1. Nge tuli nakwambulula mujimbu, tunahase kuzachisa ngachilihi kulomba chaYesu chize chatwama hali Mateu 6:9-13?

VATU vavavulu vatachikiza mazu atwama muKulomba chaMwata chize chatwama hali Mateu 6:9-13. Omu tweji kwambululanga mujimbu, tweji kuzachisanga mazu amukulomba kanechi hakunangula vatu ngwetu Wangana waKalunga wapwa hifulumende yamuchano yaKalunga yize nayikalumuna mavu kupwa palachise. Tweji kuzachisanga nawa mazu akwamba ngwavo “lijina lyove lipwenga lyajila” mangana tusolole nge Kalunga akwechi lijina kaha nawa twatela kulimona kupwa lyajila.—Mateu 6:9, kwinyikila chamwishi.

2. Twatachikiza ngachilihi ngwetu Yesu katulwezele tukindulukilenga mazu wowamwe lwola lwosena nge tuli nakulombako?

² Uno Yesu atulwezele tukindulukilenga mazu wowamwe lwola lwosena nge tuli nakulomba ngana muze veji kulinganga vatu vavavulu tahi? Nduma. Yesu ambile ngwenyi: “Enu omu namulomba, kanda namuhilukila hilukila nakuvuluka vyuma vyovimweko.” (Mateu 6:7) Kaha nawa omu apwile nakunangula  tumbaji twenyi mwakulombela, azachishile kulomba chochimwe, oloze kazachishile mazu wowamweko. (Luka 11:1-4) Ngocho, Yesu azachishile kulomba chenyi chakutalilaho mangana atunangule vyuma vize twatela kulomba.

3. Vihula muka mwatela kulihulisa omu namulinangula kulomba chaYesu chakutalilaho?

³ Muchihande chino nechi nachikavangizaho, natulinangula kulomba chaYesu chakutalilaho. Ngachize, mwatela kulihulisa ngwenu, ‘Uno echi kulomba chinahase kungukafwa ngachilihi ngulombenga mujila yamwaza? Kaha nawa kutala nguli nakuyoya kweseka nakulomba kana tahi?’

4. Mazu akwamba ngwavo “Ove Setu” atwanukisa vyuma muka, kaha Yehova apwa ngachilihi “Setu”?

⁴ Yesu aputukile kulomba hakwamba ngwenyi: “Ove Setu.” Echi cheji kutwanukisanga nge Yehova apwa Chisemi wavandumbwetu vosena muno mukaye. (Petu. 1, 2:17) Vaze asakula Yehova vakatwame mwilu, Yehova avamona kupwa vana venyi. Ngachize, apwa Sevo mujila yakulipwila. (Loma 8:15-17) Kaha nawa vaze navakatwama hano hamavu haya myaka yosena vanahase navakiko kumuvuluka ngwavo “Setu.” Yehova eji kuvahananga kuyoya nakuvahana nawa vyuma vyosena vize navivakafwa. Vatu kana navakavavulukanga ngwavo “vana vaKalunga” nge vanapu lyehi vakukupuka mwosena nakutwalaho lika kwononoka Yehova hakweseka chamakumishilo.—Loma 8:21; Kuso. 20:7, 8.

5, 6. Wana muka wamwaza uze visemi vatela kuhana vana vavo, kaha mwana himwana atela kulinga vyuma muka hawana kanou? (Talenu muvwimbimbi wakulivanga.)

