Usepa Wenu naYehova Mwaumona Kupwa Waulemu Tahi?
“Pandamenu kuli Kalunga, kaha mwapandama kuli enu.” —YAKO. 4:8.
1. Mwomwo ika twatela kuzamisa usepa wetu naYehova?
KUTALA mwapwa muVinjiho jaYehova vakumbapachisa tahi? Nge mukiko, kaha muli nausepa wamwaza naKalunga. Oloze usepa kana vanahase kuujiha navilinga vyavipi vyamukaye kaSatana, navilinga vyetu vyakuhona kukupuka mwosena. Vyuma kana vyeji kuwananga vaka-Kulishitu vosena. Ngachize, twatela kupwa nausepa wakukola chikuma naYehova.
2. (a) Usepa wapwa chuma muka? (Talenu kwinyikila chamwishi.) (b) Tunahase kuzamisa ngachilihi usepa wetu naYehova?
2 Usepa wenu naYehova mwaumona kupwa waulemu tahi? Kutala muli nakusaka kuuzamisa tahi? Mukanda WaYakova 4:8 watulweza omu tunahase kulinga ngocho. Wamba ngwawo: “Pandamenu kuli Kalunga, kaha mwapandama kuli enu.” Ijivenu ngwenu vanavuluka vyuma vivali. * Omu natupandama kuli Kalunga, nayikiye mwapandama kuli etu. Echi cheji kuzamisanga usepa wetu naYehova, nakuumona jino kupwa waulemu. Ngocho natwitavila mazu aYesu akwamba ngwenyi: “Uze angutumine kwatwama chikupu . . . Ami ngunamutachikiza.” (Yowa. 7:28, 29) Kaha vyuma muka mwatela kulinga mangana mupandame kuli Yehova?
Munahase kushimutwila ngachilihi naKalunga? (Talenu palangalafu 3)
3. Tweji kushimutwilanga ngachilihi naKalunga?
3 Kuhanjikanga naYehova lwola lwosena chapwa chachilemu hakusaka mupandame kuli ikiye. Munahase kuhanjika ngachilihi naKalunga? Mweji kuhanjikanga ngachilihi nasepa lyenu uze atwama kwakusuku? Pamo mweji kulisonekelanga mikanda, nakulituminanga jishinga. Omu mukiko wapwa nausepa wenu naYehova, mweji kuhanjikanga nenyi lwola lwosena kuhichila mukulomba. (Tangenu Samu 142:2.) Mweji kwitavilanga Yehova ahanjike kuli yenu omu mweji kutanganga Mazu enyi lwola lwosena nakushinganyekaho. (Tangenu Isaya 30:20, 21.) Tushimutwilenu jino hali eji jijila jivali mangana tumone omu jinahase kuzamisa usepa wetu naYehova nakuumona kupwa waulemu.
YEHOVA EJI KUHANJIKANGA KULI YENU OMU MWEJI KUTANGANGA MBIMBILIYA
4, 5. Yehova eji kuhanjikanga ngachilihi nayenu kuhichila muMazu enyi? Hanenu chakutalilaho.
4 Chikupu vene nayenu mwetavila ngwenu Mbimbiliya yikwechi mujimbu wakukafwa vatu vosena. Uno Mbimbiliya yamilweza omu munahase kupandama kuli Yehova tahi? Eyo. Mujila muka? Omu namutanganga Mbimbiliya lwola lwosena, mwatela kushinganyeka havyuma yahanjika nakumona omu munahase kuzachisa vyuma kana mukuyoya chenu. Nge namulinga ngocho kaha muli nakwitavila Yehova ahanjike kuli yenu kuhichila muMazu enyi. Echi nachimilingisa mupwenga nausepa wakukola naikiye.—Hepe. 4:12; Yako. 1:23-25.
