1. Uno kulondezeza Yesu nachitukafwa ngachilihi tupandame kuli Yehova?

TWEJI kufwila kulondezeza vatu vaze vakwechi vilinga vize twasaka. Havatu vosena vatwamaho lyehi hano hamavu, Yesu Kulishitu ikiye mutu wamwenemwene twatela kulondezeza. Mwomwo ika? Yesu ivene ambile ngwenyi: “Ou namono ami namono naTata nawa.” (Yowa. 14:9) Yesu asolwele vilinga vyaIse mujila yakukupuka, ngocho vatu vaze vamwene ou Mwana chafwanyine nge vanamono Ise. Shikaho, nge natulondezeza Yesu, kaha natupandama kuli Yehova uze apwa Mutu wamulemu hano hamavu namwilu. Pundu vene, natunganyala mwamunene nge natulondezeza vilinga vyaMwanenyi.

2, 3. (a) Mwomwo ika Yehova atuhanyina mijimbu yakulumbununa Mwanenyi, kaha Yehova asaka ngwenyi tulinge ika? (b) Vyuma muka natushimutwila muchihande chino nachechi nachikavangizaho?

² Uno tunahase kutachikiza ngachilihi omu apwa Yesu? Twatokwa hakupwa namijimbu yamuMbimbiliya yize yalumbununa omu apwa Yesu. Yehova atuhana mijimbu kana muVisoneka VyachiHelase vyaVaka-Kulishitu, mwomwo asaka tutachikize kanawa  Mwanenyi nakumulondezeza. (Tangenu WaPetulu 1, 2:21.) MuMbimbiliya, chakutalilaho chize atusela Yesu vachifwanyisa ‘kujitambo.’ Ngocho Yehova ali nakutulweza tukavangize munyima yaYesu nakutambuka mujitambo jenyi. Numba tuhu Yesu atusela chakutalilaho chakukupuka, oloze etu katwakupuka mwosenako. Tachikizenu ngwenu Yehova kasaka ngwenyi kuvanga tupwenga vakukupuka mwosena hakukavangiza mujitambo jaYesuko. Oloze asaka tulondezeze ou Mwanenyi noho hakumina ngolo jetu hakupwa tuvatu vakuzeneka kukupuka mwosena.

³ Tushimutwilenu jino havilinga vimwe vyamwaza vyaYesu. Muchihande chino, natushimutwila hamuchima wenyi wakulinyisa nakutetela. Kaha muchihande nachikavangizaho, natukekesa muchima wenyi wakumika nakunangakana. Hakushimutwila vilinga kanevi, natukumbulula vihula vino vitatu: Uno muchima kana walumbununa ika? Uno Yesu ausolwele ngachilihi? Tunahase kumulondezeza ngachilihi?

4. Uno kulinyisa chapwa chika?

⁴ Uno kulinyisa chapwa chika? Mukaye kano kanazale navatu vakulivwimba, vamwe vashinganyeka ngwavo mutu wakulinyisa katwama nangoloko, kaha nawa kahamukako. Oloze omu keshi mukikoko. Kulinyisa chasakiwa kupwa nangolo nakumika. Kulinyisa chapwa kuhona kupwa namuchima wakulivwimba chipwe wakulitunda. MuVisoneka VyachiHelase vyaVaka-Kulishitu, lizu valumuna ngwavo “kulinyisa” valyalumuna nawa ngwavo kulikehesa. (Fwili. 2:3) Tunahase kusolola nge twapwa vakulinyisa hakutachikiza omu twapwa. Mukanda umwe wahanjika haMbimbiliya wamba ngwawo: “Kulinyisa chapwa kutachikiza ngwetu twapwa tuvakukuminamo kumeso aKalunga.” Kachi nge natulinyisa chikupu kumeso aKalunga, kaha katweshi kumona vakwetu vatu kupwa vamokomokoko. (Loma 12:3) Chapwa chachikalu vatu vakuhona kukupuka mwosena kupwa vakulinyisa. Oloze tunahase kupwa vakulinyisa nge natushinganyeka ngwetu twapwa vakukuminamo kumeso aKalunga, nakulondezeza mujitambo jaMwanenyi.

