OMU ngwasemukile muMarch 1930, ngwapwile navausoko namasepa vaze vazachililenga Yehova nakashishi. Ngwasemukilile mulifuchi lyaMalawi mungalila yaNamkumba, yize yatwama kwakamwihi nanganda yaLilongwe. Ngwalihanyine kuli Kalunga mu 1942 nakungumbapachisa mukalwiji wamwaza. Hamyaka 70 yakavangijileho, ngwafwililile kwambulula ngana muze kaposetolo Paulu alwezele Chimoteu ngwenyi: “Ambulula mazu, anguhwisa kuwambulula mulwola lwamwaza namulwola lwalukalu.”—Chimo. 2, 4:2.

Omu ndumbwetu Nathan H. Knorr naMilton G. Henschel vejile muMalawi halwola lwatete mu 1948, ngwevwile kuwaha, kaha ngwafwililile jino kuzachila Yehova mumulimo washimbu yosena. Ngunakwanuka mazu vatukolezezele ava vaka-kwimanyinako chikota chaVinjiho jaYehova muBrooklyn, New York. Vatu kafwe 6,000 twevwililile omu Ndumbwetu Knorr ahanjikile chihande chakwamba ngwavo, “Nguvulu waVaka-Mafuchi Vosena.”

Ngwawanyine mwanapwevo Lidasi uze valelelele mutanga yaVinjiho jaYehova ngana mwayami, uze afwililile kuzata mulimo washimbu yosena. Ngocho twalimbachile mu 1950 kaha kuheta mu 1953 twapwile navana vavali. Twalivwasanyine nge ami ngwatela kuputuka upayiniya washimbu yosena numba tuhu twapwile namulimo wakulela vana. Kaha omu mwahichile myaka yivali, vangutongwele kupwa payiniya wakulipwila.

Nakushimbula chiku, vangutongwele kupwa kalama wakujinguluka. Numba tuhu ngwapwile nakuzata mulimo kanou, oloze ngwahashile kuzakama tanga yami kumujimba nakushipilitu mwomwo yakungukafwa kuli puwami Lidasi. * Chipwe ngocho, tuvosena twafwililile kuzata mulimo washimbu yosena. Kuheta mu 1960, Lidasi nayikiye aputukile kuzata mulimo washimbu yosena mwomwo yakuwahisa kanawa vyuma nakutukafwa kuli vana vetu.

Twalivwishilenga kuwaha kuzachila vandumbwetu vamuvikungulwilo vyakulisezaseza halwola kana luze lwamwaza. Mulimo wetu wakutambwojoka watulingishile tuyenga kujiPili jamwaza jaMulanje jakusulo nakuheta kuChijiva chaMalawi chize chatwama kumusamuko waMalawi. Twamwene omu vatu vapwile nakuvulilako lika muvikungulwilo twazachilile.

Mu 1962 twalivwishile kuwaha kukunguluka changalila chize chapwile namutwe wakwamba ngwavo: “Vaka-Kwambulula vaKumika.” Lwola kanelu lwatukafwile tuvosena muMalawi tupwenga vakumika muukalu uze wapwile nakwiza kulutwe. Mwaka wakavangijileho, Ndumbwetu Henschel ejile  cheka muMalawi kukukunguluka chakulipwila chize chapwile munganda yaBlantyre, kaha kwapwile vatu 10,000. Kukunguluka kana chatukolezezele mangana tupwenga vakumika muukalu wapwile nakwiza.

Mu 1964 Vinjiho vavayanjishile chikuma mwomwo yakukana kwazana muvihande vyamapolitiki. JiZuvo jaWangana jakuhambakana ha 100 najizuvo jaVinjiho jakuhambakana ha 1,000 vajipuzwile. Oloze etu twatwalilileho lika mumulimo wetu wakutambwojoka palanga nomu fulumende yaMalawi yakanyishile mulimo waVinjiho mu 1967. Ofesi yamutango yamuBlantyre vayitambwile, kaha vamishonali vavahangile mulifuchi, naVinjiho vamuMalawi vavavulu vavahakile mukamenga kuhakilako nayami napuwami. Omu vatufumishile mukamenga, twatwalileho lika kuzata mulimo wakutambwojoka mukuzangama.

