchilombo chenyi. Oloze ou mwanapwevo asolwele hatoma ngwenyi azangile kafunga. Numba tuhu Solomone afwililile kwalumuna vishinganyeka vyayou pwevo, oloze ikiye akanyine, azangile uze kafunga. (Mwaso 1:4-14) Kutwala muze uze kafunga amukavile muze muchilombo, kaha valihanjikishile namazu azangi.—Mwaso 1:15-17.
5 Omu Solomone akindulukile kuYelusalema, ayile nauze mwanapwevo, kaha uze kafunga avakavangijile. (Mwaso 4:1-5, 8, 9) Numba tuhu Solomone alembejekele uze mwanapwevo mangana etave, oloze akanyine. (Mwaso 6:4-7; 7:1-10) Amulwezele akinduluke kwimbo lyenyi. Mwaso kana wakukulula namazu auze mwanapwevo akusolola zangi apwile nayo hali uze kafunga hakwamba ngwenyi “anguhwisako, upwenga nge umbwangongo” uze ali nakulaha.—Mwaso 8:14.
6. Mwomwo ika chapwila chachikalu kutachikiza vatu vahanjika mazu mumwaso?
6 Mwaso kanou asonekele Solomone uze wapwa “mwaso wamyaso” yenyi, vawimba kanawa naulumbunwiso wamwaza, kaha chapwa chachashi kwijiva vaze vapwile nakuwimba. (Mwaso 1:1) Ndikishonali yimwe yamba ngwayo, “hakusoneka mujimbu kachapwa chachilemu kusolola majina avatu navyuma vali nakuhanjikako.” (The New Interpreter’s Dictionary of the Bible) Echi chikiko chalingisa majina avatu ahone kusoloka mumwaso kana, mangana mwaso uyeme nakwivwakana kanawa chakuzeneka kuhukana-hukana. Chipwe ngocho, mazu eji kupwanga mumujimbu akiko eji kusololanga nge himutu weka nawahanjika. *
“ZANGI YOVE YINAWAHE KUHAMBAKANA VINYO”
7, 8. Vyuma muka tunahase kuhanjika ‘hazangi yamwaza’ vasoneka muMwaso waSolomone? Hanenu chakutalilaho.
7 MuMwaso waSolomone vavulukamo chikuma ‘vyakuwaha chazangi’ yauze mwanapwevo nakafunga. Numba tuhu mazu atwamamo vawahanjikile kuvatu vaze vayoyele myaka 3,000 kunyima, kaha nawa asoloka kupwa aungeji kuvatu vamwe makumbi ano, oloze alumbununa kanawa omu veji kwivwanga vatu nomu atalikisa mukuyoya. Chakutalilaho, kafunga asangejekele meso achilembekeshi auze mwanapwevo hakuwafwanyisa ‘kumeso atumbowa.’ (Mwaso 1:15) Uze mwanapwevo nawa afwanyishile meso auze kafunga kutumbowa vavene keshi kumeso avoko. (Tangenu Mwaso waSolomone 5:12.) Kafunga evwile kuwaha chikuma hakumona liso litoma lyauze mwanapwevo kwijiva nge kambowa uze nasane mumavele.
8 Keshi nge mazu osena vasoneka muli ou mwaso waSolomone wahanjika hakuwaha chamutu kahako, nduma. Chakutalilaho, achitalenu hamazu ahanjikile uze kafunga havyuma ahanjikile uze mwanapwevo. (Tangenu Mwaso waSolomone 4:7, 11.) Ambile ngwenyi “kumivumbo yove kweji kusotwojokanga nge kungenga.” Mwomwo ika? Mwomwo uchi wakusotoka kuchitana uyema, kaha ukwechi kalivumba kamwaza kuhambakana uze vanakamuna lyehi. Kaha nawa ngwenyi: “Mushi yalilimi lyove muli uchi namavele,” kulumbununa nge hanjikiso yenyi yamwaza ngana mwauchi namavele. Jino omu uze kafunga alwezele uze mwanapwevo ngwenyi, “unawahe mwosena, muli ove kamweshi katengako,” apwile wamwaza muvyuma vyosena kuhakilako vene namujimba.
9. (a) Zangi muka yize veji kusololanga vaze valimbata? (b) Mwomwo ika chapwila chachilemu kuli vaze valimbata kulisolwela zangi?
