NDUMBWETU walunga Julian ambile ngwenyi: “Omu ngwevwile mutambi wakwamba ngwavo mwanami vanamufumisa muchikungulwilo, ngwevwile nge kaye kanachikuluka. Apwile mwanami watwatwa, kaha ngwamuzangile chikuma. Kakavulu twalingililenga hamwe vyuma. Apwile wavilinga vyamwaza, oloze jino aputukile kupwa navilinga vyavipi. Puwami alililenga lwola lwosena, kaha kangwatachikijile mwakumuvendejekelako. Twashinganyekele ngwetu pamo yetu visemi yetu katwamulelele kanawako.”

Mwomwo ika natwambila ngwetu kufumisa mutu muchikungulwilo chapwa chamwaza numba tuhu cheji kwivwisanga kukola kumuchima? Mwomwo ika Visoneka vyahanjikila vyakufumisa vatu muchikungulwilo? Kaha vyuma muka vyeji kulingisanga mutu numba vamufumise muchikungulwilo?

Kwatwama vyuma vivali vize veji kufumishilanga mutu muchikungulwilo. Chatete, kachi nge Chinjiho wakumbapachisa nalingi shili. Chamuchivali, kachi nge mwahona kupihilila nakwalumuka hashili nalingi.

Numba tuhu Yehova atachikiza ngwenyi katwakupuka mwosenako, oloze ahakako jindongi jajila jize vatela kukavangiza vangamba jenyi. Chakutalilaho, Yehova atulweza tulihende kujishili jajinene jakufwana nge ujila, nakulemesa makombelo, nawiji, nakulyapula vakwetu, nakujiha vatu, nakupanda.—Koli. 1, 6:9, 10; Kuso. 21:8.

Namwitavila ngwenu eji jindongi jaYehova kajapwa jajikaluko kaha nawa jeji kutukinganga. Tuvosena twasaka kutwama navatu vamwenemwene vakuunda vaze tunahase kufwelela. Vatu kana shina vandumbwetu vakushipilitu. Vatwama navilinga vyamwaza mwomwo omu valihanyine kuli Kalunga valishikile kukavangizanga jindongi jamuMazu enyi mukuyoya chavo chosena.

Nyi ngachilihi nge muka-Kulishitu nalingi shili yayinene mwomwo yakuhona kukupuka mwosena? Kushikulu, vangamba jaYehova vakushishika navakiko valingilenga shili, oloze Kalunga kavakanyine nakuvavulyamako. Tutalenu chakutalilaho chaMwangana Ndavichi. Ndavichi alingile ujila namulonga wakujiha mutu, oloze kapolofweto Natane amulwezele ngwenyi: “Yehova nakukonekela shili yove.”—Samwe. 2, 12:13.

Kalunga akonekelele Ndavichi hashili alingile mwomwo apihililile nakwalumuka. (Samu 32:1-5) Namakumbi ano, ngamba yaYehova vanahase kumufumisa muchikungulwilo nge kate kupihilila nakwalumuka chipwe nge chatwalaho lika kulinga vyuma vyavipi. (Vili. 3:19; 26:20) Kachi nge mutu mwahona kusolola muchima wakupihilila nakwalumuka kuli vakulwane vaze vali mukomiti yakusopako, kaha veji kumufumisa muchikungulwilo.

Hakavanga tunahase kushinganyeka ngwetu lushimbi lwakufumisa muka-shili muchikungulwilo lwapwa lwalupi kaha kalwasolola kekeko, chikumanyi nge mutu kana apwa kausoko chipwe sepa lyetu. Oloze Mazu aYehova atulweza nge kufumisa mutu muchikungulwilo chapwa chamwaza.

Yesu ahanjikile hatoma ngwenyi, “mangana eji kulijimbulanga kupwa akwoloka kumilimo yawo.” (Mateu 11:19) Kufumisa muchikungulwilo mutu wakuhona kupihilila nakwalumuka chapwa chamwaza mujijila jitatu. Tushimutwilenu jino hajijila kana:

Kufumisa mutu muchikungulwilo cheji kunehanga kavumbi halijina lyaYehova. Hakuwana nge vatuvulukila lijina lyaYehova, ngocho vilinga vyetu vinahase kusaula chipwe kuvumbika lijina kana. (Isa. 43:10) Nganomu vilinga vyamwana vinahase kulingisa vatu vavumbike chipwe kusaula visemi jenyi, navilinga vyetu nawa vinahase kulingisa vatu vavumbike chipwe kusaula lijina lyaYehova. Vatu vanahase kuvumbika lijina lyaKalunga lyajila nge etu vangamba jenyi natukavangiza jishimbi jenyi nakupwa navilinga vyamwaza. Omu mukiko chapwile namumakumbi aEzekele. Omu vatu vakumafuchi eka vamwene vilinga vyamwaza vyavaYuleya, valishilenga lijina lyaKalunga kavo, Yehova.—Ezeke. 36:19-23.