⁵ Nge visemi navakafwa vana vavo vatachikize ngwavo Yehova ikiye Sevo wamwilu nakuvanangula nawa valombenga kuli ikiye, kaha nachisolola nge vanahane vana vavo wana wamwaza chikuma. Kalama wakujinguluka wamulifuchi lyaSouth Africa ambile ngwenyi: “Kufuma halikumbi lize vasemukile vana vetu vamapwevo vavali, ngwalombelenga navo ufuku hiufuku, kuvanga kaha nge kangweshi hemboko. Ava vana vetu veji kuhanjikanga ngwavo kaveshi kwanuka mazu ngwapwile nakuzachisa mukulomba chami halwola kanako. Oloze veji kwanukanga omu chajila kushimutwila naSetu Yehova kaha nawa valivwilenga kupwa vakuunda, vakukingiwa. Omu vahashilenga kulilombela vavene, ngwavakolezezelenga valombele helu mangana nayami ngwivwenga vyuma vali nakulomba kuli Yehova. Echi changukafwile ngutachikize vyuma vyapwile mumichima yavo. Kaha ngwavakafwile vavulukenga vyuma vyavilemu vize vyatwama mukulomba chaYesu chakutalilaho.”

⁶ Ava vana vayou ndumbwetu vatwalileho lika kupandama kuli Yehova nomu valingile vanakolo. Oholyapwa vasomboka lyehi, kaha vali nakuzachila Yehova mumulimo washimbu yosena namalunga javo. Wana wamwaza uze visemi vatela kuhana vana vavo shina kuvakafwa vatunge usoko wakukola naYehova. Oloze mwana himwana atela kulama usoko wenyi naYehova. Echi chasaka kulinangula kuzanga lijina lyaKalunga nakulivumbika chikuma.—Samu 5:11, 12; 91:14.

7. Kutokwa muka twatwama nacho, kaha vyuma muka twatela kulinga?

⁷ Twatokwa chikuma hakutuvulukila lijina lyaKalunga nakupwa “vatu navavulukilanga lijina lyenyi.” (Vili. 15:14; Isa. 43:10) Tweji kulombanga ngwetu “lijina  lyove lipwenga lyajila.” Kaha nawa tweji kulombanga atukafwe tuhone kulinga chipwe kuhanjika hakala vyuma vize navisaula lijina lyenyi. Katwatela kupwa ngana mwavatu vamwe vamulikulukaji lyakulivanga vaze kavalingilenga vyuma vize vanangwilenga vakwavoko. Kaposetolo Paulu asonekele ngwenyi: “Lijina lyaKalunga vali nakulisaulanga muli vaka-mafuchi eka mwomwo yayenu.”—Loma 2:21-24.

8, 9. Hanjikenu chakutalilaho chomu Yehova eji kukafwanga vatu vaze vafwila kujilika lijina lyenyi.

⁸ Tweji kuzatanga nangolo mangana tuvumbike lijina lyaYehova. Ndumbwetu umwe wapwevo wamulifuchi lyaNorway uze asalile namwanenyi walunga wamyaka yakusemuka yivali omu lunga lyenyi afwile, ambile ngwenyi: “Lwola kana lwapwile lwalukalu chikuma. Ngwalombelenga kuli Yehova hakumbi hakumbi mangana angukolezeze kuchina Satana mwatomba Yehova nge kangweshi kusakula kanawa vyakulingako nakuhona kupwa wakushishika. Ngwafwililile kujilika lijina lyaYehova, kaha nawa ngwapwile nakusaka mwanami akamone cheka ise muPalachise.”—Vishi. 27:11.

⁹ Uno Yehova akumbulwile kulomba chenyi tahi? Eyo. Kupwanga lwola lwosena navandumbwenyi chamukolezezele. Omu mwahichile myaka 5, asombokele cheka kuli mukulwane wamuchikungulwilo. Kaha mwanenyi uze ali jino namyaka yakusemuka 20 apwa jino hindumbwetu wakumbapachisa. Ou ndumbwetu wapwevo ahanjikile ngwenyi: “Ngweji kwivwanga kuwaha hakuwana nge lunga lyami wamuchivali angukafwile kulela mwanami.”

