1. (a) Mwomwo ika chapwila chachilemu chikumanyi makumbi ano kuzunga jita naSatana? (b) Twatachikiza ngachilihi ngwetu tunahase kufungulula Satana?

SATANA ali nakuzunga jita navasalaho vawavisa “namikoko veka.” (Yowa. 10:16) Liyavolo afwila kuhungumwisa vangamba jaYehova vavavulu mwomwo natachikiza ngwenyi nasale kaha nakashimbu kakandende. (Tangenu Kusoloka 12:9, 12.) Uno tunahase kufungulula Satana tahi? Eyo! Mbimbiliya yamba ngwayo: “Mwimanyinenu Liyavolo nakole, kaha mwamichina.”—Yako. 4:7.

2, 3. (a) Vishinganyeka vyakwamba ngwavo Satana katwamako vyakundwiza ngachilihi vyuma afwila Liyavolo? (b) Mwatachikiza ngachilihi ngwenu Satana kwatwama?

² Vatu vavavulu kavafwelela ngwavo Satana kwatwamako. Veji kushinganyekanga ngwavo Satana navandemone jenyi vavasoneka kaha mumikanda nakuvazachisa mujivindiyo jakwivwisa woma, namukuhema chahajivindiyo. Vatu kana vashinganyeka ngwavo kakweshi mutu wamangana nahase kufwelela muli vashipilitu vavapiko. Uno Satana eji kwivwanga kupihya hakuwana nge vatu kavafwelela ngwavo ikiye navandemone jenyi kuvatwama tahi? Nduma. Mwomwo Satana nelavisa vishinganyeka vyavaze  veji kuhuhwasananga nge kwatwama. (Koli. 2, 4:4) Jila yimwe Satana eji kwongelangamo vatu shina yakuvalingisa vashinganyeke ngwavo ikiye navashipilitu vavapi kavatwamakoko.

³ Hakupwa tuvangamba jaYehova, ngocho keshi kuhasa kutuhungumwisako. Twejiva chikupu ngwetu Liyavolo kwatwama mwomwo ikiye ahanjikile naEve kuhichila mulinoka. (Kupu. 3:1-5) Satana atombele Yehova kutalisa kuli Yopa. (Yopa 1:9-12) Satana ikiye nawa esekele Yesu. (Mateu 4:1-10) Kaha nawa ikiye aputukile ‘kulwa jita’ navasalaho vawavisa omu Wangana waKalunga waputukile kuyula mu 1914. (Kuso. 12:17) Jita kana kuyichili hakuwana nge Satana achili lika nakufwila kwenyeka lufwelelo lwavasalaho hali vaze 144,000 vawavisa namikoko veka. Hakusaka tufungulule jita kana, twatela kumwimanyina Satana nakuzama mbe mulufwelelo. Chihande chino nachihanjika havyuma vitatu vize twatela kulinga mangana tufungulule.

4. Satana asolola ngachilihi ngwenyi apwa wakulivwimba?

⁴ Satana apwa wakulivwimba chikupu. Ou kangelo wamupi asolwele ngwenyi chiyulo chaYehova chapwa chachipi, kaha alingishile vatu valemesenga ikiye muchishishisa chakulemesa Yehova. Echi chasolola hatoma nge Satana apwa wakulivwimba. Ngachize, jila yimwe yize tunahase kwimanyina Satana shina kulihenda kumuchima wakulivwimba nakupwa vakulinyisa. (Tangenu WaPetulu 1, 5:5.) Uno kulivwimba nakulisasa chapwa chika? Uno kulisasa chapihila haka?

5, 6. (a) Uno kulisasa chosena chapwa chachipi tahi? Lumbununenu. (b) Kulivwimba chapwa chika, kaha vyakutalilaho muka vyamuVisoneka vyasolola nge kulivwimba chapwa chachipi?

⁵ Ndikishonali yimwe yalumbununa ngwayo kulivwimba chapwa ‘mutu kulimona kupwa wamulemu nakusaka kumuvumbika.’ Kaha kulisasa chapwa ‘kusuuluka navyuma vyamwaza atwama navyo mutu chipwe vize vanalingi masepa jenyi chipwe vausoko wenyi.’ Vishinganyeka kana kavyapihyako. Kaposetolo Paulu alwezele vaka-Tesolonyika ngwenyi: “Tweji kulisashilanga hali enu kuvikungulwilo vyaKalunga mwomwo yalukakachila lwenu nakushishika chenu muluyando lwenu lwosena navihuli muli nakumona.” (Teso. 2, 1:4) Ngocho kachapwa chachipi kulisashila hamilimo tunakilikita chipwe yize vanalingi vakwetuko. Katwatela kwivwa sonyi hatanga yetu, chipwe hachisemwa chetu, chipwe hangalila yize twakoleleleko.—Vili. 21:39.