5, 6. (a) Uno Mikayele kangelo wakulitulaho apwa iya? (b) Mikayele asolwele ngachilihi muchima wakulinyisa?

⁵ Yesu asolwele ngachilihi muchima wakulinyisa? Ou MwanaKalunga napunga lika wakulinyisa putu vene omu apwile mutu wakushipilitu mwilu nomu apwile hano hamavu mwamutu wakukupuka mwosena. Tutalenu vyakutalilaho vino vyavindende.

⁶ Vilinga vyenyi. Yuta uze asonekele mukanda umwe wamuMbimbiliya asonekele vyuma vimwe alingile Yesu shimbu kanda ezenga hano hamavu. (Tangenu WaYuta 9.) Hakupwa Mikayele kangelo wakulitulaho, Yesu “apwile nakuhamika Liyavolo” ‘nakulipula jipami’ nayou wakuhuka. Vapwile nakulipikila “hamujimba waMose.” Anukenu ngwenu omu Mose afwile, Yehova amufunjile kuchihela chize kavatachikijile vatuko. (Lushi. 34:5, 6) Chasoloka nge Liyavolo asakile vatu vazachise mujimba waMose hakukundwiza kulemesa chamakuli. Vyeshovyo vyuma vyavipi apwile nakushinganyeka Liyavolo, Mikayele ahamukile nakumukanyisa. Mukanda umwe wamba ngwawo mazu achiHelase valumuna ngwavo “apwile nakuhamika” ‘nakulipula jipami’ vawazachisa nawa kutalisa kukusopa muzango yakusopela, kaha anahase kulumbununa nge “Mikayele akanyishile Liyavolo kumbata mujimba waMose.” Chipwe ngocho, ou Kangelo Wamunene atachikijile ngwenyi kavamuhanyine ngolo jakusopesa Liyavoloko. Ahakile chihande chosena mumavoko aYehova uze apwa Muka-kusopesa Wakulitulaho. Ngocho Mikayele kalihanyine ngolo jize kavamuhanako, numba tuhu halwola kana kwapwile vikokojola. Pundu vene, Mikayele asolwele muchima wakulinyisa.

7. Yesu asolwele ngachilihi muchima wakulinyisa muhanjikiso yenyi navyuma alingilenga?

 ⁷ Omu Yesu apwile hano hamavu, ahanjikile nakulinga vyuma mujila yize yasolwele nge apwile chikupu wakulinyisa. Hanjikiso yenyi. Kasakile vatu vamwalisengako. Oloze asakile vatu valisenga Ise. (Mako 10:17, 18; Yowa. 7:16) Kasembulwilenga tumbaji twenyi chipwe kuvalingisa valimone nge vamokomokoko. Oloze avavumbikilenga, nakuvalisa havyuma vyamwaza valingilenga, nakuvalweza ngwenyi avafwelelele chikuma. (Luka 22:31, 32; Yowa. 1:47) Vyuma alingilenga. Yesu asakwile kupwa nachiyoyelo chachashi, kasakile kulikungulwila vyuma vyavivuluko. (Mateu 8:20) Alisuwile kuzata milimo yize vamona vatu kupwa yamokomoko. (Yowa. 13:3-15) Asolwele hatoma nge apwile wakulinyisa hakwononoka. (Tangenu Wavaka-Fwilipi 2:5-8.) Yesu kapwile nge vatu vakulitukwojola vaze kavasaka kwononokako. Alisuwile kulinga mwayile muchima waKalunga, kaha “ononokelenga palanga nakukufwa.” Pundu vene, Yesu uze vavuluka nawa ngwavo Mwanamutu apwile “wakulikehesa mumuchima.”—Mateu 11:29.

8, 9. Tunahase kusolola ngachilihi muchima wakulinyisa?

