1, 2. Mwomwo ika Yesu ahanjikilile chifwanyisa chajitalende?

MUCHIFWANYISA chajitalende, Yesu avulukile hatoma mulimo vatwama nawo tumbaji twenyi vawavisa. Twatela kutachikiza mwalumbunukila echi chifwanyisa, mwomwo chapandama kuli vaka-Kulishitu vamuchano vosena, numba vapwa nalutalililo lwakukayoyela mwilu chipwe hano hamavu.

² Yesu ahanjikile chifwanyisa kana omu apwile nakukumbulula tumbaji twenyi vaze vamuhulishile ‘vyachinjikizo chakutachikijilaho kupwako chenyi nachikukulwishi chakatwamino kamyaka yino.’ (Mateu 24:3) Ngachize echi chifwanyisa chili nakutesamo mumakumbi etu ano, kaha nawa hichinjikizo chakupwako chaYesu uze ali nakuyula mwaMwangana.

3. Vyuma muka natulinangula kuvifwanyisa vasoneka hali Mateu kapetulu 24 na 25?

³ Echi chifwanyisa chajitalende chalifwana navifwanyisa vyeka vitatu vize vasoneka hali Mateu 24:45 nakutwala ku 25:46. Chifwanyisa chimwe chahanjika hali ndungo wakushishika wakuzangama, chikwavo chahanjika hali vajike vamapwevo 10, kaha cheka chahanjika hali mikoko navapembe. Yesu ahanjikile vifwanyisa vyosenevi omu apwile nakukumbulula chihula vamuhulishile alumbunune vyakupwako chenyi. Muvifwanyisa vyosenevi viwana, Yesu avulukile vilinga vize navikakafwa vatu vakatachikize vaka-Kulishitu vamuchano  mumakumbi akukuminyina. Chifwanyisa chandungo wakushishika, nachechi chavajike vamapwevo, nachechi chajitalende chatalisa kuli vaka-Kulishitu vawavisa. Muchifwanyisa chandungo wakushishika, Yesu ashindakanyine ngwenyi lizavu lyalindende lyavaka-Kulishitu vawavisa vaze vakwechi mulimo wakuhana vaka-kuzata kuzuvo kulya chakushipilitu, vatela kupwa vakushishika nakuzangama. Muchifwanyisa chavajike vamapwevo, Yesu alumbunwine ngwenyi vaka-kumukavangiza vawavisa vosena vatela kulizanga nakuvanguluka, mwomwo kavatachikiza likumbi chipwe ola mwakeza Yesuko. Kaha muchifwanyisa chajitalende, Yesu asolwele nge vaze vawavisa vatela kuzata nangolo mulimo wavo vavahana. Yesu apandamishile chifwanyisa chamakumishilo chamikoko navapembe kuli vaze vatwama nalutalililo lwakukayoyela hano hamavu. Alumbununwine ngwenyi vatela kupwa vakushishika nakukafwa vandumbwaYesu vawavisa vaze vachili hano hamavu. * Tushimutwilenu jino hachifwanyisa chajitalende.

4, 5. Uno uze mutu chipwe ngwetu kaka emanyinako iya, kaha talende yalemene ngachilihi?

⁴ Tangenu Mateu 25:14-30. Hamyaka yayivulu mikanda yetu yinalumbununanga nge, uze mutu chipwe ngwetu uze kaka vavuluka muchifwanyisa emanyinako Yesu, kaha uze ungeji ayile kulifuchi lyeka wemanyinako omu Yesu ayile mwilu mu 33 C.E. Muchifwanyisa cheka, Yesu asolwele ovyo ayililile ungeji kana ngwenyi, ayile “akatambule ngolo jawangana.” (Luka 19:12) Yesu katambwile ngolo jaWangana hahaze vene akindulukile mwiluko. * Oloze atwamine “kulivoko lyachilyo lyaKalunga. Kufuma vene haze, ali nakuvandamina palanga nomu navakalingisa vaka-kole jenyi kupwa chitwamo chakulyata mahinji enyi.”—Hepe. 10:12, 13.

