1, 2. Vyuma muka vanawane tulama vakujinguluka muvikungulwilo vyavivulu?

KALAMA wakujinguluka umwe, apwile kukuliwana chize eji kupwanga nacho navakulwane muchalumingo chakulipwila. Jino shimbu kanda akukulule, avatalile, kaha avevwilile kuwaha hamilimo vapwile nakuhundangana chikumanyi hakumona vamwe vaze vapwile nakusoloka nge vaise. Oloze avehwile ngwenyi, “Vyuma muka muli nakulinga mangana munangule vandumbwetu vatengamo kuzata milimo muchikungulwilo?” Ava vakulwane vanukilenga ou kalama wakujinguluka hamazu avalwezele akunangula vandumbwavo. Mukulwane umwe amukumbulwile ngwenyi, “Kuhanjika muchano, katweshi nakunangula vandumbwetuko.” Navakwavo vakulwane vetavilile ngwavo mukiko.

² Kachi nge nayenu mwapwa muvakulwane, kaha munahase kumona ngwenu vaze vandumbwetu vahanjikile mwamuchano. Tulama vakujinguluka mukaye kosena vanakuhanjikanga ngwavo muvikungulwilo vyavivulu muli nakusakiwa kunangula vandumbwetu vamalunga, chikumanyi vakweze mangana vapwenga tufunga. Oloze chuma kana chapwa chachikalu. Mwomwo ika?

3. (a) Visoneka vyasolola ngachilihi nge kunangula vakwetu chapwa chachilemu, kaha mwomwo ika twatela kufwila kuzata mulimo kana? (Talenu kwinyikila chamwishi.) (b) Mwomwo ika chapwila chachikalu kuli vakulwane vamwe kunangula vandumbwavo?

 ³ Hakupwa mutufunga, mwatachikiza ngwenu chapwa chachilemu kunangula vandumbwenu. * Nayenu mwatachikiza ngwenu kuli nakusakiwa vandumbwetu vavavulu vamalunga vakafwe vikungulwilo vizame kushipilitu, nakutwaminyina nawa vikungulwilo vyeka vize navisemuka. (Tangenu Isaya 60:22.) Mwatachikiza nawa ngwenu Mazu aKalunga amilweza ‘munangulenga vakwenu.’ (Tangenu WaChimoteu 2, 2:2.) Oloze ngana mwavakulwane vaze tunavuluka lyehi, munahase kuchiwana kupwa chachikalu kunangula vandumbwenu mwomwo yamilimo yayivulu mwatwama nayo. Chakutalilaho, mweji kuzakamanga tanga yenu, namilimo yakumujimba, namilimo yachikungulwilo, namilimo yeka yayilemu yamukuyoya. Pamo echi chinahase kumilingisa mumone ngwenu kamwatwama nalwola lwakunangula vandumbwetu muchikungulwiloko. Shikaho, tushimutwilenu ovyo chapwila chachilemu kunangula vandumbwetu milimo yamuchikungulwilo.

4. Vyuma muka vyeji kulingisanga vakulwane lwola lumwe vahone kunangula washi vakwavo?

⁴ Chuma muka chinalingisa vakulwane vamwe vahone kuwana lwola lwakunangula vakwavo? Vamwe vanahase kushinganyeka ngwavo: ‘Kunangula chapwa chachilemu vene, oloze kachalema chikuma kuhambakana milimo yeka yasakiwa kuzata washiwashiko. Numba nge kangwanangwile mutuko, chikungulwilo nachitwalaho lika kuzata.’ Numba tuhu kuli milimo yayivulu yasakiwa kuzata washiwashi, oloze kuhona kunangula vandumbwetu chinahase kuzeyesa chikungulwilo.

5, 6. Chishina muka natulinangula kuchakutalilaho chanyamutekenya naminyau yenyi, kaha chinakwate ngachilihi hali vakulwane hakunangula vakwavo muchikungulwilo?

⁵ Achishinganyekenu hachakutalilaho echi: Nyamutekenya atachikiza ngwenyi hakusaka minyau yenyi yishimbule, atela kuyiwahisanga nakuhakamo maji amahya muyinjini. Chipwe ngocho, nahase kushinganyeka ngwenyi maji amuyinjini kaweshi nakusakiwa washiwashiko, oloze maji akutambukisa minyau akiko ali nakusakiwa chikuma. Nge mwahona kuhaka maji kana muminyau, kaha minyau kayeshi kutambukako. Nahase kwamba ngwenyi: ‘Numba nge kangwawanyine lwola lwakuhaka maji muyinjini yaminyauko, oloze nangukahakamo hamene mwomwo minyau nayitwalaho lika kutambuka.’ Jino ukalu muka unahase kusoloka kuminyau yenyi? Nge nyamutekenya mwahona kuwahisa eyi minyau nakuhakamo maji eka muyinjini, kaha likumbi limwe minyau kana nayikafwa. Ngocho mwakasakiwa lwola najimbongo jajivulu numba akawahise minyau kana mangana yikaputuke kuzata cheka. Vyuma muka natulinangula kuchakutalilaho kanechi?