Likumbi limwe muOctober 1972, lizavu lyamaswalale vamuMalawi Youth League vakuheta kafwe 100 vapwile nakwiza nakulukuka zuvo yetu. Oloze mutu umwe hali vakiko alahile nakwiza nakutulweza ngwenyi tuswame mwomwo vapwile nakusaka kutujiha. Ngocho ngwalwezele puwami navana vaswame mumakonde aze apwile mwakamwihi. Kaha ami ngwachinyine nakunyina kumumbuma waunene. Ngwamwene omu vapuzwile zuvo yetu nakwenyeka vikumba vyetu vyosena.

Omu luyanjisa lwaswezele muMalawi, etu vavavulu twachinyine nakufuma mulifuchi. Tanga yetu yapwile nakutwama muChilombo chamatunduke muMozambique palanga namuJune 1974. Halwola kana ami napuwami Lidasi vatulwezele tuzate upayiniya wakulipwila muDómue, Mozambique, kungiza yaMalawi. Twazachile mulimo kana swi namu 1975, omu lifuchi lyaMozambique lyatambwile chiyulo kufuma kuli vaka-Portugal. Ngocho vatukindulwishile hamwe navakwetu Vinjiho kuMalawi kuze kwapwile vaka-kutuyanjisa.

Omu twakindulukile kuMalawi, vangulwezele ngutambukile vikungulwilo vyamunganda yaLilongwe. Numba tuhu twapwile nakumona luyando naukalu weka, oloze vikungulwilo vyapwile nakuvulilako lika muchihanda ngwapwile nakuzachila.

Likumbi limwe twayile kungalila kuze valikungulwilile vaka-mapolitiki nakushimutwila vihande vyavo. Vatu vamwe halizavu kana vatachikijile ngwavo etu twapwile tuVinjiho jaYehova, ngocho vatulwezele tutwame halizavu lyamapolitiki lyavakweze vavulukilenga ngwavo Malawi Young Pioneers. Twalembelelele Yehova atukafwe nakututwaminyina mulwola kanelu lwalukalu. Omu vakumishile kushimutwila, vaputukile kutuveta. Oloze pwevo umwe wakukola alahililile kuze twapwile nakutambakana ngwenyi: “Ngwamisakwililako vechenu. Ou lunga himwana ndumbwami. Mwechenu aliyile kwenyi.” Ngocho mukulwane wavo ambile ngwenyi: “Vechenu vayenga.” Twalikomokelele chikuma  havyuma alingile uze pwevo, mwomwo kapwile kausoko ketuko. Twamwene ngwetu Yehova akumbulwile kulomba chetu.

Mu 1981 twalihumanganyine cheka nalizavu lyaMalawi Young Pioneers. Vatutambwile jikinga, naviteli vyetu, navikasha vyamikanda, najifwailo jakuzachisa mumulimo wakutambwojoka. Twachinyine nakuya kuzuvo yandumbwetu uze apwile mukulwane muchikungulwilo. Twalombele cheka kuli Kalunga atukafwe. Twalizakaminyine chikuma hamijimbu yapwile muze mujifwailo. Omu vaze vakweze vatalile mujifwailo, vawanyinemo mikanda vangusonekelele kufuma kujingalila jakulisezaseza jamuMalawi. Ngocho vevwile woma nakushinganyeka ngwavo ngwapwile nguchilolo wafulumende. Hahaze vene vatwalile vize vyuma vyosena kuli tulama vamuchikungulwilo vamungalila kana.

Likumbi limwe twapwile nakuzauka kalwiji muwato. Kaha mwenyawato apwile twamina wamapolitiki, ngocho asakile amone nge tuvosena muze muwato twapwile najikati jamapolitiki. Omu apwile nakwiza kuli etu, amwene mwiji uze vapwile nakutonda chikuma. Echi chanehele chikuma liwayanga kaha aha hakiko echelele namulimo wakutonda jikati. Ngocho twamwene ngwetu Yehova ikiye natukafwe.