⁸ Uno tunahase kulondezeza ngachilihi muchima waYesu wakulinyisa? Vilinga vyetu. Kulinyisa chatela kutulingisa tuhone kulihana ngolo jize kavatuhanako. Kachi nge natutachikiza ngwetu katwatwama nangolo jakusopesa vakwetuko, kaha katweshi kutokomenyanga hatutenga twavakwetu chipwe kuvashinganyekela vyuma vyavipiko. (Luka 6:37; Yako. 4:12) Kulinyisa nachitukafwa tulihende kukulimona etu vavene kupwa ‘tuvaka-kwoloka chikuma,’ chipwe kupopolola vandumbwetu vaze kaveshi nauhashi chipwe namilimo yize tukwechi etuko. (Kwambu. 7:16) Vakulwane vakulinyisa kavalimona kupwa vavalemu chikuma kuhambakana vakwavo vaka-kwitavako. Oloze tufunga kana ‘vamona vakwavo ngwavo vavahambakana,’ kaha veji kulikehesanga nakulimona vavene kupwa vavandende.—Fwili. 2:3; Luka 9:48.

⁹ Achitalenu hali ndumbwetu W. J. Thorn uze apwile kalama wakutambwojoka kufuma mu 1894. Azachile mulimo kanou hamyaka yayivulu, kaha vamusanyikile jino haMbetele (yize vavulukilenga ngwavo Kingdom Farm) munganda yaNew York. Vamuhanyine mulimo wakuzachila muzuvo yatusumbi. Ambile ngwenyi: “Kachi nge ngunaputuka kushinganyeka ngwami nguwamulemu chikuma, ngweji kulihulikanga nakushinganyeka ngwami: ‘Ami ngwapwa nge ngulukungu kaha. Ikaze nangulivwimbila?’” (Tangenu Isaya 40:12-15.) Ou ndumbwetu apwile wakulinyisa chikupu.

10. Tunahase kusolola ngachilihi muchima wakulinyisa muhanjikiso namuvyuma tweji kulinganga?

¹⁰ Hanjikiso yetu. Kachi nge tukwechi muchima wakulikehesa, kaha vyuma natuhanjika navisolola ngocho. (Luka 6:45) Hakushimutwila navakwetu, katwatela kuhanjika chikuma havyuma vyamwaza tweji kulinganga navihela twatwama navyoko. (Vishi. 27:2) Oloze twatela kumona vilinga vyamwaza vyavandumbwetu nakuvasangejeka havyuma vyamwaza veji kulinganga, nauhashi wavo, namilimo yavo. (Vishi. 15:23) Vyuma tweji kulinganga. Vaka-Kulishitu vakulinyisa kavafwila ulemu mukaye kanoko. Veji kwashiwisanga chiyoyelo chavo, nakuzata milimo yize vamona vatu mukaye kupwa yamokomoko mangana vazachile chikuma Yehova. (Chimo. 1, 6:6, 8) Chachinenenyi, natusolola nge twapwa tuvakulinyisa kachi nge natupwa vakwononoka. Chasakiwa kupwa namuchima wakulikehesa numbanyi ‘twononoke kuli vaze vali nakutwaminyina’ muchikungulwilo, nakwitavila jindongi veji kutuhananga kuliuka lyaYehova nakujikavangiza.—Hepe. 13:17.

11. Lumbununenu omu chapwa kutetela.

¹¹ Uno kutetela chapwa chika? Lizu “kutetela” lyalumbununa muchima wauvwovu, wakeke. Kutetela chapwa muhako wazangi, kaha chatalisa kuvilinga vyakufwana nge likoji nakeke. Visoneka vyavuluka nawa vilinga vyakufwana nge “keke,” “kutetela,” “[na]zangi.” (Luka 1:78; Koli. 2, 1:3; Fwili. 1:8) Mukanda umwe wahanjika haMbimbiliya wamba ngwawo, kupwa namuchima wakutetela kachapwa kaha kwivwila keke vatu vaze vanakalikizako. Oloze chalumbununa “kuvazakama chikuma nakuvakafwa” hakulinga vyuma vimwe vize navyalumuna chiyoyelo chavo. Mutu uze apwa muka-kutetela eji kuzatanga nangolo akafwe vakwavo.

