1. Vatu mukaye vamona ngachilihi ujila?

TULI nakuyoyela mukaye kaze kanazale navilinga vyaujila. Chakutalilaho, vatu vavavulu vashinganyeka ngwavo chapwa chakutamo kulisavala namutu wausonyi umwe chipwe namutu uze kapwa muka-mahyavoko. Vyuma vyakufwana nge jivindiyo, mikanda, myaso navyeka vyazala navilinga vyaujila. (Samu 12:8) Oloze Yehova nahase kutukafwa tuyoye mujila yize nayimwivwisa kuwaha. Tunahase kupwa vatoma mulifuchi lino linazale navilinga vyaujila.—Tangenu Wavaka-Tesolonyika 1, 4:3-5.

2, 3. (a) Mwomwo ika twatela kukana vishinganyeka vyavipi? (b) Vyuma muka natushimutwila muchihande chino?

² Hakusaka twivwise Yehova kuwaha, twatela kukana vyuma vyosena vize ahunga. Oloze hakuwana nge katwakupuka mwosenako, tunahase kufwila kupwa navishinganyeka vyaujila ngana muze ishi eji kufwilanga kulya ndulo. Nge tunaputuka kupwa navishinganyeka vyaujila, kaha twatela kuvikana hahaze vene. Nge natuhona kulinga ngocho, kaha vishinganyeka kana navitohwa nakutulingisa tulinge shili. Mbimbiliya  yahanjika ngwayo: “Kufwila . . . cheji kusemanga shili.”—Tangenu WaYakova 1:14, 15.

³ Vishinganyeka vyavipi vinahase kutanda mumuchima wetu. Evi vikiko twatela kupwila vakuzangama chikuma navyuma vize natuputuka kufwila. Nge natukananga vishinganyeka vyavipi, kaha natulihenda kukulinga ujila nakuvyuma vyavipi vyeji kufumangamo. (Ngale. 5:16) Tushimutwilenu vyuma vitatu vize navitukafwa tuhonese vishinganyeka vyavipi. Vyuma kana shina, usoko wetu naYehova, jishimbi jamuMbimbiliya, nakutukafwa kuli vaka-Kulishitu vakuhya.

4. Mwomwo ika chapwila chachilemu kuli etu kupandama kuli Yehova?

⁴ Mbimbiliya yalweza vaze vasaka ‘kupandama kuli Kalunga’ ngwayo: “Tomesenu kumavoko enu,” kaha nawa “tomesenu michima yenu.” (Yako. 4:8) Nge tuli nakusaka Yehova apwenga sepa lyetu, kaha katwatela kulingisa kaha vilinga vyetu vimwivwise kuwahako, oloze twatela nawa kulingisa vishinganyeka vyetu vimwivwise kuwaha. Nge vishinganyeka vyetu navipwa vitoma, kaha namumuchima wetu nawa namupwa mutoma. (Samu 24:3, 4; 51:6; Fwili. 4:8) Yehova atachikiza ngwenyi katwakupuka mwosenako, kaha nawa ngwenyi tunahase kuputuka kushinganyeka vilinga vyaujila. Oloze hakuwana nge katwasaka kwivwisa Yehova kupihyako, ngocho tweji kuzatanga nangolo jetu josena mangana tukane vishinganyeka vyavipi. (Kupu. 6:5, 6) Tweji kufwilanga kupwa navishinganyeka vitoma.

5, 6. Kulomba chinahase kutukafwa ngachilihi tuhonese vishinganyeka vyaujila?

⁵ Yehova mwatukafwa tuhonese vishinganyeka vyaujila nge natumulombanga atukafwe. Eji kutuhananga shipilitu yenyi yajila mangana tupwenga najingolo jakuhonesa vishinganyeka vyaujila. Tunahase kumulomba atukafwe tupwenga navishinganyeka vize navimwivwisa kuwaha. (Samu 19:14) Twatela kumulomba atukafwe tumone nge mumuchima wetu muli vishinganyeka vyavipi vize vinahase kutulingisa tulinge shili. (Samu 139:23, 24) Twalenuho lika kulomba Yehova amikafwe mukane vishinganyeka vyaujila nakulinga vyuma vyakwoloka nge muli mucheseko.—Mateu 6:13.

