1, 2. (a) Vihela muka vazachishilenga vangamba jaYehova kushikulu hakumulemesa? (b) Uno Yesu evwile ngachilihi hatembele yaKalunga yize yapwilenga muYelusalema? (c) Vyuma muka natulinangula muchihande chino?

PUTU vene kushikulu, vangamba jaKalunga vanapunga lika navihela vyavo vyakulemesela Kalunga. Chakutalilaho, pamo Avele azachishilenga lijiko lyakulumbila hakuhana mawana kuli Kalunga. (Kupu. 4:3, 4) Nowa, naApalahama, naIsaka, naYakova, naMose, vosena vatungile majiko akulumbila. (Kupu. 8:20; 12:7; 26:25; 35:1; Kulo. 17:15) Yehova alwezele vaIsalele vatunge tavanaku. (Kulo. 25:8) Kufumaho, vatungile nawa tembele yakulemesela Yehova. (Vamya. 1, 8:27, 29) Omu vaYuleya vafumine muundungo muMbavilone, valikungulwililenga mujisunangonga. (Mako 6:2; Yowa. 18:20; Vili. 15:21) Vaka-Kulishitu vakulivanga valikungulwililenga mujizuvo javandumbwavo. (Vili. 12:12; Koli. 1, 16:19) Makumbi ano, vatu jaYehova mukaye kosena veji kulikungulwilanga mujiZuvo jaWangana mangana valinangule nakulemesa Kalunga.

² Yesu azangile chikuma tembele yaYehova yize yapwile muYelusalema nakuyivwila kuwaha, kahechi chalingishile mutu umwe muka-kusoneka Mikanda yaMujimbu Wamwaza ahanjike mazu amuupolofweto akwamba ngwavo: “Twima nguli nayo hazuvo yove yinanguli.” (Samu 69:9; Yowa. 2:17) Kakweshi Zuvo yaWangana nayihasa kutamo  kanawa kuyivuluka ngwavo “zuvo yaYehova” ngana muze vavulukilenga tembele yamuYelusalemako. (Miji. 2, 5:13; 33:4) Chipwe ngocho, Mbimbiliya yatwama najindongi jize jeji kutukafwanga mwakuzachishila vihela vyakulemesela Kalunga makumbi ano nakuvimona kupwa vyavilemu chikuma. Ngocho, muchihande chino natushimutwila jindongi kaneji, nomu najitukafwa tumone mwakulamina kanawa jiZuvo jaWangana, novyo twatela kumwena jizuvo kana kupwa jajilemu, nomu tunahase kuhana wana wakuwahishisa jizuvo kaneji. *

3-5. Uno jiZuvo jaWangana tweji kujizachisanga mulimo muka, kahechi chinahase kutulingisa tumone ngachilihi kukunguluka chetu?

³ Zuvo yaWangana yapwa hichihela veji kuliwanyinanga vandumbwetu muvitungilo mangana valemese Kalunga. Yehova eji kutuwahishilanga kulya chachivulu chakushipilitu, kuhakilako vene nakukunguluka chize tweji kupwanga nacho chalumingo hichalumingo kuZuvo yaWangana. Kukukunguluka kana kukiko tweji kutambwilanga kulya chakushipilitu chize eji kutuwahishilanga Kalunga kuhichila muliuka lyenyi. Etu tuvosena tweji kwizanga kukukunguluka veji kutusanyikanga kuli Yehova naMwanenyi. Numba tuhu veji kutusanyikanga twizenga nakulya “kumesa yaYehova,” oloze katwatela kumona kutusanyika kana kupwa chamokomokoko.—Koli. 1, 10:21.

⁴ Yehova amona lwola tweji kumulemesanga nakulikolezeza navakwetu kupwa lwalulemu, ngocho ahwiminyinyine kaposetolo Paulu atuhuhumune tuhone kusuvilila kukunguluka chetu. (Tangenu WavaHepeleu 10:24, 25.) Kutala natuvumbika Yehova nge natuhona kupwa kukukunguluka chavaka-Kulishitu mwomwo yavyuma vize kavyapwa vyavilemu chikumako tahi? Natusolola kusakwilila kuli Yehova havyuma eji kutulingilanga nge natuliwahisanga mangana tukakumbulule kanawa omu natukakunguluka.—Samu 22:22.

