Azangile Vatu
“Ngwevwililenga kuwaha vana vavatu.”—VISHI. 8:31.
1, 2. Vyuma muka vyasolola nge Yesu azanga chikuma vatu?
MWANAKALUNGA watwatwa ikiye watete kusolola mangana aYehova akukangana. Vamuvulukile ngwavo ikiye mangana, “kuluwa muka-kuzata” uze azachilenga hamwe naIse. Awahililile chikuma nakusuuluka omu Ise “atengele melu” nomu “azamishile vihela vyamavu.” Oloze havyuma vyosena vatenga, MwanaKalunga watwatwa ‘evwilililenga kuwaha vana vavatu.’ (Vishi. 8:22-31) Chikupu vene, Yesu azangilenga chikuma vatu nahalwola apwile mwilu.
2 Kutwala muze, ou mwanaKalunga “alilingishile kupwa wamokomoko” nakwiza hano hamavu mwomwo azangile Ise nakushishika kuli ikiye, nakuzanga nawa chikuma “vana vavatu.” Ejile hano hamavu mangana ahane “ndando yakusokola vavavulu.” (Fwili. 2:5-8; Mateu 20:28) Chikupu vene, Yesu azanga chikuma vatu. Omu Yesu apwile hano hamavu, Kalunga amuhanyine ngolo jakulinga vyuma vyakukomwesa vize vyamusolwele nge azanga vatu. Ngocho, asolwele vyuma vyamwaza vize navilingiwa kalinwomu hamavu hosena.
3. Vyuma muka natushimutwila jino?
3 Yesu ejile hano hamavu mangana nawa ambulule “mujimbu wamwaza waWangana waKalunga.” (Luka 4:43) Yesu atachikijile ngwenyi ou Wangana naukalingisa lijina lyaIse kupwa lyajila nakukumisa ukalu wavatu vosena. Shikaho, katweshi kulikomokela hakwijiva nge Yesu alingilenga vyuma vyakukomwesa vyavivulu omu azachilenga mulimo wenyi wakwambulula vize vyasolwele nge azakama chikuma vatu. Mwomwo ika chuma kana chapwila chachilemu? Mwomwo vyuma natulinangula navitulingisa tupwenga nalutalililo lwakulutwe. Tushimutwilenu jino havyuma vyakukomwesa viwana vize alingile Yesu.
‘APWILE NANGOLO JAKUHINDULA VATU’
4. Lumbununenu mujimbu waYesu omu awanyine muka-mbumba.
4 Yesu apwile nakwambulwila mujimbu wamwaza muvihela vyasanga, kaha ambulwililenga chikumanyi muNgalileya. Munganda yimwe Yesu awanyinemo vyuma vimwe vize vyamwivwishile keke chikuma. (Mako 1:39, 40) Amwene lunga umwe uze apwile namusongo waupi wambumba. Chimbuke Luka alumbunwine seteko wahetele uze musongo hakwamba ngwenyi lunga kana “apwile namusongo wambumba mujimba wosena.” (Luka 5:12) “Jino omu amwene Yesu, afukamine chameso hamavu nakumulembelela ngwenyi: ‘Ove Mwata, kachi nge unasake, unahase kungutomesa.’” Ou lunga afwelelele ngwenyi Yesu ali nangolo jakumuka. Oloze asakile kutachikiza numba nge Yesu apwile namuchima wakusaka kumukafwa nyi chiku. Uno Yesu amukumbulwile ngachilihi? Vyuma muka apwile nakushinganyeka Yesu omu amwene ou lunga napihi namusongo waupi? Kutala Yesu apwile namuchima nge uze vapwile nawo vaFwaliseu vaze kavazakamine vatu vapwile nakuyanda namusongo kanou nyi? Nge yenu kachi mwalingile ngachilihi?
5. Ika yalingishile Yesu ambenga ngwenyi, “Ngunasake vene,” omu okile uze muka-mbumba?
5 Chasoloka nge, uze muka-mbumba alitwaminyine kutambakana ngwenyi: “Ngunapihi, ngunapihi” kweseka naJishimbi jaMose. Kaha Yesu nawa kamuhanyine mulonga hakuhona kutambakanako. Oloze ahakile muchima kuli ou lunga navyuma apwile nakusaka. (Levi 13:43-46) Katwatachikiza kanawa vyuma apwile nakushinganyeka Yesuko, oloze twatachikiza vyuma vyapwile mumuchima wenyi. Keke yalingishile Yesu amulingile chuma chakukomwesa. Olwele livoko lyenyi, nakukwata muka-mbumba, nakuhanjika nalizu lyakusolola ngolo nazangi atwama navyo ngwenyi: “Ngunasake vene. Toma.” Jino “yize mbumba yamufumine.” (Luka 5:13) Chikupu vene, ngolo jaYehova jazachile. Ngolo kana kajakafwile Yesu alinge vyuma vyakukomwesa kahako, oloze jasolwele nawa nge azanga chikuma vatu.—Luka 5:17.
