Kutala munalivwisanga kuwaha kutanga jimangazini jakalinwaha jaKaposhi Kakutalila nyi? Nge mukiko, kaha tumonenu omu namuhasa kukumbulula vihula vino vinakavangizaho:

Uno vaka-Kulishitu vatela kulomba kuli Yesu tahi?

Nduma. Yesu atunangwile tulombenga kuli Yehova, kaha atusela chakutalilaho chakulombanga kuli Ise. (Mateu 6:6-9; Yowa. 11:41; 16:23) Kaha nawa vaka-kumukavangiza valombelenga kuli Kalunga, keshi kuli Yesuko. (Vili. 4:24, 30; Kolo. 1:3)—1/1, lifwo 14.

Vyuma muka twatela kulinga mwaka himwaka hakusaka tuliwahise vyakwanuka kufwa chaYesu?

Jila yimwe yakuliwahishilamo shina kutanganga Visoneka vatunonekela vyakupandama kuchilika kanechi. Kaha nawa twatela kuzata nangolo mumulimo wetu wakwambulula mulwola kana. Tunahase nawa kushinganyeka chikuma halutalililo lwakulutwe luze atuhana Kalunga.—1/15, mafwo 14-16.

Vyuma muka vyasolokele kuli vafunge vavali vamuEjipitu vaze valwezele Yosefwe vilota vyavo?

Yosefwe alwezele muka-kuhana lupasa Fwalo ngwenyi navamukindulwisa cheka hachihela chenyi. Kaha chilota chamuka-kwocha jimbolo chalumbunwine nge Fwalo mwamujiha nakumusukika hachitondo. Vilota vyosena vivali vyasolokele kweseka namuze vavilumbunwine. (Kupu. 40:1-22)—2/1, mafwo 12-14.

Wana Muka Wakukomwesa Uze Vatambwile Vatu VamuJapan?

Vatambwile kamukanda kaze kapwile namukanda waMateu wamuMbimbiliya yaNew World Translation. Kamukanda kana vali nakukahana muwande, kaha vatu vavavulu vaze kavatachikiza kanawa Mbimbiliyako vali nakukatambula.—2/15, lifwo 3.

Vyuma muka vyalingishile mujimbu wamwaza utande mulikulukaji lyamyaka lyakulivanga?

Kuunda chavaLoma chalingishile kuhone kupwa vikokojola. Tumbaji vakulivanga vatambukilenga mumikwakwa yamwaza. Lilimi lyachiHelase valizachishilenga chikuma, kaha echi chavakafwile vambulule kanawa mujimbu wamwaza, nakuli vaYuleya vaze valimwangile muWangana wavaLoma mwosena. Kaha tumbaji vazachishilenga jishimbi javaLoma hakuhakwila mujimbu wamwaza.—2/15, mafwo 20-23.

Mwomwo ika vaka-Kulishitu vamuchano kavazana muchilika chaEasterko?

Yesu alwezele vaka-kumukavangiza vanukenga kufwa chenyi, keshi kusanguka chenyiko. (Luka 22:19, 20)—3/1, lifwo 8.

Mwomwo ika makumbi ano mikanda yetu kayeshi nakuhanjikanga chikuma havyuma vimwe novyo vyemanyinako kuhambakana muze chapwile kunyima?

Visoneka vyasolola nge vatu vamwe vaze vavuluka muMbimbiliya vemanyinyineko vyuma vimwe vyavilemu vize vyapwile nakwiza kulutwe. Chakutalilaho chimwe shina chize chatwama hali Wavaka-Ngalesha 4:21-31. Chipwe ngocho, katwatela kushinganyeka ngwetu vatu kana vemanyinako vyuma vimwe vyavilemuko. Oloze twatela kushinganyeka havyuma natulinangula kuvatu kana nakuvyuma vavuluka muMbimbiliya. (Loma 15:4)—3/15, mafwo 17-18.

Mwomwo ika chapwile chakulipwila kuwana vihanda vyamateve hamilumba yaswali muEgypt?

Mulikulukaji lyamyaka linafumuho ngana, vihanda vimwe vaviwanyine mumijimbu yimwe yize asonekele Yowano. Mikanda kana pamo vayisonekele te munahichi myaka yayindende kufuma haze Yowano asonekele mukanda wenyi, kaha vyuma vyatwamamo vyasolola mijimbu yize tweji kutanganga nakushindakanya havyuma vyatulingisa tufwelele ngwetu Mbimbiliya yapwa yamuchano.—4/1, mafwo 10-11.

Mwomwo ika chapwila chamwaza kuhanga mutu muchikungulwilo uze kate kupihilila nakwalumuka?

Mbimbiliya yasolola jijila jakukavangiza hakufumisa mutu muchikungulwilo mangana chinehe nganyo. (Koli. 1, 5:11-13) Echi cheji kuvumbikanga lijina lyaKalunga, nakulingisa chikungulwilo chipwenga chitoma. Kaha nawa chinahase kukafwa uze navulumuna mulonga.—4/15, mafwo 29-30.