MuFebruary 1984, ngwapwile nakuya kuLilongwe mangana ngukatume mikanda kuofesi yamutango yamuZambia. Kaha kapokola angwimikile nakupikita mungonga yami. Awanyinemo mikanda yahanjika haMbimbiliya, kaha angutwalile kuofesi yatupokola nakuputuka kunguveta. Ngocho angukashile namukole nakunguhaka mukapete kamwe navafunge vaze vevile vyuma vyambala.

Lichako, mukulwane watupokola angutwalile mukapete kakwavo muze asonekele halipapilo ngwenyi: “Ami Trophim R. Nsomba ngunakane kupwa nguChinjiho chaYehova mangana vangusokole.” Ngwamukumbulwile ngwami: “Ami ngunalizange kungukasa chipwe kungujiha. Nguchili nguChinjiho chaYehova.” Kaha ngwakanyine kusayina kulipapilo kana. Echi chevwishile uze kapokola kupihya chikuma, ngocho avetele nangolo konyi hamesa kaha kapokola apwile mukapete kakwavo ejile mbushi nakumona vyuma vyapwile nakusoloka. Uze kapokola amulwezele ngwenyi: “Ou lunga kate kusayina kulipapilo eli lyakusolola nge nalitwamina kwambulula. Ngocho asayine jino ngwenyi ikiye Chinjiho chaYehova mangana tumutume kuLilongwe vakamukashileko.” Halwola lwosenelu, puwami katachikijile vyuma vyapwile nakusoloka kuli amiko. Omu mwahichile makumbi awana, vandumbwetu vamwe vamulwezele okwo ngwapwile.

Kuofesi yatupokola yakuLilongwe vangulamine kanawa. Mukulwane watupokola ambile ngwenyi: “Waha lilonga eli lyaloso mwomwo vanakukashila haMazu aKalunga. Oloze vakwenu vali muno hiveji.” Kufumaho vangutwalile kuNjele yakuKachere kuze ngwapwile hatukweji vatanu.

Mukulwane wamukamenga ketu awahililile hakwiza chami, kaha asakile ngupwenga ngupashita wamuze mukamenga. Alwezele pashita uze apwileho  ngwenyi: “Kangweshi nakusaka ove unangulenga Mazu aKalunga munoko mwomwo uli muno mukamenga mwomwo yakwivila vaka-chachi yove.” Ngocho vanguhanyine mulimo wakunangula vatu Mbimbiliya hakukunguluka chize twapwilenga nacho chalumingo hichalumingo mukamenga.

Kutwala muze, vyuma vyapihililileko chikuma. Vakulwane vamukamenga vanguhulishile nguvalweze Vinjiho vangahi vapwile muMalawi. Omu ngwahonene kuvalumbunwina kanawa, vanguvetele kaha ngwalezumukile. Likumbi likwavo nawa vasakile nguvalweze okwo kwapwilile chikota chetu. Ngwavakumbulwile ngwami, “Chihula kana chachashi kukumbulula.” Tupokola vawahililile chikuma, kaha vaswamikile likina lyavo lyakukopa mazu. Ngwavalumbunwinyine ngwami chikota chaVinjiho jaYehova vachivuluka muMbimbiliya. Valikomokelele chikuma, kaha vambile ngwavo, “Halihi vasoneka muMbimbiliya?”

Ngwavakumbulwile ngwami: “Hamukanda waIsaya 43:12.” Vapandumwine Mbimbiliya nakuchitanga munona munona, ngwavo: “Yehova nambe ngwenyi: . . . Enu munapu muvinjiho jami, kahami ngunapu nguKalunga wamuchano.” Vatangile chisoneka kana mapapa katatu. Kaha vahulishile ngwavo: “Uno chikota chaVinjiho jaYehova chinahase kupwa ngachilihi muMbimbiliya, uno keshi kuAmericako tahi?” Ngwavakumbulwile ngwami: “NaVinjiho jaYehova kuAmerica vamona ngwavo echi chisoneka chalumbununa chikota chavo.” Hakuwana nge kangwavakumbulwile kweseka nomu vapwile nakusakako, ngocho vangutumine kuNjele yakuDzaleka, kunote yaLilongwe.