10. Kalunga mwakajilika ngachilihi lijina lyenyi?

¹⁰ Yehova mwakajilika lijina lyenyi omu mwakafumisako vatu vosena vaze veji kusaulanga lijina lyenyi nakukana ngwavo keshi ikiye muka-kuvayulako. (Tangenu Ezekele 38:22, 23.) Halwola kana vatu navakakupuka mwosena, kaha vatu vamwilu nava vahamavu vosena navakalemesanga Yehova. Vyuma vyosena navikavumbikanga lijina lyaKalunga lyajila. Kutwala muze, Setu wazangi mwakapwa “vyuma vyosena kuli vosena.”—Koli. 1, 15:28.

11, 12. Vyuma muka vize Yehova akafwile vatu jenyi vatachikize mumwka wa 1876?

¹¹ Shimbu kanda Yesu akinduluke mwilu, tumbaji twenyi vamuhulishile ngwavo: “Ove Mwata, uno wangana nauukindulwisa kuli vaIsalele halwola luno tahi?” Yesu avakumbulwile ngwenyi lwola lwavakiko lwakutachikiza omu naukaputuka kuyula Wangana waKalunga kanda luhete. (Tangenu Vilinga 1:6-8.) Oloze avanangwile nawa valombenga Wangana waKalunga wizenga nakutalilila lwola kana. Evi vikiko vyeji kutulingisanga tulombe Wangana waKalunga wizenga.

¹² Omu lwola lwaYesu lwakuyula mwilu lwapandamine hakamwihi, Yehova akafwile vatu jenyi vatachikize mwaka kana. Mumwaka wa 1876, Charles Taze Russell asonekele mutwe wachihande wakwamba ngwavo, “Gentile Times: When Do They End?” Alumbunwine ngwenyi “jitando 7” jize jatwama muupolofweto waNdanyele jalifwana ‘nalwola vatongola lwavaka-mafuchi eka’ luze vavulukile muupolofweto waYesu. Ou mutwe wachihande wahanjikile ngwawo lwola kana nalukakuma mu 1914. *—Ndanye. 4:16; Luka 21:24.

13. Vyuma muka vyasolokele mu 1914, kaha vyuma vize vyapwileko mumwaka kana vyasolwele ika?

 ¹³ Mumwaka wa 1914, mumafuchi amulitungu lyaEurope mwapwile jita, kaha kutwala muze yatanjile namukaye kosena. Jita kana yanehele zala yayinene yakalombolombo. Omu jita yakumine mu 1918, mukaye kosena mwahichile musongo wachihita uze wahitwile vatu vavavulu kuhambakana navaze vafwile mujita. Vyuma vyosenevi vyapwile ‘hichinjikizo’ chize Yesu ahanjikile. Chinjikizo kana chasolwele nge Yesu vamutongwele kupwa Mwangana mwilu, mu 1914. (Mateu 24:3-8; Luka 21:10, 11) Mumwaka kanou, “ayile nakufungulula mangana akumise kufungulula chenyi.” (Kuso. 6:2) Yesu ambilile Satana hamavu navangelo jenyi. Kufumaho, upolofweto uno waputukile kutesamo wakwamba ngwavo: “Lamba hamavu nahakalungalwiji, mwomwo Liyavolo neza kuli enu, ali namatoto amanene, mwomwo natachikiza ngwenyi ali kaha nakashimbu kakandende.”—Kuso. 12:7-12.

14. (a) Mwomwo ika twatela kutwalaho lika kulombanga Wangana waKalunga wizenga? (b) Mulimo muka waulemu uze twatela kuzata oholyapwa?

¹⁴ Upolofweto wamumukanda waKusoloka kapetulu 12 watukafwa tutachikize ovyo vyalingishile vyuma vyavipi viputuke kusoloka hano hamavu kutalisa kulwola luze vatongwele Yesu kupwa Mwangana waWangana waKalunga. Numba tuhu Yesu ali nakuyula mwilu, oloze Satana nawa ali nakuyula hano hamavu. Kaha kalinwomu Yesu “akumise kufungulula  chenyi” hakufumisa vyuma vyavipi vyosena hano hamavu. Oloze oholili tutwalenuho lika kulombanga Wangana waKalunga wizenga nakuzata mulimo wakwambulula Wangana. Mulimo wetu weji kutesangamo upolofweto waYesu wakwamba ngwavo: “Mujimbu wamwaza waWangana navakawambulula hamavu hosena, nakupwa unjiho kuli vaka-mafuchi osena, numbanyi kukuma chikeze.”—Mateu 24:14.

