“Omu Mukiko Wevwila Kuwaha”
“Vyumevi unaviswekela vaka-mangana navaze vananguka, oloze unavisolola kuli vana vavandende.”—LUKA 10:21.
1. Vyuma muka vyalingishile Yesu awahilile “chikuma nashipilitu yajila”? (Talenu muvwimbimbi wakulivanga.)
LIKUMBI limwe Yesu Kulishitu “awahililile chikuma nashipilitu yajila.” Achishinganyekenu muli nakumumona nawahilila chikuma. Uno vyuma muka vyamulingishile awahilile? Atumine tumbaji twenyi 70 vayenga nakwambulula mujimbu wamwaza waWangana waKalunga. Hakuwana nge kwapwile vaka-kole vavavulu vaze vemanyinyine mujimbu wamwaza, ngocho asakile kutachikiza omu vazachile ou mulimo avahanyine. Vaka-kole kana shina vaka-kusoneka navaFwaliseu vaze valinangwile chikuma. Vahungumwishile vatu vapopolole Yesu nakumumona nge himuka-kusonga maliva kaha, nakumona nawa tumbaji twenyi nge hivatu “vakuzeneka kulinangula kaha nawa hivatu vanganavene.” (Vili. 4:13; Mako 6:3) Oloze omu tumbaji vakindulukile kufuma kuze vayile nakwambulula mujimbu, vawahililile chikuma. Vahashile kwambulula numba tuhu vatu navandemone vavemanyinyine nakole. Vyuma muka vyavakafwile vawahilile nakumika?—Tangenu Luka 10:1, 17-21.
2. (a) Mwomwo ika Yesu afwanyishile tumbaji twenyi kuvana vavandende? (b) Vyuma muka vyakafwile vaka-kukavangiza Kulishitu vevwishise muchano waulemu wakushipilitu?
2 Nyingililenu ngwenu Yesu ambile kuli Yehova ngwenyi: “Ove Tata, Mwata wamelu namavu, ngunakwalisa kumeso avatu, mwomwo vyumevi unaviswekela vaka-mangana navaze vananguka, oloze unavisolola kuli vana vavandende. Ove Tata, mwomwo omu mukiko wevwila kuwaha.” (Mateu 11:25, 26) Yesu hano kapwile nakulumbununa ngwenyi tumbaji twenyi vapwile vakemba chipwe ngwetu vana vavandendeko. Oloze atachikijile ngwenyi vapwile nge vana vavandende hakuvesekesa kuli vaka-mangana vaze valinangwile chikuma, vaze nawa valimwenenga kupwa vaka-chinyingi. Yesu anangwile vaka-kumukavangiza vapwenga nge vana vavandende hakupwa vakulinyisa nakupwa nawa vavashi kunangula. (Mateu 18:1-4) Uno kulinyisa chavanganyalishile ngachilihi? Yehova avakafwile nashipilitu yenyi yajila vevwishise muchano waulemu wakushipilitu, oloze vaka-mangana navaze vananguka vapwile lika mumilima mwomwo yaSatana namichima yavo yakulivwimba.
3. Vyuma muka natushimutwila muchihande chino?
3 Evi vikiko vyalingishile Yesu awahilile chikuma. Awahililile chikuma hakumona omu Yehova asolwele muchano wakujiminyina wakushipilitu kuli vatu vosena vakulinyisa numba tuhu vamwe kavalinangwile kumashikolako. Awahilile nawa hakumona nge Ise evwilile kuwaha eyi jila yakunangwilamo vatu. Uno Yehova nalumuka tahi? Uno ali nakusolola ngachilihi nge noholyapwa achili lika nakwivwila kuwaha eyi jila yakunangwilamo vatu? Muchihande chino, natulinangula omu Yehova ali nakusolwela vatu vakulinyisa muchano wakujiminyina wakushipilitu.