6. Vyuma muka vyalingisa vyuma vyakukomwesa alingile Yesu kupwa vyavilemu, kaha vyasolola ika?
6 Ngolo jaKalunga jakafwile Yesu Kulishitu alinge vyuma vyakukomwesa vyakulisezaseza. Yesu okile misongo yayivulu nautonji wakulisezaseza. Mazu vahwima amba ngwawo: “Lize liyongomena lyalikomokelele hakumona tumama vali nakuhanjika, vaka-kutenguka vanalikangula, vitonji vali nakutambuka, tupuputa vali nakumona.” (Mateu 15:31) Omu Yesu alingilenga vyuma kanevi kasakiwile kumuhana vilyo vyamujimba mangana avihake muli vaze vapwile naukaluko. Okile vene vize vilyo vyamujimba vyapwile naukalu. Kaha okilenga vaveji mukapyapya kakandende, lwola lumwe avokile oku ali hahasuku. (Yowa. 4:46-54) Uno evi vyakutalilaho vyakukomwesa vyasolola vyuma muka? Vyasolola nge Yesu uze apwa Mwangana mwilu, akwechi ngolo jakuhindula vatu namuchima wakufwila kulinga ngocho. Kutachikiza jila Yesu amwenenemo vatu chatukafwa tumone nge mukaye kakahya upolofweto wamuMbimbiliya naukatesamo wakwamba ngwavo: “Mwakevwila keke vaka-kukalikiza navaka-kuhutwa.” (Samu 72:13) Chikupu vene, Yesu mwakalinga mwaya muchima wenyi nakukafwa vatu vosena vaze vali muukalu.
“KATUKA, MBATA KAHELA KOVE, UTAMBUKE”
7, 8. Lumbununenu vyuma vyalingishile Yesu akawane muka-kalepa kuchijiva chaMbeteseta.
7 Omu mwahichile tukweji vavandende kufuma haze Yesu okile muka-mbumba muNgalileya, ayile kuYuleya nakuvilika mujimbu wamwaza waWangana waKalunga. Mujimbu ambulwile Yesu namuchima apwile nawo vyalingishile vatu vavavulu vetavile. Yesu afwililile kwambulula mujimbu wamwaza kuli vaka-kuhutwa, nakuvilika kuli vafunge mujimbu wakuvasokola, nakukasa hajimbandu javaze vali nakulyonyinga mumichima.—Isa. 61:1, 2; Luka 4:18-21.
8 Jino mukakweji waNyisane, Yesu ayile kuYelusalema kuchilika chaPaseka. Alingile ngocho mangana asolole kwononoka chenyi kulushimbi lwaIse. Munganda kana mwapwile vikilikita vyavivulu vize vahundanganyine vatu vaze vejile kuchilika. Kaha kunote yatembele kwapwile chijiva vavulukilenga ngwavo Mbeteseta, kuze Yesu awanyine lunga wakalepa.
9, 10. (a) Vyuma muka vyalingishile vatu vayenga kuchijiva chaMbeteseta? (b) Vyuma muka alingile Yesu kuze kuchijiva, kaha vyuma kana vyatunangula ika? (Talenu muvwimbimbi wakulivanga.)
9 Vaveji vavavulu navitonji valikungulwililenga kuchijiva chaMbeteseta. Vyuma muka vyavanehelenga kuchijiva kana? Vatu kana vafwelelele ngwavo nge vaveji navitonji navengila muchijiva kana shimbu meya ali nakuvunduka, kaha navavoka mujila yakukomwesa. Oloze katwatachikiza vyuma vyavalingishile vafwelele ngochoko. Achishinganyekenu vyuma vyasolokelenga. Vatu vavavulu valizakaminyine, nakuhona kutachikiza mwakulingila. Jino vyuma muka vyanehele Yesu kuze kuchijiva hakuwana nge ikiye apwile wakukupuka mwosena, kaha nawa kavijileko? Yesu ayileko mwomwo evwililile keke lunga uze avijile hatondo yayisuku shimbu kanda Yesu ezenga hano hamavu.—Tangenu Yowano 5:5-9.
