Londezezenunga Muchima waYesu waKumika naKunangakana
“Numba tuhu kamwamumweneko, oloze munamuzange. Numba tuhu oholili kamweshi nakumumonako, oloze munafwelela muli ikiye.”—PETU. 1, 1:8.
1, 2. (a) Vyuma muka navitukafwa tukayovoke? (b) Vyuma muka navitukafwa tutwaleho lika kutambuka ungeji wetu wakuya kukuyoya?
OMU tweji kwalumukanga nakupwa tumbaji twaKulishitu, chinafwane nge tunaputuka kutambuka ungeji. Ungeji kana unahase kututwala kukuyoya mwilu chipwe hano hamavu. Yesu ambile ngwenyi: “Ou mwakakachila palanga nakusongo [kusongo yakuyoya chenyi choholyapwa chipwe kusongo yakatwamino kamyaka yino], ikiye navakalwila.” (Mateu 24:13) Enga, kachi nge natupwa lika vakushishika mukuyoya chetu, kaha natukayovoka chikupu. Oloze omu tuli nakutambuka ou ungeji wetu, twatela kuzangama kuchina natuhungukila kuvyuma vyeka chipwe kujimbala. (Yowa. 1, 2:15-17) Uno tunahase kutwalaho lika ngachilihi kutambuka ou ungeji wetu?
2 Yesu uze tweji kutalilangaho atutuvila lyehi jila. Ungeji wenyi vausoneka muMbimbiliya. Kachi nge natulinangula mujimbu wenyi, kaha natutachikiza omu apwa. Natumuzanga nakumufwelela. (Tangenu WaPetulu 1, 1:8, 9.) Anukenu ngwenu, kaposetolo Petulu ambile ngwenyi Yesu atusela chakutalilaho mangana tukavangizenga kanawa mujitambo jenyi. (Petu. 1, 2:21) Kachi nge natukavangiza kanawa mujitambo jenyi, kaha natukatambula vyuma twafwelela, kulumbununa nge navakatulwila. * Muchihande chinafumuho, tunashimutwila omu tunahase kulondezeza muchima waYesu wakulinyisa nakutetela. Tukekesenu jino omu tunahase kukavangiza mujitambo jenyi hakusolola muchima wakumika nakunangakana.
YESU APWA WAKUMIKA
3. Uno kumika chapwa chika, kaha tunahase kupwa nacho ngachilihi?
3 Kumika chinahase kutukafwa tupwenga vakujikiza hakuhita muvihuli. Kumika nawa cheji kutukafwanga tukundwize vyuma vyakwoloka. Chinahase kutukafwa tupwenga vakuunda nakupwa vakushishika kuli Kalunga kachi nge natumona vyeseko. Kumika chatambukila hamwe nawoma, nalutalililo, nazangi. Mujila muka? Kwivwa Kalunga woma cheji kutukafwanga tuhamuke nakuhona kwivwa vatu woma. (Samwe. 1, 11:7; Vishi. 29:25) Kupwa nalutalililo lwamwenemwene cheji kutukafwanga tushishike kuvyuma vili nakwiza kulutwe, nakuhona kushishika kaha havyeseko tuli nakuhitamo oholyapwa. (Samu 27:14) Kupwa nazangi yakulisuula cheji kutukafwanga tupwenga vakumika numba nge myono yetu yili muponde. (Yowa. 15:13) Tweji kupwanga namuchima wakumika hakufwelela muli Kalunga nahakukavangiza mujitambo jaMwanenyi.—Samu 28:7.
4. Uno Yesu asolwele ngachilihi muchima wakumika omu atwamine “mukachi kavaka-kunangula” mutembele? (Talenu muvwimbimbi wakulivanga.)
4 Numba vene omu Yesu apwile namyaka yakusemuka 12, omikile nakukundwiza vyuma vyakwoloka. Nyingililenu vyuma vyasolokele omu Yesu apwile “mutembele, natwame mukachi kavaka-kunangula.” (Tangenu Luka 2:41-47.) Ava vaka-kunangula vatachikijile kanawa Jishimbi jaMose nakutachikiza nawa visemwa vyavatu vize vyazeyeselenga Jishimbi kana. Oloze Yesu kevwile woma nakuhola kuluko, apwile “nakuvehwojola.” Yesu hano kapwile nakuvehula vihula vyamokomoko vize veji kuhulisanga vanyikeko. Yesu apwile nakuvehula vihula vize vyavalingishile vamwivwilile nakushinganyeka chikuma havihula kana. Numba tuhu ava vaka-kunangula vesekele kwihula Yesu vihula vyavikalu mangana vamuhonese, oloze vahonene. Vatu vosena vaze vapwile nakumwivwilila, kuhakilako vene navaka-kunangula “valikomokelele chikuma hakunangakana chenyi nomu akumbulwilenga vihula.” Vyuma akumbulwilenga vyakundwijile muchano wamuMazu aKalunga.