Nge natupwa navilinga vyavipi, kaha natusawisa lijina lyaKalunga lyajila. Kaposetolo Petulu ahuhumwine vaka-Kulishitu ngwenyi: “Hakupwa muvana vakwononoka, kanda namwitavila kufwila chize mwapwilenga nacho kunyima omu mwahonene kutachikiza vyuma chimihungumwiseko. Oloze pwenunga vajila mutwamiso yenu yosena nge omu apwa Ou Wajila uze amisanyikile, mwomwo vasoneka ngwavo: ‘Pwenunga mwajila mwomwo ami ngwajila.’” (Petu. 1, 1:14-16) Enga, kupwa navilinga vyamwaza cheji kunehanga kavumbi halijina lyaKalunga.

Nge Chinjiho chaYehova umwe nalingi vyuma vyavipi, kaha masepa jenyi navatu veka vanahase kutachikiza vilinga kana mukuhita chamakumbi. Shikaho, kufumisa vatu muchikungulwilo chasolola nge Yehova asaka vatu vavilinga vitoma vaze valama jindongi jamuVisoneka mangana chikungulwilo chitwaleho lika kupwa chitoma. Chakutalilaho, likumbi limwe mutu ejile kukukunguluka kuZuvo yaWangana muSwitzerland, kaha ambile ngwenyi ali nakusaka kulinunga nachikungulwilo. Ndumbwenyi wapwevo vamufumisa muchikungulwilo mwomwo yakupwa navilinga vyavipi. Ou lunga ambile ngwenyi ali nakusaka kupwa muliuka lize “kalyeshi kwitavila vatu vavilinga vyavipiko.”

Kufumisa mutu muchikungulwilo cheji kukinganga chikungulwilo chavaka-Kulishitu chize chapwa chitoma. Kaposetolo Paulu ahuhumwine vaka-Kolinde vatachikize upi watwama hakwechelela mutu wavilinga vyavipi atwaleho lika kupwa muli vakiko. Afwanyishile ngolo javilinga vyavipi kuchimbalwila chachindende chize cheji kufutunwisanga muunga wosena. Ambile ngwenyi: “Chimbalwila chachindende cheji kufutunwisanga muunga wosena.” Jino avalwezele ngwenyi: “Mufumisenu owo muka-kuhuka muli enu.”—Koli. 1, 5:6, 11-13.

Chasoloka nge ou “muka-kuhuka” avulukile Paulu apwile mutu uze alingilenga vilinga vyavipi. Kaha mukuhita chalwola vakwavo muchikungulwilo vaputukile kumona nge vyuma alingilenga uze mutu kavyapihile chikumako. (Koli. 1, 5:1, 2) Kachi nge vechelelele mutu kana atwaleho lika kupwa muchikungulwilo, kachi vatu vosena muchikungulwilo vaputukile kulondezeza vilinga kana vize vyalisalile munganda kana. Kwechelela vatu vanakuvulumuna shili mukuchisakula mumichima yavo cheji kulingisanga vatu valelese jishimbi jaYehova. (Kwambu. 8:11) Mutu anakuvulumuna lika shili mukulizangila apwa “nge malolwa anaswame kwishi yameya” aze eji kuvombesanga lufwelelo lwavakwavo muchikungulwilo.—Yuta 4, 12.

Kufumisa mutu muchikungulwilo chinahase kumulingisa echenga vilinga vyenyi. Lwola lumwe Yesu ahanjikile vyamukweze umwe uze afumine hembo nakuya kulifuchi lyeka kuze akenyekele luheto lwenyi nakwazana muvilinga vyakuhuka. Ou mwana wachimwange amwene vichila nangindu hanyima kuze ayile, kaha alinangwile nge chiyoyelo kana chapwile chachipi sulumunu. Kutwala muze apihililile nakwalumuka, kaha akindulukile hembo nakulinunga natanga yenyi. (Luka 15:11-24) Yesu alumbunwine muchima wazangi asolwele ise yauze mwana hakumwivwila keke nakumutambula cheka. Echi chatukafwa tumone muchima wamwenemwene atwama nawo Yehova, uze atufwelelesa ngwenyi: “Kangweshi kwivwila kuwaha kufwa chamuka-kuhukako. Oloze ngwasaka muka-kuhuka aseze jijila jenyi nakuyoya lika.”—Ezeke. 33:11.