⁵ Ou mutu vavuluka muchifwanyisa kanechi apwile najitalende 8, kahechi chasolola nge apwile muka-luheto halwola luze. * Shimbu kanda akatuke ungeji wenyi uze ayile kulifuchi lyeka, apangilile jitalende kana kuli vandungo jenyi. Afwelelele ngwenyi ava vandungo navasekasana omu mwalinga ikiye nayi. Chiwenya uze mutu, Yesu apwile navyuma vimwe vyavilemu shimbu kanda ayenga mwilu. Vyuma mukovyo? Vyuma kana shina mulimo uze azachilenga mukuyoya chenyi.

6, 7. Uno jitalende jemanyinako ika?

⁶ Yesu amwenenga mulimo wakwambulula nakunangula vatu kupwa waulemu chikuma. (Tangenu Luka 4:43.) Oloze atachikijile ngwenyi mulimo kana waunene, kaha nawa vatu vavavulu navetavila mujimbu wamwaza. Shikaho alwezelele tumbaji twenyi ngwenyi: “Andulenu meso enu mutale mande, kaha namumona ngwenu anatomasana lyehi, anatemo kwaha.” (Yowa. 4:35-38) Hakuhanjika mazu awa, Yesu apwile nakushinganyeka hamulimo wakukungulula vatu veka vamichima yamwaza vaze navakapwa tumbaji twenyi. Chiwenya njimi wamwaza, Yesu kasezele ou wande watomasanyine nakwaha chakuzeneka vaka-kwahako. Shikaho omu asangukile, oloze shimbu kanda ayenga mwilu, ahanyine tumbaji twenyi mulimo waulemu chikuma ngwenyi: ‘Yenunga mukanangule vatu vakapwe tumbaji.’ (Mateu 28:18-20) Hakulinga ngocho, Yesu avahanyine luheto lwalulemu lwamulimo wakwambulula.—Koli. 2, 4:7.

⁷ Vyuma muka twatela kukukulula? Omu Yesu ahanyine vaka-kumukavangiza mulimo wakutunga tumbaji, chafwanyine nge avahanyine  “vyuma vyenyi” chipwe ngwetu jitalende jenyi. (Mateu 25:14) Ngocho mukavatu, jitalende jemanyinako mulimo wakwambulula nakutunga tumbaji.

8. Numba tuhu ndungo hindungo vamuhanyine jitalende jakulihandununa, oloze vyuma muka afwelelele kaka yavo?

⁸ Muchifwanyisa chajitalende, Yesu alumbunwine ngwenyi ndungo umwe vamuhanyine jitalende jitanu, mukwavo vamuhanyine jivali, kaha weka vamuhanyine yimwe. (Mateu 25:15) Numba tuhu ndungo hindungo atambwile jitalende jakulihandununa, oloze uze kaka yavo afwelelele ngwenyi navazata nangolo vasekasane najize jitalende. NaYesu afwelelele ngwenyi tumbaji twenyi vawavisa navazata noho hakumina ngolo javo mulimo ou wakwambulula. (Mateu 22:37; Kolo. 3:23) Mulikulukaji lyamyaka lyakulivanga, kuputuka vene haPendekoseta mu 33 C.E., vaka-kukavangiza Kulishitu vaputukile kusekasana najize jitalende. Mulimo vahundanganyine kutalisa kukwambulula nakutunga tumbaji vausoneka mumukanda wamuMbimbiliya waVilinga. *—Vili. 6:7; 12:24; 19:20.

9. (a) Vaze vandungo vakushishika vavali vazachishile ngachilihi jize jitalende, kahechi chasolola vyuma muka? (b) Mulimo muka vazata “mikoko veka”?

⁹ Mumakumbi akukuminyina, chikumanyi kuputuka vene mu 1919, vandungo jaKulishitu  vakushishika vawavisa hano hamavu vanapunga nakusekasana najitalende jaMwata wavo. Ngana mwavaze vandungo vatete vavali vamuchifwanyisa, vandumbwetu vawavisa vanazatenga chikupu nangolo. Oloze katwatela kusandasanda tuwane veya vemanyinako ndungo uze vahanyine jitalende jitanu nauze vahanyine jitalende jivaliko. Muchifwanyisa echi, ava vandungo vosena vavali vawanyinyineho jitalende jeka jakuhakila hali jize vavahanyine, ngocho vosena vazachile nangolo. Uno mulimo muka vazata vaze vatwama nalutalililo lwakukayoyela hano hamavu? Vazata mulimo waulemu chiyovo. Chifwanyisa chaYesu chamikoko navapembe chatunangula nge vaze vatwama nalutalililo lwakukayoyela hano hamavu vakwechi mulimo wakukafwa vandumbwaYesu vawavisa mumulimo wakwambulula nakunangula vatu. Mumakumbi ano akukuminyina amakalu, awa mazavu avali ali nakuzachila hamwe nge “utanga umwe” hakuzata ou mulimo wakutunga tumbaji.—Yowa. 10:16.

