1, 2. (a) Vyuma muka ahanjikile Yesu kutalisa kumakumbi akukuminyina? (b) Vihula muka natushimutwila?

ACHISHINGANYEKENU muli nakumona Yesu natwame haPili yaMilive yize yalitalasanyine natembele muYelusalema. Ali navaposetolo jenyi vawana, Petulu, Andelei, Yakova, naYowano. Ava vaposetolo vanalihulika nakwivwilila omu Yesu ali nakuvalweza vyuma navikasoloka kulutwe. Yesu ali nakutotojola upolofweto wakusolola vyuma navikasoloka kumakumbi akukuminyina amukaye kano kakapi omu mwakayula muWangana waKalunga. Ali nakuvalweza ngwenyi mulwola elu lwakusongo, ‘ndungo yenyi wakushishika wakuzangama’ mwakamwimanyinako hano hamavu nakuhana vangamba jenyi vyakulya vyakushipilitu halwola lwakutamo.—Mateu 24:45-47.

² Kufumaho, muupolofweto woumwe, Yesu ahanjikile chifwanyisa chavajike vamapwevo 10. (Tangenu Mateu 25:1-13.) Tushimutwilenu havihula vino: (1) Uno echi chifwanyisa chatalikisa mulihi? (2) Uno vawavisa vakushishika vanakavangizanga ngachilihi mazu akuhuhumuna atwama muchifwanyisa echi, kaha vyuma muka vinafumumo? (3) Uno tunahase kunganyala ngachilihi kuchifwanyisa chaYesu makumbi ano?

3. Mikanda yetu kunyima yahanjikile vyuma muka hachifwanyisa chavajike vamapwevo 10, kaha vyuma muka vyafuminemo?

³ Nganomu twashimutwilanga muchihande chinafumuho, mumyaka yakalinwomu ndungo wakushishika nalumuna jila ali nakulumbunwinamo mijimbu yamuMbimbiliya. Ali jino nakushindakanya chikuma havyuma natulinangula kumijimbu kana, muchishishisa chakushindakanya haupolofweto navyuma vyemanyinako. Achitalenu hachifwanyisa chaYesu chavajike vamapwevo 10. Mikanda yetu kunyima yambilenga ngwayo aze manongo, namaji, najisaji vyemanyinyineko vyuma chipwe mutu umwe. Kushishika hatuvishina kanetu twatundende vavuluka, chalingishile vatu vahone kumona chishina chivene chize Yesu ahanjikilile chifwanyisa kana. Mujila muka? Nganomu natumona kulutwe, echi chihula chachilemu chikuma.

4. Muchifwanyisa echi, (a) mwenyamwenga apwa iya? (b) vajike vamapwevo vapwa veya?

⁴ Tutalenu jino omu chatalisa echi chifwanyisa ahanjikile Yesu. Chatete, tutalenu vatu avulukile omu muchifwanyisa chenyi. Uno mwenyamwenga iya? Mwenyamwenga apwa Yesu. Tunahanjika ngocho, mwomwo halwola lweka Yesu alivulukile ivene ngwenyi ikiye mwenyamwenga. (Luka 5:34, 35) Uno vajike vamapwevo vapwa veya? Vapwa “utanga wamikoko waundende” wavaka-Kulishitu vawavisa. Tunatachikiza ngachilihi? Muchifwanyisa echi, Yesu ambile ngwenyi vaze vajike vamapwevo vatelelele kupwa vakulizanga namanongo avo akumunyika omu mweza mwenyamwenga. Jino nyingililenu vyuma vize Yesu alwezele vaka-kumukavangiza vawavisa. Avalwezele ngwenyi: “Vwalenu uvwalo nakupwa vakulizanga, kaha manongo enu apwenga akuwika kakahya. Pwenunga nge vatu vaze vali nakuvandamina kaka yavo uze mwakinduluka kufuma kuchilika chaulo.” (Luka 12:32, 35, 36) Kaha nawa kaposetolo Paulu nakaposetolo Yowano vafwanyishile vaka-kukavangiza Kulishitu vawavisa kuvajike vamapwevo vatoma. (Koli. 2, 11:2; Kuso. 14:4) Shikaho tunamono nge mazu aze Yesu ahuhumwine vajike vamapwevo vaze vasoneka hali Mateu 25:1-13 atalisa kuli vaka-kumukavangiza vawavisa.