Omu mukiko chapwa nakumutu uze vanafumisa muchikungulwilo chipwe ngwetu kutanga yenyi yakushipilitu. Chinahase kumukafwa euluke nakumona ngwenyi najimbala. Mahinga mwamona, nakwanuka omu alivwishilenga kuwaha kulikata naYehova navandumbwenyi muchikungulwilo chinahase kumulingisa ambile vilinga vyavipi nakukinduluka jino kuchikungulwilo.

 Nge natupwa nazangi nakumika, kaha chinahase kulingisa mutu nahungumuka akinduluke. Muka-kwimba jisamu ambile ngwenyi: “Kachi nge muka-kwoloka mwanguveta, nachipwa hizangi yakwilila. Kachi nge mwanguhanjikila, nachipwa nge himaji navahingunwina hamutwe wami.” (Samu 141:5) Chakutalilaho, achishinganyekenu mutu ali nakulya vyakulya kaha vinamukakachila hamuliu. Mwakolonyoka nakuhona kuhwima kanawa, oku nangolo jinamukumu, kaha keshi nakuhanjikako. Nge navahona kumukafwa washi, kaha nahase kufwa. Pamo sepa lyenyi nahase kumuveta mbanda hanyima mangana chize kulya chinamukakachila chimufume. Mbanda kana yinahase kukola vene, oloze chachilemu kulinga ngocho mangana vamukafwe ayoye. Omu mukiko atalishile Ndavichi hano, ngwenyi muka-kwoloka vatela kumuzangamisa mangana apwenga kanawa.

Kufumisa mutu muchikungulwilo chapwa hikuzangamisa chamwaza chize chasakiwa kuli uze nalingi vilinga vyakuhuka. Omu mwahichile myaka 10, mwana Julian uze twavulukanga hakavanga ambilile vilinga vyavipi nakukinduluka jino muchikungulwilo, kaha oholyapwa apwa jino mukulwane muchikungulwilo. Ambile ngwenyi: “Kupwa kuweluka wachikungulwilo changulingishile ngulitalasane naukalu watwama hakulinga vyuma vyavipi. Kunguzangamisa mujila kaneyi chapwile chakutamo.”—Hepe. 12:7-11.

Numba tuhu kufumisa mutu muchikungulwilo cheji kulingisanga mutu apwenga muukalu wakushipilitu, oloze katwatela kulingisa ukalu kana uswezeko. Twatela kumona ngwetu kuzangamisa kana nachimukafwa ayoye kushipilitu.

Vakulwane vaze vatwama namulimo wakulweza mutu ngwavo vanamufumisa muchikungulwilo veji kusololanga muchima wazangi atwama nawo Yehova. Hakumulweza vyakumuhanga muchikungulwilo, veji kumulumbunwinanga kanawa mulikoji vyuma atela kulinga mangana vakamukindulwise muchikungulwilo. Hakusaka kumukafwa akinduluke kuli Yehova, vakulwane veji kutambukilanga vaze vali nakusolola muchima wakwalumuna vilinga vyavo. *

Vaka-tanga vatela kusolola ngwavo vazanga chikungulwilo namutu vanahange muchikungulwilo hakukavangiza lushimbi lwakuhona kulikata namutu vanafumisa muchikungulwilo. Julian ambile ngwenyi “Numba tuhu apwile lika mwanami, oloze vilinga vyenyi vyavipi vyalingishile tuhone kulikata nenyi.”

Vosena muchikungulwilo vatela kulihenda kukulikata nakuhanjika namutu vanafumisa muchikungulwilo, kahechi nachisolola nge vamuzanga. (Koli. 1, 5:11; Yowa. 2, 10, 11) Echi cheji kukundwiza jindongi jaYehova jakuzangamisa vatu kuhichila muli vakulwane muchikungulwilo. Vanahase nawa kusolola zangi hakulikata nakuvendejeka tanga yikwechi kausoko vanafumisa muchikungulwilo mangana vevwenga ngwavo vandumbwavo vavazakama chikuma.—Loma 12:13, 15.

Julian akukulula ngwenyi: “Kufumisa muchikungulwilo chapwa hikuzangamisa chamwaza chize cheji kwololanga mutu mangana ayoye kweseka namwaya jindongi jaYehova. Numba tuhu cheji kwivwisanga kukola kumuchima, oloze mukuhita chalwola cheji kukafwa mutu apwenga navilinga vyamwaza. Kachi ngwapwilenga nakulikata chipwe kushimutwila nenyi, kachi kavamukindulwishile muchikungulwiloko.”