10. Chihanda muka chachilemu chachinjikizo chakupwako chaYesu?

¹⁰ Mwata asaka tusekasane najitalende vatuhana. Nganomu tunashimutwila lyehi, tumbaji twenyi vakushishika vamulikulukaji lyamyaka lyakulivanga vavulishile jitalende jenyi. Nyi ngachilihi mumakumbi ano akukuminyina omu chili nakutesamo jino echi chifwanyisa chajitalende? Vangamba jaYesu vakushishika vali nakuhundangana nangolo ou mulimo wakwambulula nakutunga tumbaji. Kahechi chili nakulingisa makombakaji namakombakaji avatu vavambapachise mwaka himwaka. Kaha ava vali nakumbapachisa vali nakupwa hamukana wavaka-kwambulula Wangana. Ou mulimo nachechi kuzovoloka vili nakusolola hatoma nge mulimo wakwambulula nakunangula vatu hichihanda chachilemu chachinjikizo chakupwako chaYesu muWangana. Pundu vene Mwata Yesu ali nakwivwila kuwaha ava vangamba jenyi vali nakuzata ou mulimo.

11. Vyuma muka vinatulingisa tukukulule ngwetu Yesu mwakahituluka mujimbongo haluyando lwalunene?

¹¹ Yesu mwakeza nakuhituluka mujimbongo navandungo jenyi kusongo yaluyando lwalunene luze luli nakwiza. Vyuma muka vinatulingisa tuhanjike ngocho? Muupolofweto wenyi vasoneka hali Mateu kapetulu 24 na 25, Yesu ahanjikile vyakwiza chenyi mapapa kakavulu. Hakuvuluka vyakusopesa chize nachikapwako haluyando lwalunene, Yesu ambile ngwenyi vatu “navakamona Mwanamutu ali  nakwiza hamavwi amwilu.” Akolezezele vaka-kumukavangiza vaze vali nakuyoyela mumakumbi akukuminyina vapwenga vakuvanguluka mwomwo ‘kavatachikiza likumbi mweza Mwata wavoko,’ kaha nawa ‘haola yize kavashinganyekele ngwavo yikiko mwezako, hakiko vene mweza Mwanamutu.’ (Mateu 24:30, 42, 44) Ngachize, omu Yesu ambile ngwenyi mwata chipwe ngwetu “kaka yavaze vandungo ejile nakuhituluka navo mujimbongo,” apwile nakutalisa kulwola luze mwakeza nakusopesa vatu kusongo yakatwamino kano. *—Mateu 25:19.

12, 13. (a) Vyuma muka ahanjikile mwata kuli vandungo jenyi vavali vatete, kaha mwomwo ika? (b) Lwola muka vawavisa navakavalamika tutachikijilo twamakumishilo? (Talenu lipwata lyakwamba ngwavo “ Kutambula Fweto haKufwa.”) (c) Fweto muka navakatambula vaze navakamona kupwa mikoko?

¹² Kweseka nachechi chifwanyisa, omu ejile mwata awanyine uze ndungo ahanyine jitalende jitanu nauze ahanyine jivali vanashishika mwomwo vosena vahakilileho hajitalende jize vavahanyine. Ou mwata ambile kuli ndungo hindungo hali ava vandungo jenyi vavali ngwenyi: “Wazachila, ove ndungo wamwaza wakushishika! Unapunga uwakushishika havyuma vyavindende. Nangukutongola ulamenga vyuma vyavivulu.” (Mateu 25:21, 23) Uno vyuma muka mwakawana Mwata Yesu uze vatohwesa omu mwakeza nakusopesa kulutwe?