⁵ Twatela kulama kanawa jiZuvo jetu jaWangana nakumona kukunguluka kupwa chachilemu mangana tusolole kavumbi kuli Kalunga. Chikupu vene michima yetu yeji kusololanga omu tweji kwivwanga halijina lyaKalunga, lize lyeji kusolokanga hachinjikizo chajiZuvo jaWangana.—Esekesenuko Vamyangana 1, 8:17.

6. Vyuma muka vahanjikile vatu vamwe kutalisa kujiZuvo jetu jaWangana nakuvatu vaze vejile kukukunguluka? (Talenu muvwimbimbi wakulivanga.)

⁶ Kakavulu vatu vaze kavapwa Vinjihoko vatachikiza chikupu ngwavo twamona vihela vyetu vyakulemesela Kalunga kupwa vyavilemu. Chakutalilaho, lunga umwe mulifuchi lyaTurkey ambile ngwenyi: “Omu ngwayile kuZuvo yaWangana, ngwevwile kuwaha hakumona vanayitomesa kanawa, kaha nawa yapwile yaunyoji. Ngwawanyine vatu vanavwale kanawa, vakuwahilila, kaha vangumenekele nachisambo. Vyuma vyosenevi ngwamwene vyangusuulwishile.” Uze lunga aputukile kukukungulukanga lwola lwosena, kutwala muze vamumbapachishile. Mulifuchi lyaIndonesia, chikungulwilo chimwe chalanyine vilolo vamufulumende navatu vaze vatunga navo vezenga vamone Zuvo yaWangana yayihya shimbu kanda vayikunjike. Kaha chilolo umwe wafulumende ejile. Evwile kuwaha hakumona mujila vayitungililemo, namujila vapwile nakuyizachishilamo, namilemba yayo yamwaza. Ngocho ambile ngwenyi: “Unyoji wazuvo kaneyi wasolola lufwelelo lwenu lwamuchano.”

7, 8. Vyuma muka vyavilemu vatela kutachikiza vaze veji kwizanga kukukunguluka chavaka-Kulishitu?

⁷ Mujila tweji kulilengelangamo, navwaliso yetu, nasolokeso yetu vyatela kuneha kavumbi kuli Kalunga uze eji kutusanyikanga kukukunguluka chavaka-Kulishitu. Ngocho echi nachitukafwa tuhone kulinga vyuma kanevi nakuhambakanyisaho.  Chinasoloka nge vatu vamwe veji kulilenga nakuhambakanyisaho nge vali nakwiza kuZuvo yaWangana nakukunguluka, kaha veka nawa kaveshi kulilenga kanawako. Yehova asaka vangamba jenyi navatu veka vaze naveza kukukunguluka vapwenga vakukasunuka. Kaha nawa vaze vanatwame mulizavu katwatela kuvatangula mwomwo yakuvwala mwamupi, nakulitumina mijimbu hajishinga, nakuhanjejeka, nakulya, chipwe kunwa halwola lwakukungulukako. Visemi vatela kunangula vana vavo vatachikize ngwavo haZuvo yaWangana kahapwa hachihela chakulihangasanyina chipwe chakuhemenako.—Kwambu. 3:1.

⁸ Omu Yesu ayile mutembele yaKalunga, apihililile hakumona vatu vali nakusekasanyinamo, kaha avahangilemo. (Yowa. 2:13-17) JiZuvo jetu jaWangana japwa vihela vyakulemesela Kalunga nakulinangula vyuma vyakushipilitu. Shikaho, haZuvo yaWangana katwatela kulingilaho vyuma vize kavyapwa vyakushipilituko.—Esekesenuko Nehemiya 13:7, 8.

9, 10. (a) Uno jiZuvo jaWangana vanahasenga ngachilihi kujitunga, kaha vyuma muka vinafumuho? (b) Vyuma muka vinakafwe vandumbwetu vaze kavapwile najimbongo jakuhasa kulitungila vavene jiZuvo jaWanganako?

⁹ Liuka lyaYehova lyeji kuzatanga nangolo chikuma mangana jihane jimbongo jakutunga jiZuvo jaWangana jamwaza. Mulimo wakufunjejeka jiZuvo jaWangana nakujitunga veji kuuzatanga kuli vandumbwetu vakulisuula vaze kavafwetako. Kaha vyuma muka vinafumuho? Kuputuka haNovember 1, 1999, vanatungu jiZuvo jaWangana jamwaza jakuhambakana ku 28,000 mukaye kosena. Echi chili nakulumbununa nge mumyaka 15 yinahichimo, vanatungu jiZuvo jaWangana jitanu hakumbi hakumbi.