⁶ Chipwe ngocho, kulivwimba chinahase kujiha usepa wetu navakwetu vatu naYehova. Chinahase nawa kutulingisa tukane vyuma navatuhuhumuna, muchishishisa chakulinyisa nakwitavila. (Samu 141:5) Kulivwimba chinahase kulingisa mutu alisase nakushinganyekanga kaha hali ivene, ngana muze “vatu vamwe vafwelela ngwavo vapwa vavalemu chikuma kuhambakana vakwavo.” Yehova ahunga kulivwimba sulumunu. (Ezeke. 33:28; Amo. 6:8) Oloze Satana eji kwivwanga kuwaha nge vatu navalondezeza kulikanga chenyi hakulisasa mujila kaneyi. Achishinganyekenu ocho kuwaha evwile Satana omu Nyimelote, naFwalo naAvasalome valivwimbile! (Kupu. 10:8, 9; Kulo. 5:1, 2; Samwe. 2, 15:4-6) Kulivwimba nawa chikiko chalingishile Kena ajihe usoko wenyi naYehova. Vamuhuhumwine kuli Kalunga, oloze ikiye ketavilile kuhuhumuna kanako. Alikangile nakuliula vyuma amulwezele Yehova, kaha nakushimbula chiku, alingile shili kuli Yehova.—Kupu. 4:6-8.

7, 8. (a) Uno kulitala havikova chapwa chika, kaha chatambukila ngachilihi hamwe namuchima wakulivwimba? (b) Lumbununenu omu kulivwimba chinahase kulingisa chikungulwilo chihone kupwa mukuunda.

⁷ Makumbi ano vatu veji kusololanga muchima wakulivwimba mujijila  jakulisezaseza. Shimbu jimwe, kulivwimba chatambukila hamwe nakulitala havikova. Ndikishonali yimwe yalumbununa ngwayo kulitala havikova chapwa kumona ulumbi vatu vavisemwa vyeka. Chapwa nawa kushinganyeka nge “vatu vakumiyachi yeka vatwama navilinga vyakulisezaseza nauhashi wakulisezaseza, kaha nawa ngwavo miyachi yimwe yapwa yayilemu kuhambakana yikwavo.” Kulitala havikova chinalingisa vatu valizungise, nakulijiha mujijita, nakulivulumuna.

⁸ Vyuma kana kavyatela kusoloka muchikungulwilo chavaka-Kulishituko. Oloze kulivwimba chinahase kutulingisa tulizungise navakwetu vaka-kwitava nakuneha chimbalanganyi chachinene. Chuma kana pamo chikiko chasolokele kuli vaka-Kulishitu vamulikulukaji lyamyaka lyakulivanga vaze Yakova ahulishile ngwenyi: “Uno jijita navikokojola evi vili muli enu vili nakufuminyina kulihi?” (Yako. 4:1) Nge natuhunga vakwetu nakulimona kupwa tuvavalemu kuhambakana vakiko, kaha tunahase kuhanjika chipwe kulinga vyuma vize navivevwisa kukola kumuchima. (Vishi. 12:18) Chapundu vene, kulivwimba chinahase kulingisa chikungulwilo chihone kupwa mukuunda.

9. Mbimbiliya yatukafwa ngachilihi tuhonese muchima wakulitala havikova nakulivwimba? (Talenu muvwimbimbi wakulivanga.)

⁹ Nge twatwama natato yakulimona kupwa tuvavalemu kuhambakana vakwetu, kaha twatela kwanuka ngwetu “mutu wamuchima wakulivwimba napu waunyengwe kumeso aYehova.” (Vishi. 16:5) Twatela kukekesa vishinganyeka twatwama navyo kutalisa kuvatu vavikova vyeka, navaze vafuma kumafuchi eka nakuvisemwa vyeka. Nge natupwa namuchima wakulimona ulumbi, kaha echi nachisolola nge tunavulyama muchano wakwamba ngwavo “kumutu umwe [Kalunga] aloweleko miyachi yavatu.” (Vili. 17:26) Echi chalumbununa nge kwatwama kaha muyachi umwe mwomwo tuvosena twafuma kuli kakuluka yetu Alama. Ngocho, chapwa chakuhenga kushinganyeka ngwetu miyachi yimwe yapwa yayilemu kuhambakana yikwavo. Vishinganyeka kana vyafuma kuli Satana uze afwila kuhonesa zangi nakulinunga chavaka-Kulishitu. (Yowa. 13:35) Hakusaka tufungulule Satana, twatela kulihenda kumuchima wakulivwimba.—Vishi. 16:18.