5 Chakutalilaho, tangenu nakushinganyeka hamazu aYesu akwamba ngwenyi, “litwaminenu kulilunjikila luheto hano hamavu.” Nge munamono ngwenu muli lyehi nakuhaka vyuma vyaWangana kulutwe mukuyoya chenu, kaha namumona ngwenu Yehova ali nakumivwila kuwaha. Oloze nge munamono ngwenu mwatela kwashiwisako chiyoyelo chenu mangana muhake vyuma vyaWangana kulutwe, kaha Yehova ikiye namilweze vyuma mwatela kulinga mangana mupandame kuli ikiye.—Mateu 6:19, 20.
6, 7. (a) Kutanganga Mbimbiliya chinahase kulingisa zangi yetu naYehova yipwenga ngachilihi? (b) Vyuma muka twatela kufwila kulinga nge tuli nachilongesa chahauka?
6 Kutanganga Visoneka kachasolola kaha vyuma vize twatela kuzachilaho mangana tuzovoloke kushipilituko, oloze cheji kutukafwanga nawa tumone jijila jaYehova kupwa jajilemu nakutulingisa tumuzange chikuma. Nge zangi yetu yakuzanga Kalunga nayitohwa, kaha naikiye nawa mwatuzanga chikuma nakulingisa usepa wetu naikiye uzame.—Tangenu Wavaka-Kolinde 1, 8:3.
7 Hakusaka tupandame kuli Yehova, twatela kutanganga Mbimbiliya mangana tulinangule. Chisoneka chaYowano 17:3 chahanjika ngwacho: “Echi chikiko kuyoya chahaya myaka yosena, kukutachikiza ove Kalunga umwe kaha wamuchano, nayou nawa watumine, Yesu Kulishitu.” Ngocho omu natutanganga Mbimbiliya katwatela kufwila kupwa nachinyingi kahako, oloze twatela kupwa namuchima ‘wakutachikiza’ Yehova kupwa mutu nahenyi.—Tangenu Kulovoka 33:13; Samu 25:4.
8. (a) Vyuma muka tunahase kushinganyeka kupandama kujila yize Yehova azangamishililemo Mwangana Azaliya kweseka namukanda waVamyangana 2, 15:1-5? (b) Uno kutachikiza Yehova nachitukafwa ngachilihi tuhone kupwa navishinganyeka vyakuhenga havyuma eji kulinganga?
8 Omu natutachikiza chikuma Yehova, katweshi kwivwa kupihya kumuchima nge mijimbu yimwe vasoneka muMbimbiliya nayitulingisa tuhuhwasane ovyo vyamulingishile alinge vyuma kanako. Chakutalilaho mweji kwivwanga ngachilihi mujila yize Yehova azangamishililemo Mwangana Azaliya wavaYuta? (Vamya. 2, 15:1-5) Tachikizenu ngwenu numba tuhu “vatu vachipwile lika nakuhana vimuna vakuvatula havihela kana mangana vakakumuke wishi,” oloze Mwangana Azaliya “alingilenga vyuma vyakwoloka kumeso aYehova.” Chipwe ngocho, “Yehova avetele mwangana Azaliya namusongo wambumba, kaha apwile lika nambumba palanga nakulikumbi afwile.” Mwomwo ika? Mujimbu kana kawatulweza ovyo Kalunga alingililile ngochoko. Uno echi chatela kutwivwisa kupihya nakushinganyeka ngwetu Yehova azangamishile Azaliya chakuhona mulonga tahi? Katweshi kuhasa kushinganyeka ngochoko nge twatachikiza kanawa jijila jaYehova. Kaha nawa twatela kutachikiza ngwetu Yehova eji kuzangamisanga “mujila yakutamo.” (Yele. 30:11) Kupwa nachinyingi kana cheji kutukafwa tutachikize ngwetu numba tuhu katwatachikiza vyuma vyalingishile Yehova azangamise Azaliyako, oloze twafwelela ngwetu kusopesa chaYehova chapwa chakwoloka.
