1, 2. (a) Mwomwo ika chapwila chachilemu vaka-Kulishitu kupwa vakushishika kuli Kalunga, kahechi chapandama ngachilihi kukuhona kwazana muvihande vyalifuchi? (Talenu muvwimbimbi wakulivanga.) (b) Uno vatu vavavulu vazanga chikuma vyuma muka, kaha vyuma muka vinahase kufumamo?

KUPWA lika vakushishika nakuhona kwazana muvihande vyalifuchi nachiyulo cheji kunehanga ukalu kuli vaka-Kulishitu, keshi nge mulwola lwajita kahako. Mwomwo ika? Mwomwo vosena vaze valihana kuli Yehova vamushika kumuzanganga, nakupwa vakushishika kuli ikiye nakumwononoka. (Yowa. 1, 5:3) Twatela kufwila kwononoka jishimbi jaKalunga jakwoloka, chamokomoko nakuchihela twatwama, nachiyoyelo chetu, nalifuchi twasemukila nachisemwa chetu. Kupwa vakushishika kuli Yehova naWangana wenyi chapwa chachilemu chikuma kuhambakana vyuma vyosena. (Mateu 6:33) Kushishika kana chatela kulingisa vaka-Kulishitu vahone kwazana muvikokojola vyosena namuvihande vyakaye.—Isa. 2:4; tangenu Yowano 17:11, 15, 16.

² Vatu vaze kavafwelela vyuma twafwelelako vanahase kuzanga chikuma lifuchi lyavo, namuyachi wavo, nachisemwa chavo navyuma vyeka vyakuhemahema vyamulifuchi lyavo. Chaluvinda, vyuma kanevi vinalingisa vatu kupwa namichima yakulipecha, nachijindo, kaha  lwola lumwe vatu vanalijihinga. Ngocho jila veji kukumishilangamo vatu ukalu kanou yinahase kuneha ukalu kuli etu nakuli vausoko wetu mwomwo twatwama muchitungilo chimwe navakiko. Hakuwana nge Kalunga atutenga namuchima wakusakula kulinga vyuma vyakwoloka, vyuma veji kulikasanga vaka-fulumende vinahase kutwivwisa kumuchima kupihya nakutuhonesa kulinga vyuma vyakwoloka. (Kupu. 1:27; Lushi. 32:4) Uno nge vyuma kana vinasoloka tweji kulinganga ngachilihi? Chapwa chachashi kundupukila muvihande vyalifuchi nakwazana jino muvikokojola.

3, 4. (a) Mwomwo ika vaka-Kulishitu kaveshi kwazana muvikokojola vyamukaye kanoko? (b) Natushimutwila vyuma muka muchihande chino?

³ Jifulumende jimwe jinahase kukanjikiza vatu mangana vazane muvikokojola vyalifuchi. Oloze vaka-Kulishitu vamuchano kaveshi kwazanamoko. Etu vangamba jaKalunga katwazana muvikokojola vyalifuchi, chipwe kulwa jijitako. (Mateu 26:52) Kavahasa kutuhungumwisa mangana tumone lifuchi limwe mukaye kaSatana kupwa lyalilemu kuhambakana likwavoko. (Koli. 2, 2:11) Etu katwasaka kwazana muvihande vyalifuchi nachiyuloko mwomwo katwapwa vamuli vaka-kayeko.—Tangenu Yowano 15:18, 19.

⁴ Oloze mwomwo yakuhona kukupuka mwosena, etu vamwe tunahase kupwa naukalu wakuhonesa muchima waupi uze twapwile nawo hakavanga. (Yele. 17:9; Efwe. 4:22-24) Ngocho muchihande chino natushimutwila vyuma vinahase kutukafwa tuhonese vilinga kana. Natukekesa nawa mwakunangwila michima yetu navivezu vyetu vipwenga lika vyakushishika kuWangana waKalunga.

5, 6. Vyuma muka alingile Yesu omu amwene chihandwa chapwile mungalila yize atwaminenga, kaha mwomwo ika?

⁵ Kachi nge namuhuhwasana nakuzeneka kutachikiza mwakulingila nge muli muukalu umwe, kaha lihulisenu enu vavene ngwenu, ‘Yesu kachi nalingi ngachilihi hachuma kanechi?’ Mulifuchi muze apwile Yesu mwapwile vatu vakufuma kujingalila jakulisezaseza jakufwana nge Yuleya, Ngalileya, Samaliya, najingalila jeka. Mijimbu yamuMbimbiliya yasolola nge vatu vafumine kujingalila kana vapwile nakulizungisa. (Yowa. 4:9) VaFwaliseu navaSatuse vapwilenga nakulikokojwesa (Vili. 23:6-9), kaha vatu vamuchivulu navaka-kutambula mitelo navakiko valikokojweselenga (Mateu 9:11), vatu vaze valinangwilenga kumashikola avaLapi navaze kavayile kumashikola kanako navakiko valizungishilenga. (Yowa. 7:49) Mulikulukaji lyamyaka lyakulivanga, vaLoma vayulilenga vaIsalele kaha vaLoma nawa vavahungilenga kuli vatu. Numba tuhu Yesu atachikijile muchano nakwitavila ngwenyi ulwilo waputukilile kuli vaYuleya, oloze kalwezele tumbaji twenyi vanehe vikokojolako. (Yowa. 4:22) Avalwezele vazangenga vatu vosena.—Luka 10:27.