5. Yesu asolwele ngachilihi muchima wakumika omu apwile nakuzata mulimo wenyi?
5 Yesu asolwele muchima wakumika mujijila jajivulu omu apwile nakuzata mulimo wenyi. Asopolwele hatoma vatwamina vamukwitava vaze vahungumwishilenga vatu nakunangula chavo chamakuli. (Mateu 23:13-36) Ahonesele vyuma vyavipi vyamuno mukaye. (Yowa. 16:33) Atwalileho lika kwambulula chamokomoko navaka-kole vaze vamwimanyinyinenga nakole. (Yowa. 5:15-18; 7:14) Ahamukile nakutomesa tembele mapapa kavali hakuhangamo vaze vapwile nakupihisa kulemesa chamuchano.—Mateu 21:12, 13; Yowa. 2:14-17.
6. Yesu asolwele ngachilihi muchima wakumika halikumbi lyamakumishilo lyakuyoya chenyi hano hamavu?
6 Cheji kutukolezezanga chikuma hakumona omu Yesu asolwele muchima wakumika halwola apwile muluyando. Achitalenu muchima wakumika asolwele halikumbi lyamakumishilo lyakuyoya chenyi hano hamavu. Atachikijile vyuma vyosena mwalinga uze amusolwele kuli vaka-kole. Oloze hakulya chaPaseka, Yesu alwezele Yuta ngwenyi: “Echi uli nakulinga chilinge washi.” (Yowa. 13:21-27) Kaha mumilemba yaNgetesemane, Yesu alijimbwile ivene kumaswalale vaze vejile nakumukwata. Numba tuhu mwono wenyi wapwile muponde, oloze ahanjikile mangana akinge tumbaji twenyi. (Yowa. 18:1-8) Omu vapwile nakumwihwojola muSunendeline, omikile nakwamba ngwenyi ikiye vene Kulishitu, MwanaKalunga, numba tuhu atachikijile ngwenyi kapilishitu wakulitulaho apwile nakusaka kumuwanyina mulonga mangana vamujihe. (Mako 14:60-65) Yesu alamine kulonga chenyi palanga nakukufwa hachitondo chakuyanjishila. Omu apwile hakamwihi nakufwa, atambakanyine ngwenyi: “Vyuma vyosena vinatesamo jino!”—Yowa. 19:28-30.
LONDEZEZENUNGA MUCHIMA WAYESU WAKUMIKA
7. Enu vanyike, mweji kwivwanga ngachilihi kumivulukila lijina lyaYehova, kaha namusolola ngachilihi nge mwomika?
7 Tunahase kulondezeza ngachilihi muchima waYesu wakumika? Kushikola. Enu vanyike, munahase kusolola ngwenu mwapwa vakumika hakulijimbula ngwenu mwapwa muVinjiho jaYehova, numba nge vakwenu vaka-shikola navamisekeleka nakumihenda. Nge namulinga ngocho, kaha namusolola ngwenu mwawahilila kumivulukila lijina lyaYehova. (Tangenu Samu 86:12.) Vanahase kumishinyinyika mwitavile kunangula chakwamba nge vyuma vyalijilile vivene. Oloze mukwechi unjiho wamwenemwene wakumilingisa mufwelele vyuma yahanjika Mbimbiliya ngwayo vyuma valingile vyakutenga. Munahase kuzachisa mbuloshuwa yaThe Origin of Life—Five Questions Worth Asking, mangana mukumbulule vihula vyavatu “vaze navasaka ngwavo muvalumbunwine lutalililo luze muli nalwo.” (Petu. 1, 3:15) Kulinga ngocho nachimilingisa mupwenga vakuwahilila hakutachikiza ngwenu muli nakukundwiza muchano wamuMazu aKalunga.