12. Vyuma muka vyasolola nge Yesu evwililenga vatu keke, kaha keke yamulingishile alinge ika?

¹² Yesu asolwele ngachilihi muchima wakutetela? Muchima navilinga vyenyi vyakutetela. Yesu atetelelenga vakwavo. Omu Yesu amwene sepa lyenyi Maliya navaze apwile navo vali nakulila Lazalu uze afwile, nayikiye “asotwele masoji.” (Tangenu Yowano 11:32-35.) Evwile keke chikuma ngana yize evwile omu asangwile mwanatuliwe umwe, ngocho asangwile Lazalu. (Luka 7:11-15; Yowa. 11:38-44) Vyumevi alingile Yesu mwomwo yamuchima wenyi wakutetela, vyakafwile Lazalu akayoyelenga mwilu. Shimbu kanda vyumevi visoloke, Yesu ‘evwililile keke’ liyongomena lyavatu vaze vejile kuli ikiye. Hakupwa namuchima wakutetela, “aputukile kuvanangula vyuma vyavivulu.” (Mako 6:34) Pundu vene, vaze vetavilile vyuma avanangwile valumwine kuyoya chavo. Nyingililenu ngwenu Yesu kapwile kaha nakwivwila keke vatuko, oloze keke yamulingishile avakafwe.—Mateu 15:32-38; 20:29-34; Mako 1:40-42.

13. Uno Yesu azachishile ngachilihi mazu akutetela hakuhanjika navatu? (Talenu muvwimbimbi wakulivanga.)

¹³ Mazu enyi akutetela. Muchima waYesu wakutetela wamulingishile ahanjikenga nalikoji, chikumanyi kuli vatu vakuhomba. Kaposetolo Mateu hakuvuluka mazu aIsaya, ahanjikile kutalisa kuli Yesu ngwenyi: “Kakweshi lihongo lyakufunyuka mwakachikako, chipwe wanda uze uli nakufwinda wishi mwakajimako.” (Isa. 42:3; Mateu 12:20) Yesu ahanjikilenga mujila yize yahizumwinenga vaze vapwile nge mahongo akufunyuka chipwe nge wanda wakulinongo uze uli hakamwihi nakujima. Ambulwilenga mujimbu walutalililo mangana ajichike vaze “vahokoka michima.” (Isa. 61:1) Asanyikile vosena vaze vapwile “nakufulyangila nakulemuwa naviteli” mangana vezenga kuli ikiye, nakuvafwelelesa ngwenyi navapwa “vakuhizumuka.” (Mateu 11:28-30) Afwelelesele vaka-kumukavangiza ngwenyi Kalunga azakama vatu jenyi vaze veji kumulemesanga, kuhakilako vene navava “vavandende,” ava vamona kuvatu mukaye kupwa vamokomoko.—Mateu 18:12-14; Luka 12:6, 7.

14. Tunahase kusolola ngachilihi muchima wakutetela vakwetu?

¹⁴ Tunahase kulondezeza ngachilihi muchima waYesu wakutetela? Muchima wetu wakutetela. Muchima wakutetela chipwe wakeke kaweshi kulijila uveneko, oloze Mbimbiliya yatukolezeza tuzate nangolo tupwenga nawo. “Muchima wakeke” naukiko watwama havilinga vyamutu wamuhya uze vaka-Kulishitu vosena vatela kuvwala. (Tangenu Wavaka-Kolose 3:9, 10, 12.) Uno munahase kusolola ngachilihi muchima wakutetela vakwenu? Kasununenu chikuma michima yenu. (Koli. 2, 6:11-13) Ivwililenu kanawa nge mutu ali nakumilweza ukalu wenyi chipwe omu ali nakwivwa. (Yako. 1:19) Hunananenu nakulihulisa ngwenu: ‘Kachi nge ami yami ngwapwanga muukalu kana, kachi ngunevu ngachilihi? Kachi vyuma muka nangusaka?’—Petu. 1, 3:8.

15. Vyuma muka tunahase kulinga mangana tukafwe vaze vanafwane nge lihongo lyakufunyuka chipwe nge wanda wakulinongo uze uli hakamwihi nakujima?