⁶ Mwomwo ika Yesu azenekele kukundwiza vikokojola vyavaYuleya? Mwomwo ikiye naIse kavazana muvikokojola vyakayeko. Omu Yehova atengele lunga napwevo kuhichila muli Mwanenyi, ajinyine ngwenyi vatu vakaseme nakuzalisa hamavu hosena. (Kupu. 1:27, 28) Kalunga atengele vatu mangana vaseme miyachi yavatu yakulisezaseza. Ngocho Yehova naYesu kavamona muyachi, chipwe lifuchi, chipwe lilimi limwe kupwa lyalilemu kuhambakana likwavoko. (Vili. 10:34, 35; Kuso. 7:9, 13, 14) Twatela kulondezeza chakutalilaho chavo chamwaza.—Mateu 5:43-48.

7, 8. (a) Uno vaka-Kulishitu vatela kukundwiza vyuma muka? (b) Vyuma muka vatela kutachikiza vaka-Kulishitu kupandama kuukalu wavatu?

⁷ Twatela kukundwiza wata waYehova wakutenga chosena. Vikokojola vyaputukile mumilemba yaEtene omu Satana afumbukilile chiyulo chaYehova. Makumbi ano, vatu vosena vatela kulisakwila vavene kupwa kusali yaKalunga nakufwelela ngwavo vyuma eji kulinganga vyapwa vyavilemu kuhambakana vize eji kulinganga Satana. Kutala mweji kusakulanga kupwa kusali yaYehova hakwononoka jishimbi  jenyi nakulinga vyuma asaka, muchishishisa chakulilingila vyuma enu vavene tahi? Uno mwamona Wangana wenyi kupwa ukiko kaha naukakumisa ukalu wavatu tahi? Uno mwafwelela ngwenu mutu nahase kuliyula ivene tahi?—Kupu. 3:4, 5.

⁸ Mujila namukumbulwilamo vihula kanevi nachisolola vyuma munahase kulinga kachi nge vatu navamihulisa vyuma muli nakushinganyeka kupandama kuvihande vyalifuchi. Vaka-mapolitiki, navaka-kukundwiza vyamapolitiki, navaka-kwalumuna vyuma mukwitava vanesejeka chikuma kuwana mwakukumishila vikokojola. Vishinganyeka vyavo vyakusaka kukafwa vatu vinasoloka kupwa vyamwenemwene. Oloze vaka-Kulishitu vatachikiza ngwavo Wangana waKalunga kaha ukiko naukakumisa ukalu wavatu vosena nakuneha chiyulo chakwoloka. Twatela kufwelela kaha Yehova. Achishinganyekenu, kachi nge muka-Kulishitu himuka-Kulishitu mwashinganyeka ngwenyi vyuma ajina ikiye vikiko vyamwaza kuhambakana vyavakwavo, kutala muvikungulwilo namupwa kuunda tahi?

9. Ukalu muka wapwile muchikungulwilo chamuKolinde mulikulukaji lyamyaka lyakulivanga, kaha kaposetolo Paulu avakafwile ngachilihi?

⁹ Achitalenu vyuma valingile vaka-Kulishitu vamwe mulikulukaji lyamyaka lyakulivanga omu kwepukile chihande chimwe muchikungulwilo. Vaka-Kulishitu vamwe muKolinde vambilenga mutu himutu ngwenyi: “‘Ami nguwakuli Paulu,’ mukwavo ngwenyi, ‘Ami nguwakuli Apolo,’ weka ngwenyi, ‘Ami nguwakuli Kefwase,’ mukwavo nawa ngwenyi, ‘Ami nguwakuli Kulishitu.’” Numba katwatachikiza ovyo vyakatwile chihande kanako, oloze twatachikiza ngwetu kaposetolo Paulu apihililile chikuma hachuma kana. Ahulishile ngwenyi: “Uno Kulishitu vanamupangununa numba?” Vyuma muka vyatelele kukumisa vishinganyeka kanevi vyakuhenga? Paulu akolezezele vaka-Kulishitu ngwenyi: “Enu vandumbwami, ngunamilembelela jino kuhichila mulijina lyaMwata wetu Yesu Kulishitu ngwami, muvosena muhanjikenga mwomumwe, ngwami muli enu kanda namupwa vihandwako, oloze ngwami mulinunge hakupwa navishinganyeka vyovimwe nakujina chochimwe.” Namakumbi ano nawa, muchikungulwilo chavaka-Kulishitu kamwatela kupwa vihandwako.—Koli. 1, 1:10-13; tangenu Wavaka-Loma 16:17, 18.