8. Vyuma muka vyatela kutulingisa twambululenga nakumika?
8 Mumulimo wetu wamuwande. Hakupwa tuvaka-Kulishitu vamuchano, twatela kutwalaho lika “kuhanjika nakumika nangolo jakuli Yehova.” (Vili. 14:3) Vyuma muka vyatela kutulingisa twambulule nakumika? Twatachikiza ngwetu vyuma tweji kwambululanga vyapwa vyamuchano mwomwo vyafuma muMbimbiliya. (Yowa. 17:17) Twatachikiza nawa ngwetu twapwa “tuvaka-kuzachila hamwe naKalunga,” kaha nawa shipilitu yajila yeji kutukafwanga. (Koli. 1, 3:9; Vili. 4:31) Twejiva ngwetu nge natwambululanga mujimbu natwima, kaha natusolola ngwetu twalihana kuli Yehova namuchima wetu wosena, nakuzanga nawa vakwetu. (Mateu 22:37-39) Hakuwana nge twomika, katweshi kuhola kuluko. Natutwalaho lika kusolola hatoma kunangula chamakuli chamukwitava chize chili nakulingisa vatu vahone kutachikiza muchano. (Koli. 2, 4:4) Kaha nawa natutwalaho lika kwambulula mujimbu wamwaza chamokomoko nakalelesa, nakututoleka, nakutufumbukila.—Teso. 1, 2:1, 2.
9. Tunahase kusolola ngachilihi muchima wakumika nge tuli muukalu?
9 Nge tuli muukalu. Kufwelela Kalunga cheji kutukafwanga tupwenga nalufwelelo nakumika nge tuli nakuhita muvihuli. Nge mutu twazanga nafu, tweji kulishonanga, oloze katweshi kulishona nge katwatwama nalutalililoko. Tweji kumikanga nakutala kuli “Kalunga wakuvendejeka chosena” atuhane ngolo. (Koli. 2, 1:3, 4; Teso. 1, 4:13) Nge tuli nakuviza misongo yayinene chipwe nge tunalivulumuna chikuma, tweji kwivwanga kukola vene, oloze katweshi kulinga vyuma vize vyalimbalaka naVisonekako. Katweshi kwitavila jijila jakukilamo jize jalimbalaka najindongi jamuMbimbiliyako. (Vili. 15:28, 29) Kachi nge tunahombo, ‘michima yetu yinahase kutuhana milonga,’ oloze katweshi kuzeya nakulitwaminako mwomwo twafwelela ngwetu Kalunga “ali hakamwihimwihi navava vahokoka michima.” *—Yowa. 1, 3:19, 20; Samu 34:18.
YESU ANANGAKANA
10. Uno kunangakana chapwa chika, kaha ngamba yaYehova wakunangakana eji kuhanjikanga nakulinga vyuma muka?
10 Kunangakana chapwa kupwa nauhashi wakushinganyeka kanawa, nakutachikiza vyuma vyakwoloka navyevi vyakuhenga nakusakula kulinga jino vyuma vyakwoloka. (Hepe. 5:14) Muka-Kulishitu wakunangakana eji kulinganga vyuma vize navimukafwa apwenga nausoko wamwaza naKalunga. Eji kuhanjikanga nakulinga vyuma vize vyeji kwivwisanga Kalunga kuwaha. Mutu kana eji kusakulanga mazu akukokweza vakwavo keshi kuvalemekako. (Vishi. 11:12, 13) Apwa “wakushipwokela kutenuka.” (Vishi. 14:29) “Eji kwololanga kutambuka chenyi,” kulumbununa nge eji kutambukanga lika mujila yakwoloka muungeji wenyi wakuya kukuyoya. (Vishi. 15:21) Uno tunahase kupwa ngachilihi vakunangakana? Twatela kulinangula Mazu aKalunga nakukavangiza vyuma natulinangula. (Vishi. 2:1-5, 10, 11) Twatela nawa kukekesa chakutalilaho chaYesu uze apwile wakunangakana kuhambakana vatu vosena vatwamaho lyehi hano hamavu.