5. Yesu asolwele ngachilihi lwola nachikatesamo chifwanyisa chenyi?

⁵ Uno mazu aYesu atalisa kulwola muka? Vyuma ahanjikile Yesu kusongo yachifwanyisa echi vyatukafwa tutachikize lwola kana. Yesu ambile ngwenyi: “Mwenyamwenga ahetele.” (Mateu 25:10) Ngana muze vahanjikile muKaposhi Kakutalila kaJuly 15, 2013, upolofweto waYesu vasoneka hali Mateu kapetulu 24 na 25 wahanjika ‘vyakwiza’ chenyi mapapa 8. Omu Yesu avulukile vyakwiza chenyi, apwile nakutalisa kulwola lwaluyando lwalunene omu mwakeza nakusopesa vatu nakunongesa kano kaye kakuhuka. Shikaho echi chifwanyisa chatalisa kumakumbi ano akukuminyina, kaha Yesu mwakeza mulwola lwaluyando lwalunene.

6. Uno echi chifwanyisa chatalikisa mulihi?

⁶ Uno echi chifwanyisa chatalikisa mulihi? Anukenu vyuma vahanjika mumujimbu kana. Yesu ahanjikile chatete hali ‘ndungo yenyi wakushishika wakuzangama.’ Ambile ngwenyi ou ndungo mwakapwa kalizavu kakandende kamalunga vawavisa vaze navakatwaminyina vaka-kukavangiza Kulishitu mumakumbi akukuminyina. Yesu ahuhumwine malunga kana ngwenyi vatela kupwa lika vakushishika. Kufumaho, ahanjikile jino echi chifwanyisa hakusaka kuhuhumuna vaka-kumukavangiza vawavisa vosena vamumakumbi akukuminyina ngwenyi ‘vatonenga’ mokomoko navajimbalisa lutalililo lwavo lwakukayoyela mwilu. (Mateu 25:13) Tukekesenu jino echi chifwanyisa nakumona omu vaze vawavisa vanakavangiza mazu akuhuhumuna amuchifwanyisa kana.

7, 8. (a) Mwomwo ika vaze vajike vamapwevo vakuzangama vapwile vakulizanga? (b) Vaka-Kulishitu vawavisa vanalizange ngachilihi?

⁷ Muchifwanyisa kanechi, Yesu ambile ngwenyi vaze vajike vamapwevo vakuzangama kavapwile nge vaze vakuhulamako, vakiko valizangile vyakwiza chamwenyamwenga. Mwomwo ika? Mwomwo yavyuma vivali, vapwile vakulizanga nakuvanguluka. Ava vajike vamapwevo vatelelele kutona lika nakulama manongo avo ufuku wosena. Vajike vakuhulama kavambachile maji ekako, oloze vaze vakuzangama vatanu valizangile chikupu. Vambachile maji eka mujisaji javo namanongo avo. Uno vaka-Kulishitu vawavisa vakushishika vanalizangenga ngachilihi vyakwiza chaYesu?

⁸ Mumakumbi ano akukuminyina, vaka-Kulishitu vawavisa vanalinginga ngana muze valingile vaze vajike vamapwevo vakuzangama. Valizanga kutesamo mulimo wavo palanga nakusongo. Vatachikiza ngwavo hakusaka vatesemo kanawa mulimo wavo wakuzachila Kalunga, kavatela kuhaka muchima kuvyuma vyakumujimba vyamukaye kano kaSatanako. Ngocho vafwila kuzachila Yehova namichima yavo yosena mwomwo vamuzanga chikuma, kaha nawa vazanga Mwanenyi, keshi nge mwomwo yakutachikiza ngwavo kukuma chili hakamwihiko. Veji kulamanga kulonga chavo nakukana shipilitu yamukaye kano yakufwila luheto, naujila, navilinga vyavipi vyalizangamina. Ngana muze vajike vamapwevo vakuzangama vaze valizangile namanongo avo akumunyika, vawavisa vali nakutwalaho lika kumunyika omu vali nakuvandamina kwiza chaMwenyamwenga, numba tuhu chili nakusoloka nge ali nakushimbula.—Fwili. 2:15.

