1. Mwomwo ika Paulu ahanjikilile ngwenyi “Kulishitu ikiye ngolo jaKalunga”?

YEHOVA asolwele ngolo jenyi kuhichila muli Yesu Kulishitu mujijila jajivulu jakukomwesa. Mumikanda yiwana yaMujimbu Wamwaza vasonekamo vyuma vimwe vyakukomwesa alingile Kulishitu vize vyeji kukolezezanga lufwelelo lwetu. Atela Yesu alingile navyuma vyeka vyakukomwesa vyavivulu. (Mateu 9:35; Luka 9:11) Eyo, Kalunga asolwele ngolo jenyi kuhichila muli Yesu. Echi chikiko chalingishile kaposetolo Paulu ambenga ngwenyi: “Kulishitu ikiye ngolo jaKalunga.” (Koli. 1, 1:24) Jino vyuma vyakukomwesa alingile Yesu vyakwata ngachilihi hakuyoya chetu?

2. Vyuma muka natulinangula kuvyuma vyakukomwesa alingile Yesu?

² Kaposetolo Petulu ambile ngwenyi Yesu alingilenga vyuma “vyakukomwesa.” (Vili. 2:22) Vyuma vyakukomwesa alingile Yesu omu apwile hano hamavu, hiunjiho wakusolola nge kulutwe muchiyulo chenyi mwakalinga vyuma vyavinene. Vyuma vize alingile vyemanyinako vyuma vyakukomwesa vize Yesu mwakalinga mukaye kosena mulifuchi lyaKalunga lyalihya. Kaha nawa vyuma vyakukomwesa alingile Yesu vyatukafwa tutachikize kanawa vilinga vyenyi navilinga vyaIse. Tuchikekesenu jino vyakukomwesa vimwe  alingile Yesu nakumona omu vyakwata hakuyoya chetu oholyapwa nakulutwe.

3. (a) Vulukenu vyuma vyalingishile Yesu alinge chuma chatete chakukomwesa. (b) Yesu asolwele ngachilihi muchima wazumbu kuKana?

³ Yesu alingile chuma chatete chakukomwesa kuchifupawenga chakuKana muNgalileya. Chasoloka nge vatu vaze vejile kuchifupawenga vavulile chikuma kuhambakana vaze vasanyikile. Chamokomoko namweshomwo chapwile, oloze vinyo vyakumine. Hali vaze vasanyikile, hapwile naMaliya naye yaYesu. Hamyaka yayivulu, Maliya ashinganyekelenga hajishiko josena jaupolofweto vashikile kutalisa kuli mwanenyi, kaha atachikijile nawa ngwenyi navakamuvuluka ngwavo, “Mwana wayou Wakulitulaho Chikuma.” (Luka 1:30-32; 2:52) Uno atachikijile ngwenyi ou mwanenyi apwile nangolo jize kanda achimoneho lyehi tahi? KuKana vaMaliya naYesu vevwilile vasamwenga nanyamwenga keke nakusaka kuvanda sonyi. Yesu atachikijile ngwenyi kupwa namuchima wazumbu chapwa chachilemu chikuma. Ngocho, alumwine meya mujila yakukomwesa akuheta kujilita 380 kupwa “vinyo vyamwenemwene.” (Tangenu Yowano 2:3, 6-11.) Uno wapwile mulimo waYesu kulinga chuma kanechi chakukomwesa tahi? Nduma. Azakamine vatu nakusaka kulondezeza Ise wamwilu uze atwama nazumbu.

4, 5. (a) Chuma chatete chakukomwesa alingile Yesu chatunangula vyuma muka? (b) Uno chuma chakukomwesa alingile Yesu kuKana chasolola vyuma muka kutalisa kulifuchi lyalihya?

⁴ Yesu ahanyine vatu vinyo vyamwenemwene vyakutamo mujila yakukomwesa. Uno echi chuma chakukomwesa alingile chatunangula vyuma muka? Kulisuula chaYesu hakuhana vatu vinyo mujila yakukomwesa chatufwelelesa nge Yesu naIse vazakama chikuma vatu. Chikupu vene, kavatwama nauminyiko. Achishinganyekenu omu Yehova mwakazachisa ngolo jenyi mulifuchi lyalihya hakuhana “vatu veka naveka” vosena kulya chamwaza.—Tangenu Isaya 25:6.

⁵ Achishinganyekenu omu vatu vosena navakavahana vyuma vafwila vyakufwana nge kulya chamwaza najizuvo jamwaza. Shikaho, tuwahililenu hakutalilila vyuma vyamwaza vize mwakatuwahishila Yehova muPalachise hano hamavu.