⁶ Shimbu kanda tulinangule muchano, pamo twasakilenga kulinga vyuma vize kasaka Yehovako, kaha pamo noholili tuchili nakulipika navishinganyeka kanevi. Oloze Yehova nahase kutukafwa twalumuke nakulinga vyuma vize navimwivwisa kuwaha. Chakutalilaho, omu Mwangana Ndavichi alingile ujila naMbate-sheva, apihililile nakwalumuka nakulembelela Yehova amuhane “muchima utoma” nakumukafwa apwenga wakwononoka. (Samu 51:10, 12) Ngachize, nge kushimbu yakunyima twapwilenga navishinganyeka vyaujila, kaha noholili tuchili nakulipika navyo, Yehova nahase kutukafwa tufwile kumwononoka nakulinga vyuma vyakwoloka. Nahase kutukafwa tuhonese vishinganyeka vyavipi.—Samu 119:133.

7. Mazu aKalunga anahase kutukafwa ngachilihi tukane vishinganyeka vyaujila?

⁷ Yehova nahase kukumbulula kulomba chetu kuhichila muMazu enyi Mbimbiliya. MuMbimbiliya mwatwama mangana aKalunga aze “apwa atoma.” (Yako. 3:17) Nge natutanganga Mbimbiliya hakumbi hakumbi, kaha mumuchima wetu namuzala navishinganyeka vitoma. (Samu 19:7, 11;  119:9, 11) MuMbimbiliya mwatwama nawa vyakutalilaho vize navitukafwa tukanenga vishinganyeka vyaujila.

8, 9. (a) Vyuma muka vyalingishile mukweze umwe walunga alinge ujila napwevo muka-ujila? (b) Chakutalilaho chahamukanda waVishimo kapetulu 7 chinahase kutukafwa tulihende kuvyuma muka?

⁸ Hali Vishimo 5:8, mazu aKalunga atulweza tuchine vilinga vyaujila. Kaha hali Vishimo kapetulu 7 hatwama mujimbu wamukweze walunga uze apwile nakutambuka naufuku kwakamwihi nazuvo yapwevo waujila. Pwevo kana “avwalile nge omu eji kuvwalanga muka-ujila,” kaha apwile mumukwakwa. Ayile kuli uze mukweze walunga nakumukwata mukasamba nakumusweswenya nakumulweza vyuma vize vyasangumwine vishinganyeka vyavipi. Ou mukweze kalitwaminyine kushinganyeka havyuma kanako, ngachize alingile ujila nauze pwevo. Numba tuhu katachikijile ngwenyi mwalinga ujilako, oloze aulingile. Ngachize, vishinganyeka vyavipi vyamuyanjishilenga. Nge atachikijile ponde yakulinga ujila, kachi alihendele kuli pwevo kana.—Vishi. 7:6-27.

⁹ Ngana mwauze mukweze walunga, nayetu tunahase kulinga vyuma vyavipi mwomwo yakuhona kutachikiza ukalu naufumamo. Chakutalilaho, naufuku havisaji vyamivwimbimbi hanahase kwiza  mivwimbimbi yaujila, ngachize, chinahase kupwa chachipi kutondatonda jipolongalamu jahatelevijini kuswakumwe. Chinahase nawa kupwa chachipi kuchoka haInternet chakuhona kutachikiza vyuma vize navisokoloka chipwe kutala vatu vali uselesele. Shikaho, vyuma natutala navitunehela vishinganyeka vyaujila nakutulingisa tuhone kwononoka Yehova.

