1. Lumbununenu omu mutu wakushipilitu alumukile nakupwa Satana.

LWOLA LUMWE, Satana apwile nausoko wamwaza naYehova. Kutwala muze, asakile vatu vamulemesenga. Muchishishisa chakuhonesa vishinganyeka kanevi vyavipi, ikiye avyechelele vitande nakumulingisa jino alinge shili. (Yako. 1:14, 15) Twatachikiza ngwetu Satana “kazamine mumuchanoko.” Alikangile kuli Yehova, kaha apwile jino “ise yamakuli.”—Yowa. 8:44.

2, 3. Mazu akwamba ngwavo “Satana,” “Liyavolo,” “linoka,” “chazangombe,” asolola ngachilihi omu apwa muka-kole waYehova wamunene?

² Kufuma vene haze alikangile, Satana apwa muka-kole wamunene waYehova navatu. Jivulukiso jaSatana jasolola omu apwa. Lizu Satana lyalumbununa “Muka-kulipambula,” kulumbununa nge ou mutu wamupi wakushipilitu kakundwiza chiyulo chaKalungako, oloze achihunga chikuma. Satana afwila chikumanyi kukamona chiyulo chaYehova chinakumu.

³ Nganomu chahanjika chisoneka chaKusoloka 12:9, Satana vamuvuluka ngwavo ikiye Liyavolo, kulumbununa “Muka-lusongi.” Echi cheji kutwanunanga nge Satana asaula Yehova hakumuvuluka ngwenyi muka-kwonga. Mazu akwamba ngwavo “linoka wakushikulu” eji kutwanukisanga vyuma vyasolokele  muEtene omu Satana azachishile linoka hakwonga Eve. Mazu akwamba ngwavo “chazangombe wamunene” eji kutwanukisanga kanyama wamunene wakwivwisa woma, kaha amutela Satana mwomwo apwa waukenya, wamupi. Kasaka Yehova akatesemo vyuma ajinako nakusaka kunongesa vatu jaKalunga.

4. Vyuma muka natulinangula muchihande chino?

⁴ Satana asaka tuhone kupwa vakulonga. Evi vikiko Mbimbiliya yatuhuhumwina ngwayo: “Lamenunga uhashi wenu wakushinganyeka kanawa, tonenunga. Muka-kole wenu Liyavolo eji kuhitangana nge ndumba wakutahwoka, nakutondatonda weshowo mwawana amulye.” (Petu. 1, 5:8) Ngachize, muchihande chino natulinangula vilinga vitatu vyaSatana vize vyatela kutulingisa tupwenga vakuzangama nayou muka-kole waYehova navatu.

5, 6. (a) Hanenu chakutalilaho chize chasolola nge vatu vakushipilitu vakwechi “ngolo chikuma.” (b) Mwomwo ika natwambila ngwetu Satana “atwama nangolo jakuneha kufwa”?

⁵ Vangelo vakwechi “ngolo chikuma.” (Samu 103:20) Vakwechi ngolo namangana kuhambakana vatu. Oloze vangelo vakushishika veji kuzachisanga ngolo javo mujila yamwaza. Chakutalilaho, lwola lumwe kangelo kaYehova ajihile maswalale vavaAsulya 185,000, chuma chize mwazeneka kulinga mutu umwe, kaha nawa chachikalu kuchilinga kulizavu lyamaswalale. (Vamya. 2, 19:35) Halwola lweka, kangelo azachishile ngolo jenyi jakulipwila hakufumisa vaposetolo jaYesu mukamenga. Uze kangelo apatunwine tupachiso twakukamenga nakulovola vaze vaposetolo nakupatako cheka okunyi vaze vaka-kulama kamenga hanga vanemanyina.—Vili. 5:18-23.

⁶ Vangelo vakushishika veji kuzachisanga ngolo javo mujila yamwaza, oloze Satana eji kuzachisanga ngolo jenyi mujila yayipi. Chikupu vene atwama nangolo jakufungulula. Visoneka vyamuvuluka ngwavo ikiye “muka-kuyula kano kaye,” ikiye “kalunga wakatwamino kamyaka yino.” (Yowa. 12:31; Koli. 2, 4:4) Satana Liyavolo “atwama nangolo jakuneha kufwa.” (Hepe. 2:14) Echi kachalumbununa nge Satana eji kujihanga vatu iveneko, nduma. Chipwe ngocho, kano kaye kanazale nashipilitu yenyi yayipi yaukenya. Hakuwana nge Eve evwililile makuli aSatana, kaha Alama alikangile kuli Kalunga, ngocho shili nakufwa vyatanda kuvatu vosena. (Loma 5:12) Echi chikiko chinalingisa Liyavolo vamuvuluke ngwavo, “atwama nangolo jakuneha kufwa.” Yesu amuvulukile nawa ngwenyi ikiye “muka-kujiha vatu.” (Yowa. 8:44) Satana apwa chikupu muka-kole wangolo.