KULUMBUNWINA VATU MUCHANO WAKUJIMINYINA
4. Uno Kaposhi Kakutalila kaChingeleshi uze vali nakusoneka mujila yayashi ali nakunganyalisa ngachilihi vandumbwetu?
4 Mumyaka yakalinwomu, liuka lyaYehova linanangulanga jindongi jakushipilitu mujila yayashi kwivwa. Achitalenu havyakutalilaho vino vitatu. Chatete, kuli Kaposhi Kakutalila kaChingeleshi uze vali nakusoneka mujila yayashi. * Eyi mangazini yili nakukafwa chikuma vandumbwetu vaze kavatachikiza kanawa Chingeleshiko. Vandumbwetu vaze vapwa mitwe yajitanga vali nakwamba ngwavo vana vavo vali nakwivwishisa jino kanawa vihande vyamuKaposhi Kakutalila uze apwa chinoma chachinene tweji kutambwilangamo kulya chakushipilitu. Vavavulu vanasoneka mikanda yakusakwilila. Ndumbwetu umwe wapwevo asonekele ngwenyi kunyima kapwile nakukumbululangako haChilongesa chaKaposhi Kakutalila. Ambile ngwenyi: “Ngwapwilenga nge ngukamama muZuvo yaWangana.” Oloze omu keshi mukiko ali makumbi anoko. Omu aputukile kuzachisa eyi mangazini yayashi, asonekele ngwenyi: “Ano makumbi ngweji kukumbululanga, kaha nawoma ngwevwilenga wakuma lyehi. Nguli nakusakwilila Yehova naliuka lyenyi.”
5. Uno Mbimbiliya yaChingeleshi vanasononona yili nakunganyalisa ngachilihi vatu?
5 Chamuchivali, kuli Mbimbiliya vanasononona yaChingeleshi yaNew World Translation of the Holy Scriptures, yize valowele haKuliwana chaMwaka hiMwaka chaLiuka haOctober 5, 2013. * Visoneka vyavivulu vili namazu amandende, oloze ulumbunwiso kawalumukileko kaha nawa vinashiwa jino kuvivwa. Chakutalilaho, hali Yopa 10:1 hapwile mazu 27, oloze hali jino mazu 19. Kaha hali Vishimo 8:6 hapwile mazu 20, oloze hali jino mazu 13. Evi visoneka vyosena vinashiwa jino kuvivwa. Ndumbwetu umwe wakushishika vawavisa uze nazachila Kalunga hamyaka yayivulu ambile ngwenyi: “Omu ngwatangile mukanda waYopa muMbimbiliya eyi yayihya, ngwevwile nge lwapwile hilwola lwatete kuutanga. Nguli nakuwivwishisa jino kanawa.” Omu mukiko vanambenga navatu vavavulu.
6. Muli nakwivwa ngachilihi hakulinangula ulumbunwiso wauhya wachisoneka chaMateu 24:45-47?
6 Chamuchitatu, achishinganyekenu havyuma vanalumunako kalinwomu kupandama kuulumbunwiso wavisoneka vimwe. Chakutalilaho, ulumbunwiso wauhya wakuvuluka “ndungo wakushishika wakuzangama” uze vasonekele muKaposhi Kakutalila kaJuly 15, 2013 watwivwishile kuwaha chikuma. (Mateu 24:45-47) Valumbunwine ngwavo ndungo wakushishika wakuzangama emanyinako Lizavu Lyakutwaminyina, kaha “vaka-kuzata kuzuvo” vemanyinako vosena vaze veji kutambulanga kulya chakushipilitu, numba vapwa vawavisa chipwe “mikoko veka.” (Yowa. 10:16) Ocho kuwaha kana hakulinangula muchano kanou nakuunangula nawa vandumbwetu vavahya! Uno Yehova nasolola nawa ngachilihi nge evwila kuwaha kunangula vatu mujila yayashi?
KULUMBUNUNA MIJIMBU YAMUMBIMBILIYA MUJILA YAYASHI
7, 8. Mijimbu muka yimwe yamuMbimbiliya yize yemanyinyineko vyuma vimwe kulutwe?
