Fwelelenunga Yehova Lwola Lwosena
“Enu vatu, fwelelenu muli ikiye lwola lwosena.”—SAMU 62:8.
1-3. Paulu vamukafwile ngachilihi afwelele Yehova? (Talenu muvwimbimbi wakulivanga.)
CHAPWILE chaponde mutu kupwa muka-Kulishitu muLoma. Vaka-kukavangiza Kulishitu vavayanjishilenga chikuma mwomwo vavavangijikilile ngwavo vakiko vochele nganda mu 64 C.E. kaha nawa ngwavo vahunga vatu. Nge nayenu kumwapwile halwola kana, kachi vamihakilenga mukamenga nakumiyanjisa. Mwomwo vaka-Kulishitu vamwe vavatanyile kuli tunyama, veka vavapapalilile havitondo, kaha veka vavochelenga oku vachili vavatonyi mangana yize milangi yavo yipwenga mumunyi naufuku.
2 Chasoloka nge halwola kana hakiko kaposetolo Paulu vamuhakile kamuchivali mukamenga muLoma. Uno vakwavo vaka-Kulishitu vejile nakumukafwa tahi? Paulu pamo apwile nakushinganyeka hachuma kana mwomwo asonekelele Chimoteu ngwenyi: “Hakulihakwila chami chatete, naumwe wauchi apwile kusali yami, vosena vangusezele. Kaha kanda navavahana mulongako.” Chipwe ngocho, Paulu ejivile ngwenyi kapwile ukawenyiko. Asonekele ngwenyi: “Oloze Mwata emanyine kusali yami, nakunguhana ngolo.” Chikupu vene, Mwata Yesu ahanyine Paulu Chimo. 2, 4:16, 17. *
ngolo jakumukafwa. Uno ngolo kana jamukafwile ngachilihi? Achitalenu vyuma vyasolokele. Ambile ngwenyi: “Vangupululwile kukanwa kandumba.”—3 Kushinganyeka hachumechi chajikijishile Paulu nakumukafwa afwelele nge Yehova mwamukafwa omike muvyeseko vize apwile nakumona halwola kana navize navikeza kulutwe. Mwomwo ambile ngwenyi: “Mwata mwangupululula kumilimo yayipi yosena.” (Chimo. 2, 4:18) Enga, Paulu alinangwile nge Yehova naMwanenyi veji kutukafwanga mujila yamwenemwene numba tuhu vakwetu vatu vanahono kutukafwa muukalu wetu wosena.
LWOLA MWATELA ‘KUFWELELA YEHOVA’
4, 5. (a) Iya nahase kumikafwa muukalu wenu wosena? (b) Munahase kuzamisa ngachilihi usepa wenu naYehova?
4 Kutala lwola lumwe mweji kwivwanga ngwenu muli nakulipika naukalu ukawenu nyi? Pamo ukalu kana shina kuhona milimo, kumishinyinyika kuli vakwenu kushikola, chipwe ukalu weka waunene. Kaha nawa pamo mwalombele vakwenu vamikafwe, oloze vyuma valingile kavyamikafwile chikumako. Chikupu vene, ukalu umwe kaveshi kuhasa kuukumisa kuli vatuko. Nge muli muukalu kanou, kutala mazu amuMbimbiliya akwamba ngwavo “mufwelelenga Yehova” apwa amokomoko tahi? (Vishi. 3:5, 6) Nduma. Kalunga eji kukafwanga chikupu vatu jenyi ngana muze yasolola mijimbu yayivulu yamuMbimbiliya.
5 Shikaho muchishishisa chakusulakana nge vakwenu vanahono kukumisa ukalu wenu, enu fwelelenu Yehova nakumona omu mwamizakama ngana muze alingile kaposetolo Paulu. Nge namulinga ngocho, kaha namufwelelanga chikuma Yehova nakuzamisa usepa wenu nayikiye.