⁶ Vakulwane vatwama namilimo yayilemu yayivulu yize yasakiwa kuzata washiwashi, nge chiku kaha chikungulwilo chinahase kupwa muukalu waunene. Nganomu tunashimutwila lyehi, nyamutekenya atela kumona ngwenyi chapwa chachilemu kuhaka maji mutanki yaminyau yenyi. Ngocho natulama nawa vatela ‘kukekesa vamone vyuma vyavilemu’ vatela kulinga. (Fwili. 1:10) Tuyokutuyoku nawa, vakulwane vanahase kuzezama namilimo yeka yayivulu nakuhona jino kuzata milimo yakunangula vakwavo, yize vanafwanyisa kukuwahisa yinjinyi yaminyau. Nge vakulwane navatwalaho lika kuzata milimo yeka chakuhona kunangula vakwavo, kaha mukuhita chalwola, chikungulwilo kacheshi  kukapwa namalunga vakutamo kuzakama milimo muchikungulwiloko.

7. Twatela kumona ngachilihi vakulwane vaze veji kunonekanga lwola lwakunangula vakwavo?

⁷ Twatela kulihenda kumuchima wakushinganyeka nge milimo yakunangula vakwetu kayalemako. Vakulwane vaze vamona mulimo wakunangula vakwavo kupwa waulemu, nakunoneka kanawa lwola lwakuzata mulimo kana, vapwa tuselwa vamwenemwene vaze veji kunganyalisanga chikungulwilo. (Tangenu WaPetulu 1, 4:10.) Mujila muka?

8. (a) Vyuma muka vyeji kulingisanga vakulwane vanangule vakwavo? (b) Mulimo muka vatwama nawo vakulwane vaze veji kuyanga kuze kuli nakusakiwa kukafwa? (Talenu lipwata lyakwamba ngwavo “Kuzata Mulimo Waulemu.”)

⁸ Navakulwane vaze vanazatenga milimo muchikungulwilo hamyaka yayivulu vatela kutachikiza ngwavo ngolo jamutu jakuzata jeji kukuma omu navaya nakushinakaja. (Mika 6:8) Kaha nawa vatela kwanukanga ngwavo “myaka navyuma vyakulijila tuhu,” vinahase kwalumuna uhashi wavo wakuzakama milimo vatwama nayo muchikungulwilo. (Kwambu. 9:11, 12; Yako. 4:13, 14) Hakuwana nge vakulwane vatwama namuchima wakulisuula hakuzakama mikoko jaYehova, ngocho veji kuwananga lwola lwakushimutwila navakweze vamalunga nakuvalweza vyuma vinavalingisa vazachile Yehova nakashishi hamyaka yayivulu.—Tangenu Samu 71:17, 18.

9. Vyuma muka vili nakwiza kulutwe vize vyatela kulingisa vakulwane vanangule vakwavo?

⁹ Jila muka yikwavo yize mikoko veji kunganyalanga kuli vakulwane vaze veji kunangulanga vakwavo? Veji kukafwanga chikungulwilo chipwenga chakuzama. Mujila muka? Nge vakulwane navanangula vandumbwetu vamalunga, kaha nachivalingisa vakafwe vakwavo nakulinunga hamwe oholyapwa nakulutwe omu nalukeza luyando lwalunene. (Ezeke. 38:10-12; Mika 5:5, 6) Shikaho, tuli nakulomba vakulwane vosena muvikungulwilo vafwile kunangula vakwavo oholyapwa.

10. Vyuma muka atela kulinga mukulwane mangana awane lwola lwakunangula vakwavo?

¹⁰ Tunejiva vene ngwetu mwatwama namilimo yayivulu muchikungulwilo, kaha nawa kamweshi nalwola lwaluvuluko. Oloze tuli nakumikolezeza munonekenga kanawa lwola lwenu mangana munangule vakwenu. (Kwambu. 3:1) Nge namulinga ngocho, kaha chikungulwilo nachinganyala.

11. (a) Jila muka yakunangwilamo yize vanazachisanga vakulwane kumafuchi akulisezaseza? (b) Kweseka naVishimo 15:22, natunganyala ngachilihi kujijila veji kuzachisanga vakulwane hakunangula vakwavo?