15, 16. Uno twatela kaha kulombanga mwaya muchima waKalunga mulingiwe hano hamavu tahi? Lumbununenu.

¹⁵ Myaka kafwe 6,000 kunyima, vatu hamavu valingilenga mwaya muchima waKalunga. Echi chikiko chalingishile Yehova ahanjike ngwenyi vyuma vyosena “vinawahe chikuma.” (Kupu. 1:31) Kufuma halwola kana, Satana alikangile kaha vatu vavavulu kavalingilenga mwaya muchima waKalungako. Oloze makumbi ano vatu kafwe jimiliyoni 8 vali nakuzachila Yehova. Vatu kanava veji kulombanga Kalunga alinge mwaya muchima wenyi hano hamavu, kaha nawa veji kulinganga mwaya muchima waKalunga. Veji kuyoyanga mujila yize nayivwisa Kalunga kuwaha nakunangula natwima vatu vyaWangana wenyi.

¹⁶ Chakutalilaho, ndumbwetu wapwevo wakamishonali wamyaka yakusemuka 80 uze azachila mulifuchi lyaAfrica uze vambapachishile mu 1948 ambile ngwenyi: “Ngweji kulombanga ngwami twatela kuwana vatu vaze vafwana nge mikoko nakuvakafwa vatachikize Yehova shimbu kanda kaye kakume. Kaha nawa shimbu kanda nguputuke kwambulila mutu, ngweji kulombanga Yehova anguhane chinyingi mangana nguhete mutu kana kumuchima. Kaha ngweji kulombanga Yehova atukafwe tuzakame vatu vakufwana nge mikoko vaze twawana lyehi.” Ou ndumbwetu wapwevo wakashinakaji nakafwe vatu vavavulu valinangule vyaYehova. Kutala munahase kwanuka vandumbwetu vatushinakaji veka vaze vali nakulinga mwaya muchima waYehova natwima tahi?—Tangenu Wavaka-Fwilipi 2:17.

17. Munakwivwa ngachilihi havyuma vize Yehova mwakalingila vatu kulutwe hano hamavu?

¹⁷ Natutwalaho lika kulombanga mwaya muchima waYehova mulingiwe hano hamavu palanga nomu mwakafumisaho vaka-kole jenyi vosena. Kufumaho mavu navakawalumuna kupwa palachise, kaha vatu vavavulu navakasanguka. Yesu ambile ngwenyi: “Ola yili nakwiza omu vosena vaze vali muvimbumbe navakevwa lizu [lyami] nakulovokamo.” (Yowa. 5:28, 29) Natukevwa kuwaha chikuma hakusambilila vausoko wetu vaze twazanga omu navakasanguka. Kalunga “mwakahunda masoji osena kumeso [etu]. (Kuso. 21:4) Vatu vavavulu vaze navakasanguka navakapwa “vaka-kuhenga” vaze kanda lyehi valinanguleho muchano wakutalisa kuli Yehova naYesu. Natukalivwisa kuwaha  kuvanangula mwaya muchima waKalunga mangana vakapwe ‘nakuyoya chahaya myaka yosena.’—Vili. 24:15; Yowa. 17:3.

18. Vyuma muka vize vatu vazanga chikuma?

¹⁸ Omu naukeza Wangana waKalunga, vatu vosena navakalemesa Yehova. Kalunga mwakahana vatu vyuma vize navakasaka chikuma omwo mwakakumbulula vyuma vitatu vyatete vyamukulomba chaYesu chakutalilaho. Muchihande chinakavangizaho natushimutwila havyuma vikwavo vyavilemu vize Yesu atulwezele tulombenga.