FWELELENUNGA KALUNGA MANGANA MUZAMISE USEPA WENU NAYIKIYE
6. Mwomwo ika chinahase kupwa chachikalu kufwelela Yehova nge tuli muukalu?
6 Munahase kumulweza Yehova ukalu muli nawo kuhichila mukulomba, kahechi nachimikafwa muunde muchima nakutachikiza ngwenu munazate kweseka noho hakumina ngolo jenu, kaha ikiye mwamikafwa. (Tangenu Samu 62:8; WaPetulu 1, 5:7.) Nge namulinga ngocho, kaha namuzamisa usepa wenu naYehova. Lwola lumwe chinahase kupwa chachikalu kufwelela ngwenu Yehova mwamikafwa. Mwomwo ika? Mwomwo Yehova lwola lumwe keshi kukumbulula kulomba hahaze veneko.—Samu 13:1, 2; 74:10; 89:46; 90:13; Hamba. 1:2.
7. Mwomwo ika Yehova lwola lumwe keshi kukumbulula kulomba hahaze veneko?
7 Mwomwo ika Yehova lwola lumwe keshi kukumbulula kulomba chetuko? Anukenu ngwenu usepa wetu nayikiye aufwanyisa kuusoko wachisemi namwana. (Samu 103:13) Chisemi keshi kuhana mwanenyi kala chuma mwalomba chipwe kulinga ngocho hahaze veneko. Vyuma vimwe vize nahase kulomba mwana vinahase kupwa vyamokomoko. Vikwavo pamo nahase kukamuhanavyo halwola lwakutamo. Kaha vyeka vinahase kuneha ukalu kuli ikiye nakuli vakwavo. Tuyokutuyoku nawa, kuhana mwana kala chuma mwasaka chinahase kulingisa chisemi apwenga jino ndungo yamwana. Chochimwe nawa, Yehova nahase kuhichisamo tando yayisuku numba akumbulule kulomba chetu. Akwechi ngolo jakulinga ngocho mwomwo ikiye Tengi yetu wamangana, Mwata wetu wazangi, kaha nawa Setu wamwilu. Nge mwatuhana kala vyuma natulomba hahaze vene, kaha Isaya 29:16; 45:9.
nachenyeka usepa wetu nayikiye.—Esekesenuko8. Vyuma muka atufwelelesa Yehova kutalisa kuukalu natumona?
8 Twatela kwijiva nawa ngwetu Yehova atachikiza kanawa hakumina ngolo jetu. (Samu 103:14) Ngocho keshi kutwechelela tulipike naukalu ukawetuko, oloze eji kutukafwanga hakupwa setu. Lwola lumwe tweji kwivwanga nge ukalu unatutohwela chikuma, kaha katweshi kuhasa kuuhonesako. Chipwe ngocho, Yehova atufwelelesa ngwenyi keshi kukechelela vangamba jenyi vayande chikuma kuhambakana hakumina ngolo javoko. Enga, ‘mwavasela kuulovokelo.’ (Tangenu Wavaka-Kolinde 1, 10:13.) Ngachize twatela kufwelela ngwetu Yehova atachikiza kanawa hakumina ngolo jetu.
9. Vyuma muka twatela kulinga kachi nge hanga tunalizakamina numba tuhu tunalombo kuli Yehova?
9 Nge tunalombo kuli Yehova atukafwe okunyi hanga tunalizakamina lika, kaha tuvandaminenu Yehova uze atachikiza lwola lwakutamo kutukafwa. Yehova apwa muka-kutalilila chikoki, chipwe ngocho afwila kutukafwa. Mbimbiliya ngwayo: “Yehova ali nakumitalilila chikoki mangana amivwile uselewa, mwakatuka mangana amitetele. Mwomwo Yehova apwa Kalunga wachiyulo. Vawahilila vaze veji kumuvandaminanga.”—Isa. 30:18.
“KANWA KANDUMBA”
10-12. (a) Vyuma vinahase kukaluhwilako lika ngachilihi kuli muka-Kulishitu uze ali nakuvijisa kausoko? (b) Uno kufwelela Yehova mulwola lwalukalu chinahase kuzamisa ngachilihi usepa wetu nayikiye? Hanenu chakutalilaho.