9. (a) Yesu ahuhumwine ngachilihi vaka-kumukavangiza kutalisa kukunongoka? (b) Vaze vawavisa vanakula ngachilihi kumutambi wakwamba ngwavo: “Mwenyamwenga uno”? (Talenu nawa kwinyikila chamwishi.)

⁹ Chuma chikwavo chakafwile vaze vajike kupwa vakulizanga shina kuvanguluka. Oloze muchifwanyisa echi, vaze vajike 10 “vosena vanongokele, kaha vayile mutulo” omu ashimbwile mwenyamwenga. Uno vaka-Kulishitu vawavisa makumbi ano vanahase kunongoka nakuya mutulo, kulumbununa kuhungukila kuvyuma vyeka omu vali nakuvandamina Yesu nyi? Eyo. Yesu ejivile ngwenyi navatu vamichima yamwaza vanahase kuzeya nakuhungukila kuvyuma vyeka omu vali nakuvandamina kwiza chenyi. Ngocho vawavisa vakushishika vanazatenga nangolo mangana vapwenga lika vakuvanguluka nakutona. Mujila muka? Muchifwanyisa kanechi, vajike vosena 10 vahindukile omu vevwile mutambi wakwamba ngwavo: “Mwenyamwenga uno!” Oloze vaze vajike vakuzangama vakiko kaha vatonene palanga nakusongo. (Mateu 25:5, 6; 26:41) Nyi ngachilihi vawavisa vakushishika makumbi ano? Mumakumbi ano akukuminyina, vanakula kumutambi wakwamba ngwavo, “Mwenyamwenga uno!” Vanetavila unjiho wamwenemwene wakusolola nge ou Mwenyamwenga kalinwomu ezenga, kaha vanalizange vyakwiza chenyi. * Tukekesenu jino vyuma ahanjikile Yesu kumakumishilo achifwanyisa chenyi vize vyatalisa kulwola mwakeza.

10. Mazu vahanjikile vaze vajike vakuzangama navaze vakuhulama vyaneha chihula muka?

¹⁰ Kusongo yachize chifwanyisa, vaze vajike vakuhulama vahanjikile navaze vakuzangama mangana vavahaneko maji vahake mumanongo avo. Oloze vaze vajike vakuzangama vakanyine. (Tangenu Mateu 25:8, 9.) Uno lwola muka vaka-Kulishitu vawavisa navakakana kukafwa vaze navakakalikiza? Kukumbulula natuchiwana hakukekesa  lwola navikasolola vyumevi. Anukenu ngwenu kulinangula chetu chakalinwaha chinasolola nge Yesu uze apwa Mwenyamwenga mwakeza nakusopesa vatu kwakamwihi nakukuma chaluyando lwalunene. Echi chasolola nge kushimutwila kana nachikapwako kwakamwihi nakukuma chaluyando lwalunene, mwomwo shimbu kanda lwola kana, vaze vawavisa navakavalamika tutachikijilo twamakumishilo.

11. (a) Vyuma muka navikasoloka shimbu kanda luyando lwalunene luputuke? (b) Uno vajike vakuzangama vatalikishile mulihi hakulweza vajike vakuhulama vayenga nakulanda maji?