¹¹ Mumyaka yakalinwomu, vakulwane vamwe vaze vanafukilanga mumulimo wakunangula vandumbwetu vamalunga mangana vakole kushipilitu, vavahulishile vahanjike jila veji kuzachisanga. * Numba tuhu chiyoyelo chavo chalihandununa, oloze jila veji kuzachisanga yapwa yawenyembo kuli etu tuvosena. Uno echi chasolola ika? Chasolola hatoma nge, kuzachisa Mbimbiliya hakunangula hijila yamwenemwene yize yeji kuzatanga “kwosena muchikungulwilo hichikungulwilo,” ngana muze chapwile mumakumbi akaposetolo Paulu. (Koli. 1, 4:17) Shikaho, muchihande chino nachechi chinakavangizaho, natushimutwila hajijila jimwe jize vazachishile ava vakulwane. (Vishi. 15:22) Muvihande kana natuvuluka vaze vanakunangula vakwavo ngwetu “vaka-kunangula,” kaha vaze vanakulinangula ngwetu “vaka-kulinangula.”

12. Vyuma muka atela kuwahisa muka-kunangula, kaha mwomwo ika?

¹² Muka-kunangula atela kuwahisa muchima wamutu uze mwanangula. Ngana muze njimi eji kuvangilanga kuwahisa mavu numba atumbeho jimbuto, namuka-kunangula  atela kuwahisa chipwe ngwetu kukolezeza muka-kulinangula shimbu kanda amunangule jijila jajihya. Uno muka-kunangula eji kuwahisanga ngachilihi muchima wamutu mwasaka kunangula? Eji kulondezezanga jila yize azachishile kapolofweto umwe wakushikulu. Uno jila muka vene eyi?

13-15. (a) Mulimo muka vahanyine kapolofweto Samwele? (b) Samwele azachile ngachilihi mulimo wenyi? (Talenu muvwimbimbi wakulivanga.) (c) Mwomwo ika vakulwane makumbi ano vatela kufwila kutachikiza chikuma mujimbu wamuMbimbiliya waSamwele?

¹³ Myaka 3,000 yinahichimo, Yehova alwezele kapolofweto wakashinakaji Samwele ngwenyi: “Hamene halwola nge luno, nangukakutumina mutu mwakafuma kungalila yavaMbenjamine. Kamuwavise mangana apwenga twamina yavatu jami vaIsalele.” (Samwe. 1, 9:15, 16) Samwele atachikijile ngwenyi milimo yenyi yakutwaminyina yinakumu, ngocho Yehova amulwezele awavise mutu uze mwamushisa. Samwele pamo alihulishile ngwenyi: ‘Nangukafwa ngachilihi ou mutu mangana atachikize mwakuzachila mulimo wenyi?’ Samwele atela ashinganyekele chikuma, kaha awanyine jila yakumukafwilamo.

¹⁴ Lichako, omu Samwele amwene Saulu, Yehova alwezele ou kapolofweto ngwenyi: “Ou ikiye uze lunga ngwakulwezanga.” Kaha hahaze vene, Samwele aputukile kuzata mulimo wenyi. Jino alwezele Saulu ayenga hamwe nayikiye kuzuvo yakulila mangana vakalile hamwe vyakulya. Omu vahetele kuze, ahanyine Saulu nangamba yenyi vitwamo vyaulemu nanyama yamwaza, nakuvalweza ngwenyi: “Lyako, mwomwo ove yove vachitumbikilanga mangana ulyenga kuchilika chino.” Kufumaho, Samwele naSaulu vayile kuzuvo yauze kapolofweto oku vali nakushimutwila. Samwele afwilile kuzachisa lwola kanelu lwamwaza luze vapwile nakulya vyakulya naluze vapwile nakutambuka. Kaha Samwele alwezele Saulu mangana vayenga hamwe hamulungu wazuvo. Hahichilenga peho yamwaza nachingoloshi, kaha Samwele “ahanjikile naSaulu hamulungu wazuvo” swi nomu vasavalile. Lichako, Samwele awavishile Saulu nakumusweswenya nakumulweza jindongi jamwakuzachila. Kufumaho, alwezele Saulu ayenga nakuliwahisa vyachilika chapwile nakwiza kulutwe.—Samwe. 1, 9:17-27; 10:1.

¹⁵ Numba tuhu kuwavisa mutu apwenga twamina chalihandununa nakunangula mutu apwenga mukulwane chipwe muka-kuzachila muchikungulwilo, oloze vakulwane makumbi ano vanahase kulinangula kuvyuma alingile Samwele. Tushimutwilenu jino vyuma vivali tunahase kulinangulako.

