1. Uhashi muka uze unahase kutukafwa tulondezeze Kalunga?

YEHOVA atuhana uhashi wakushinganyeka omu vali nakwivwa vakwetu, numba tuhu kanda tumonengaho lyehi ukalu vali nakumona. (Tangenu Wavaka-Efwesu 5:1, 2.) Tunahase ngachilihi kuzachisa kanawa ou uhashi atuhana Kalunga? Vyuma muka twatela kulinga mangana ou uhashi uhone kutulemeka?

2. Uno Yehova eji kwivwanga ngachilihi nge tuli nakuyanda?

² Kalunga atushika ngwenyi kulutwe natukayoya kanawa chakuzeneka kuyanda. Vawavisa “namikoko veka” vatalilila kuyoya chahaya myaka yosena mwilu chipwe hamavu. (Yowa. 10:16; 17:3; Koli. 1, 15:53) Chipwe ngocho, Yehova eji kwivwanga kupihya nge tuli nakumona ukalu. Kunyima Yehova evwilenga kumuchima kukola omu vangamba jenyi muEjipitu vayanjilenga. Chapundu vene, “evwilenga kupihya omu vayanjilenga.” (Isa. 63:9) Kufumaho, omu vatu jenyi vapwile nakutungulula tembele, vevwile vaka-kole javo woma. Oloze Kalunga avalwezele ngwenyi: “Weshowo mwamikwata, nakwate hakatutu kahaliso lyami.” (Zeka. 2:8) Yehova eji kwivwilanga vatu jenyi keke ngana muze chisemi  wapwevo eji kwivwilanga keke mwanenyi. (Isa. 49:15) Yehova atachikiza omu tweji kwivwanga, kaha nayetu atuhana wana kana.—Samu 103:13, 14.

3. Vyuma muka vyasolola nge Yesu evwililenga vatu keke?

³ Yesu atachikijile ukalu vapwile nakumona vatu numba tuhu ikiye kanda ahitengaho lyehi muukalu kana. Chakutalilaho, vatu vevwilenga woma vatwamina vamukwitava mwomwo vavongelenga nakuvahana jishimbi jajivulu jize kajafumine kuli Kalungako. (Mateu 23:4; Mako 7:1-5; Yowa. 7:13) Yesu kavevwilenga woma chipwe kwitavila makuli avoko. Chipwe ngocho, atachikijile omu vapwile nakwivwa vatu. “Omu amwene mayongomena avatu, avevwilile keke, mwomwo vayanjile nakulimwanga nge mikoko vakuzeneka kafunga.” (Mateu 9:36) Ngana mwaIse, Yesu azangile vatu nakuvevwila keke.—Samu 103:8.

4. Yesu evwile ngachilihi hakumona omu vatu vapwile nakuyanda?

⁴ Omu Yesu amwene vatu vali nakuyanda, avakafwilenga mwomwo avazangile. Ngocho alondezezele Ise hakusolola zangi. Omu vakumishile kwambulula, Yesu navaposetolo jenyi vasakile kuya kwauka wavo mangana vakahwime. Hakuwana nge Yesu evwilile keke mayongomena aze apwile nakumuvandamina, ngocho “aputukile kuvanangula vyuma vyavivulu.”—Mako 6:30, 31, 34.

5, 6. Hakusaka tulondezeze Kalunga hakusolola zangi, vyuma muka twatela kulinga? Hanenu chakutalilaho. (Talenu muvwimbimbi wakulivanga.)

⁵ Tunahase kulondezeza Kalunga hakusolwela vakwetu zangi. Chakutalilaho, mukweze Alan ali nakushinganyeka omu nahase kukafwila ndumbwetu wakashinakaji uze keshi nakuhasa kutanga kanawako mwomwo yakufwa meso. Kaha nawa keshi nakuhasa kutambuka kanawa hakwambulula kuzuvo hizuvoko. Alan mwanuka mazu aYesu akwamba ngwavo: “Mweshomwo namusaka ngwenu vatu valinge kuli enu, nayenu nawa lingenu mwomumwe kuli vakiko.” (Luka 6:31) Alan mwalihulisa ngwenyi, ‘Vyuma muka nguli nakusaka vakwetu vangulingile?’ Mwalikumbulula ngwenyi, ‘Nangusaka vakwetu vaheme nayami ngunja.’ Oloze ou ndumbwetu wakashinakaji keshi kuhasa kuhema ngunjako. Ngocho mazu aYesu alumbununa nge atela kulihulisa ngwenyi, ‘Vyuma muka nangusaka vakwetu vangulingile nge ami yami ngwapwanga naukalu kanou?’