¹¹ Ngocho, shimbu kanda luyando lwalunene luputuke, vawavisa vakushishika vosena hamavu navakavalamika tutachikijilo twamakumishilo. (Kuso. 7:1-4) Kulumbununa nge kufuma halwola kanelu, navakapwa mwilu. Oloze achishinganyekenu vyuma navikasoloka shimbu kanda luyando lwalunene luputuke. Vyuma muka navikasoloka kuli vawavisa vaze vahonene kutona, vaze kavalamine kulonga chavoko? Kaveshi kukavalamika tutachikijilo twamakumishiloko. Halwola kanelu, vaka-Kulishitu veka vakushishika navakavawavisa. Omu nalukaputuka luyando lwalunene, vaze vakuhulama navakalikomokela hakumona omu navakanongesa Mbavilone Yayinene. Halwola kana hakiko navakatachikiza ngwavo kavalizangile vyakwiza chaMwenyamwenga, Yesuko. Uno vyuma muka navikasoloka halwola kana kachi nge navakasaka kuvakafwa? Chifwanyisa chaYesu chakumbulula kanawa chihula kana. Vaze vajike vakuzangama vakanyine kuhana maji avo kuli vaze vajike vakuhulama, kaha vavalwezele kuya nakulanda maji. Oloze chaluvinda lwola kana lwapwile “mukachi kaufuku,” ngocho kakwapwile mutu wakuvalanjisa majiko. Vachelewele chikupu.

12. (a) Halwola lwaluyando lwalunene, vyuma muka navikasoloka kuli vawavisa vaze navakahona kulama kulonga chavo shimbu kanda vavalamike tutachikijilo twamakumishilo? (b) Vyuma muka navikasoloka kuli vaze navakafwana nge vaze vajike vamapwevo vakuhulama?

¹² Chochimwe nakuli vawavisa nawa. Halwola lwaluyando lwalunene, vawavisa vakushishika kaveshi kukakafwa weshowo ahonene kushishikako. Lwola lwakukafwa vatu nalukapwa hilunahichi lyehi. Shikaho vyuma muka navikasoloka kuli vaze vakuhona kushishika? Nyingililenu vyuma vyasolokele kuli vaze vajike vakuhulama vaze vayile nakulanda maji. Yesu ambile ngwenyi: “Mwenyamwenga ahetele. Kaha vajike vamapwevo vaze vapwile vakulizanga lyehi, vengilile nenyi hamwe muze mwapwile chifupawenga, kaha chikolo vachisokele.” Omu Kulishitu mwakeza muupahu wenyi kwakamwihi nakukuma chaluyando lwalunene, mwakakungulula vatu jenyi vawavisa vakushishika nakuya navo mwilu. (Mateu 24:31; 25:10; Yowa. 14:1-3; Teso. 1, 4:17) Oloze mwakakana vaze vakuhona kushishika. Ngana muze vajike vamapwevo vakuhulama, navakatambakana ngwavo: “Ove Mwata, Ove Mwata, tusokolweleko.” Oloze chaluvinda Yesu mwakavakumbulula nganomu mwakakumbulula vatu vavavulu vakufwana nge vapembe halwola kanelu lwakusopesa. Mwakavakumbulula ngwenyi: “Chamuchano vene nangumilweza ngwami, ami kangwamitachikizako.” Olwo luvinda kana!—Mateu 7:21-23; 25:11, 12.

13. (a) Mwomwo ika katwatela kukukulula ngwetu vaka-Kulishitu vawavisa vavavulu kaveshi kukahasa kupwa vakushishikako? (b) Mwomwo ika mazu aYesu akuhuhumuna asolola nge afwelela vangamba jenyi vawavisa? (Talenu muvwimbimbi wakulivanga.)