7. Vandemone vanasololanga ngachilihi ngolo javo?

⁷ Kachi nge natwimanyina Satana nakole, kaha natupwa vaka-kole jenyi navaze veji kumukundwizanga hakulikanga kuchiyulo chaKalunga, kuhakilako vene navandemone. (Kuso. 12:3, 4) Kakavulu vandemone vanasololanga ngolo javo jakulipwila hakuyanjisa vatu. (Mateu 8:28-32; Mako 5:1-5) Kanda kulelesa ngolo vatwama najo vangelo vavapi chipwe ngolo jauze “muka-kuyula vandemone.” (Mateu 9:34) Katweshi kuhasa kufungulula Satana uka wetu chakuzeneka kutukafwa kuli Yehovako.

8. (a) Satana afwila kulinga ika? (Talenu muvwimbimbi wakulivanga.) (b) Kweseka nakumona chenu, kano kaye kanasolola ngachilihi nge Satana apwa wakukenyuka?

⁸ Kaposetolo Petulu afwanyishile Satana kuli “ndumba wakutahwoka.” Mukanda umwe walumbununa ngwawo, lizu lyachiHelase valumuna ngwavo “kutahwoka” lyatalisa kukanyama uze ali nakutahwoka, uze ali nazala. Echi chasolola vilinga vyaukenya  atwama navyo Satana. Numba tuhu Satana ikiye ali nakuyula kano kaye kosena, oloze ali nazala yakusaka kujiha vatu vavavulu. (Yowa. 1, 5:19) Satana nahake mangana kuli vasalaho vawavisa vaze veji kuzachilanga hamwe “namikoko veka.” (Yowa. 10:16; Kuso. 12:17) Satana afwila kunongesa vatu jaYehova. Kukenyuka chaSatana chinasoloka hatoma omu nayanjisanga vaka-kukavangiza Yesu kufuma vene mulikulukaji lyamyaka lyakulivanga kuheta noholili.

9, 10. (a) Uno Satana asakile ngachilihi kuhonesa vyuma ajinyine Kalunga kutalisa kumuyachi waIsalele? (Hanenu vyakutalilaho.) (b) Mwomwo ika Satana afwililile kuhungumwisa vaIsalele? (c) Liyavolo eji kwivwanga ngachilihi nge ngamba yaYehova nalingi shili makumbi ano?

⁹ Satana asolola nawa nge apwa wakukenyuka hakusaka kuhonesa vyuma ajina Kalunga. Ndumba uze ali nazala keshi kwivwila keke kanyama uze ali nakusaka kukwatako. Keshi kwivwa keke shimbu kanda amujiheko, kaha nawa keshi kuliveya nge namujihi lyehiko. Chochimwe nawa, Satana keshi kwivwila keke vaze eji kusakanga kujihako. Chakutalilaho, achishinganyekenu omu evwile Satana Liyavolo halwola vaIsalele valingilenga ujila nakusolola muchima wachipululu. Chakutalilaho, hakutanga vyuma vyavipi vyasolokele kuli Jimili muka-ujila naNgehaze wachipululu, munahase kumona omu ou ndumba wakutahwoka afungulwile.—Kula. 25:6-8, 14, 15; Vamya. 2, 5:20-27.

¹⁰ Kwapwile vyuma vyalingishile Satana afwile kuhungumwisa vaIsalele. Anukenu ngwenu, Meshiya uze mwakachika Satana nakuhakwila chiyulo chaYehova atelele kufuma kumuyachi kana. (Kupu. 3:15) Satana kasakile mangana vaIsalele vafukileko, ngocho azachile nangolo mangana avafungulule valinge shili. Satana kevwililile Ndavichi keke omu avulumwine mulonga waujilako, chipwe kwivwila keke kapolofweto Mose omu ahonene kwingila muLifuchi lyaLushikoko. Satana eji kuwahililanga kachi nge ngamba yaKalunga umwe nalingi shili yayinene. Nge chuma kana chinasoloka, Liyavolo eji kutombanga Yehova.—Vishi. 27:11.