6. Yesu azachishile ngolo jenyi hakukafwa veya, kaha natumulondezeza ngachilihi?

⁶ Halwola Liyavolo esekele Yesu alumune malolwa kupwa mbolo, Kulishitu akanyine kuzachisa ngolo jenyi mangana alisuulwise ivene. (Mateu 4:2-4) Oloze Yesu azachishile ngolo jenyi hakukafwa vatu nakuvahana vyuma vyasakiwile. Natulondezeza ngachilihi muchima waYesu wakuzakama vatu? Akolezezele vatu jaKalunga vapwenga “vaka-kuhana.” (Luka 6:38) Kutala tunahase kusanyika vatu kujizuvo jetu nakuvasolwela muchima wazumbu nakuvahana vyakulya nakulikolezeza kushipilitu nyi? Kutala tunahase kusolola chisambo hakukumisa kukunguluka mangana tukafwe vakwetu vanakalikiza, chipwe pamo kwivwilila kuli ndumbwetu uze ali nakuhituluka muchihande chenyi tahi? Vyuma muka tunahase kuhana kuli vaze vali nakusaka  kuvakafwa mumulimo wamuwande? Hakusaka tulondezeze muchima waYesu wazumbu, twatela kulisuula kukafwa vakwetu vyuma vyakumujimba nakushipilitu.

7. Vyuma muka navipwangako lika mukatwamino kamyaka yino?

⁷ Kuhutwa keshi nge chaleloko. Yehova alwezele vaIsalele nge mulifuchi namukapwanga lika vaka-kuhutwa. (Lushi. 15:11) Omu mwahichile myaka yayivulu, naYesu nawa ahanjikile ngwenyi: “Enu namupwanga navaka-kuhutwa shimbu yosena.” (Mateu 26:11) Uno Yesu alumbunwine nge hamavu nahakapwanga lika vaka-kuhutwa tahi? Nduma, alumbunwine nge vaka-kuhutwa navapwanga lika hamavu chikalu kaha nge katwamino kamyaka yino kukachili lika. Ocho kuwaha kana tuli nakwivwa hakutachikiza ngwetu vyuma vyakukomwesa alingile Yesu vyasolola vyuma vyamwaza vyakulutwe vize navakatulingila muchiyulo chaWangana wenyi, muze vatu vosena navakalya nakwikuta.

8, 9. (a) Vyuma muka vyalingishile Yesu alise liyongomena lyavatu mujila yakukomwesa? (b) Vyuma muka vinamivwisa kuwaha hakumona omu Yesu alishile liyongomena lyavatu?

⁸ Muka-kwimba jisamu ahanjikile hali Yehova ngwenyi: “Weji kukamununanga mulivoko lyove nakwikuchisa vyuma vyakuyoya vyosena.” (Samu 145:16) ‘Kulishitu uze apwa ngolo jaKalunga’ alondezezele Ise hakuhana vaka-kumukavangiza vyuma vafwila nakuvekuchisa. Kalingile ngocho hakusolola kaha ngolo jenyiko. Oloze apwile namuchima wakuzakama vakwavo. Tuchishimutwilenu mukanda waMateu 14:14-21. (Tangenu.) Tumbaji twaYesu vejile kuli ikiye mangana vashimutwile hachihande chavyakulya. Kavayile mwomwo yazalako, oloze vashinganyekele chikuma hali vatu vaze vapwile chikuma nazala, vaze nawa vatambukile hamavu nakukavangiza Yesu kufuma kujinganda javo. (Mateu 14:13) Uno Yesu alingile ngachilihi?

⁹ Yesu alishile malunga 5,000 najimbolo jitanu navaishi vavali, kaha alishile namapwevo navanyike. Uno katweshi kwivwa kuwahako hakushinganyeka omu Yesu azachishile ngolo jenyi mujila yakukomwesa nakuzakama jitanga, kuhakilako navanyike vavandende nyi? Liyongomena ‘lyalile nakwikuta.’ Chuma kana chasolola nge avahanyine vyakulya vyavivulu. Kulya avahanyine Yesu chavakafwile nakuvahana ngolo mangana vatambuke nakuheta kumembo avo kuze vafumine. (Luka 9:10-17) Kaha vyakulya vize vyasalileho vavikungulwile nakuzalisa mitonga 12.