¹⁰ Oholyapwa vali nakulongesa vyuma mangana vatunge jiZuvo jaWangana kuvihela kuze jili nakusakiwa. Tweji kukavangizanga jindongi jamuVisoneka jize jasolola nge vaze vali navyavivulu vatela kukafwa vaze vanakalikiza ‘mangana vosena vateseke hamwe.’ (Tangenu Wavaka-Kolinde 2, 8:13-15.) Ngocho vanatungu jiZuvo jaWangana jamwaza kujingalila jize vandumbwetu kaveshi kuhasa kuwana jimbongo jakulitungila vavene jiZuvo jaWanganako.

11. Vyuma muka veji kuhanjikanga vandumbwetu vamwe kutalisa kuZuvo yavo yaWangana yayihya, kaha mweji kwivwanga ngachilihi?

¹¹ Chikungulwilo chimwe mulifuchi lyaCosta Rica chize changanyalile kukulongesa kanechi chasonekele ngwacho: “Omu vatutungilile Zuvo yaWangana yayihya, twamwene nge hikulota kaha! Twalikomokelele chikuma hakumona Zuvo yaWangana vanayitungu nakuyikumisa yosena mumakumbi 8. Mulimo kanou wateselemo hakuukisula kuli Yehova, navyuma lyalongesele liuka lyenyi, nakuukundwiza kuli vandumbwetu. Chikupu vene, echi chihela chakulemesela Kalunga chapwa wana wamwaza uze atuhana Yehova. Tweji kuwahililanga chikuma hachuma kanechi.” Uno kamweshi kwivwa kuwaha hakwivwa mazu vanahanjika vandumbwetu hakuvatungila jiZuvo  jaWangana jajihya nakutachikiza ngwenu navandumbwetu vamukaye kosena vanevunga mwomumweko tahi? Chikupu vene, ou wapwa himulimo waYehova, mwomwo nge Zuvo yaWangana vanakumisa kuyitunga, hahaze vene yeji kuzalanga navatu vamichima yamwaza vaze vafwila kutachikiza vyavivulu hali Tengi yetu wazangi.—Samu 127:1.

12. Munahase kukundwiza ngachilihi mulimo wakutunga jiZuvo jaWangana?

¹² Vandumbwetu vavavulu vanevunga kuwaha chikuma kwazana mumulimo wakutunga jiZuvo jaWangana. Numba tuhu tuli nakwazana mumulimo kanou chipwe chiku, tuvosena twatela kuhana mawana akukundwiza ou mulimo wakutunga. Kushikulu, vatu vapwilenga natwima yakukundwiza kulemesa chamuchano hakuhana mawana kumulimo wakutunga nganomu tuli nakulinga makumbi ano, mwomwo chuma kana cheji kutohwesanga Yehova.—Kulo. 25:2; Koli. 2, 9:7.

13, 14. Vyuma muka vyamuVisoneka vize twatela kukavangiza hakulama jiZuvo jetu jaWangana kupwa jitoma, kaha nawa jaunyoji?

¹³ Nge vanatutungila Zuvo yaWangana, kaha twatela kuyilama yipwenga yitoma, yaunyoji, mangana yisolole vilinga vyamwaza vyaKalunga uze tweji kulemesanga, uze eji kulinganga vyuma mukulonga. (Tangenu Wavaka-Kolinde 1, 14:33, 40.) MuMbimbiliya, lizu kujila valyesekesa kukutoma chakushipilitu nakumujimba. (Kuso. 19:8) Shikaho, vatu vaze navasaka kuvetavila kuli Yehova vatela kupwa vaunyoji.

¹⁴ Ngocho, twatela kwivwa kuwaha kusanyikanga vatu vezenga vakunguluke nayetu hamwe mwomwo omu naveza navamona nge mujimbu tweji kuvambulwilanga walitombola nomu yili nakusoloka Zuvo yetu yaWangana. Kaha navatachikiza ngwavo tweji kulemesanga  Kalunga wajila uze mwalumuna kaye kalinwomu kupwa palachise.—Isa. 6:1-3; Kuso. 11:18.

15, 16. (a) Mwomwo ika chinahase kupwa chachikalu kulama Zuvo yaWangana kupwa yaunyoji, oloze mwomwo ika chapwila chachilema kulinga ngocho? (b) Vyuma muka vanalongesa vakulwane kutalisa kukutomesa Zuvo yaWangana, kaha vatu vosena muchikungulwilo vatela kulinga ika?