11. Chuma muka chalingishile Satana eseke Sala?

¹¹ Satana ahungile tanga yize  mwakasemukila Meshiya. Chakutalilaho,  achishinganyekenu havyuma vyasolokele omu vamulwezele Apalahama ngwavo mwakapwa “muyachi waunene.” (Kupu. 12:1-3) Omu Apalahama naSala vapwile muEjipitu, Fwalo atumine vatu vamunehele Sala kuzuvo yenyi, pamo asakile apwenga pwevo lyenyi. Chipwe ngocho, Yehova ayowele Sala muukalu kanou. (Tangenu Kuputuka 12:14-20.) Ukalu kana wasolokele cheka muNgelale te Isaka kalinwomu asemuke. (Kupu. 20:1-7) Uno Satana ikiye anehele ukalu kana tahi? Kutala ashinganyekele ngwenyi Sala uze afumine munganda yaluheto yaUle nakuya nakutwama mujimbalaka mwafwila kutwama munganda yaMwangana Fwalo chipwe Avimeleke nyi? Kutala Satana ashinganyekele ngwenyi Sala mwaseza lunga lyenyi naYehova nakusomboka ulo waukoji nyi? Mbimbiliya kayahanjika havyuma kanako, oloze twafwelela ngwetu Liyavolo kachi awahililile kachi nge Sala ahonene kutamo kusema mwana walushiko. Kachi nge Sala alingile vyuma kana, kachi Satana kaliveyeleko hakujihisa ulo wamwaza waSala, nakupihisa lijina lyenyi, nausepa wenyi naYehova. Ocho kukenyuka chaSatana vayaya!

12, 13. (a) Satana asolwele ngachilihi ukenya wenyi omu asemukile Yesu? (b) Satana eji kumonanga ngachilihi vanyike vaze vazanga Yehova nakufwila kumuzachila makumbi ano?

¹² Yesu asemukile omu mwahichile makulukaji amyaka kufuma halwola apwileko Apalahama. Kanda kushinganyeka ngwenu Satana amwene ngwenyi ou mwana apwile wamwaza, kaha nawa wamulemuko. Satana atachikijile ngwenyi ou kemba mwakakola nakupwa Meshiya uze vashikile. Chapundu vene, Yesu apwile muka-tanga yaApalahama uze mwakenyeka “milimo yaLiyavolo.” (Yowa. 1, 3:8) Uno Satana ashinganyekele ngwenyi nachipwa ukenya kujiha kemba tahi? Nduma, mwomwo ikiye keshi kulinga vyuma vyakwolokako. Ngocho omu Yesu apwile kemba, Satana asakile kumujiha hahaze vene. Alingile ngachilihi ngocho?

¹³ Mwangana Helote apihililile chikuma omu vaka-kuzachisa vatanganyika vayile nakumuhulisa ‘vyamwangana wavaYuleya uze asemukile,’ kaha afwililile kumujiha. (Mateu 2:1-3, 13) Hakusaka ajihe Yesu, ahanyine lushimbi lwakujiha vanyike vamalunga vosena vaze vapwile namyaka yivali yakusemuka nakuneha mwishi, vaze vapwilenga muMbetelema namujingalila jahachileko. (Tangenu Mateu 2:13-18.) Yesu ayovokele muponde kana. Jino mujimbu kanou watunangula vyuma muka kutalisa kuli muka-kole wetu Satana? Chasoloka hatoma nge Liyavolo kamona kuyoya chavatu kupwa chachilemuko. Kazakama vana vavandendeko. Chapundu vene, Satana apwa “ndumba wakutahwoka.” Ngocho, zangamenu, mwomwo apwa wakukenyuka chikupu.

14, 15. Satana ‘nelavisa ngachilihi vishinganyeka vyavaze kavetavako’?

¹⁴ Satana eji kuzachisanga makuli hakusaka kusosolola vatu kuli Kalunga wazangi Yehova. (Yowa. 1, 4:8) Satana eji kwonganga vatu kuchina navejiva ngwavo “vasaka vyuma vyakushipilitu.” (Mateu 5:3) Ngocho “nelavisa vishinganyeka vyavaze kavetavako, mangana musana wamujimbu wamwaza waupahu waKulishitu, uze apwa chifwanyisa chaKalunga, uzeneke kuvamunyikila.”—Koli. 2, 4:4.