16. (a) Samwele evwile ngachilihi omu vaIsalele vamulwezele ngwavo vali nakusaka mwangana? (b) Muchima muka asolwele Samwele hakuzata mulimo vamuhanyine wakuwavisa Saulu?

¹⁶ Lisuulenu, kanda kupwa nakanengauliko. Omu Samwele evwile ngwavo vaIsalele vali nakusaka kupwa namwangana wamutu, evwile kupihya chikuma nakumona ngwenyi vatu jenyi vanamukane. (Samwe. 1, 8:4-8) Kasakile kulinga vyuma vamulwezele vatuko, ngachize Yehova amulwezele mapapa katatu ngwenyi etavile vyuma vapwile nakusaka vatu. (Samwe. 1, 8:7, 9, 22) Chipwe ngocho, Samwele kakwachilile koko mutu uze vatongwele akamushiseko. Omu Yehova amulwezele atongole Saulu, ou kapolofweto ononokele nakulisuula chakuhona kukwata kumashinde.

17. Mujila muka vakulwane makumbi ano veji kulondezezelangamo muchima waSamwele walikoji, kaha veji kwivwa ngachilihi?

¹⁷ Ngana mwaSamwele, vakulwane makumbi ano veji kusololanga muchima walikoji kuli vaze vali nakunangula. (Petu. 1, 5:2) Vakulwane kana veji kulisuulanga kunangula vakwavo chakuzeneka kushinganyeka ngwavo pamo kulutwe navakavatambula milimo yavo muchikungulwilo. Vaka-kunangula vamichima yamwaza veji kumonanga vandumbwavo vanakufwila kulinangula kupwa vakwavo ‘muvazachila hamwe’ muchishishisa  chakuvamona nge vaka-kulipecha navo. (Koli. 2, 1:24; Hepe. 13:16) Ava vandumbwetu vaze veji kunangulanga vakwavo mukusuuluka veji kwivwanga kuwaha chikuma hakumona vandumbwavo vanalongesa navazovoloka nakuzamisa chikungulwilo.—Vili. 20:35.

18, 19. Mukulwane nahase kulingisa ngachilihi ndumbwetu ali nakulinangula alisuule, kaha mwomwo ika chapwila chachilemu kulinga ngocho?

¹⁸ Pwenu masepa javo, keshi vaka-kuvanangula kahako. Kachi Samwele apwile namuchima waupi, kachi likumbi aliwanyine naSaulu pamo kachi amumwangilile kaha maji kumutwe nakumulweza ayenga chakuzeneka kumunangula jindongi jamwakuzachila mulimo wenyi. Oloze Samwele kalingile ngochoko, amukafwile kanawa munona munona. Vavangilile kulivwisa kuwaha vyakulya, nakushikama, nakushimutwila kanawa, nakuhwima numba jino awavise Saulu.

¹⁹ Namakumbi ano, vandumbwetu vaze navanangula vakwavo vatela kuvangila kushimutwila kanawa, nakutunga usepa wamwaza numba jino vanangule kanawa vakwavo. Vyuma mwalinga mukulwane hakusaka alijilile namutu anakusaka kunangula vinahase kulisezaseza kweseka navisemwa chipwe mafuchi vatwama. Shikaho, nge umukulwane muchikungulwilo kaha nawa watwama namilimo yayivulu, watela kuwanako lwola lwakupwanga nandumbwove uli nakunangula. Nachipwa kwijiva nge muli nakumwamba ngwenu, “Ngwakuzanga.” (Tangenu Loma 12:10.) Echi nachilingisa ndumbwetu ali nakulinangula evwenga ngwenyi mwamumona kupwa wamulemu.

20, 21. (a) Muka-kunangula wamwaza atela kupwa ngachilihi? (b) Vyuma muka natushimutwila muchihande chinakavangizaho?

²⁰ Vakulwane vatela kwanuka ngwavo, muka-kunangula wamwenemwene asaka mulimo wenyi wakunangula, kaha nawa azanga mutu uze ali nakunangula. (Esekesenuko Yowano 5:20.) Nge muka-kunangula mwapwa namuchima wamwaza, kaha muka-kulinangula eji kutachikizanga vyuma mwalinangula nakwakulako kanawa. Shikaho, enu vakulwane, omu namunangulanga vandumbwetu, mwatela kupwa muvaka-kunangula oku nawa mumasepa javo.—Vishi. 17:17; Yowa. 15:15.

²¹ Nge munawahisa lyehi muchima wandumbwetu munakusaka kunangula, mwatela jino kumunangula mwakuzachila mulimo. Jijila muka vatela kuzachisa vakulwane hakunangula vandumbwavo? Evi vikiko natushimutwila muchihande chinakavangizaho.