10. Mwomwo ika kusapula chaseya chapwila chachipi? (Talenu muvwimbimbi wakulivanga.)

¹⁰ Mbimbiliya yahanjika nawa ngwayo malunga namapwevo vatela kulivumbikanga. (Tangenu WaChimoteu 1, 5:2.) Vaka-Kulishitu vatela kulihenda kukusapula chaseya. Vatu vamwe vanahase kushinganyeka ngwavo kusapula namutu uze kapwa muka-mahyavoko hakumutala mujila yayipi kachapihyako chikalu kaha nge kavamukwachile hamujimbako. Oloze nge valunga napwevo vaze kavalimbatako navaputuka kusapula, vanahase kuputuka kushinganyeka vyuma vyavipi, kutwala muze hikulinga jino ujila. Vyuma kana vinasolokanga kakavulu, kaha nawa vinahase kusoloka.

11. Vyuma muka natulinangula kuli Yosefwe?

¹¹ Yosefwe atuhana chakutalilaho chamwaza. Pwevo lyaPotefwale asakile alisavale naYosefwe. Oloze Yosefwe amukanyine, kaha pwevo lyaPotefwale kalitwaminyineko. Hakumbi hakumbi alwezelenga Yosefwe ashikame nenyi. (Kupu. 39:7, 8, 10) Muka-kulinangula Mbimbiliya umwe ahanjikile ngwenyi pwevo lyaPotefwale ashinganyekele ngwenyi nge navapwa vavali kaha, kaha Yosefwe mwamutonda. Oloze Yosefwe alikashile mumuchima wenyi kuhona kumutonda. Ngocho, kechelelele vishinganyeka vyavipi vitande muvishinganyeka vyenyiko. Omu pwevo lyaPotefwale akwachile kulihina lyaYosefwe nakusaka asavale nenyi, Yosefwe hahaze vene “asezele lize lihina mumavoko ayauze pwevo nakuchinyina haweluka.”—Kupu. 39:12.

12. Twatachikiza ngachilihi ngwetu vyuma natutala vinahase kutunehela vishinganyeka vyavipi?

¹² Yesu ahanjikile ngwenyi vyuma natutala vinahase kutulingisa tupwenga navishinganyeka vyakusaka kulinga ujila. Ambile ngwenyi: “Oloze aminyi nangwamba kuli enu ngwami, weshowo mwatala lika pwevo nakumwivwila peha, nalingi lyehi nenyi ukoji mumuchima wenyi.” (Mateu 5:28) Echi chikiko chasolokele nakuli Mwangana Ndavichi. “Omu apwile haze hamulungu, amwene pwevo ali nakusana.” (Samwe. 2, 11:2) Kaha atwalileho lika kutala uze pwevo nakumushinganyekela. Numba tuhu apwile pwevo lyambala, oloze Ndavichi aputukile kumusaka nakulinga nenyi ujila.

13. Mwomwo ika twatela ‘kulishika lushiko nameso etu,’ kaha tunahase kulinga ngachilihi ngocho?

¹³ Nge tuli nakusaka kukana vishinganyeka vyaujila, kaha twatela kukavangiza chakutalilaho chaYopa. Yopa ambile ngwenyi: “Ngunalishiki lushiko nameso ami.” (Yopa 31:1, 7, 9) Ngana mwaYopa, nayetu twatela kulihenda kukushinganyekelanga vyuma vyavipi mutu uze natutala. Nge tunamono muvwimbimbi waujila hakopyuta, halipapilo, mumangazini chipwe kweka, kaha hahaze vene twatela kutala kweka.

14. Vyuma muka twatela kulinga hakusaka tupwenga vatoma?

¹⁴ Nge namushinganyeka havyuma tunashimutwila, kaha munahase kumona ngwenu mwatela kuzata nangolo mangana muhonese vishinganyeka vyaujila. Nge muli nakusaka kulihenda kuvishinganyeka kana, kaha lingenu ngocho oholyapwa. Nge namwononoka vyuma ahanjika Yehova, kaha namulihenda kuujila nakupwa vatoma.—Tangenu WaYakova 1:21-25.

15. Nge chinatukaluhwila kuhonesa vishinganyeka vyavipi, kaha mwomwo ika chapwila chachilemu kulwezako vandumbwetu vatukafwe?