¹⁵ Jila yayinene Satana eji kwongelangamo vatu shina kuhichila mukwitava chamakuli. Eji kwivwanga kuwaha kumona vatu navalemesa vakulu, navyuma vatenga, natunyama, nakala chuma, muchishishisa chakulemesa Yehova uze “asaka vatu valihane kuli [ikiye] namichima yavo yosena.” (Kulo. 20:5) Numba tuhu  vatu vamwe vashinganyeka ngwavo veji kulemesanga Kalunga, oloze vafwelela vyuma vyamakuli navisemwa vyamokomoko. Vanafwane nge vatu vaze vapwileko mumakumbi aIsaya, vaze Yehova alembelelele ngwenyi: “Ikaze muli nakwenyekela jimbongo kuvyuma vize kavyapwa vyakulyako? Ikaze muli nakwenyekela jimbongo jenu kuvyuma vize kavyeshi kumisuulwisako? Ngwivwililenu kanawa, kaha lyenu kulya chamwaza, namulivwisa kuwaha kulya chamaji.”—Isa. 55:2.

16, 17. (a) Mwomwo ika Yesu alwezelele Petulu ngwenyi: “Ove Satana, hita kunyima yami”? (b) Satana nahase kutuhungumwisa ngachilihi mangana tuhone kutona?

¹⁶ Satana nahase kuhungumwisa navangamba jaYehova vatwima. Chakutalilaho, achishinganyekenu omu Yesu alwezele tumbaji twenyi ngwenyi kalinwomu vamujihe. Kaposetolo Petulu uze amuzangile chikuma amutwalile kupenge nakumulweza ngwenyi: “Litetele ove Mwata. Vyuma kana kavyeshi kukakusolokelako.” Oloze Yesu amukumbulwile chakuhona kuhita mutenga ngwenyi: “Ove Satana, hita kunyima yami!” (Mateu 16:22, 23) Mwomwo ika Yesu avulukilile Petulu ngwenyi “Satana”? Mwomwo Yesu atachikijile vyuma navisoloka. Lwola lwahetele mangana Yesu afwenga mwandando yakusokola nakusolola nge Liyavolo apwa muka-kwonga. Halwola kanelu lwalukalu, Yesu katelelele ‘kulitetelako.’ Satana asakile Yesu ahone kupwa wakutona.

¹⁷ Hakuwana nge tuli kusongo yakatwamino kamyaka yino, nayetu nawa tuli nakuyoyela mulwola lwalukalu. Satana asaka tuhone kupwa vakutona, chipwe ‘tulitetele etu vavene,’ hakusaka kufukila muno mukaye nakuvulyama ngwetu tuli nakuyoyela mumakumbi akukuminyina. Chuma kana kachatela kusoloka kuli enuko. Shikaho, “tonenunga.” (Mateu 24:42) Kanda navamihungumwisa kuli Satana hakushinganyeka ngwenu kukuma chili hahasuku, chipwe ngwenu kacheshi kukezako.

18, 19. (a) Satana nahase kutwonga ngachilihi nakutulingisa jino tumone nge Yehova katuzangako? (b) Yehova eji kutukafwanga ngachilihi tulame uhashi wetu wakushinganyeka nakupwa vakutona?

¹⁸ Satana eji kwesekanga kutuhungumwisa mujila yeka nawa. Asaka tufwelele ngwetu Kalunga katuzangako, kaha nawa keshi kutukonekela jishili jetuko. Evi hivishinganyeka vyaSatana vyakwonga. Achishinganyekenu hachumechi. Uno iya chikupu kavazanga kuli Yehovako? Satana. Kaha nawa iya chikupu kaveshi kukakonekelako? Satana lika. Mbimbiliya yatufwelelesa ngwayo: “Kalunga kapwa wakuhengako numba avulyame milimo yenu, nazangi munasolola yakuzanga lijina lyenyi.” (Hepe. 6:10) Yehova eji kusakwililanga hakala vyuma tweji kulinganga mangana tumwivwise kuwaha, kaha milimo yetu kayeshi yakulishina tuhuko. (Tangenu Wavaka-Kolinde 1, 15:58.) Ngocho kanda natwechelela Satana atuhungumwiseko.

¹⁹ Nganomu tunashimutwila, Satana akwechi ngolo, apwa wakukenyuka, kaha nawa muka-kwonga. Uno tunahase kufungulula ngachilihi ou muka-kole wetu wamunene? Yehova katuseza ukawetuko. Mazu enyi atulweza jijila eji kuzachisanga Satana, ngocho “twatachikiza tufuta twenyi.” (Koli. 2, 2:11) Nge natutachikiza kanawa tufuta twaSatana, kaha nachitukafwa tulame uhashi wetu wakushinganyeka nakupwa vakutona. Oloze kwijiva kaha tufuta twaSatana kacheshi kutukafwako. Mbimbiliya yamba ngwayo: “Mwimanyinenu Liyavolo nakole, kaha mwamichina.” (Yako. 4:7) Chihande chinakavangizaho nachishimutwila havishina vitatu vize navitukafwa twimanyine Satana nakumufungulula.