MULIMO wakwambulula mujimbu wamwaza ukiko mulimo waulemu vali nakuzata hano hamavu makumbi ano. Hakuwana nge muvangamba jaYehova, tunafwelela ngwetu mwachimona kupwa hikutokwa chachinene kwazana mumulimo kanou wakutunga tumbaji. Oloze nganomu munatachikiza, vapayiniya navaka-kwambulula lwola lumwe veji kumonanga ukalu uze weji kuvalingisanga vahone kwambulula mujimbu wamwaza natwima.

Vaka-kwambulula vamwe kaveshi kuwana vatu vakushimutwila navo nge vali nakwambulwila kuzuvo hizuvo. Vatu vavavulu mujindandanda jimwe kavatwamisa hamemboko. Kaha nawa vatu vamwe vaze tweji kuwananga hamembo, veji kupopololanga mujimbu waWangana tweji kuvambulilanga, kaha veka veji kutwimanyinanga nakole. Vaka-kwambulula veka nawa vakwechi ngalila yayinene yakwambulwila, kaha vatu nawa veji kwitavilanga mujimbu, oloze veji kwivwanga woma nakanengauli ngwavo kaveshi kukahasa kukamanyisa ngalila yosenako. Kaha vandumbwetu vamwe muchikungulwilo nawa vanambululanga hamyaka yayivulu, ngocho vanahombo nakuzeya mwomwo vafwelelele ngwavo kukuma kalinwomu chizenga.

Uno twatela kulikomokela hakuwana nge vatu jaYehova vosena vali nakumona ukalu uze uli nakuvalingisa vahone kupwa natwima yakuzata mulimo wakwambulula nyi? Nduma. Mwomwo tuvosena twatachikiza ngwetu nachipwanga chachikalu kwambulula mujimbu wamuchano waKalunga mukaye kano vali nakuyula kuli “uze wakuhuka” Satana Liyavolo.—Yowa. 1, 5:19.

Chamokomoko naukalu muli nakumona hakwambulula mujimbu wamwaza, fwelelenu ngwenu Yehova mwamikafwa muhonese ukalu kana. Vyuma muka mwatela kulinga mangana mupwenga chikuma natwima mumulimo wenu wakwambulula? Tutalenu vyuma vimwe mwatela kulinga.

Mwaka himwaka, vatu vavavulu chikuma vali nakuvambapachisa nakupwa Vinjiho jaYehova. Kachi nge kalinwomu mwalihananga kuli Kalunga nakumimbapachisa, kaha namunganyala mwamunene hakuzata navaze vanazananga mumulimo kanou hamyaka yayivulu. Kachi nge munapunga muvaka-kwambulula Wangana hamyaka yayivulu, kaha nachipwa chakutamo kukafwa  vaka-kwambulula vavahya. Nge namulinga ngocho, kaha namutambula jikisu jajivulu.

Yesu atachikijile ngwenyi apwile namulimo wakukafwa tumbaji twenyi mangana vapwenga vaka-kwambulula vakwipangweji, kaha avalwezele mwakuzachila ou mulimo. (Luka 8:1) Makumbi ano nawa, kuli mulimo wakunangula vavahya vapwenga vaka-kwambulula vakwipangweji.

Kanda natushinganyeka ngwetu vaka-kwambulula vavahya navapwa nauhashi wakunangula hakwazana kaha mumulimo wamuwandeko, nduma. Kwatela kupwa mutu wazangi nalikoji wakuvanangula nakuvalweza jindongi. Kunangula vaka-kwambulula vavahya nachisakiwa kuvalweza (1) mwakuliwahishila mazu akushimutwila namutu nakulijilisawo, (2) mwakuputukila kushimutwila namwenyazuvo chipwe namutu navalihumangana nenyi, (3) mwakuhanyina mikanda yetu, (4) mwakukindulukila kuli vaze vasolwele kuwahilila, kaha (5) mwakuputukila chilongesa chaMbimbiliya. Kachi nge ndongeshi mwanyingilila nakulondezeza jijila jakwambulwilamo jize ali nakuzachisa ndumbwetu ali nakumukafwa, kaha chamuchano vene mwafukila nakuzovoloka. (Luka 6:40) Muka-kwambulula wamuhya mwawahilila chikuma kachi nge mwatambuka nandumbwetu uze mwamwivwilila nakumukafwa nge nahono vyakuhanjika. Ou muka-kwambulula wamuhya mwanganyala chikuma nge namumusangejeka nakumulweza mwakwambulwila.—Kwambu. 4:9, 10.