10. Vyuma muka navyalumuka kalinwaha kuli vaka-kuhutwa?

¹⁰ Makumbi ano, vatu vavavulu kaveshi navyakulyako mwomwo vatu vaze vali nakuvayula vali namichima yalifwi. Navandumbwetu vamwe vaze vali navyuma vimwe vyakulikafwa navyo, kaveshi kupwa navyavivulu ‘vyakuvasuulwisako.’ Chipwe ngocho, kalinwomu vatu vakwononoka valivwise kuwaha kutwama mulifuchi lyalihya lyakuzeneka katombo nauhutu. Kachi nge mwapwanga nangolo, kutala kamweshi kuhasa kusuulwisa vatu vosenako tahi? Kalunga Wangolo Josena kalinwomu alinge chuma kana mwomwo akwechi ngolo namuchima wakufwila kulinga ngocho. Chikupu vene, vyuma vyosena kalinwomu vilingiwe.—Tangenu Samu 72:16.

11. Mwomwo ika munafwelela ngwenu kalinwomu Kulishitu azachise ngolo jenyi nakunganyalisa vatu mukaye kosena, kahechi nachimilingisa mulinge ika?

¹¹ Omu Yesu apwile hano hamavu, azachile mulimo wakwambulula mujingalila jimwe hamyaka yitatu nachimbwa. (Mateu 15:24) Hakupwa Mwangana vatohwesa, ngalila yenyi nayikatohwa jino kuheta kumavu kwosena. (Samu 72:8) Vyuma vyakukomwesa alingile Yesu vyatukafwa tufwelele ngwetu kalinwomu azachise ngolo jenyi mujila yize nayikatunganyalisa. Numba tuhu katweshi kuhasa kulinga vyuma vyakukomwesako, oloze tukwechi twima yakukafwa vatu vamone Mazu aKalunga vahwima kupwa amalemu. Upolofweto wamuMbimbiliya  watufwelelesa vyuma vyamwaza vyakulutwe. Etu hakupwa tuVinjiho jaYehova vaze valihana nakutachikiza vyuma vyakulutwe, twatachikiza ngwetu tukwechi mulimo wakunangula vatu. (Loma 1:14, 15) Kushinganyeka hachuma kanechi chatela kutulingisa twambulwile vakwetu mujimbu wamwaza waWangana waKalunga.—Samu 45:1; 49:3.

12. Mwomwo ika tunafwelela ngwetu Yesu atachikiza kanawa mwakuzachishila vyuma vyakutenga hano hamavu?

¹² Omu Kalunga atengele mavu navyuma vyatwamaho, apwile hamwe naMwanenyi wakulipwila uze apwa “kuluwa muka-kuzata.” (Vishi. 8:22, 30, 31; Kolo. 1:15-17) Ngocho, Yesu atachikiza kanawa vyuma vyakutenga vyosena vyatwama hano hamavu. Atachikiza mwakuzachishila kanawa vyuma vyahano hamavu.

13, 14. Hanenu chakutalilaho chakusolola nge Kulishitu atwama nangolo havyuma vyakutenga.

¹³ Omu Yesu apwile hano hamavu, asolwele nge apwile ikiye “ngolo jaKalunga” hakupwa nangolo havyuma vyakutenga. Achishinganyekenu omu Yesu aunjishile peho yanyamanganda yize yahakile kuyoya chatumbaji twenyi muponde. (Tangenu Mako 4:37-39.) Mutu umwe uze alinangula chikuma vyaMbimbiliya ambile ngwenyi: “Lizu lyachiHelase [vavuluka ngwavo “nyamanganda” hali Mako 4:37] lyalumbununa peho yachijimbilanganga chipwe vula yamishilinjinji. Lizu kana kalyalumbununa kaha peho yayineneko . . . Oloze peho yachijimbilanganga yize yili nakwiza namiveso yautenu hamwe kaha navula nakakundukundu wamunene.” Mukanda waMateu wavuluka peho kana ngwayo “nyamanganda wamunene.”—Mateu 8:24.

¹⁴ Achishinganyekenu havyuma vyasolokele. Kulishitu azeyele chikuma omu afumine mumulimo wamuwande. Makimba alivetelenga kuwato, kaha meya nawa engililenga muwato. Chamokomoko navyema vyapeho yanyamanganda namakimba aze alivetelenga kuwato, Yesu asavalile lika, mangana ahwimeko. Oloze tumbaji twenyi vevwile woma, kaha vamuhindwile nakwamba ngwavo: “Natunonga!” (Mateu 8:25) Omu Yesu ahindukile, ambile kupeho nakukalungalwiji ngwenyi: “Unda! Hola kulu!” Kaha yize peho yatulile. (Mako 4:39) Chikupu vene, Yesu ahanjikilile peho nakalungalwiji, kaha vyaholele kulu. Vyuma muka vyasolokele? “Kwaunjile” keke. Eyo, ngolo apwilenga najo Yesu japwile jakukangana.