7 Kachi nge munazachilanga Yehova hamyaka yayivulu, pamo munamono nge mikanda yetu ano makumbi kayeshi nakulumbununanga mijimbu yamuMbimbiliya nganomu yapwile nakulumbununa kunyimako. Mujila muka? Kunyima, mikanda yetu yahanjikilenga ngwayo mijimbu yimwe yemanyinyineko vyuma vimwe vyavilemu kulutwe. Mijimbu yamuMbimbiliya vayimwenenga nge hivifwanyisa, kaha kutesamo chamijimbu kana vachimwenenga nge hivyuma vize vyemanyinyineko vifwanyisa kana. Uno kuli vyuma vyalingisa valumbunune mijimbu yamuVisoneka mujila kaneyi tahi? Eyo. Chakutalilaho, Yesu ahanjikile “[vya]chinjikizo chakapolofweto Yona.” (Tangenu Mateu 12:39, 40.) Yesu alumbunwine ngwenyi makumbi aze Yona atwamine mujimo lyaishi emanyinyineko tando yize Yesu mwakapwa muchimbumbe.
8 Kwatwama mijimbu yeka yamuMbimbiliya yize yemanyinyineko vyuma vyavilemu kulutwe. Kaposetolo Paulu avulukile mijimbu kaneyi yayivulu. Chakutalilaho, ulo waApalahama naHangale naSala wemanyinyineko usoko waYehova namuyachi wavaIsalele naliuka lyenyi lyamwilu. (Ngale. 4:22-26) Kaha nawa tavanaku natembele, naLikumbi lyaKulinga Chakufwika haShili, nakapilishitu wakulitulaho, navyuma vyeka vavulukile muJishimbi jaMose vyapwile “muvwimbimbi wavyuma vyamwaza vize vyapwile nakwiza.” (Hepe. 9:23-25; 10:1) Kulinangula mijimbu yangana novyo yemanyinako cheji kutwivwisanga kuwaha nakukolezeza lufwelelo lwetu. Uno twatela kukukulula ngwetu, kala mutu chipwe chuma chipwe mujimbu vavuluka muMbimbiliya wemanyinako vyuma vimwe tahi?
9. Uno mujimbu wamuMbimbiliya waNavote vaulumbunwinenga ngachilihi kunyima?
9 Kunyima, mikanda yetu yalumbunwinenga ngwayo kala mutu chipwe chuma chipwe mujimbu wemanyinyineko vyuma vimwe kulutwe. Chakutalilaho, achitalenu hamujimbu waNavote. Lisano Yezevele alongesele vatu mangana vavangijikile Navote nakumujiha, mangana lunga lyenyi Ahave atambule wande wamivinyo waNavote. (Vamya. 1, 21:1-16) Mu 1932, Kaposhi Kakutalila alumbunwine ngwenyi Ahave naYezevele vemanyinyineko Satana naliuka lyenyi, Navote emanyinyineko Yesu, kaha kufwa chaNavote chemanyinyineko kufwa chaYesu. Oloze omu mwahichile myaka, mukanda vavulukile ngwavo “Let Your Name Be Sanctified,” uze valowele mu 1961, wambile ngwawo Navote emanyinyineko vawavisa, kaha Yezevele emanyinyineko Kulishitendomu. Kaha luyanjisa vamumwenesele Navote kuli Yezevele lwemanyinyineko luyanjisa luze vanamononga vawavisa mumakumbi ano akukuminyina. Hamyaka yayivulu, mijimbu yangana yamuMbimbiliya yinazamisanga lufwelelo lwavatu jaKalunga. Kaha mwomwo ika vyuma vinalumukila?
10. (a) Kuzangama chandungo chinamukafwe ngachilihi hakulumbununa mijimbu yimwe yamuMbimbiliya? (b) Mikanda yetu yili nakuhanjika chikuma havyuma muka makumbi ano?