9. Mujimbu muka wasolola ovyo Yehova azangamishilile Azaliya namusongo wambumba?
9 MuMbimbiliya mwatwama mujimbu uze unahase kutukafwa twijive ovyo Yehova azangamishilile Mwangana Azaliya. Ou Mwangana vamuvulukile cheka ngwavo Mwangana Ujiya. (Vamya. 2, 15:7, 32) Mujimbu uze watwama hali Mijimbu 2, 26:3-5, 16-21, watulweza nge numba tuhu Ujiya alingilenga mwamwaza kumeso aYehova, oloze kutwala muze “aputukile kulivwimba, ngocho ahichikishilemo mwono wenyi.” Kulipambula chamulingishile azate milimo yaupilishitu yize katelele kuzata yikiyeko. Tupilishitu vakuheta ku 81 vejile nakumuhuhumuna. Uno Ujiya alingile ngachilihi? Alivwimbile nakuhona kwitavila kuhuhumuna. “Apihililile” navapilishitu. Echi chikiko chalingishile Yehova amuzangamise namusongo wambumba.
10. Mwomwo ika katwatela lwola lwosena kufwila kupwa namashina namasongo kutalisa kuvyuma eji kulinganga Yehova, kaha tunahase ngachilihi kufwelela ngwetu jijila jaYehova japwa jakwoloka?
10 Twatela kutachikiza chishina kanechi. Nyi ngachilihi nge mijimbu yimwe yamuMazu aKalunga kayeshi namashina namasongoko? Kutala namuhuhwasana kwoloka chaKalunga tahi? Nyi namushinganyeka ngwenu muMbimbiliya mwatwama mijimbu yize yatulingisa tufwelele ngwetu lwola lwosena Yehova eji kulinganga vyuma vyakwoloka, nakutachikiza vyuma vyakwoloka navyakuhenga tahi? (Lushi. 32:4) Omu natutachikiza kanawa Yehova, kaha natumuzanga chikuma nakumona jijila jenyi kupwa jajilemu, kahechi nachitukafwa tuhone kuhuhwasana havyuma vyosena eji kulinganga numba tuhu mijimbu yimwe kayeshi namashina namasongoko. Namumonanga jijila jaYehova kupwa jajilemu nge namutanganga Mbimbiliya nakushinganyeka omu Kalunga eji kushimutwilanga nayenu kuhichila muMazu enyi. (Samu 77:12, 13) Nge namulinga ngocho, kaha namuzamisa usepa wenu naYehova nakuumona kupwa waulemu.
TWEJI KUHANJIKANGA KULI YEHOVA KUHICHILA MUKULOMBA
11-13. Munatachikiza ngachilihi ngwenu Yehova eji kwivwililanga kukulomba? (Talenu muvwimbimbi wakulivanga.)
11 Kulomba cheji kutulingisanga tupandame kuli Yehova. Tweji kumwalisa, nakumusakwilila, nakufwila atutwaminyine. (Samu 32:8) Oloze hakusaka usepa wetu naYehova upwenga waulemu, twatela kufwelela ngwetu eji kwivwililanga kukulomba chetu.
12 Vatu vamwe vafwelela ngwavo kulomba chapwa kaha hijila yize mutu eji kulivwishilanga kuwaha. Vafwelela ngwavo kulomba cheji kuvakafwanga kaha vashinganyeke kanawa haukalu wavo nakufwila kuukumisa. Numba tuhu kulomba cheji kutukafwanga mujijila kaneji, oloze mwatachikiza ngachilihi ngwenu Yehova eji kwivwanga kulomba chenu?
13 Achitalenu hachishina chino. Shimbu kanda Yesu ezenga hano hamavu amwenenga omu Yehova akumbulwilenga kulomba chavangamba jenyi vahano hamavu. Kaha omu ejile hano hamavu, Yesu alwezelenga Ise wamwilu vyuma vyapwilenga kumuchima wenyi kuhichila mukulomba. Lwola lumwe alombelenga ufuku wosena. Kutala Yesu kachi alingile vyuma kanevi nge ashinganyekele ngwenyi Yehova kapwile nakumwivwililako tahi? (Luka 6:12; 22:40-46) Uno kachi anangwile tumbaji twenyi mwakulombela nge ashinganyekele ngwenyi kulomba cheji kukafwanga kaha mutu evwenga kuwaha tahi? Nduma. Yesu ejivile ngwenyi kulomba chapwa hijila yimwe yakuhanjikilamo naYehova. Lwola lumwe Yesu ambile ngwenyi: “Ove Tata, ngunakusakwilila mwomwo unangwivu. Chamuchano vene ngunatachikiza ngwami weji kungwivwanga shimbu yosena.” Nayetu nawa tunahase kufwelela ngwetu Yehova apwa “muka-kwivwilila kukulomba.”—Yowa. 11:41, 42; Samu 65:2.