Numba tuhu vyuma tweji kushimutwilanga navatu vaze tweji kwambulilanga vyeji kutukolezezanga, oloze vyuma natushimutwila nandumbwetu tuli nakuzata nenyi muwande vikiko navitukolezeza chikuma. Anukenu ngwenu Yesu atumine tumbaji twenyi “vavali vavali” hakuya nakwambulula. (Luka 10:1) Omu vazachilenga hamwe, valikolezezele nakulikafwa umwe namukwavo. Ngocho lwola luze tuli namukwetu muka-kwitava muwande lunapu hilwola lwamwaza ‘lwakulikolezeza.’—Loma 1:12.

Vyuma muka munahase kushimutwila? Munahase kushimutwila vyuma vimwe vyamwaza vyamisolokelanga muwande, nachishina chimwe chamwaza mwalinangulanga hachilongesa chahauka chipwe hachilongesa chatanga. Munahase nawa kushimutwila chishina mwevwanga hakukunguluka chize chamikolezezanga. Lwola lumwe, tunahase kuzata namuka-kwambulula uze kanda tuchizatengaho lyehi nenyi muwande. Uno munatachikiza omu alinangwile muchano tahi? Vyuma muka vyamukunywile etavile ngwenyi eli hiliuka lyaYehova? Milimo muka ali nakuzata, kaha vyuma muka ali nakulivwisa kuwaha? Pamo munahase kumulweza nayenu vyuma muli nakulivwisa kuwaha. Kala mweshomwo navakula vatu muwande, anukenu ngwenu lwola muli nakuzata nandumbwenu muwande lunapu hilwola lwamwaza ‘lwakulitunga navakwenu.’—Teso. 1, 5:11.

Chuma chachilemu nachimikafwa mutwaleho lika kwambulula mujimbu natwima shina kupwanga nachilongesa chahauka. “Ndungo wakushishika wakuzangama” ali nakusonekanga mijimbu yayivulu havihande vyakulisezaseza. (Mateu 24:45) Ngocho kuli vihande vyavivulu vize munahase kulinangula mangana mulyenga kulya chakushipilitu. Talenu chihande chimwe munahase kulinangula hachilongesa chenu chahauka: Mwomwo ika mulimo wakwambulula Wangana wapwila himulimo waulemu chikuma? Lipwata lili muchihande chino linavuluka vishina vimwe vyalingisa mulimo kana kupwa waulemu.

Achishinganyekenu havishina vanavuluka mulipwata eli vize vinahase kumikafwa mutwaleho lika kwambulula natwima. Tuli nakumikolezeza muwaneko lwola lwakulinangula nakuwana vishina vyeka vyalingisa ou mulimo kupwa waulemu. Kaha shinganyekenu havishina evi navisoneka vize vinakundwiza vishina kana. Kulinga ngocho nachimikafwa mupwenga natwima yakwambulula mujimbu wamwaza.

Liuka lyaYehova kakavulu lyeji kutunangulanga jijila jakwambulwilamo jize jinahase kutukafwa tuzovoloke mumulimo wetu. Chakutalilaho, tunahase kwazana mumulimo wakwambulwila kuzuvo hizuvo, chipwe kusonekela vatu mikanda, chipwe kwambulwila hashinga, chipwe kwambulwila mumikwakwa nakuvihela vyeka vyasanga, chipwe kwambulila vatu chakutulukila, chipwe kwambulwila kuvisakano nakuvitanda. Tunahase nawa kuwahisa vyuma mangana twambulwilenga kujingalila kuze katwambulwila chikumako.

Kutala munahase kukavangiza eji jijila jakwambulwilamo tahi? Kutala mwesekaho lyehi kuzachisa jijila jimwe nyi? Vandumbwetu vavavulu vaze vaneseka kukavangiza eji jijila vanafukila chikupu. Tutalenu vyakutalilaho vitatu.