10 Hamyaka eyi yinahichimo, Yehova nakafwe “ndungo wakushishika wakuzangama” azangame chikuma nakuvanguluka. Mujila muka? Kuzangama chinamulingisa alihende kukuvulukanga mijimbu yimwe yamuMbimbiliya ngwenyi yemanyinako vyuma vimwe, kuvanga kaha nge kuli unjiho wamwenemwene wamuVisoneka unasolola ngocho. Kaha nawa vanachiwane nge ulumbunwiso wakunyima uze wahanjikilenga havifwanyisa navyuma vyemanyinyineko wapwile waukalu kwivwishisa, nakuwanuka, nakuuzachisa mukuyoya. Chachinenenyi, kulumbununa mijimbu yamuMbimbiliya mujila kaneyi yakusaka kuyifwanyisa kuvyuma vimwe chajimbalishilenga vishina vyavilemu vatela kulinangula vatu kumijimbu kana. Ngocho, mikanda yetu makumbi ano yili nakuhanjika chikuma mwakusolwela vilinga vyakufwana nge lufwelelo, nalukakachila, namuchima wakuzachila Kalunga navilinga vyeka vyavilemu. *
Chakutalilaho chaNavote chatunangula chishina chachilemu (Talenu palangalafu 11)
11. (a) Uno mujimbu waNavote unatulumbunukila ngachilihi jino, kaha chakutalilaho chayou mutu chinahase kutukafwa ngachilihi? (b) Mwomwo ika mikanda yetu makumbi ano kayeshi nakuvula kuhanjika havyuma vimwe novyo vyemanyinako? (Talenu chihande “[cha]Vihula Vyakufuma Kuli Vaka-kutanga” chili mumangazini yino.)
11 Uno mujimbu waNavote unatulumbunukila ngachilihi makumbi ano? Unatulumbunukila mujila yayashi kwivwa. Ou mutu wakwolola afwile mwomwo apwile wakulonga, keshi nge mwomwo emanyinyineko Yesu chipwe vawavisako. Akavangijilenga Jishimbi jaYehova numba tuhu ayoyelele muchiyulo chamwangana wamupi. (Kula. 36:7; Vamya. 1, 21:3) Ngocho chakutalilaho chenyi chinahase kutukafwa noholyapwa kachi nge vali nakutufumbukila chipwe kutwimanyina nakole. (Tangenu WaChimoteu 2, 3:12.) Vaka-Kulishitu vosena vanahase jino kwivwishisa nakwanuka, nakuzachisa chishina echi tunalinangula kuchakutalilaho chaNavote.
12. (a) Vyuma muka katwatela kukukulula kutalisa kumijimbu yamuMbimbiliya? (b) Mwomwo ika tuli nakwivwishishila vyuma vyakujiminyina vyamuMbimbiliya? (Talenu kwinyikila chamwishi.)
12 Uno twatela kukukulula ngwetu mijimbu yamuMbimbiliya vayisonekelele kaha kutunangula etu, kayatwama novyo yemanyinako nyi? Nduma. Muchishishisa chakulumbununa ngwavo mijimbu eyi neyi yamuMbimbiliya yemanyinako vyuma vimwe, mikanda yetu makumbi ano yili nakuhanjikanga omu mijimbu yamuMbimbiliya yimwe yapandama kuyikwavo. Chakutalilaho, kulonga nakumika chaNavote omu vamuyanjishilenga palanga nakukufwa chenyi cheji kutwanukisanga kulonga chaKulishitu navawavisa. Achishinganyekenu nawa hakulonga chavandumbwetu vavavulu vaze vapwa “mikoko veka.” Pundu vene, tunalimwena omu Yehova ali nakutunangula mujila yayashi. *
KULUMBUNUNA VIFWANYISA VYAYESU MUJILA YAYASHI
13. Vyakutalilaho muka vili nakusolola nge tuli jino nakulumbununa vifwanyisa vyaYesu mujila yayashi kwivwa?
13 Yesu Kulishitu apwile Muka-kunangula wamunene havatu vatwamaho lyehi hano hamavu. Jila yimwe azangile chikuma kunangwilamo vatu shina yakuzachisa vifwanyisa. (Mateu 13:34) Vifwanyisa vyapwa vyamwaza mwomwo vyeji kukafwanga kulumbununa vyuma vyavikalu mujila yayashi yize nayiheta vatu kumichima. Mumyaka eyi yinahichimo, mikanda yetu yinalumbununanga vifwanyisa vyaYesu mujila yayashi kwivwa. Chakutalilaho, Kaposhi Kakutalila kaJuly 15, 2008 atukafwile tutachikize kanawa mwalumbunukila chifwanyisa chaYesu chachimbalwila, nachize chalinona lyamusetale, nachize chalyoji lyachikokela. Tunatachikiza jino ngwetu vifwanyisa vyosenevi vyatalisa kuWangana waKalunga, uze unakafwe vatu vavavulu vakane kaye kano kakuhuka nakupwa tumbaji twaKulishitu vamuchano.