14, 15. (a) Tunahase kunganyala ngachilihi nge natuvulukanga vyuma tuli nakusaka mukulomba? (b) Uno kulomba chakafwile ngachilihi ndumbwetu umwe azamise usepa wenyi naYehova?
14 Nge namuvuluka vyuma muli nakusaka hakulomba, kaha namumona omu Yehova mwamikumbulula kulomba chenu numba tuhu mwamikumbulula mujila yize kamweshi kutachikizako. Nge Yehova mwakumbulula kulomba chenu, kaha namufwelela chikupu ngwenu kwatwama. Kaha nawa nge namumulwezanga vyuma vyosena vili kumuchima wenu, kaha mwapandama chikuma kuli enu.
15 Achitalenu hachakutalilaho chaKathy. * Numba tuhu apwilenga nakwambulula lwola lwosena, oloze kalivwishilenga kuwaha mulimo kanako. Ambile ngwenyi: “Kangwazangilenga mulimo wamuwandeko. Kuhanjika muchano, mulimo kana kangwauzangile numba vene hahandendeko. Omu ngwechele kuzata milimo yakukaye, mukulwane wamuchikungulwilo ambile ngwenyi ngunahase kupwa ngupayiniya, kaha anguhanyine fwomu. Ngwaputukile kuzata upayiniya, kaha hakumbi hakumbi ngwalombelenga Yehova angukafwe nguzange mulimo wakwambulula.” Uno Yehova akumbulwile kulomba chenyi tahi? Eyo, mwomwo ambile ngwenyi: “Ngunazate upayiniya hamyaka yitatu. Kuzata lwola lwaluvulu muwande nakulinangula kuli vandumbwetu chinangukafwe nguhotole uhashi wami wakwambulula. Makumbi ano mulimo wamuwande ngunauzange chikupu. Ngunanganyala chikupu hakuwana nge usepa wami naYehova unazame chikuma kuhambakana omu chapwile kunyima.” Chikupu vene, kulomba chakafwile Kathy azamise usepa wenyi naYehova.
VYUMA TWATELA KULINGA
16, 17. (a) Vyuma muka twatela kulinga numba usepa wetu naYehova uzame? (b) Chishina muka natushimutwila muchihande chinakavangizaho?
16 Twatela kutwalaho lika kuzamisa usepa wetu naYehova mukuyoya chetu chosena. Twatela kulingako vyuma vimwe vize navitulingisa tupandame kuli Kalunga, kaha naikiye nawa mwapandama kuli etu. Ngachize, tufwilenu kushimutwila naKalunga hakutanganga Mbimbiliya nakulombanga kuli ikiye lwola lwosena. Nge natulinga ngocho, kaha usepa wetu naYehova nauzama nakutukafwa tumike muvyeseko.
Twatela kutwalaho lika kuzamisa usepa wetu naYehova mukuyoya chetu chosena (Talenu jipalangalafu 16, 17)
17 Chipwe ngocho, chinahase kupwa chachikalu nge ukalu wetu chiutwalaho lika okunyi tuli nakulomba kuli Kalunga namuchima wetu wosena. Halwola kana chinahase kupwa chachikalu kufwelela Yehova. Tunahase kuhuhwasana numba nge Yehova eji kwivwililanga kukulomba chetu, chipwe nge atumona kupwa tumasepa jenyi. Tunahase kufwelela ngachilihi ngwetu usepa wetu naYehova kuuli numba tuhu tuli nakuhita muukalu? Chihande chinakavangizaho nachishimutwila hachishina kana.