 ¹⁵ Vilinga vyetu vyakutetela. Muchima wakutetela ukiko weji kutulingisanga tusake kukafwa vakwetu, chikumanyi vaze vanafwane nge lihongo lyakufunyuka chipwe nge wanda wakulinongo uze uli hakamwihi nakujima. Uno tunahase kuvakafwa ngachilihi? Hali Wavaka-Loma 12:15 vatulweza ngwavo: “Lilenunga navaze veji kulilanga.” Vatu vaze vanahombo vasaka kuvevwila keke keshi kuvakafwa kahako. Ndumbwetu umwe uze vavendejekele kuli vakwavo vaka-kwitava omu afwishile mwanenyi wapwevo ambile ngwenyi: “Ngwevwile hwo kumuchima hakumona masepa naveza nangukukafwa kulila mwanami.” Tunahase kusolola nawa muchima wakutetela hakukafwa vakwetu milimo yimwe. Pamo kuli tuliwe umwe uze ali nakusaka kumuwahishila zuvo yenyi, chipwe muka-Kulishitu umwe wakashinakaji uze ali nakusaka kumutwalanga kukukunguluka, chipwe mumulimo wamuwande, chipwe kuchipatela. Milimo yayindende yakufwana nge eyi yinahase kukafwa chikuma vakwetu vaka-Kulishitu vaze vali muukalu. (Yowa. 1, 3:17, 18) Chachilemunyi, tunahase kusolola muchima wakutetela vakwetu hakwazananga chikuma mumulimo wamuwande. Enga, jila yayilemu tunahase kukafwilamo vatu vamichima yayivwovu shina kuvambulila mujimbu wamwaza.

16. Mazu muka tunahase kuhanjika mangana tukolezeze vaze vanahombo?

¹⁶ Mazu etu akutetela. Muchima wetu wakutetela ukiko weji kutulingisanga ‘tuhanjikenga nakuvendejeka kuvatu vaze vanahombo.’ (Teso. 1, 5:14) Mazu muka tunahase kuhanjika mangana tukolezeze vatu kana? Tunahase kuvahizumuna hakuvafwelelesa ngwetu twavazakama, kaha nawa twavazanga chikuma. Tunahase kuvasangejeka mangana vamone vilinga vyavo vyamwaza nauhashi wavo. Tunahase kuvanukisa ngwetu Yehova ikiye avasanyikile vapandame kuli Mwanenyi, ngocho avamona kupwa vavalemu chikuma. (Yowa. 6:44) Tunahase kuvafwelelesa ngwetu Yehova azakama chikuma vangamba jenyi vaze “vahokoka michima” vaze “vakwechi jishipilitu jakuchikika.” (Samu 34:18) Mazu etu akutetela anahase chikupu kukafwa vaze vali nakusakiwa kuvavendejeka.—Vishi. 16:24.

17, 18. (a) Yehova asaka ngwenyi vakulwane valinge ika kumikoko jenyi? (b) Vyuma muka natushimutwila muchihande chinakavangizaho?

¹⁷ Enu vakulwane, Yehova asaka mutetelenga mikoko jenyi. (Vili. 20:28, 29) Anukenu ngwenu himulimo wenu wakulisa mikoko jenyi, nakuvakolezeza, nakuvahizumuna. (Isa. 32:1, 2; Petu. 1, 5:2-4) Ngachize mukulwane uze akwechi muchima wakutetela keshi kushinyinyika mikokoko. Keshi kukasa jishimbi chipwe kushinyinyika vakwavo mangana valinge vyuma vize kaveshi kuhasa kulingako. Oloze eji kuhizumunanga vakwavo, nakufwelela ngwenyi vali nakuzachila Yehova noho hakumina ngolo javo mwomwo vamuzanga.—Mateu 22:37.

¹⁸ Pundu vene, kuhunanana hamuchima waYesu wakulinyisa nawou wakutetela chinatukafwe tufwile kutambukanga lika mujitambo jenyi. Muchihande chinakavangizaho, natushimutwila muchima weka wamwaza waYesu, wakumika nakunangakana.