14. (a) Uno chifwanyisa chakaSamaliya wamuchima wamwaza twachilumbunwinenga ngachilihi? (b) Uno makumbi ano chifwanyisa kana tuli nakuchilumbununa ngachilihi?
14 Nyi ngachilihi mijimbu yakujiminyina chipwe ngwetu vifwanyisa vize ahanjikilenga Yesu? Mijimbu yimwe yangana yapwile hivifwanyisa naupolofweto. Yimwe nawa yatwama navishina vyavilemu vyakutunangula. Kaha jino twatachikiza ngachilihi mijimbu yize yikwechi ovyo yemanyinako nayize kayatwama novyo yemanyinakoko? Tunatachikiza mijimbu kana chikoki chikoki mumyaka eyi yinahichimo. Chakutalilaho, achitalenu omu twalumbunwinenga chifwanyisa chaYesu chakaSamaliya wamuchima wamwaza. (Luka 10:30-37) Mu 1924, Kaposhi Kakutalila ahanjikile ngwenyi uze kaSamaliya emanyinyineko Yesu, kaha jila yakushikumuka kufuma kuYelusalema yakuya kuYeliko yemanyinyineko chiyoyelo chavatu chize chili nakupihilako lika kufuma vene haze vatu valikangile muEtene. Vihwanga vaze vapwile hajila vemanyinyineko jikapani jajinene navaka-kusekasana vachipululu, kaha uze kapilishitu nakaLevi vemanyinyineko Kulishitendomu. Oloze makumbi ano, mikanda yetu yazachisa chifwanyisa kana nakwanukisa vaka-Kulishitu vosena valihende kumuchima wakumona vatu mweka namweka. Twatela kukafwa vosena vaze vali muukalu navaze vanakalikiza, chikumanyi hakuvakafwa vatachikize muchano waKalunga. Pundu vene, tuli nakwivwa kuwaha hakumona omu Yehova ali nakutulumbunwina muchano mujila yayashi.
15. Vyuma muka natushimutwila muchihande chinakavangizaho?
15 Muchihande chinakavangizaho, natukekesa chifwanyisa cheka ahanjikile Yesu chavajike vamapwevo 10. (Mateu 25:1-13) Yesu asakile tumbaji twenyi vamumakumbi akukuminyina vevwishise ngachilihi chifwanyisa kana? Uno kala mutu, nakala chuma, nakala mujimbu vavuluka muchifwanyisa echi vyemanyinako vyuma vimwe vyayilemu vyakulutwe nyi? Uno apwile nakusaka tulinangule vishina vyavilemu kuchifwanyisa kana vize navitukafwa mumakumbi ano akukuminyina tahi? Tutalenu kanawa.
^ par. 4 Ou Kaposhi Kakutalila kaChingeleshi uze vali nakusoneka mujila yayashi aputukile kulovoka muJuly 2011. Kufuma vene haze, ou kaposhi kana ali jino namumalimi eka amandende.
^ par. 5 Vali nakuwahisa vyuma mangana eyi Mbimbiliya yilovoke namumalimi eka nawa.
^ par. 10 Chakutalilaho, mukanda waLondezezenunga Lufwelelo Lwavo wahanjika hachiyoyelo chavatu 14 vakulisezaseza vamuMbimbiliya. Vihande vyamumukanda kanou vyahanjika chikuma havyuma tunahase kulinangula kumijimbu kana, keshi havifwanyisa navyuma vyemanyinakoko.
^ par. 12 Tuyokutuyoku nawa, muMbimbiliya mwatwama vyuma vimwe ‘vyavikalu kwivwa.’ Chakutalilaho, vyuma vimwe navimwe vize asonekele Paulu mumikanda yenyi vyapwa vyavikalu kutachikiza. Oloze vatu vosena vasonekele Mbimbiliya vavahwiminyine nashipilitu yajila. Ngocho shipilitu kana yikiko yili nakukafwa vaka-Kulishitu vamuchano makumbi ano vevwishise Mbimbiliya “[na]vyuma vyakujiminyina vyaKalunga.”—Petu. 2, 3:16, 17; Koli. 1, 2:10.