¹³ Tumbaji twenyi vawavisa vaze vapwa vasamalikita vaze vemanyinako vandungo vatete vavali navakavalamika tutachikijilo twamakumishilo shimbu kanda luyando lwalunene luputuke. (Kuso. 7:1-3) Shimbu kanda jita yaAlamangetone, Yesu mwakavahana fweto yavo vavashika mwilu. Vaze vakwechi lutalililo lwakukayoyela hano hamavu, vaze veji kukafwanga vandumbwaKulishitu vawavisa mumulimo wakwambulula halwola kana navakavamona kupwa mikoko keshi nge vapembeko, kaha nawa navakavayula kuWangana waKalunga nakuvahana fweto yakukayoyela hano hamavu.—Mateu 25:34.

14, 15. Uno Yesu apwile nakulumbununa ngwenyi vandumbwenyi vawavisa vavavulu navakapwa vakuhuka kaha nawa vovwa nyi? Lumbununenu.

¹⁴ Muchifwanyisa kanechi, ndungo wamakumishilo avumbikile talende yenyi muchishishisa chakuyizachisa kukusekasana chipwe kuyitwala kuli vaka-nyambaulu. Ou ndungo asolwele muchima waupi sulumunu mwomwo achisakwile mumuchima wenyi kuhona kulinga vyuma asakile mwata wenyi. Mwata wenyi amuvulukile ngwenyi “ndungo wakuhuka wamuvwa.” Ou mwata wenyi amutambwile yize talende nakuyihana kuli uze apwile najitalende 10. Kufumaho ou ndungo wakuhuka vamumbilile “mumilima kuweluka.” ‘Mwamuze vene mukiko apwile nakulila nakulingenjunga kumazo.’—Mateu 25:24-30; Luka 19:22, 23.

¹⁵ Hakuwana nge ndungo umwe avumbikile talende yamwata wenyi, uno Yesu hano apwile nakulumbununa ngwenyi vaka-kumukavangiza vawavisa vamwe navakapwa vakuhuka kaha nawa vovwa nyi? Nduma. Achitalenu hamujimbu wosena. Muchifwanyisa chandungo wakushishika wakuzangama, Yesu  ahanjikile vyandungo wamupi uze avetele vakwavo vandungo. Yesu kapwile nakupolofweta ngwenyi nakukapwa ndungo wamupiko. Oloze apwile nakuhuhumuna ndungo wakushishika akahone kusolola vilinga vyavipi vyayou ndungo wamupi. Chochimwe nawa, muchifwanyisa chavajike vamapwevo 10, Yesu kapwile nakulumbununa ngwenyi chimbwa chavaka-kumukavangiza vawavisa navakapwa vakuhulama kwijiva nge vaze vajike vamapwevo vatanuko. Oloze apwile nakuhuhumuna vandumbwenyi vakushipilitu havyuma vinahase kusoloka kachi nge kaveshi kuvanguluka nakutona likako. * Ngocho kweseka navishina evi tunashimutwila, nachipwa chakutamo kukukulula ngwetu muchifwanyisa chajitalende, Yesu kapwile nakulumbununa ngwenyi vandumbwenyi vawavisa vavavulu mumakumbi akukuminyina navakapwa vakuhuka kaha nawa vovwako. Yesu apwile nakuhuhumuna vaka-kumukavangiza vawavisa vazatenga lika nangolo ‘hakusekasana’ najitalende javo. Ngocho navalihenda kuvilinga namuchima wandungo wamupi.—Mateu 25:16.

16. (a) Vishina muka tunalinangula kuchifwanyisa chajitalende? (b) Uno ulumbunwiso muka wauhya uli muchihande chino kutalisa kuchifwanyisa chajitalende? (Talenu lipwata lyakwamba ngwavo “ Kutachikiza Mwalumbunukila Chifwanyisa chaJitalende.”)

¹⁶ Vishina muka vivali tunalinangula kuchifwanyisa chajitalende? Chatete, Mwata Kulishitu nahane vandungo jenyi vawavisa chuma chize amona kupwa chachilemu chikuma, kulumbununa mulimo wakwambulula nakutunga tumbaji. Chamuchivali, Kulishitu asaka tuvosena tuzate nangolo mumulimo ou wakwambulula. Kachi nge natulinga ngocho, kaha natufwelela ngwetu Mwata mwakatufweta, chikalu kaha kutunalame lufwelelo lwetu, nakupwa vakuvanguluka, nakushishika lika.—Mateu 25:21, 23, 34.