9 Ulo kawapwa nge chivwasano chize vanasayina hamapapilo chakuzeneka zangiko. Oloze zangi yikiko chuma chachinene chize chazamisa malo avaka-Kulishitu. Uno zangi muka vene eyi tuli nakuhanjika? Uno yapwa zangi yize vanangula najishimbi jamuMbimbiliya tahi? (Yowa. 1, 4:8) Uno zangi kana yalifwana nazangi yize vatu veji kulisolwelanga navausoko wavo mujitanga tahi? Kutala yapwa zangi yize veji kulisolwelanga vasepa namutu tahi? (Yowa. 11:3) Kutala yapwa zangi yakwivwila mutu peha tahi? (Vishi. 5:15-20) Jizangi joseneji kujihaka hamwe jikiko jatunga zangi yalunga napwevo muulo. Mutu eji kwivwanga ngwenyi vamuzanga nge navamusolwela zanga mujila yamwaza. Shikaho chapwa chachilemu kuli vaze valimbata kulisolwela zangi muchishishisa chakundupukila kaha mumilimo yahakumbi hakumbi. Echi chikiko chinahase kulingisa vaze valimbata vakinge ulo wavo nakupwa vakuwahilila. Nge vatu vafuma muvisemwa muze vausoko veji kutondelanga mutu wakulimbata nenyi, kaha vatu kana kavalijiva kanawako swi nakulikumbi lyakulimbata. Vatela kuhanjikanga hatoma ngwavo valizanga. Kulinga ngocho nachivakafwa vazamise ulo wavo nakufukila.
10. Kushinganyeka hamazu azangi chinahase kutukafwa ngachilihi?
10 Kulisolwela zangi muulo cheji kunehanga nawa mihako yamwaza. Mwangana Solomone alisuwile kulingila uze mwanapwevo wakuShulame “jizeze jaulu najimota japalata.” Amwalishile chikuma hakuwaha chenyi ngwenyi, “wamwaza nge kakweji, utoma nge likumbi.” (Mwaso 1:9-11; 6:10) Oloze uze mwanapwevo azangile lika uze kafunga. Vyuma muka vyamujikijishile nakumuvendejeka omu apwile kwakusuku nauze kafunga? Atulweza vyuma vyamukafwile. (Tangenu Mwaso waSolomone 1:2, 3.) Anukile ‘mazu azangi’ auze kafunga. Kuli yikiye mazu kana ‘awahile kuhambakana vinyo’ vize vyeji kuwahisanga muchima wamutu, kaha lijina lyenyi lyapwile nge ‘maji vanahingunwina’ mumutwe. (Samu 23:5; 104:15) Enga, kushinganyeka mazu azangi chinahase kulingisa zangi yavatu yikole. Chikupu vene, chapwa chachilemu kulisolwela zangi muulo lwola lwosena.
KANDA KUHINDULA OU NGWAZANGA “PALANGA NOMU MWASAKA”
11. Vyuma muka navalinangula vaka-Kulishitu vavajike kuli mwanapwevo wakuShulame uze alwezele vakwavo vahone kuhindula uze azangile?
11 Vaka-Kulishitu vaze vali nakusaka mutu wakulimbata nenyi vanahase kulinangula vyavivulu kuMwaso waSolomone. Mwanapwevo wamumujimbu kana kazangile Solomoneko. Alishingile navana vaYelusalema ngwenyi: “Kanda mumuhindulou ngwazangako, chipwe kumutonesa, palanga nomu mwasaka.” (Mwaso 2:7; 3:5) Mwomwo ika? Mwomwo kachapwa chakutamoko kusolwela zangi kala mutu wausonyi weka uze mwakusakako. Muka-Kulishitu uze anakutonda mutu wakulimbata nenyi atela kuvandamina swi noho mwakasolokela mutu uze mwakazanga chikuma.
12. Mwomwo ika uze pwevo wakuShulame azangilile kafunga?
12 Mwomwo ika uze mwanapwevo wakuShulame azangile kafunga? Uze kafunga apwile wamwaza nge “mbwangongo,” mavoko enyi apwile akukola nge “tuzekeso vanahake jimbelelu.” Mahinji enyi apwile amwaza akukola nge “jipanda jamamole.” Ou lunga kapwile kaha wamwaza nakujikizako, oloze apwile nawa nge “mutondo wamihako yamwaza mumitondo yamumusenge.” Ou mwanapwevo wakushishika kuli Yehova hakuhanjika mazu kana, asolwele nge uze lunga apwile wakuhya kushipilitu.—Mwaso 2:3, 9; 5:14, 15.