10 Nge muli muukalu waunene chikuma, munahase kwivwa nge muli “kukanwa kandumba,” ngana muze evwile Paulu. Halwola kanelu, twatela kufwelela chikuma Yehova numba tuhu chapwa chachikalu kulinga ngocho. Chakutalilaho, achishinganyekenu muli nakulama kausoko kenu uze ali nakuviza chikuma. Pamo munalombo kuli Yehova amihane mangana nangolo. * Nge munazate noho hakumina ngolo jenu, munahase kwivwa kumuchima undutu hakutachikiza ngwenu Yehova ali nakumimona, kaha mwamikafwa mumike.—Samu 32:8.
11 Lwola lumwe, vyuma vinahase kukaluhwa chikuma. Vandotolo vanahase kumilweza mijimbu yakulimbalaka. Kaha nawa vausoko wenu vaze mwafwelela ngwenu navamivendejeka vanahase kulingisa ukalu wenu utohweleko chikuma. Oloze Yehova mwamihana ngolo. Pandamenunga lika kuli ikiye. (Tangenu Samwele 1, 30:3, 6.) Omu Yehova mwamikafwa muunde muchima, usepa wenu nayikiye nauzaminako lika.
12 Linda * amwene muchano wamazu kana omu avijishile visemi jenyi hamyaka yayivulu. Ambile ngwenyi: “Omu twapwile muukalu kanou, kakavulu ami nalunga lyami, nandumbwami walunga katwatachikijile vyakulingako. Lwola lumwe twahombelenga chikuma. Oloze oholili tuli nakumona omu Yehova apwile hamwe nayetu. Atukolezezele nakutukafwa kweseka naukalu wetu, nahalwola luze twahonene vyakulinga.”
13. Kufwelela Yehova chakafwile ngachilihi ndumbwetu umwe omike muvihuli?
13 Kufwelela chikuma Yehova chinahase kutukafwa namuvihuli vyavinene. Omu ndumbwetu Rhonda vamulukulwile kuli lunga lyenyi uze kapwa chinjihoko, songo yenyi walunga vamuwanyine namusongo waupi walupus wakuzeneka kuka. Omu mwahichile tukweji vavandende, pwevo
lyayou ndumbwenyi afwile. Rhonda aputukile kuzata mulimo waupayiniya omu aputukile kwivwako kanawa kufuma haukalu ahichilemo. Kufumaho, naye afwile. Vyuma muka vyakafwile Rhonda omike? Ambile ngwenyi: “Ngwahanjikilenga naYehova mukulomba hakumbi hakumbi mangana angukafwe namuvyuma vyavindende. Echi changukafwile ngukunyuke ngwami Yehova kwatwama chikupu. Ngwalinangwile kupendamina hali Yehova, keshi hali ami ivene chipwe vakwetu vatuko. Kaha angukafwile muvyuma vyosena. Ngocho nguli nakuzachila hamwe naYehova.”Vyeseko vinahase kwiza mutanga vize vinahase kujiha usepa wetu naYehova (Talenu jipalangalafu 14-16)
14. Vyuma muka navikafwa muka-Kulishitu wakushishika uze ali nakausoko kenyi vanafumisa muchikungulwilo?
14 Tuchitalenu hachakutalilaho chikwavo. Ngachilihi nge kausoko kenu vanamufumisa muchikungulwilo? Kweseka navyuma mwalinangula muMbimbiliya, mwatachikiza kanawa omu mwatela kuyoya namutu kana. (Koli. 1, 5:11; Yowa. 2, 10) Oloze kukavangiza jindongi jahanjika hachihande kana chinahase kupwa chachikalu. * Kutala namufwelela ngwenu Senu wamwilu mwamikafwa muhase kukavangiza jishimbi jamuMbimbiliya jakupandama kuchihande kana tahi? Elu hilwola lwakuzamisa usepa wenu naYehova hakupandama chikuma kuli ikiye.