¹⁵ Vandumbwetu vamwe vanahase kumona mulimo wakutomesa Zuvo yaWangana kupwa waulemu kuhambakana omu veji kuumonanga vakwavo. Veka veji kutomesanga Zuvo yaWangana mwomwo yajila vavalelelelemo chipwe mwomwo yakutwama kuvihela vyalukungu naulova, chipwe kutwama kuchihela kuze kwatwama mikwakwa yayipi, chipwe mwomwo yakukeha chameya navyuma vyakuzachisa. Kala mweshomwo vili vyuma, jiZuvo jetu jaWangana jatela kuhana chakutalilaho chamwaza hakujilama kupwa jaunyoji mwomwo jeji kuhananga unjiho halijina lyaYehova, kaha nawa japwa hichihela chakulemesela Kalunga.—Lushi. 23:14.

¹⁶ Katwatela kuzelendenda kumulimo wakutomesa jiZuvo jetu jaWanganako. Lizavu lyavakulwane lyatela kunoneka kanawa jila yakutomeselamo Zuvo yaWangana nakulongesa kanawa vyuma vyakuzachisa mangana chihela chakulemesela Kalunga chipwenga chitoma. Vakulwane vatela kulongesa kanawa vyuma nakuzeneka kusuvilila Zuvo yaWangana, mwomwo milimo yimwe yasakiwa kuyizata hakukumisa kukunguluka, kaha yikwavo yasakiwa kukayizata lwola lweka. Vatu vosena muchikungulwilo vatela kwazana mumulimo kanou wakutomesa chihela chakulemesela Kalunga.

17, 18. (a) Vyakutalilaho muka vyamuVisoneka vize vyatukafwa kuwahisa vihela vyetu vyakulemesela Kalunga? (b) Mwomwo ika twatela kulamina jiZuvo jetu jaWangana jipwenga lika jaunyoji?

¹⁷ Vangamba jaYehova vosena veji kuzatanga nangolo mangana vawahisenga vihela vyakulemesela Kalunga visoloke lika kanawa. Mwangana wavaYuta Yehowashe alwezele vapilishitu vazachise wana uze vanehelenga vatu kuzuvo yaYehova ‘kumilimo yakuwahisa heshoho halyenyekele kuzuvo’ kana. (Vamya. 2, 12:4, 5) Omu mwahichile myaka 200, Mwangana Yoshiya nayikiye azachishile wana vanehele vatu kutembele hakuwahisa haze halyenyekele.—Tangenu Mijimbu 2, 34:9-11.

¹⁸ Jiofesi jamitango jimwe jinatumunga mijimbu nge vatu vavavulu kavahaka mangana kukuwahisa jiZuvo jaWangana chipwe kuvyuma vyakuzachisako. Pamo vatu vavandende kaha mumafuchi kana vakiko vatachikiza mwakuzachila milimo kana, chipwe pamo kavatwama najimbongo jakutamo jakuzachisa kumilimo kaneyiko. Nge Zuvo yaWangana navayisuvilila nakuhona kuyiwahisa, kaha nayilyenyeka chindende chindende, ngocho kayeshi kuhasa kuhana unjiho wamwaza kuvatu muchitungiloko. Kachi nge vatu vosena muchikungulwilo navahaka mangana kukuwahisa Zuvo yaWangana mangana yisoloke lika kanawa, kaha chuma kana nachilingisa vatu valise Yehova nakusolola nge tuli nakuzachisa kanawa jimbongo vali nakuhananga vandumbwetu.

19. Vyuma muka munafwila kulinga kutalisa kujizuvo jakulemesela Kalunga?

¹⁹ Zuvo yaWangana yapwa zuvo yize vatuhana kuli Yehova. Ngocho katweshi kuhasa kuvuluka zuvo kana ngwetu yapwa yamutu chipwe yachikungulwiloko. Jindongi javaka-Kulishitu jasolola hatoma nge twatela kulinunga hamwe nakumona nge Zuvo yaWangana tuli nakuyilama kweseka namulimo vayitungilile wakulemesa Kalunga. Shikaho, tuvosena twatela kuzachila hamwe mangana tuvumbike vihela vyetu vyakulemesela Kalunga. Twatela kulinga ngocho hakuhananga mawana kuzuvo yayihya vanakutunga, nakulisuula kuzachisa lwola lwetu nangolo jetu mangana tuwahise jiZuvo jetu jaWangana jipwenga lika jaunyoji. Nge natulinga ngocho, kaha natusolola nge tukwechi twima yakukundwiza chihela chakulemesela Yehova, ngana muze alingile Yesu.—Yowa. 2:17.