13. Mwomwo ika uze kafunga azangilile uze mwanapwevo?
13 Nyi ngachilihi uze mwanapwevo wakuShulame? Numba tuhu kuwaha chenyi chakunywile mwangana uze apwile ‘namasano 60, natulumbu twamasano 80, navasanda jamapwevo navahona kulava,” oloze alimwene nge jitemo ‘jaloza jamuvinema’ jize jalisalile. Ou mwanapwevo apwile wakulinyisa sulumunu. Evi vikiko vamuvulukilile kuli uze kafunga ngwenyi apwile nge jitemo ‘jalilya muvikwata’ jize amwenenga chikuma kafunga. Chapundu vene, uze mwanapwevo apwile wakushishika kuli Yehova.—Mwaso 2:1, 2; 6:8.
14. Zangi vasolola muMwaso waSolomone yanangula vyuma muka vaka-Kulishitu navasaka wakulimbata nenyi?
14 Visoneka vyalweza vaka-Kulishitu vavajike vambachile nakusombokela “muli Mwata kaha.” (Koli. 1, 7:39) Mutu wamujike uze mwasaka wakulimbata nenyi atela kutonda uze eji kuzachilanga Yehova, nakulihenda kukufwila vatu vaze kavetavako. Chasakiwa kupwa vakuunda, navilinga vyamwaza vyakushipilitu, nakufwelela muli Yehova numba mutu asakule kanawa wakulimbata nenyi. Evi vikiko vilinga apwile navyo uze kafunga nauze mwanapwevo.
Vaka-Kulishitu vatela kulihenda kukufwila vatu vaze kavetavako (Talenu palangalafu 14)
MWENGA WAMI “NAPU MILEMBA VANASHICHI”
15. Chakutalilaho muka uze mwanapwevo wakuShulame asela vaka-Kulishitu vavajike?
15 Tangenu Mwaso waSolomone 4:12. Mwomwo ika uze kafunga afwanyishilile uze mwanapwevo ‘kumilemba vanashichi’? Milemba yize vanashichi yinapu nge kembwe yize vanakiyi yize kaveshi kwingila kuli kala mutuko, oloze kuvanga kaha vaze vali nasapi yakusokolwesa. Uze mwanapwevo wakuShulame afwanyine nge milemba mwomwo zangi ayilaminyinyine kaha uze kafunga mwakapwa lunga lyenyi. Ou mwanapwevo hakuhona kwitava mwangana, asolwele nge apwile “kembwe” keshi nge “lipito” lyakuhona kupachika lize vanahase kusokolola kuli kala mutuko. (Mwaso 8:8-10) Navaka-Kulishitu vavajike, vatela kulama zangi yavo yize vatela kukasolwela mutu uze navakalimbata nenyi.
16. Vaze vanakusaka kulimbata navalinangula vyuma muka kuMwaso waSolomone?
16 Omu uze kafunga alombele uze mwanapwevo wakuShulame ayenga nenyi nakupasala, vandumbwenyi vamalunga kavamwitavishileko. Oloze vamuhanyine mulimo wakulama wande wamivinyo. Mwomwo ika? Uno kavamufweleleleko tahi? Nyi vamumwene ngwavo apwile wakunyamwina mumeso? Nduma, vapwile kaha nakumukinga kuchina mwengila mucheseko. (Mwaso 1:6; 2:10-15) Vyuma muka natulinangulaho? Vandumbwetu vavajike vatela kulihenda kuvyuma vize navivalingisa valinge ujila shimbu kanda valimbate. Kanda kuyanga kuvihela vyakuhengama oku muli muvavali kahako. Nahalwola lweka vene, kamwatela kulinga vyuma vize navimihaka muchesekoko.
17, 18. Vyuma muka munanganyala hakushimutwila mukanda waMwaso waSolomone?
17 Vaka-Kulishitu veji kulizanganga chikuma omu veji kulimbatanga. Hakuwana nge ulo vauhakileko kuli Yehova mangana wililenga lika, shikaho chapwa chachilemu kuli vaze valimbata vazate nangolo nakutwalaho lika kulizanga ngana muze tweji kusambizanga kakahya mangana kahone kujima.—Mako 10:6-9.
18 Nge muli nakusaka wakulimbata nenyi, kaha tondenu mutu uze namukazanganga mukuyoya chenu chosena ngana muze vasolola muMwaso waSolomone. Numba muchili nakutonda mutu wakulimbata nenyi chipwe mwatwama lyehi muulo, munahase kupwa nazangi yamuchano yize yapwa “mulangi waYehova.”—Mwaso 8:6.
