VYUMA eji kutunangulanga Yehova omu tweji kulikungulwilanga hamwe vyeji kutwivwisanga kuwaha. Omu vatu jaKalunga veji kupwanga kukukunguluka, veji kulihananga vyakulya, kaha chuma kana nachikiko cheji kuvevwisanga kuwaha.

MuSeptember 1919, Vaka-Kulinangula Mbimbiliya vapwile nakukunguluka changalila chamakumbi 8 muCedar Point, Ohio, U.S.A. Numba tuhu kwapwile jizuvo javangeji jajivulu jakuwahisa vyakulya nakwakusavala, oloze vatu vavulilileko lika. Hakuwana nge vatu vapwile vavavulu chikuma, ngocho kwasakiwile vaka-kuzata vavavulu vakuhana vatu vyakulya. Mukulwane atala kujizuvo javangeji alombele vamuhane vakweze vakumukafwa milimo, kaha vakweze vavavulu valisuwile. Mukweze umwe uze alisuwile shina Sadie Green. Ambile ngwenyi: “Olu lwapwile lwola lwatete kuzata ou mulimo, oloze twalivwishile kuwaha kuuzata.”

Hamyaka yakavangijileho, kuwahisa vyakulya hakukunguluka changalila chalingishile vandumbwetu vavavulu valihane kuzachila vandumbwavo. Ou mulimo wakuzachila hamwe navandumbwavo wakafwile vakweze vavavulu valitomenene kuzachila Yehova mukuyoya chavo. Ndumbwetu Gladys Bolton azachile mulimo wakuwahisa vyakulya hakukunguluka changalila chize chapwileko mu 1937. Ambile ngwenyi: “Ngwatachikijile jino vandumbwetu vavavulu vakufuma kumafuchi akulisezaseza, kaha vangulwezele omu valipikilenga naukalu. Echi changukafwile nguputuke kushinganyeka vyakupwa payiniya.”

Ndumbwetu Beulah Covey uze apwile kukukunguluka chimwe ambile ngwenyi: “Muchima wakulisuula uze vasolwele vaze vaka-kuzata walingishile mulimo vauzate washi chakuzeneka ukalu.” Chipwe ngocho, mulimo kana wapwile waukalu. Chakutalilaho, Angelo Manera vamulwezele ngwavo ikiye mukulwane wakutala mulimo wakuwahisa vyakulya kukafitelya omu ahetele kuchihela chakukungulukila kuDodger Stadium kuLos Angeles, muCalifornia, mumwaka wa 1969. Ambile ngwenyi: “Ngwalikomokelele chikuma.” Kuwahisa vyakukunguluka kana chaliwezelemo nakufula mufwolo wajikilomita jiwana wakuhakamo muyengo wamaji akuzachisa kukafitelya.

Mu 1982, vaka-kuzata mulimo wakulisakila muSierra Leone vakilikichile nangolo hakuwahisa hachihela mangana vatungeho kafitelya kuzachisa vyuma vyapwileko. Mu 1951 kuFrankfurt, muGermany, vandumbwetu vamwe vakumwine minyau yize yapwile navinoma vyakuzumisa meya mukachi yize yazumishilenga  jiketulu 40. Kaha vaka-kuhana vyakulya vahanyinenga vandumbwetu 30,000 vyakulya haola yimwe. Vandumbwetu vaze vejilenga kukukunguluka, vejilenga najipoko navimbonde vyavo vyakulisa hakusaka vashiwiseko mulimo vapwile nawo vandumbwetu vakuheta ku 576 wakukosa malonga. MuYangon, muMyanmar, vaka-kuteleka vakeheselenga jindungu muvyakulya vyakuhana vaze vafuminenga kumafuchi eka.

Kwimana mumukana halwola lwalusuku mumusana hakukunguluka changalila muUnited States mumwaka wa 1950 chalingishile Annie Poggensee anganyale. Ambile ngwenyi: “Ngwalivwishile kuwaha kushimutwila navandumbwetu vavali vaze vejile nawato kufuma kuEurope.” Vosena vamulwezele omu Yehova avakafwile mangana vapwenga kukukunguluka. Annie ambile nawa ngwenyi: “Vaze vandumbwetu vavali vawahililile chikuma kuhambakana vatu vosena. Kavevwile kutwa chamusanako halwola vemanyine muze mumukana nakuvandamina vyakulya.”

Hakukunguluka changalila chachivulu vatungilengaho tuvitandapoli muze vahakilenga jimesa jajisuku mangana vatu valileho washi oku vanemana nakusezako lwola lwakulilamo vakwavo. Uno vahashilenga ngachilihi kuhana vatu vavavulu vyakulya halwola lwakuhwima? Mutu umwe uze kapwile Chinjihoko ambile ngwenyi: “Echi kwitava kana chapwa cheka. Veji kulyanga wimanyina.”

Maswalale navaka-kuyula valikomokelele hakulinunga chapwilengako. Omu mukulwane wamaswalale umwe wamuUnited States akumishile kutala kafitelya yetu kuYankee Stadium muNew York City, alwezele Faulkner mukulwane wamaswalale wamulipatimende lyatala hajita kuBritain nayikiye akalimwene ivene. Ngocho mu 1955, ou mukulwane napuwenyi vayile kukukunguluka chapwileko kuTwickenham, muEngland. Ambile ngwenyi amwene zangi vapwile nayo vatu vaze vapwile kukafitelya.

Hamyaka yayivulu vandumbwetu vanalisuulanga kuwahisa vyakulya vize kavyapwilenga vyandando yayinene chikumako mangana vikafwe vaze vejilenga kukukunguluka. Oloze mulimo kanou wasakiwilenga vandumbwetu vavavulu vazatenga jiola jajivulu, kahechi chavalingishilenga vahone kwivwilila kuvihande vimwe chipwe vene vyosena. Kuheta kusongo yaji 1970, mulimo kanou vawashiwishile. Kaha kuputuka mu 1995, vatu vaze vejilenga kukukunguluka vavalwezele valimbachilenga kulya chavo vavene. Ngocho echi chalingishile vandumbwetu vawahishilenga vyakulya vanganyale kuvyuma vavanangwilenga nakulikolezeza navakwavo. *

Chikupu vene, Yehova evwile kuwaha hamulimo vakilikichilenga vandumbwetu hakuzachila vandumbwavo. Vandumbwetu vamwe veji kushinganyekanga hamakumbi kana valivwishilenga kuwaha kuzata kukafitelya. Numba tuhu chili ngocho, oloze ijivenu ngwenu zangi yikiko yayilemu hakukunguluka changalila.—Yowa. 13:34, 35.