Hamyaka yayivulu, mikanda yetu yinavulukanga Satana Liyavolo kupwa ikiye Ngonge wakuMangonge kufuma vene haze vamumbilile hamavu kufuma mwilu. Ulumbunwiso kana wafuma mumukanda waKusoloka uze wavuluka Satana Liyavolo kupwa twamina wavaze navakafumbukila vatu jaKalunga. (Kuso. 12:1-17) Ngocho twashinganyekele ngwetu Ngonge lyapwa lijina likwavo lyaSatana.

Oloze ulumbunwiso kana unanehe vihula vyavilemu. Mwomwo ika? Achishinganyekenu hachuma kana. Kutalisa kulwola luze Ngonge navakamufungulula, Yehova ahanjikile hali Ngonge ngwenyi: “Nangukamihana kutujila vaze veji kulyanga nyama vosena nakuli visuma vamuchipapa vakamilye.” (Ezeke. 39:4) Kaha atwalileho ngwenyi: “Halikumbi lize, nangukahana Ngonge chihela chakumufunda muIsalele . . . Kuchihela kana kukiko navakafunda Ngonge naliyongomena lyenyi.” (Ezeke. 39:11) Uno mutu wakushipilitu vanahase kumulya ngachilihi “kutujila vaze veji kulyanga nyama vosena nakuli visuma vamuchipapa”? Uno Satana vanahase kumuhana ngachilihi “chihela chakumufunda” hamavu? Mbimbiliya yasolola hatoma nge Satana navakamukasa hamyaka 1,000, keshi kumulya chipwe kumufundako.—Kuso. 20:1, 2.

Vatulweza ngwavo, hakukuma chamyaka 1,000, Satana navakamukasununa mukamenga, kaha “mwakahungumwisa vaka-mafuchi vaze vali kujimbango jiwana jahamavu, eyo, Ngonge naMangonge, nakuvakungulwila hamwe kujita.” (Kuso. 20:7, 8) Uno Satana nahase kuhungumwisa ngachilihi Ngonge kachi nge ikiye vene Ngonge? Chapundu vene, “Ngonge” uze vavuluka muupolofweto waEzekele namumukanda waKusoloka kapwa Satanako.

Uno Ngonge wakuMangonge ikiye iya? Hakusaka tukumbulule chihula kana, twatela kukekesa Visoneka mangana twijive uze mwakafumbukila vatu jaKalunga. Mbimbiliya yahanjika ngwayo ‘Ngonge wakuMangonge,’ ‘namwangana wakunote,’ “navamyangana vahamavu,” navakafumbukila vatu jaKalunga. (Ezeke. 38:2, 10-13; Ndanye. 11:40, 44, 45; Kuso. 17:14; 19:19) Kutala echi chalumbununa nge vatu jaKalunga navakavafumbukila halwola lwakulihandununa nyi? Nduma. Mbimbiliya yasolola nge echi kufumbukila kana nachikapwako halwola lwolumwe. Mwomwo ika tunambila ngocho? Mwomwo Visoneka vyatulweza ngwavyo vaka-mafuchi osena vahamavu navakazana muli echi kufumbukila chamakumishilo chize nachikaneha jita yaAlamangetone.—Kuso. 16:14, 16.

 Nge natukekesa kanawa Visoneka vyosena evi vyahanjika hakufumbukila chavatu jaKalunga chamakumishilo, natuwana nge lizu Ngonge wakuMangonge kalyatalisa kuli Satanako, oloze lyatalisa kuli vaka-mafuchi vaze navakalifutula nakufumbukila vatu jaKalunga. Uno lizavu kana navakalitwaminyina kuli “mwangana wakunote” nyi? Katwatachikijile kanawako. Oloze chinasoloka nge mukiko vene nachikapwa, mwomwo Yehova ahanjika hali Ngonge, ngwenyi: “Naukeza kufuma kuchihela chove, kujingalila jakunote jakusongosongo. Naukeza navatu veka naveka vavavulu vaka-kutambukila hatuvalu, liyongomena lyalinene lyavaka-kwasa jita.”—Ezeke. 38:6, 15.

Kaha nawa kapolofweto Ndanyele uze azachile mulimo wenyi halwola lwolumwe naEzekele, avulukile vyamwangana wakunote ngwenyi: “Mijimbu yize nayikafuma kumututuko nakunote nayikamwivwisa kupihya, kaha mwakakwata utenu, mwakaya nakunongesa nakulalisa vavavulu. Mwajika jimbalaka jawangana wenyi hakachi, oku kalungalwiji wamunene, oku pili yajila yaLifuchi Lyamwaza. Kukuma chenyi nachikeza, kaha naumwe wauchi mwakamukafwa.” (Ndanye. 11:44, 45) Evi vyalitota navyuma wahanjika mukanda waEzekele kutalisa kuvyuma mwakalinga Ngonge.—Ezeke. 38:8-12, 16.

Vyuma muka navikasoloka hanyima yakufumbukila kanechi chamakumishilo? Ndanyele atulweza ngwenyi: “Mikayele [Yesu Kulishitu], mwata wamunene uze mwakemanyinako vatu jove [kufuma vene mu 1914] mwakakatuka halwola luze [haAlamangetone]. Kaha nakukeza lwola lwavihuli vize kanda visolokengaho lyehi kufuma haze waputukile muyachi watete nakuheta kulwola kana. Halwola kana, vatu jove vosena vaze vakwechi majina avo vasoneka mumukanda navakayovoka.” (Ndanye. 12:1) Evi vyuma mwakalinga Yesu uze emanyinako Kalunga vavivuluka nawa nahali Kusoloka 19:11-21.

Uno iya emanyinako “Ngonge naMangonge” uze vavuluka hali Kusoloka 20:8? Halwola lwakweseka chamakumishilo, hakukuma chamyaka 1,000, vaze navakalikanga kuli Yehova navakiko navakapwa namuchima wakukenyuka ngana ‘mwaNgonge wakuMangonge,’ kaha navakafumbukila vatu jaKalunga hakukuma chaluyando lwalunene. Mazavu osena avali navakawanongesa. (Kuso. 19:20, 21; 20:9) Ngocho, chinapu chakutamo kuvuluka vaze navakalikanga hakukuma chamyaka 1,000 ngwavo, “Ngonge naMangonge.”

Hakuwana nge twapwa tuvaka-kulinangula Mazu aKalunga vatwima, ngocho tuli nakuvandamina kukamona ou mwakapwa “mwangana wakunote.” Numba tuhu halwola luno katwejivile owo mwakatwaminyina vaka-mafuchi vaze navakalifutula nakufumbukila vatu jaKalungako, oloze tunejiva ngwetu, (1) Ngonge wakumaNgonge naliyongomena lyenyi navakavafungulula nakuvanongesa; (2) Mwangana Yesu Kulishitu uze ali nakuyula mwakalwila vatu jaKalunga nakuvengisa mulifuchi lyalihya muze navakatwama mukuunda nakupwa vakukingiwa.—Kuso. 7:14-17.