⁶ Alan keshi kashinakajiko, oloze ali nakushinganyeka omu ali nakwivwa uze ndumbwetu wakashinakaji. Eji kushimutwilanga nenyi nakumwivwilila kanawa. Kutwala muze, Alan eji kwijivanga jino ukalu eji kumonanga ou kashinakaji hakutanga Mbimbiliya chipwe hakuya nakwambulula kuzuvo hizuvo. Omu Alan eji kumonanga ukalu wayou ndumbwetu wakashinakaji, eji kwijivanga jino mwakumukafwila nakufwila kumukafwa. Nayetu tunahase kulinga mwomumwe. Hakusaka tulondezeze Kalunga hakusolola zangi, twatela kushinganyeka omu vali nakwivwa vakwetu.—Koli. 1, 12:26.

7. Tunahase kutachikiza ngachilihi vakwetu mangana twijive ukalu vali nakumona?

⁷ Kachapwa chachashi lwola lwosena kutachikiza omu vali nakwivwa vakwetuko. Vatu vavavulu veji kumonanga ukalu uze kanda tumonengaho lyehi. Vamwe veji kuvizanga, veka vatenguka, kaha vakwavo vali nakushinakajiwa. Veka vali nakumona ukalu mwomwo yakuhomba, nakulizakamina, chipwe mwomwo yakuvayanjisa. Veka vali nakumona ukalu mwomwo yakupwa mutanga yakwitava chakulihandununa, chipwe yize yachisemi umwe. Vatu  vosena veji kumonanga ukalu, oloze ukalu umwe etu kanda tuchiumonengaho lyehi. Ngocho tunahase kulondezeza ngachilihi Kalunga hakusolola zangi? Twatela kwivwilila kanawa omu vali nakuhanjika mangana tutachikize omu vali nakwivwa. Echi nachitulingisa tulondezeze Yehova hakusolwela vakwetu zangi nakuvakafwa. Vyuma navasaka vatu vinahase kupwa vyakulisezaseza, oloze tunahase kuvakolezeza kushipilitu nakuvakafwa mujijila jeka.—Tangenu Loma 12:15; WaPetulu 1, 3:8.

8. Vyuma muka vyalingishile Yesu asolole likoji?

⁸ MwanaKalunga ambile ngwenyi: “Ou Wakulitulaho Chikuma . . . eji kusolwelanga likoji vaka-kuhona kusakwilila navaka-kuhuka.” (Luka 6:35) Yesu alondezezelenga Kalunga hakusolola likoji. Vyuma muka vyamukafwile? Ashinganyekelenga omu vanahase kwivwa vatu havyuma mwahanjika chipwe vize mwalinga. Chakutalilaho, pwevo umwe uze vamwene kupwa muka-shili, ayile kuli Yesu nakulila nakuzovesa mahinji aYesu namasoji enyi. Yesu amwene ngwenyi ou pwevo napihilila nakwalumuka, kaha ejivile ngwenyi nahase kuhomba chikuma nge mwamuhanga. Ngocho amusangejekele nakumukonekela. Kaha omu kaFwaliseu umwe evwile kupihya havyuma alingile uze pwevo, Yesu amuhanjikishile naikiye mujila yalikoji.—Luka 7:36-48.

9. Vyuma muka vinahase kutukafwa mangana tulondezeze muchima waKalunga walikoji? Hanenu vyakutalilaho.

⁹ Tunahase kulondezeza ngachilihi Kalunga hakusolola likoji? Kaposetolo Paulu asonekele ngwenyi: “Ndungo yaMwata katela kuzungako, oloze atela kupwa wamuvwovu [chipwe “kupwa wakuzangama,” kwinyikila chamwishi] kuli vosena.” (Chimo. 2, 2:24) Vatu vakuzangama vejiva mwakukumishila kanawa ukalu chakuzeneka kulemeka vakwavo. Achishinganyekenu omu tunahase kusolola likoji kuvyakutalilaho vino. Tunahase kulinga ngachilihi nge mukulwane wetu wamilimo keshi nakuzata kanawa mulimo wenyiko? Vyuma muka natuhanjika kuli ndumbwetu uze alitwaminyinyine kwiza kukukunguluka hatukweji vavavulu, kaha neza jino? Natulinga ngachilihi nge tuli muwande kaha mwenyazuvo mwamba ngwenyi “Ami kangweshi nalwola lwakushimutwila nenuko.” Kutala namumwivwishisa nakumuseza tahi? Nge muka-mahyetu mwatuhulisa ngwenyi: “Mwomwo ika kawangulwezelanga chimweza vyuma unanoneka kuzata lyaSateli?” Kutala tunahase kukumbulula mujila yalikoji tahi? Nge natushinganyekanga omu vali nakwivwa vakwetu, nomu vanahase kwivwa hamazu natuhanjika, kaha nachitukafwa tutachikize mazu amwaza akuzachisa mangana tulondezeze Yehova.—Tangenu Vishimo 15:28.

