HAKUKUNGULUKA chimwe chakulipwila chapwile muNagoya, kuJapan, haApril 28, 2013, ndumbwetu Anthony Morris wamuLizavu Lyakutwaminyina avilikile mutambi uze wakomwesele vatu vakungulukile. Avilikile ngwenyi vanalovola mukanda wauhya mulilimi lyaJapanese wakwamba ngwavo Mbimbiliya—Mujimbu Wamwaza Asonekele Mateu. Vatu vakuzomboka 210,000 vaze vakungulukile hohamwe navaze vapwile nakwivwilila kuchihande kanechi oku vali kuvihela vyeka vasakwililile hatando yayisuku.

Ou mukanda wakulipwila wamafwo 128 waMujimbu Wamwaza waMateu vaufumisa muMbimbiliya yaNew World Translation yamulilimi lyaJapanese. Ndumbwetu Morris alumbunwine ngwenyi mukanda kana vausonekele ukafwe vatu muJapan. Uno ou mukanda wamuMbimbiliya vausoneka ngachilihi? Mwomwo ika vausonekelele? Kaha vatu vanakula ngachilihi kumukanda kana?

Jila vasonekelamo ou mukanda waMateu yakomwesele chikuma vatu vakungulukile. Hakusoneka vasona vamulilimi lyaJapanese, munahase kuvemika chipwe kuvasavalika. Mapapilo namikanda yayivulu, kuhakilako vene namikanda yetu yakalinwomu vanayisonekanga muvasona vakusavalika. Oloze vasona mumukanda ou wauhya vapwa vakwimika, vakavangiza omu vasoneka mapapilo amijimbu amuJapan namikanda yeka yakukaye. Vaka-kutanga vavavulu muJapan vamona nge chapwa chachashi kutanga mujimbu vanasoneka muvasona vakwimika. Kaha nawa mumukanda ou wauhya, mitwe yize vahaka helu muMbimbiliya yili jino mukachi kupwa tumitwe twatundende mangana chikafwe vaka-kutanga kumona vishina vyavilemu.

Vandumbwetu muJapan vali nakunganyala hakuzachisa ou mukanda waMateu. Ndumbwetu umwe wapwevo uze ali namyaka yamuji 80, ambile ngwenyi: “Ngunatangenga mukanda waMateu mapapa kakavulu, oloze eyi jila vanasonekelamo ou mukanda natumitwe twatundende vanahakemo vinangukafwe ngwivwishise kanawa Chihande chaYesu chahaPili.” Ndumbwetu weka wapwevo asonekele ngwenyi: “Ngwatangile ou mukanda waMateu mulikumbi lyangongo. Ngunejilila kutanga vasona vakusavalika, oloze vatu vavavulu muJapan vasaka kutanga vasona vakwimika.”

Mwomwo ika ou mukanda umwe kaha wamuMbimbiliya unahase kukafwa vatu muJapan? Numba tuhu vatu vavavulu muJapan kavatachikiza Mbimbiliyako, oloze vasaka kuyitanga. Ou mukanda waMujimbu Wamwaza waMateu naukafwa vaze kanda vamonengaho lyehi Mbimbiliya vahase kukwata chihanda chamukanda ou wajila mumavoko avo nakuchitanga.

Mwomwo ika vasakwilile mukanda waMateu? Vatu vavavulu muJapan nge navevwa lizu “Mbimbiliya,” veji kushinganyekanga Yesu Kulishitu. Shikaho vasakwile mukanda waMateu mwomwo watwama namujimbu wachisaka chaYesu, nakusemuka chenyi, naChihande chenyi chahaPili chize vatachikiza vatu vavavulu, naupolofweto wenyi wakulipwila uze wahanjika hamakumbi akukuminyina. Vihande vyangana vavisaka chikuma kuvatu vavavulu muJapan.

Vaka-kwambulula Wangana muJapan vaputukile kuhana ou mukanda wauhya natwima kuzuvo hizuvo nahakukindulukila kuli vaze vambulilile. Ndumbwetu umwe wapwevo asonekele ngwenyi: “Ano makumbi chili  nakungwashiwila jino kuhana Mazu aKalunga kuvatu mungalila yami. Halikumbi vene lize twapwile nakukunguluka echi chakulipwila, kuheta nachingoloshi ngwahanyine mutu ou mukanda waMateu.”

Uno vaka-kwambulula veji kujimbulanga ngachilihi ou mukanda waMateu kuli vatu muwande? Vatu vavavulu muJapan vatachikiza kanawa mazu akufwana nge “chikolo chachindende,” “kumbila jipela jenu kuli vangulu,” “kanda kulizakamina vyalikumbi lyahameneko.” (Mateu 6:34; 7:6, 13) Veji kulikomokelanga hakwijiva nge awa mazu vawahanjikile kuli Yesu Kulishitu. Omu veji kumonanga mazu awa mumukanda waMujimbu Wamwaza waMateu, vavavulu veji kwambanga ngwavo: “Ngunasakenga kutanga Mbimbiliya mukuyoya chami.”

Omu vaka-kwambulula veji kukindulukilanga kuli vatu vaze vatambwile mukanda waMateu, kakavulu ava vatu veji kwambanga ngwavo vatangile chihanda chamukanda ou hahaze vene, veka ngwavo vautangile wosena. Lunga umwe uze ali namyaka yamuji 60 alwezele muka-kwambulula umwe ngwenyi: “Ngunautangenga mapapa kakavulu, kaha unanguvendejeka. Nguli nakulomba ungunangule vyuma vyavivulu yahanjika Mbimbiliya.”

Mukanda waMateu vali nakuuzachisa hakwambulwila kuvihela vyasanga. Omu Chinjiho umwe wapwevo apwile nakwambulwila kuchihela chimwe chasanga, ahanyine keyala yenyi yahaInternet kuli mwanapwevo umwe atambwile mukanda waMateu. Omu mwahichile ola yimwe, uze pwevo asonekelele ou ndumbwetu nakumulweza ngwenyi atangile chihanda chamukanda ou wamuMbimbiliya, kaha asakile kutachikiza vyavivulu. Omu mwahichile chalumingo chimwe, vaputukile kumunangula chilongesa chaMbimbiliya, kaha nakushimbula chiku aputukile kukunguluka.

Mikanda yaMbimbiliya—Mujimbu Wamwaza Asonekele Mateu yakuzomboka 1,600,000 vanayitumu kuvikungulwilo muJapan, kaha kakweji hikakweji Vinjiho vali nakuhana makombakaji namakombakaji amukanda kanou kuvatu. Mazu akujimbula atwama mumukanda ou avuluka vyuma vafwila vaka-kusoneka hakwamba ngwavo: “Tunafwelela chikupu ngwetu omu namutanga ou mukanda namupwa napwipwi yakusaka kutachikiza vyavivulu vyatwama muMbimbiliya.”