 Chakutalilaho chatete chili nakusolola kuwaha chakukavangiza vyuma vahanjikile muMulimo Wetu waWangana vyakuvuluka mwakuputukila vilongesa vyaMbimbiliya. Omu ndumbwetu wapwevo April evwile vyuma kana, ashinganyekele kuputuka chilongesa kuli vakwavo vaka-milimo vatatu. Alikomokelele nakuwahilila chikuma hakuwana nge vosena vatatu vetavilile kulinangula Mbimbiliya, kaha vaputukile nakukunguluka.

Chakutalilaho chamuchivali chili nakuhanjika hakuhana jimangazini jetu. Vanatukolezezanga tutondetonde vatu vaze vanahase kwivwila kuwaha vihande vimwe vyeji kupwanga mujimangazini jetu. Kalama wakujinguluka umwe muUnited States ambile ngwenyi ahanyine Tonenu! yize yapwile nachihande chapwile nakuhanjika hatufumbo kuli vakulwane vavitanda vyosena vize vyalanjisa tufumbo mungalila yimwe. Kaha nawa ou kalama wakujinguluka napuwenyi vatwalile mangazini yapwile nachihande chakwamba ngwavo “Understanding Your Doctor” kujiofesi jakuzomboka 100 vazachila vandotolo muchihanda chavo. Ambile ngwenyi: “Kutambukila kujiofesi kana chinatukafwe tulijimbule etu vavene nakujimbula nawa mikanda yetu. Omu tunalijilila navatu vatwama kuvihela evi, chinatukafwe tukindulukilengako.”

Chakutalilaho chamuchitatu chili nakuhanjika hakwambulwila hashinga. Ndumbwetu wapwevo Judy asonekele mukanda kuchikota chetu wakusakwilila havyuma veji kutukolezezanga vyakwambulwila hashinga. Ambile ngwenyi naye uze ali namyaka yakusemuka 86 uze aviza misongo yayivulu, eji kwambulwilanga hashinga lwola lwosena, kaha awahilila chikuma kutwaminyina chilongesa chaMbimbiliya hashinga nakashinakaji umwe wamyaka yakusemuka 92.

Jijila jakwambulwilamo jize veji kutulwezanga mumikanda yetu jeji kuzatanga chikupu. Jizachisenunga. Najimikafwa mutwaleho lika kwambulula mujimbu wamwaza nakuwahilila natwima.

Kuhana mikanda yayivulu muwande, nakutwaminyina vilongesa vyaMbimbiliya vyavivulu, nakupwa navatu vavavulu tunakafwe vapwenga vangamba jaYehova, keshi chikiko chesekelo chakumona nge tuli nakufukila mumulimo wetu wakwambululako. Achitalenu hali Nowa. Kufumisako vaka-tanga yenyi, vatu vangahi akafwile vapwenga vaka-kulemesa Yehova? Vauchi, oloze apwile muka-kwambulula wakufukila. Enga, chuma chachilemu shina kuzachila Yehova nakashishi.—Koli. 1, 4:2.

Vaka-kwambulula Wangana vavavulu vachiwana nge kulitomena kulinga vyuma vize vanahase kutesamo cheji kuvakafwanga kupwa lika natwima yakwambulula mujimbu wamwaza. Vyuma muka munahase kulitomena kulinga? Vyuma vimwe vanavivuluka mulipwata eli lili muchihande chino.

Tondetondenu jijila jize najilingisa mulimo wenu ufukile, kaha Yehova nawa mwamikafwa mufukile chikupu. Nge namutesamo vyuma munalitomena, kaha namupwa vakuwahilila nakusuuluka hakutachikiza ngwenu muli nakuzata nangolo jenu josena hakwambulula mujimbu wamwaza.

Pundu vene, kwambulula mujimbu wamwaza chapwa chachikalu lwola lumwe. Oloze kuli vyuma vimwe munahase kulinga mangana mutwaleho lika kwambulula mujimbu waWangana natwima. Livwisenu kuwaha kushimutwila nakulikolezeza namutu muli nakuzata nenyi muwande, twalenuho lika kupwa nachilongesa chahauka, kavangizenu jijila jakwambulwilamo jize ali nakutulweza ndungo wakushishika, kaha nawa litomenenu kulinga vyuma vize munahase kutesamo. Chachinenenyi, anukenu ngwenu Kalunga amihana kutokwa chachinene chakupwa Vinjiho jenyi mangana mwambululenga mujimbu wamwaza. (Isa. 43:10) Enga, namupwa vakuwahilila kachi nge namutwalaho lika kwambulula mujimbu wamwaza natwima.