10, 11. Vyuma muka vinahase kutukafwa tulondezeze mangana aKalunga? Hanenu chakutalilaho.

¹⁰ Yehova apwa wamangana kaha eji kumwenanga chimweza vyakulutwe nge nasake kulinga ngocho. Numba tuhu etu katwatwama nauhashi wakutachikiza vyuma vyakulutweko, oloze tunahase kupwa namangana. Shimbu kanda tusakule vyakulinga, twatela kushinganyekela chimweza ukalu unahase kukatuwana havyuma natusaka kulinga. Katwatela kupwa nge vaIsalele vaze vahonene kushinganyeka haukalu watelele kusoloka hakulikanga chavo kuli Kalunga. Chamokomoko navyuma avalingilile Kalunga, Mose atachikijile ngwenyi navakalikanga kuli Yehova. Ambile ngwenyi: “VaIsalele vanapu muyachi wakuhona mangana, kavapwa vatu vakunangakanako. Kachi nge vapwanga vatu vamangana, kachi  vanahunanana hachumechi. Kachi vanashinganyeka havyuma navifumamo.”—Lushi. 31:29, 30; 32:28, 29.

¹¹ Nge natushinganyeka nakumona vyuma vinahase kukasoloka kulutwe mwomwo yavilinga vyetu, kaha natulondezeza mangana aKalunga. Chakutalilaho, nge munalivwasana kulimbata namutu, kaha mwatela kutachikiza ngwenu munahase kupwa mucheseko chakulinga ujila. Katwatela kushinganyeka kulinga vyuma vize vinahase kutulingisa tujihe usoko wetu naYehovako. Oloze twatela kukavangiza mazu akwamba ngwavo: “Muka-kuzangama eji kumonanga ponde, kaha himwaswama, oloze ou azeneka chinyingi mwalitakaho nakumona lupi.”—Vishi. 22:3.

12. Mwomwo ika chapwila chachipi kushinganyekanga havyuma vyavipi?

¹² Mutu wakuzangama atachikiza ngwenyi uhashi wakushinganyeka unafwane nge kakahya. Kakahya vanahase kukazachisa hakuteleka vyakulya. Oloze nge kavakazachishile kanawako, kaha kanahase kwocha zuvo nakujiha vatu valimo. Chochimwe nawa, nge natushinganyeka havyuma vyamwaza, kaha natulondezeza Yehova. Oloze nge natushinganyekanga havyuma vyavipi, kaha natupwa navilinga vyavipi. Chakutalilaho, nge natushinganyekanga havyuma vyashili, kaha likumbi limwe natukalinga shili. Shikaho, vishinganyeka vyavipi vinahase kutulingisa tujihe usoko wetu naYehova.—Tangenu WaYakova 1:14, 15.

13. Chiyoyelo muka apwile nakushinganyeka kupwa nacho Eve?

¹³ Achitalenu omu pwevo watete Eve aputukile kushinganyeka vyakulya “kumutondo wakutachikijila kuwaha nakupihya” uze vavakanyishile. (Kupu. 2:16, 17) Linoka amulwezele ngwenyi: “Kufwa kamweshi kufwako. Mwomwo Kalunga natachikiza ngwenyi halikumbi lize namukalyako, meso enu nawakatona, kaha namukapwanga nge Kalunga, kaha namukatachikizanga kuwaha nakupihya.” Eve “amwene ngwenyi mutondo unawahe kulya, ngwenyi wamwaza kuutala nameso.” Vyuma muka vyafumineho? “Aheleleko kumihako yawo, alile. Kufumaho ahanyineko nawa lunga lyenyi omu vapwile hamwe, kaha alile.” (Kupu. 3:1-6) Eve amwene ngwenyi vyuma amulwezele vyapwile vyamwaza. Muchishishisa chakuvandamina vamulwezenga vyuma vyamwaza navyavipi, ikiye asakile alisakwilenga ivene vyuma kana. Vishinganyeka kana vyapwile vyavipi sulumunu! Vyuma alingile Eve vyalingishile nalunga lyenyi avulumune, kaha “shili yengilile mukaye kuhichila muli mutu umwe nakufwa nawa kuhichila mushili.”—Loma 5:12.