¹⁵ Nge chinakumikaluhwila kuhonesa vishinganyeka vyavipi, kaha shimutwilenu nandumbwenu muchikungulwilo uze nazachila Yehova hamyaka yayivulu uze nahase kumikafwa kuzachisa Mazu aKalunga. Numba tuhu chinahase kupwa chachikalu kulweza vakwenu ukalu wenu, oloze chapwa chachilemu kuvalweza vamikafwe. (Vishi. 18:1; Hepe. 3:12, 13) Vandumbwetu vakuhya vanahase kumikafwa vyuma vize mwatela kwalumunako mukuyoya chenu. Kaha alumunenuko vyuma kana mangana Yehova atwaleho lika kupwa Sepa lyenu.

16, 17. (a) Vakulwane vanahase kukafwa ngachilihi vandumbwetu vaze chili nakuvakaluhwila kuhonesa vilinga vyaujila? Hanenu chakutalilaho. (b) Mwomwo ika chapwila chachilemu vandumbwetu vaze vali nakutanganga chipwe kutala vatu vali uselesele kulweza washi vakulwane vavakafwe?

¹⁶ Vakulwane vamuchikungulwilo chetu vatamo kutukafwa. (Tangenu WaYakova 5:13-15.) Mukweze walunga umwe wamulifuchi lyaBrazil chapwilenga nakumukaluhwila kuhonesa vilinga vyavipi. Ambile ngwenyi: “Ngwatachikijilenga ngwami vishinganyeka vyami vili nakwivwisa Yehova kupihya kumuchima, oloze ngwapwile nakwivwa sonyi kulweza vakwetu vyuma ngwapwilenga nakushinganyeka.” Kaha mukulwane umwe amwene ngwenyi uze mukweze walunga apwile nakusaka kumukafwa. Ngachize, amukolezezele alweze vakulwane vamukafwe. Uze mukweze ambile ngwenyi: “Ngwalikomokelele halikoji vangusolwelele vakulwane nakungwivwishisa. Kangwashinganyekele ngwami navangusolwela likoji kanako. Vangwivwililile kanawa omu ngwapwile nakuvalweza ukalu wami. Vazachishile Mbimbiliya nakungufwelelesa ngwavo Yehova anguzanga, kaha vangulombeleleko. Echi changukafwile ngwitavile Mazu amuMbimbiliya aze vangutangililile.” Omu ou mukweze walunga ajikijishile usoko wenyi naYehova, ambile ngwenyi: “Ngunamono jino ngwami kumana chapwa chachilemu kulweza vakwetu vangukafwe muchishishisa chakulipika naukalu ukawami.”

¹⁷ Nge mwatwama natato yakutanganga chipwe kutala vatu vali uselesele, kaha mwatela kulweza washi vandumbwenu vamikafwe. Nge kamweshi kuvalweza washiko, kaha namwingila muponde yakulinga ujila. Echi chinahase kulingisa vatu veka vevwenga kupihya kumuchima nakupihisa lijina lyaYehova. Vandumbwetu vavavulu vanalwezenga vakulwane vavakafwe, kaha vanetavilanga vyuma vanavakafwenga mwomwo vasaka kwivwisa Yehova kuwaha nakutwalaho lika kupwa muchikungulwilo chavaka-Kulishitu.—Yako. 1:15; Samu 141:5; Hepe. 12:5, 6.

18. Vyuma muka mwafwila kulinga?

¹⁸ Kaye kano kaSatana kanandupukila chikuma muvilinga vyaujila. Oloze vangamba jaYehova veji kuzatanga nangolo mangana vapwenga navishinganyeka vitoma. Yehova eji kwivwilanga kuwaha vangamba jenyi kanava. Tutwalenuho lika kupandama kuli Yehova nakukavangiza vyuma eji kutukafwanga kufuma muMazu enyi namuchikungulwilo chenyi. Nge natulinga ngocho, kaha natupwanga vakuwahilila nakupwa nachivezu chitoma. (Samu 119:5, 6) Kaha kulutwe omu navakafumisako Satana, natukatwama haya myaka yosena mulifuchi lyaKalunga lyalihya litoma.