11. Uno hanjikiso yaYesu yamusolwele ngachilihi nge apwile wakunangakana?
11 Yesu asolwele nge apwile wakunangakana muvyuma vyosena ahanjikilenga navize alingilenga. Hanjikiso yenyi. Ashinganyekelenga kanawa omu ambulwilenga mujimbu wamwaza, kaha asakwilenga “mazu ayema” alikoji aze akomweselenga vaze vamwivwilililenga. (Luka 4:22; Mateu 7:28) Azachishilenga Mazu aKalunga. Alingilenga ngocho hakutanga visoneka, chipwe kuvinungulula, chipwe kuvuluka mazu atwamaho hakulumbununa vishina kuvatu. (Mateu 4:4, 7, 10; 12:1-5; Luka 4:16-21) Yesu nawa alumbunwinenga Visoneka mujila yize yahetele kumichima yavatu vaze vamwivwililenga. Omu apwile nakuhanjika natumbaji twenyi vavali mujila yakuya kuEmau hanyima yakusanguka chenyi, Yesu “avalumbunwinyine vyuma vyosena vize vahanjika hali ikiye muVisoneka vyosena.” Omu mwahichile shimbu, vaze tumbaji vambile ngwavo: “Uno katwapwanga nakwivwa hyangu kumichima yetuko . . . omu apwanga nakutulumbunwina Visoneka nyi?”—Luka 24:27, 32.
12, 13. Vyakutalilaho muka vyasolola nge Yesu apwile wakushipwokela kutenuka, kaha nawa apwile namuchima wamwaza?
12 Muchima navilinga vyenyi. Kunangakana chakafwile Yesu apwenga namuchima “wakushipwokela kutenuka.” (Vishi. 16:32) Apwilenga ‘wamuvwovu.’ (Mateu 11:29) Atalililenga chikoki tumbaji twenyi chamokomoko natutenga twavo. (Mako 14:34-38; Luka 22:24-27) Aunjilenga muchima numba vene omu vamulingilenga mwamupi.—Petu. 1, 2:23.
13 Kunangakana chakafwile nawa Yesu apwenga namuchima wamwaza. Ejivile kanawa Jishimbi jaMose. Atachikijile ovyo vasonekelele jishimbi kana, kahechi chamukafwile alinge vyuma kweseka najishimbi kana. Chakutalilaho, talenu mujimbu watwama hali Mako 5:25-34. (Tangenu.) Pwevo umwe uze apwile namusongo wakuhita manyinga alichichimikile halizavu, akwachile kuuvwalo waYesu, kaha ahindukile kumusongo wenyi. Kweseka naJishimbi, ou pwevo apihile, shikaho katelelele kukwata mutu numba umweko. (Levi 15:25-27) Oloze hakuwana nge Yesu atachikijile ngwenyi “lutetelo nakushishika” vikiko “vyuma vyavilemu kuJishimbi,” kamutenukilile hakukwata kuuvwalo wenyiko. (Mateu 23:23) Oloze ahanjikile nalikoji ngwenyi: “Ove mwanami, lufwelelo lwove lunakuhindula. Yakonga mukuunda, nakupwa uwakulikangula omu unahinduka lyehi kumusongo wove waupi.” Ocho kuwaha kana hakuwana nge kunangakana chaYesu chamukafwile asolwele vatu likoji!
14. Yesu asakwile kulinga ika, kaha vyuma muka vyamukafwile atwaleho lika kwambulula?
14 Vyuma alingilenga mukuyoya chenyi. Yesu asolwele nge apwile wakunangakana hakusakula vyuma vyamwaza vyakulinga mukuyoya chenyi nakulinga vyuma kana. Ahakile muchima kumulimo wakwambulula mujimbu wamwaza, kaha ukiko mulimo wapwile waulemu mukuyoya chenyi. (Luka 4:43) Yesu asakwile nawa kulinga vyuma vize vyamukafwile atwaleho lika kuzata ou mulimo palanga nomu aukumishile. Asakwile kwashiwisako chiyoyelo chenyi mangana apwenga nalwola lwaluvulu nangolo jajivulu jakuzata ou mulimo wakwambulula. (Luka 9:58) Amwene ngwenyi atela kunangula vakwavo mangana vakatwalilile kuzata ou mulimo omu mwakalinga ikiye nafu. (Luka 10:1-12; Yowa. 14:12) Ashikile vaka-kumukavangiza ngwenyi mwatwalaho lika kuvakundwiza mumulimo kanou “palanga nakuchikukulwishi chakatwamino kamyaka yino.”—Mateu 28:19, 20.