10, 11. (a) Mwomwo ika chapwila chachashi kuzanga vyuma vyamukaye? (b) Ndemase asolwele ngachilihi nge azangile vyuma vyamukaye?

¹⁰ Satana ikiye “muka-kuyula kano kaye,” kaha katwama mumavoko enyi. (Yowa. 12:31; Yowa. 1, 5:19) Ngachize vyuma vyavivulu vize veji kukundwizanga muno mukaye vyalimbalaka najishimbi jamuMbimbiliya. Echi kachalumbununa nge vyuma vyosena vyamuno mukaye vyapwa vyavipiko. Oloze twatela kutachikiza ngwetu Satana nahase kuzachisa kano kaye mangana atuzondole tulinge shili chipwe tuzange chikuma kano kaye nakulitwamina kulemesa Yehova.—Tangenu WaYowano 1, 2:15, 16.

¹¹ Vaka-Kulishitu vamwe vamulikulukaji lyamyaka lyakulivanga vazangilenga chikuma vyuma vyamukaye. Chakutalilaho, Paulu asonekele ngwenyi: “Ndemase nanguseze, nazange katwamino kamyaka yino.” (Chimo. 2, 4:10) Mbimbiliya kayahanjika vyuma vyamukaye azangile Ndemase vize vyamulingishile aseze Pauluko. Pamo Ndemase aputukile kuzanga chikuma luheto kuhambakana kuzachila Yehova. Nge evi vikiko vyamulingishile, kaha alivindamishile mwomwo kazanyine jino mumulimo wakuzachila Kalungako. Kutala vyuma vyamukaye ahungukilile vyamunganyalishile kuhambakana vyuma vize Yehova atelele kumuhana hakuzata naPaulu tahi?—Vishi. 10:22.

12. Mujijila muka tunahase kufwila “luheto luze lwatwama nangolo jakutangisa”?

¹² Vyuma kana vinahase kusoloka nakuli  etu nawa. Hakupwa tuvaka-Kulishitu, tweji kufwilanga kuzakama tanga yetu kumujimba. (Chimo. 1, 5:8) Yehova asaka tulivwise kuwaha kuyoya. Kaha chuma kana achisolwele hakuhaka Alama naEve mumilemba yamwaza. (Kupu. 2:9) Oloze Satana nahase kutuhungumwisa mangana tufwile “luheto luze lwatwama nangolo jakutangisa.” (Mateu 13:22) Vatu vavavulu vashinganyeka ngwavo jimbongo naluheto vikiko navivalingisa vawahilile nakufukila mukuyoya chavo. Vishinganyeka kana vyakuhenga mwomwo vinahase kujihisa usepa wetu naYehova uze wapwa waulemu chikuma kuli etu. Yesu ahuhumwine vaka-kumukavangiza ngwenyi: “Kakweshi ndungo mwahasa kuzachila vamyata vavaliko, mokomoko mwahunga umwe nakuzanga mukwavo, chipwe mwalipanjika naumwe nakulumbilisa mukwavo. Kamweshi kuhasa kuzachila Kalunga naLuheto hamweko.” (Mateu 6:24) Nge natufwila chikuma Luheto, kaha natuhona kuzachila Yehova, ngocho Satana mwawahilila. Kanda natulingisa jimbongo chipwe vikumba vituhonese kupwa nausepa wamwaza naYehovako. Hakusaka tufungulule Satana, katwatela kufwila luhetoko.—Tangenu WaChimoteu 1, 6:6-10.

13. Vatu mukaye vamona ngachilihi ulo?

¹³ Ujila himuheto ukwavo uze Satana ali nakuzachisa. Vatu vavavulu makumbi ano vamona ngwavo kupwa vakushishika muulo chapwa chamokomoko mwomwo cheji kulingisa mutu asoloke nge ali munjele. Chakutalilaho, pwevo umwe ambile ngwenyi: “Mutu keshi kuhasa kupwa namuka-mahyenyi umwe kahako. Kakwatwama mutu wakushishika chipwe uze asaka kupwa wakashishi kuli muka-mahyenyiko.” Lunga umwe ambile ngwenyi: “Ami ngwamona nge etu vatu katweshi kuhasa kupwa namutu umwe kaha mukuyoya chetu chosenako.” Satana eji kuwahililanga chikuma nge vatu vavalemu navamona ou wana atuhana Kalunga waulo mujila kaneyi yayipi. Liyavolo kasaka kumona malo afukileko. Ngocho hakusaka tufungulule Satana, twatela kumona ulo ngana muze aumona Kalunga.

14, 15. Tunahase kulihenda ngachilihi kuujila?