15. Mwomwo ika Alama alikangilile kujindongi jaYehova vamuhanyine muEtene?
15 Achishinganyekenu chindende havyuma vyasolokele kuli mutu watete Alama. Kutala ashinganyekele ngwenyi mwalikanga kuli Yehova nakutwalaho Chimo. 1, 2:14) Uno mwomwo ika alikangilile? Chuma chalingishile Alama alyenga muhako amuhanyine Eve shina kuzanga chikuma puwenyi. Evwililile puwenyi muchishishisa chakwivwilila Kalunga kenyi Yehova.—Kupu. 3:6, 17.
lika kuyoya nyi? Nduma, mwomwo Visoneka vyatulweza ngwavyo Alama “kavamutangishileko.” (16. Iya twatela kuzanga chikuma, kaha mwomwo ika?
16 Uno echi chasolola nge katwatela kuzanga chikuma vausoko wetu nyi? Nduma. Twatela kuzanga chikuma Yehova. (Tangenu Mateu 22:37, 38.) Echi nachinganyalisa vausoko wetu, numba vazachila Yehova chipwe nduma. Ngocho zangenunga chikuma Yehova nakumufwelela. Kachi nge muli nakwivwa kukola kumuchima hali kausoko kenu uze vanafumisa muchikungulwilo, kaha mulwezenu Yehova mukulomba. * (Loma 12:12; Fwili. 4:6, 7) Monenu lwola kana kupwa hilwola lwamwaza lwakumikafwa muzamise usepa wenu naYehova. Echi nachimilingisa mufwelele Yehova ngwenu mwamikafwa mujila yamwaza.
VYUMA TWATELA KULINGA OMU TULI NAKUVANDAMINA YEHOVA
Fwelelenu Yehova hakuzata chikuma mulimo wenyi (Talenu palangalafu 17)
17. Uno tweji kusololanga ngachilihi nge twafwelela Yehova hakuzata chikuma mulimo wakwambulula Wangana?
17 Mwomwo ika Paulu vamuyowelele “kukanwa kandumba”? Ambile ngwenyi: “Mangana mulimo wakwambulula vautesemo wosena kuhichila muli ami, kaha nawa vaka-mafuchi vosena vahase kuwivwa.” (Chimo. 2, 4:17) Ngana mwaPaulu, nge natuhaka muchima kumulimo wakwambulula, kaha Yehova ‘mwatuhana’ vyuma vyosena vyasakiwa. (Mateu 6:33) Hakuwana nge twapwa tuvaka-kwambulula Wangana, vatuhana mulimo wakwambulula “mujimbu wamwaza,” kaha Yehova atumona kupwa “tuvaka-kuzachila hamwe” nayikiye. (Teso. 1, 2:4; Koli. 1, 3:9) Nge natuzata chikuma mulimo wakwambulula, kaha nachipwa chachashi kuli etu kuvandamina Yehova atukafwe.
18. Mujila muka tunahase kufwelela Yehova nakuzamisa usepa wetu nayikiye?
18 Shikaho, tuzachisenu lwola tuli nalwo hakuzamisa usepa wetu naKalunga. Nge tunalizakamina havyuma vimwe, kaha tupandamenu chikuma kuli Yehova. Enga, kutanga Mazu aKalunga, nakulomba nalukakachila, nakuzata chikuma vyuma vyakushipilitu nachitulingisa tufwelele ngwetu Yehova mwatukafwa muukalu wetu oholili nakulutwe.
^ par. 2 “Kanwa kandumba” kaze ayovokele Paulu kanahase kupwa kachifwanyisa chipwe nduma.
^ par. 10 Kuli vihande vyavivulu vinahase kukafwa vaka-Kulishitu vali nakuviza navaze vali nakuvijisa. Talenu Tonenu! yaChingeleshi yaFebruary 8, 1994; February 8, 1997; May 22, 2000; naJanuary 22, 2001.
^ par. 12 Majina vanawalumuna.
^ par. 14 Talenu chihande chili mumangazini yino chakwamba ngwavo, “Mwomwo Ika Kufumisa Mutu muChikungulwilo Chapwila Chamwaza?”
^ par. 16 Kuli vihande vyavivulu vize navikafwa vaka-tanga yamutu vomike nge kausoko kavo naseze Yehova. Talenu Kaposhi Kakutalila kaSeptember 1, 2006 mafwo 17-21, naJanuary 15, 2007 mafwo 17-20.