10 Achishinganyekenu omu evwile uze lunga hakumuhulisa kuli Yesu ngwenyi, ‘Uli nakusaka ulikangule tahi?’ Uze lunga etavile. Asakile kachi vamuke, oloze katachikijile mwakumukilako mwomwo kakwapwile mutu wakumukafwa engile muchijivako. Yesu alwezele uze lunga alinge vyuma vyavikalu kulinga. Amulwezele akatuke, nakumbata kahela kenyi atambuke. Ngocho, uze lunga alingile ngana muze amulwezele Yesu, ambachile kahela kenyi nakuputuka kutambuka. Chakutalilaho kana chasolola vyuma mwakalinga Yesu mukaye kakahya. Chuma kanechi chakukomwesa chasolola nawa keke atwama nayo Yesu. Atondeletondelenga vatu vaze vapwile nakusakiwa kukafwa. Chakutalilaho chaYesu chatukafwa tutwaleho lika kutondatonda vatu mungalila yetu vaze vanahombo mwomwo yavyuma vyavipi vili nakusoloka mukaye.
“IYA NAKWATE KUUVWALO WAMI WAHELU?”
11. Mukanda waMako 5:25-34 wasolola ngachilihi nge Yesu evwililile keke vatu vaze vapwile nakuyanjiwa namisongo?
11 Tangenu Mako 5:25-34. Pwevo umwe evwilenga sonyi hamyaka 12 mwomwo yamusongo avijilenga, kaha musongo kana wamuyanjishile chikuma, kaha nakulemesa Kalunga chamukaluhwilile. Numba tuhu “ayanjiwile chikuma hakumuka kuli vimbuke vavavulu, kaha nawa amanyishile vikumba vyenyi vyosena,” oloze musongo wenyi wapwile nakuya nakumutekeleka lika. Likumbi limwe, ou pwevo ashinganyekeleko mweka mwakulingila mangana ayoye. Ayile kwakamwihi nakuze apwile Yesu. Ayile mukachi kaliyongomena nakukwata kuuvwalo waYesu wahelu. Oloze kweseka naJishimbi, pwevo uze apwile “nakuhita manyinga” kavamwitavishile kulinga chuma kanako. (Levi 15:19, 25) Yesu evwile ngwenyi ngolo jinamufumu, kaha asakile kutachikiza owo amukwachile. Uze pwevo “evwile woma nakulichikimina,” kaha “ejile nakulimbila hamavu kumeso enyi nakumulweza muchano wosena.” Omu Yesu amwene ngwenyi ou pwevo vanamuhindula kuli Yehova, ambile ngwenyi: “Ove mwanami, lufwelelo lwove lunakuhindula. Yakonga mukuunda, likangule kumusongo wove waupi.”
Vyuma vyakukomwesa alingile Yesu vyamusolola chikupu nge eji kutuzakamanga nakufwila kukumisa ukalu wetu (Talenu palangalafu 11, 12)
12. (a) Kweseka navyuma tunashimutwila, Yesu munahase kumulumbununa ngachilihi? (b) Yesu atusela chakutalilaho muka?
12 Chikupu vene, Yesu apwa walikoji. Twatachikiza ngwetu atwama namuchima wakuzakama vatu vaze vali nakuyanjiwa namisongo. Satana asaka tushinganyeke ngwetu Kalunga katuzangako, kaha nawa tuvamokomoko. Vyuma vyakukomwesa alingile Yesu vyasolola hatoma nge atuzakama, kaha nawa asaka kutukafwa nge tuli muukalu. Chikupu vene, Yesu apwa Kapilishitu Wakulitulaho wakutetela, Mwangana wakeke. (Hepe. 4:15) Shimbu jimwe chinahase kupwa chachikalu kutachikiza kanawa omu vali nakwivwa vatu vaze vali nakuyanjiwa namisongo yakuvatekeleka, chikumanyi nge etu kanda tuchivizengaho lyehi misongo kana. Chipwe ngocho, Yesu evwililile keke vatu vaze vavijilenga, numba tuhu ikiye kanda avizengaho lyehi. Chakutalilaho chaYesu chatela kutukafwa nayetu nawa twivwilenga vakwetu keke.—Petu. 1, 3:8.
“YESU ASOTWELE MASOJI”
13. Hakusangula Lazalu, Yesu asolwele ngachilihi muchima atwama nawo?
13 Yesu evwilenga kumuchima kukola hakumonomu vatu vapwile nakuyanda. Yesu “alishishimwine nakulyonyinga chikuma” omu amwene vatu vali nakulila hakufwa chasepa lyenyi Lazalu. Chamukolele chikuma kumuchima numba tuhu ejivile ngwenyi kalinwomu asangule Lazalu. (Tangenu Yowano 11:33-36.) Yesu kevwile sonyi hakusolola omu apwile nakwivwako. Vatu vamwene ngwavo Yesu azangile chikuma Lazalu natanga yenyi. Yesu apwile nakeke yize yamulingishila azachise ngolo amuhanyine Kalunga mangana asangule sepa lyenyi.—Yowa. 11:43, 44.