MuJuly 1984, ngwayile kuNjele yakuDzaleka kuze kwapwile Vinjiho 81. Ngwakawanyine vafunge 300, vosena vasavalilenga mukapete kamwe hamavu. Chindende chindende, etu Vinjiho jaYehova twalipangile mutumazavu twatundende nakushimutwilanga chisoneka hakumbi hakumbi chize vasakwilenga vandumbwetu. Echi chatukolezezele chikuma.

Kutwala muze, mukulwane wamukamenga atuhandunwine kuvafunge vakwavo. Muka-kulama vafunge atulwezele ngwenyi: “Fulumende kayamihungako. Oloze tunamitumbika muno munjele kuchina navamijiha kuli vakweze, kaha nawa mwomwo mweji kwambululanga vyajita yize yili nakwiza. Ngocho fulumende yinakwivwa woma ngwayo maswalale javo navakafwa mujita kana.”

MuOctober 1984, tuvosena vatutwalile kuzango yakusopela. Kufumaho, tuvosena vatukashile cheka hamyaka yivali. Nahalwola kanelu, vatuhakila mukamenga kamwe navafunge vaze kavapwile Vinjihoko. Oloze mukulwane wamukamenga avilikile kuli vosena ngwenyi: “Vinjiho jaYehova kaveshi kunwa makanyako. Ngocho enu vaka-kulama, kanda namuvayanjisa hakuvalomba vamihane makanya chipwe kuvatuma vakamimbachile kakahya kakuswamikisa makanya enuko. Ava hivatu jaKalunga. Vinjiho jaYehova vosena muvahanenga vyakulya kavali halikumbi mwomwo kavavulumwine  mulongako, oloze vanavakashila havyuma vafwelela muMbimbiliya.”

Twanganyalile nawa mwomwo yakupwa napuho yamwaza. Omu kwapwilenga milima chipwe vula, vafunge kavavetavishilenga kulovoka hawelukako. Oloze etu vatwitavishilenga kulovoka kala lwola mwomwo vejivile ngwavo katweshi kuhasa kuchinako. Likumbi limwe kapokola uze apwile nakututala hakuzata muwande aholokele, kaha twamumbachile nakumutwala muchilombo chavafunge mangana vakamuhane vitumbo. Vakulwane vatupokola vatufwelelele chikuma. Shikaho kupwa natwamiso yamwaza chalingishile vaze vatukwachile ufunge valise lijina lyaYehova.—Petu. 1, 2:12. *

HaMay 11, 1985, vangufumishile mukamenga kaDzaleka. Ocho kuwaha kana twevwile hakulinunga cheka hamwe mwatanga. Tweji kusakwililanga Yehova hakutukafwa mangana tutwaleho lika kulama kulonga chetu mulwola kana luze lwalukalu. Kutalikisa kulwola kana twevwile ngana muze evwile kaposetolo Paulu uze asonekele ngwenyi: “Enu vandumbwami, etu katwasakile ngwetu muhone kwijiva luyando lwetu luze twamwene . . . Katwatachikijile nge natuyoyako. Kaha twamwene ngwetu vanatutongwela kufwa. Echi chapwile ngocho mangana tuhonenga kulifwelela etu vavene, oloze tufwelelenga Kalunga uze eji kusangulanga vafu. Ikiye atuyowele kuponde yize yambile kutujiha, kaha mwatuyovola nawa. Tunatalilila nawa kuli ikiye ngwetu mwatuyovolanga lika.”—Koli. 2, 1:8-10.

Lwola lumwe chasolokelenga nge katweshi kuyoyako. Oloze twalombelenga kuli Yehova lwola lwosena mangana atuhane ngolo jakumika namangana akutukafwa tupwenga vakulinyisa nakwalisa lijina lyenyi.

Yehova natukisula mumulimo wenyi mulwola lwamwaza namulwola lwalukalu. Ocho kuwaha kana tuli nakwivwa oholyapwa hakumona ofesi yamutango yamuLilongwe yize vakumishile kutunga mu 2000, najiZuvo jaWangana jakuhambakana ha 1,000 vanatungu mulifuchi lyaMalawi lyosena. Yehova natukisula mwamunene kushipilitu, kaha ami napuwami Lidasi tweji kumonanga nge tuli nakulota kaha. *