14. Mbimbiliya yatukafwa ngachilihi tulihende kuvishinganyeka vyavipi?

¹⁴ Shili avulumwine Eve mumilemba  yaEtene kayapwile yakulinga ujilako. Yesu ahuhumwine ngwenyi mutu katela kushinganyekanga vyuma vyavipiko. Ambile ngwenyi: “Weshowo mwatala lika pwevo nakumwivwila peha, nalingi lyehi nenyi ukoji mumuchima wenyi.” (Mateu 5:28) Kaha nawa Paulu ahuhumwine ngwenyi: “Kanda namushinganyekelanga chimweza mwakulingila vyuma wafwila mujimbako.”—Loma 13:14.

15. Luheto muka twatela kulilunjikila, kaha mwomwo ika?

¹⁵ Chuma chikwavo chachipi shina kushinganyekanga chikuma vyaluheto kuhambakana Kalunga. Mutu waluheto eji kumonanga vyuma aheta “kupwa nge kembwe yakukola.” (Vishi. 18:11) Yesu ahanyine chakutalilaho chakusolola luvinda eji kumonanga mutu uze “mwalilunjikila luheto, oloze keshi naluheto kuli Kalungako.” (Luka 12:16-21) Yehova eji kusuulukanga nge natulinga vyuma vize navimwivwisa kuwaha. (Vishi. 27:11) Chapwa kutokwa chikuma nge Yehova mwatwivwila kuwaha mwomwo yakulilunjikila “luheto mwilu.” (Mateu 6:20) Chikupu vene, kupwa nausoko wamwaza naYehova hiluheto lwamwenemwene twatela kupwa nalwo.

16. Tunahase kukehesako ngachilihi kulizakamina?

¹⁶ Achishinganyekenu kulizakamina natupwa nacho kachi nge natulilunjikila chikuma “luheto hano hamavu.” (Mateu 6:19) Yesu azachishile chakutalilaho hakulumbununa ngwenyi “kulizakamina hakatwamino kamyaka yino, naluheto luze lwatwama nangolo jakutangisa” vinahase kukivisa mazu aWangana. (Mateu 13:18, 19, 22) Vatu amwe valizakamina lika mukuyoya chavo havyuma vyavipi vinahase kuvasolokela numba vapwa najimbongo chipwe nduma. Oloze kulizakamina chikuma chinahase kulingisa mutu avize kumujimba nakushipilitu. Twatela kufwelela muli Yehova nakwanuka ngwetu, “kulizakamina chamutu nachilemuwisa muchima wenyi, oloze mazu amwaza nawahizumuna muchima wenyi.” (Vishi. 12:25) Mazu amwaza akufuma kuli mutu uze atutachikiza kanawa anahase kutulingisa tuwahilile. Kulweza ukalu wetu kuli visemi jetu, chipwe muka-mahyetu, chipwe sepa lyetu chinahase kutukolezeza tupendamine hali Kalunga nakukehesako kulizakamina.

17. Yehova eji kutukafwanga ngachilihi tuhona kulizakamina chikuma?

¹⁷ Yehova ikiye kaha atachikiza kanawa kulizakamina chetu chosena. Paulu asonekele ngwenyi: “Kanda namulizakamina hachuma numba chimweko, oloze muvyuma vyosena, hakulomba, nahakulembelela, nahakusakwilila, mulwezenunga Kalunga vyuma munakusaka, kaha kuunda chaKalunga chize chahambakana kunangakana chosena nachikinga michima yenu navishinganyeka vyenu kuhichila muli Kulishitu Yesu.” (Fwili. 4:6, 7) Mwatela kushinganyekanga hali vaze vali nakutukinga kushipilitu, vakufwana nge vandumbwetu, navakulwane muchikungulwilo, nandungo wakushishika, navangelo, naYesu naYehova.

18. Kuzachisa uhashi wetu wakushinganyeka nachitukafwa ngachilihi?

¹⁸ Nganomu tunamono, kuzachisa kanawa uhashi wetu wakushinganyeka chinahase kutukafwa tupwenga navilinga vyaKalunga vyakufwana nge zangi. (Chimo. 1, 1:11; Yowa. 1, 4:8) Natupwa vatu vakuwahilila nge natusololanga zangi yamwenemwene, nakushinganyeka haukalu unahase kwiza havyuma tunakusaka kulinga, nakuhonesa kulizakamina chize chinahase kutuhombesa. Shikaho, tufwilenu kuzachisa kanawa uhashi atuhana Kalunga hakushinganyekanga vyuma mwakatulingila kulutwe, nakulondezeza vilinga vyaYehova vyakufwana nge zangi, nalikoji, namangana nakuwahilila.—Loma 12:12.