14, 15. (a) Vyuma muka vyasolola nge Yehova afwila kukakumisa kuyanda chosena vali nakumona vatu? (b) Mwomwo ika lizu lyakwamba ngwavo “vimbumbe vyakwanukila” lyapwila lyalilemu?
14 Mbimbiliya yalumbununa Yesu kupwa “ikiye vene chifwanyisa chomu apwa Kalunga.” (Hepe. 1:3) Vyuma vyakukomwesa alingile Yesu vyasolola nge ikiye naIse vakwechi muchima wakufwila kufumisako kukola nakufwa. Muchima kanou wasolola nge navakasangula vatu vavavulu kulutwe kuhambakana mijimbu yakusangula vatu yize vasoneka muMbimbiliya. Yesu ambile ngwenyi, ‘Ola yili nakwiza omu vosena vaze vali muvimbumbe vyakwanukila, navakalovokamo.’—Yowa. 5:28, 29, kwinyikila chamwishi.
15 Chapwile chakutamo Yesu kuzachisa lizu “vimbumbe vyakwanukila,” mwomwo lizu kana lyalumbununa nge Kalunga eji kuvanukanga. Kalunga Wangolo Josena uze atengele melu namavu, nahase kwanuka vyuma vyosena kutalisa kuli vatu vaze twafwisa, kuhakilako vene navilinga vyavo vyosena. (Isa. 40:26) Kalunga keshi kwanuka kahako, oloze ikiye naMwanenyi vafwila kulinga vene ngocho. Kusanguka chaLazalu nachavatu veka vaze vasoneka muMbimbiliya chasolola vyuma navikalingiwa kulutwe mukaye kakahya kosena.
VYUMA MUKA NATULINANGULA KUVYAKUKOMWESA ALINGILE YESU?
16. Kutokwa muka navakapwa nacho vaka-Kulishitu vavavulu vamakumbi ano vaze navalama kulonga chavo?
16 Hakupwa tuvaka-Kulishitu, kachi nge natulama kulonga chetu, kaha natukamona chuma chakukomwesa chachinene chakukayovoka muluyando lwalunene. Hakuhita chajita yaAlamangetone, nakukapwa vyuma vyakukomwesa vyavivulu vize navikalingiwa mangana vatu vakapwe vakulikangula. (Isa. 33:24; 35:5, 6; Kuso. 21:4) Achishinganyekenu omu namukamona vatu navambila vivanjilo vyahameso, namikombo, navitwamo vyakushindumuna, navyuma vyeka vyangana. Ngocho, Yehova mwakakafwa vatu vaze navakayovoka kujita yaAlamangetone kupwa vakulikangula. Kaha vatu kana navakapwa namilimo yakuzata. Navakapwa natwima yakwalumuna mavu aze vatuhana kuli Kalunga kupwa wana wetu mangana akapwe palachise.—Samu 115:16.
17, 18. (a) Chuma muka chachinene chalingishile Yesu alinge vyuma vyakukomwesa? (b) Mwomwo ika mwatela kuzata nangolo mangana mukapwe mukaye kaKalunga kakahya?
17 Vyuma vyakukomwesa alingile Yesu vyakuka vatu vyakolezeza vatu ‘vamuliyongomena lyalinene’ vawahilile hakutachikiza ngwavo navakapwa vakulikangula. (Kuso. 7:9) Omu Yesu okile vatu asolwele nge akwechi muchima wakutetela vatu, nakusolola nge ou MwanaKalunga watwatwa azanga chikuma vatu. (Yowa. 10:11; 15:12, 13) Keke apwile nayo Yesu yasolola nge Yehova azakama vangamba jenyi vosena.—Yowa. 5:19.
18 Vatu vavavulu vali nakulyonyinga namisongo, kaha vali nakufwa. (Loma 8:22) Tuli nakusaka kaye kaKalunga kakahya, muze vatu navakapwa vakulikangula ngana muze ashika. Mukanda waMalaki 4:2 watulweza nge vaze navakahindula navakatumbwojoka “nge vana vavangombe vakununa.” Navakawahilila hakuvasokola muundungo wakuhona kukupuka mwosena. Kufwelela muvyuma vize atushika Kalunga chatela kutulingisa tumusakwilile nakuzata nangolo mangana tutengamo kukapwa mukaye kakahya. Ocho kuwaha kana vayaya hakutachikiza ngwetu vyuma vyakukomwesa alingile Yesu omu apwile hano hamavu vyatuhana lutalililo lwavyuma mwalingila vatu kalinwomu muchiyulo chenyi chauMeshiya!