15. Kalunga Wangolo Josena asolola ngachilihi nge akwechi ngolo havyuma vyakutenga?

¹⁵ Yehova ikiye apwa Kaselwoke kangolo jaKulishitu, ngocho twafwelela ngwetu Kalunga Wangolo Josena atwama nangolo havyuma vyakutenga vyosena. Achitalenu havyakutalilaho vimwe vino. Shimbu kanda Livaji lizenga, Yehova ambile ngwenyi: “Kunasale kaha makumbi 7, nangunokesa vula hamavu makumbi 40 namusana naufuku.” (Kupu. 7:4) Kaha nawa hali Kulovoka 14:21 ngwavo: “Yehova ahuhwishile peho yangolo yakumututuko ufuku wosena.” Hali Yona 1:4 tweji kutangangaho ngwavo: “Yehova ahuhwishile peho yayinene hakalungalwiji, kaha hakatukile nyamanganda wamunene, ngocho wato wasakile kupazuka namakimba.” Cheji kutukolezezanga hakwijiva nge Yehova atwama nangolo havyuma kana. Chamuchano vene, mavu nawakapwanga mumavoko amuka-kwoloka.

16. Uno kutachikiza ngwetu Tengi yetu naMwanenyi watwatwa vakwechi ngolo havyuma vyakutenga cheji kutuvendejekanga ngachilihi?

¹⁶ Kushinganyeka hangolo jakukomwesa atwama najo Tengi yetu ‘nakuluwa yenyi muka-kuzata’ cheji kutuvendejekanga. Mumyaka likombakaji vatu navakapwa vakukingiwa mwomwo Kalunga naMwanenyi navakavazakamanga chikuma. Kakweshi kukapwa woma wavyuma vyakutenga hano hamavuko. Mulifuchi lyalihya, vatu kaveshi kukevwa cheka woma wamindenda, napeho yanyamanganda navyuma vyeka vyakuneha  pondeko. Ocho kuwaha kana tweji kwivwanga hakushinganyeka halwola luze vyuma kana kavyeshi kukajiha chipwe kulemeka vatuko, mwomwo “mbalaka yaKalunga [nayikapwa] navatu hamwe.” (Kuso. 21:3, 4) Tunahase kufwelela ngwetu ngolo jaKalunga jize asolwele kuhichila muli Kulishitu mwakajizachisa havyuma vyakutenga haMyaka Likombakaji.

17. Mujila muka tuli nakulondezeza Kalunga naKulishitu makumbi ano?

¹⁷ Numba tuhu katweshi nangolo jakuhonesa ukalu wakulijila ngana mwaYehova naYesuko, oloze nayetu tukwechi jingolo jajindende. Uno ngolo kana tweji kujizachisanga ngachilihi? Jila yimwe shina kukavangiza mazu atwama hali Vishimo 3:27. (Tangenu.) Nge vandumbwetu vali nakumona ukalu, kaha twatela kuvavendejeka nakuvakafwa kuvyuma vyakumujimba nakushipilitu. (Vishi. 17:17) Chakutalilaho, kachi nge ukalu unavawane, tunahase kuvakafwa kuvyuma vyakumujimba nakushipilitu. Talenu mazu akusakwilila ahanjikile tuliwe umwe omu peho yanyamanganda yapuzwile zuvo yenyi. Ambile ngwenyi: “Ngwasakwilila chikuma Yehova hakupwa muliuka lyenyi lize linangukafwe kuvyuma vyakumujimba nakushipilitu.” Ndumbwetu umwe wapwevo wamujike ahombele chikuma nakuzeya mwomwo zuvo yenyi yalyenyekele napeho yanyamanganda. Kahomu vamukafwile, ambile ngwenyi: “Chachikalu kulumbununa kuwaha nguli nakwivwa . . . Ove Yehova, ngunakusakwilila chikuma.” Chikupu vene, twawahilila chikuma hakupwa muliuka lyawanawakwetu lize lyeji kutuzakamanga nge tuli muukalu. Tweji kuwahililanga mwomwo Yehova naYesu Kulishitu veji kutuzakamanga.

18. Vyuma muka vyalingishile Yesu alinge vyuma vyakukomwesa?

¹⁸ Omu Yesu azachilenga mulimo wenyi wakwambulula, asolwele nge ikiye “ngolo jaKalunga.” Uno vyuma muka vyamulingishile azate natwima? Kazachishile ngolo jenyi mangana evwise vatu kumichima kuwaha chipwe alinganyalise iveneko. Eyo, vyuma vyakukomwesa alingile Yesu vyasolola nge azanga chikuma vatu. Muchihande chinakavangizaho natushimutwila hachuma kana.