LONDEZEZENUNGA MUCHIMA WAYESU WAKUNANGAKANA
Zachisenu uhashi wenu wakunangakana mangana mutachikize vyuma vasaka vatu, nakuhanjika jino mazu aze nawavaheta kumichima (Talenu palangalafu 15)
15. Uno natusolola ngachilihi nge twanangakana muhanjikiso yetu?
15 Tutalenu jila yikwavo tunahase kulondezeza Yesu. Hanjikiso yetu. Nge tuli nakushimutwila navakwetu vaka-kwitava, twatela kuzachisa mazu aze nawavakolezeza, keshi aze nawavalemekako. (Efwe. 4:29) Nge tuli nakuhanjika navatu vyaWangana waKalunga, twatela kuzachisa mazu amwaza, “akutova mungwa.” (Kolo. 4:6) Twatela kuzachisa uhashi wetu wakunangakana mangana tutachikize vyuma vali nakusaka venyazuvo naukalu vali nakuhitamo, nakusakula jino mazu aze nawavaheta kumichima. Twatela kwanuka ngwetu mazu amwaza alikoji anahase kulingisa vatu vevwilile kuvyuma natuvambulila. Kaha nawa nge tuli nakulumbununa vyuma twafwelela, twatela kuzachisa Mbimbiliya. Twatela kusolola nge Mbimbiliya yapwa yayilemu chikuma, kaha twatela kuyitanga nge chinahase. Twatachikiza ngwetu mujimbu wamuMbimbiliya watwama nangolo chikuma kuhambakana kala vyuma natuhanjika hakanwa.—Hepe. 4:12.
16, 17. (a) Mujila muka tunahase kusolola nge twapwa vakushipwokela kukwata utenu, kaha nawa twatwama namuchima wamwaza? (b) Vyuma muka navitukafwa tutwaleho lika kuzata mulimo wetu wakwambulula?
16 Muchima navilinga vyetu. Kunangakana cheji kutulingisa tupwenga vakushipwokela chipwe ngwetu ‘kulivenjeka kukwata utenu.’ (Yako. 1:19) Nge vakwetu vanatwivwisa kupihya, twatela kushinganyeka ovyo vinavalingisa vatwambe chipwe vatulinge mwamupi. Kulinga ngocho nachitukafwa tuhonese matoto, nakutukafwa nawa “kuzomboka tuhu mulonga.” (Vishi. 19:11) Kunangakana nawa cheji kutulingisa tupwenga namuchima wamwaza. Ngocho katweshi kufwelela ngwetu vakwetu vaka-kwitava navalinganga vyuma vyamwaza lwola lwosenako, mwomwo twatachikiza ngwetu pamo vali nakuhita muukalu uze katwejivileko. Twatela kulisuula kwivwilila vyuma vali nakushinganyeka vakwetu, kaha nge chinahase twatela kulyononona nakukavangiza vyuma navahanjika.—Fwili. 4:5.
17 Vyuma tweji kulinganga mukuyoya chetu. Hakupwa tuvaka-kukavangiza Yesu, twatachikiza ngwetu mulimo waulemu twatela kuzata mukuyoya chetu shina kwambulula mujimbu wamwaza. Tweji kusakulanga vyuma vyakulinga vize navitukafwa tutwaleho lika kuhaka muchima kumulimo kanou wakwambulula. Tweji kuhakanga vyuma vyakushipilitu kulutwe mukuyoya chetu, nakwashiwisako chiyoyelo chetu mangana tuwane lwola lwaluvulu lwakuzata ou mulimo waulemu wakwambulula, shimbu kanda kukuma chizenga.—Mateu 6:33; 24:14.
18. Natutwalaho ngachilihi kutambuka ungeji wetu wakuya kukuyoya, kaha vyuma muka muli nakufwila kulinga?
18 Tunalivwisa kuwaha chikuma kukekesa vilinga vimwe vyamwaza vyaYesu. Achishinganyekenu omu namunganyala kachi nge namulinangula vilinga vyenyi vyeka nakukekesa omu munahase kumulondezeza. Ngachize, tutwalenuho lika kukavangiza kanawa mujitambo jenyi. Nge natulinga ngocho, kaha natutwalaho lika kutambuka ungeji wetu wakuya kukuyoya. Natupandama nawa chikuma kuli Yehova uze Yesu alondezezelenga kanawa.
^ par. 2 Mazu atwama hachisoneka chaWaPetulu 1, 1:8, 9 vawasonekelele vaka-Kulishitu vaze vatwama nalutalililo lwakukayoyela mwilu. Oloze mazu kana anahase kuzata nakuli vaka-Kulishitu vaze vatalilila kukayoyela hano hamavu.
^ par. 9 Nge muli nakusaka vyakutalilaho vyavatu vaze vasolwele muchima wakumika omu vapwile muukalu, kaha talenu Kaposhi Kakutalila kaChingeleshi kaDecember 1, 2000, mafwo 24-28; naTonenu! yaChingeleshi yaApril 22, 2003, mafwo 18-21; nayeyi yaJanuary 22, 1995, mafwo 11-15.