¹⁴ Tuvosena twatela kulihenda kuvilinga vyaujila, numba nge twapwa tuvajike nyi chiku. Uno chapwa chachashi kulinga ngocho tahi? Nduma. Chakutalilaho, nge wapwa ukanyike, kaha vakwenu kushikola vanahase kukulweza mijimbu yavyuma vyaujila veji kulinganga, chipwe kulitumina mijimbu yauvumbi hashinga. Kaha mumafuchi amwe, kulitumina mijimbu yauvumbi hashinga chapwa nge mutu uze ali nakutuma mijimbu yauselesele. Mbimbiliya yamba ngwayo: “Weshowo mwalinga ujila ali nakulinga shili kumujimba wenyi ivene.” (Koli. 1, 6:18) Misongo yakulitambwisa yinanehe kuyanda nakufwa. Kaha vanyike vaze valingile ujila shimbu kanda vengile muulo veji kuliveyanga chikuma. Vaka-kwazana muvyuma vyakuhemahema vasaka tufwelele ngwetu kuhokola jishimbi jaKalunga kacheshi kuneha ukaluko. Nge natufwelela makuli kana, kaha navatuhungumwisa “[ku]shili yize yatwama nangolo jakutangisa.”—Hepe. 3:13.

¹⁵ Vyuma muka mwatela kulinga nge mwatwama mucheseko chakulinga ujila? Itavilenu ngwenu mwatwama naukalu kana. (Loma 7:22, 23) Lombenu kuli Kalunga amihane ngolo jakumika. (Fwili. 4:6, 7, 13) Lihendenu kuvyuma vize vinahase kumilingisa mulinge ujila. (Vishi. 22:3) Kaha nge cheseko chineza, chikanenu hahaze vene.—Kupu. 39:12.

16. Yesu ahonesele ngachilihi vyeseko vyaSatana, kaha vyuma muka natulinangula kuchakutalilaho kana?

¹⁶ Yesu atusela chakutalilaho chamwaza chakuhonesa vyeseko. Kavamuhungumwishile kuli Satana havyuma vize amufwelelesele kumuhanako. Kenyekele lwola hakushinganyeka havyuma kanako, oloze  hahaze vene akumbulwile Satana ngwenyi: “Vasoneka ngwavo.” (Tangenu Mateu 4:4-10.) Yesu atachikijile Mazu aKalunga, kaha chapwile chachashi kuwazachisa washi nakuhonesa vyeseko. Hakusaka tufungulule Satana, twatela kulihenda kuujila.—Koli. 1, 6:9, 10.

17, 18. (a) Miheto muka yikwavo ali nakuzachisa Satana, kaha mwomwo ika katwatela kulikomokelako? (b) Vyuma muka navikasoloka kuli Satana, kahechi chinamikolezeza ngachilihi mukakachile?

¹⁷ Muchima wakulivwimba, nakufwila luheto, naujila himiheto yitatu yize ali nakuzachisa Satana. Oloze kwatwama miheto yikwavo eji kuzachisanga. Chakutalilaho, vaka-Kulishitu vamwe vali nakuvafumbukila kuli vaka-tanga yavo, nakuvahenda kuli vakwavo vaka-shikola. Vamwe vatwama mumafuchi muze fulumende yakanyisa mulimo wavo wakwambulula. Katweshi kulikomokela havyuma kanako mwomwo Yesu alwezele vaka-kumukavangiza ngwenyi: “Navakamihunganga kuli vatu vosena mwomwo yalijina lyami, oloze ou mwakakachila palanga nakusongo navakamulwila.”—Mateu 10:22.

¹⁸ Uno tunahase kwimanyina ngachilihi Satana nakumufungulula? Yesu alwezele tumbaji twenyi ngwenyi: “Hakukakachila chenu hakiko vene namukalwila myono yenu.” (Luka 21:19) Mutu keshi kuhasa kulinga vyuma vize navitwenyeka haya myaka yosenako. Kakweshi mutu weka nahase kuhonesa usepa wetu naKalungako, kuvanga etu vavene kaha. (Loma 8:38, 39) Numba nge vangamba jaYehova vanafu, echi kacheshi kulumbununa nge Satana nafungululako, mwomwo Yehova afwila kukavasangula. (Yowa. 5:28, 29) Oloze Satana katwama nalutalililo lwakulutweko. Nge kano kaye kaSatana vanakanongesa, ikiye navakamukasa hamyaka 1,000. (Kuso. 20:1-3) Hakukuma chaChiyulo chaYesu chaMyaka Likombakaji, Satana “navakamukasununa mukamenga” hakatando kakandende mangana akahungumwise vatu vakukupuka mwosena. Kufumaho, Liyavolo navakamunongesa. (Kuso. 20:7-10) Satana navakamunongesa ndolokoto, oloze enu kamweshi kukanongako. Mwimanyinenunga Satana, zamenunga mbe mulufwelelo. Munahase kwimanyina Satana nakumufungulula.