¹³ Kweseka navyumevi tunashimutwila, natukukulula ngwetu ngachilihi? Uno Yesu apwile nakulumbununa ngwenyi vandungo jenyi vawavisa vavavulu navakahona kushishika nakuvashishisa jino naveka nyi? Nduma. Anukenu ngwenu, shimbu kanda Yesu ahanjike vyuma kanevi, ahuhumwine “ndungo wakushishika wakuzangama” azeneke kupwa ndungo wamupi. Echi kachalumbunwine nge vyuma kana navikasolokako. Ngocho, nachechi chifwanyisa nawa chatwama namazu akuhuhumuna amalemu. Ngana muze vajike vamapwevo vatanu vapwile  vakuhulama, kaha vakwavo vatanu nawa vapwile vakuzangama, ngocho muka-Kulishitu himuka-Kulishitu vawavisa atela kufwila kupwa wakulizanga nakuvanguluka, mokomoko mwakapwa wakuhulama nakuhona kushishika. Kaposetolo Paulu vamuhwiminyine ahuhumune vakwavo vaka-Kulishitu vawavisa. (Tangenu WavaHepeleu 6:4-9; esekesenuko Lushimbi lwamuchivali 30:19.) Nyingililenu ngwenu Paulu avahuhumwine hatoma chakuzeneka kuhita mutenga, oloze enjikijile ngwenyi kulutwe vandumbwenyi vaka-Kulishitu navakatambula fweto yavo. Chochimwe nawa, kuhuhumuna chatwama muchifwanyisa chavajike vamapwevo, chasolola nge Yesu afwelela chikuma vangamba jenyi vawavisa. Atachikiza kanawa ngwenyi vawavisa vosena vanahase kupwa vakushishika nakukahasa kukatambula fweto yayinene.

14. Mwomwo ika “mikoko veka” navakiko vanahase kunganyala kuchifwanyisa chavajike vamapwevo 10?

¹⁴ Hakuwana nge chifwanyisa chaYesu chavajike vamapwevo 10 chatalisa kuli vaka-Kulishitu vawavisa, uno twatela kukukulula ngwetu chifwanyisa kana kachatwama nanganyo kuli “mikoko veka” tahi? (Yowa. 10:16) Nduma, chikwechi nganyo. Anukenu mazu ahanjikile Yesu muchifwanyisa kanechi akwamba ngwenyi, “Tonenunga.” Lwola lukwavo nawa Yesu ahanjikile ngwenyi: “Omu nguli nakwamba kuli enu mukiko munangwamba nakuli vosena ngwami: Tonenunga.” (Mako 13:37) Yesu asaka vaka-kumukavangiza vosena vapwenga vakulizanga nakuvanguluka. Enga, vaka-Kulishitu vosena vatela kulondezeza chakutalilaho chamwaza chavaka-Kulishitu vawavisa vaze vahaka mulimo wakwambulwila kulutwe mukuyoya chavo. Anukenu ngwenu vajike vamapwevo vakuhulama valombele maji kuli vajike vamapwevo vakuzangama. Echi cheji kutwanukisanga nge tuvosena mutu himutu twatela kupwa vakushishika kuli Kalunga, nakulizanga lwola lwosena, nakupwa wakuvanguluka lika. Naumwe wauchi nahase kutulingila vyumevi. Tuvosena mutu himutu navakatusopesa kuli Muka-kusopesa wakwoloka, Yesu Kulishitu uze ali nakwiza kalinwomu ngana. Shikaho tuvosena twatela kupwa vakulizanga.

15. Mwomwo ika chilika chaulo chaKulishitu namwenga wenyi chapwila chachilemu kuli vaka-Kulishitu vamuchano vosena?

¹⁵ Vaka-Kulishitu vosena navakanganyala kuchilika chaulo chize vavuluka muchifwanyisa chaYesu. Evi vikiko tweji kwivwilanga kuwaha hakushinganyeka hachilika kana. Kulutwe omu nayikakuma jita yaAlamangetone, vawavisa navakapwa mwilu muze navakapwa jino pwevo lyaKulishitu. (Kuso. 19:7-9) Vatu vosena hamavu navakanganyala kuulo kanou wamwilu, mwomwo watufwelelesa chiyulo chamwenemwene. Ngocho tuvosena tufwilenu kukavangiza chishina vatunangula muchifwanyisa chavajike vamapwevo 10 numba twatwama nalutalililo lwakukayoyela mwilu chipwe hano hamavu. Tupwenunga lika vakulizanga, nakuwahisa michima yetu, nakuzama mbe, nakupwa lika vakuvanguluka mangana tukalivwise kuwaha vyuma vili nakwiza kulutwe vize natuwahishila Yehova.