10. Kaposetolo Paulu alumbunwine ngachilihi ovyo vaka-Kulishitu kavatela kwazana muvihande vyamukayeko?

¹⁰ Paulu akolezezele vaka-Kulishitu vawavisa vahake muchima kuvyuma vyamwilu keshi nge kuvyuma vyahano hamavuko. (Fwili. 3:17-20) * Vatelele kupwa nge hivaluwa vakwimanyinako Kulishitu. Valuwa kavazana muvihande vyamumafuchi aze vazachilako, mwomwo vatela kupwa vakushishika kulifuchi lyavo. (Koli. 2, 5:20) Vaka-Kulishitu vaze vatwama nalutalililo lwakukayoyela hano hamavu navakiko vakundwiza Wangana waKalunga, ngocho kachapwa chakutamo kuli vakiko kwazana muvihande vyamukayeko.

11, 12. (a) Jingalila muka jinahase kulingisa vaka-Kulishitu kuchiwana kupwa chachikalu kupwa lika vakushishika kuWangana waKalunga? (b) Ukalu muka amwene ndumbwetu umwe, kaha auhonesele ngachilihi?

¹¹ Mumafuchi amwe mukaye, vatu mujingalila valihata chikuma nakulinunga hamwe mwomwo yachiyoyelo nachisemwa chavo, nakuhanjika lilimi limwe. Mujingalila kana, vaka-Kulishitu vatela kuzangama nakuhona kwitavila vyuma kana vivalingise vazane muvihande vyalifuchi nachiyulo. Uno vanahase kulinga ngachilihi ngocho?

¹² Achishinganyekenu hali Mirjeta * uze afumine kulifuchi lize vavulukilenga ngwavo Yugoslavia. Vamulelelele mungalila muze vahungilenga  vaka-Serbia. Omu alinangwile nge Yehova katala vatu kumesoko, kaha nawa Satana ikiye eji kunehanga ukalu wakulitala havikova, ngocho esekele kumbila tato yakumona vatu ulumbi. Oloze omu vikokojola vyepukile mungalila yavo vyakulitala havisemwa, vishinganyeka vyakumona vatu ulumbi vyaputukile cheka kwiza muvishinganyeka vyenyi nakuchiwana jino kupwa chachikalu kwambulwila vaka-Serbia. Kaha atachikijile ngwenyi vishinganyeka kanevi vyavipi kavyeshi kuhasa kuliyila viveneko. Ngocho alembelelele Yehova amukafwe kuhonesa ukalu kanou nakwazana chikuma mumulimo wakwambulula mangana atengamo kupwa payiniya. Kaha ambile ngwenyi: “Kwazana chikuma mumulimo wakwambulula chikiko chinangukafwe kuhonesa ukalu kanou. Omu ngweji kwambululanga, ngweji kwesekanga kulondezeza vilinga vyaYehova wazangi, kaha chuma kanechi chinangukafwe kuhonesa vishinganyeka kanevi vyavipi.”

13. (a) Vyuma muka vyalingishile ndumbwetu umwe evwenga kumuchima kupihya, kaha alingile ika? (b) Vyuma muka natulinangula kuvyuma ahichilemo Zoila?

¹³ Achishinganyekenu nawa hali Zoila, uze asemukilile kuMexico, oloze oholili ali muchikungulwilo chakuEurope. Amwene vandumbwetu vamwe muchikungulwilo vaze vafumine kuvihela vyakuLatin America navapopolola lifuchi afumine, nachisemwa chatwamako, namyaso vembilenga. Uno nge mwapwile yenu kachi mwalingile ngachilihi? Chikupu vene, vyuma vahanjikilenga vyevwishile Zoila kupihya kumuchima. Oloze ou ndumbwetu alombele kuli Yehova amukafwe kufumisa vishinganyeka vyavipi vize vyejile mumuchima wenyi. Twatela kutachikiza ngwetu vatu vamwe muli etu vachili nakulipika navyuma vyakufwana ngana. Katweshi nakusaka kuhanjika chipwe kulinga vyuma vimwe vize navineha vihandwa muli vandumbwetu chipwe kutuhonesa kupwa vakushishika kuli vakikoko. Kaha nawa katwatela kulinga vyuma vize navineha chihandwa nakuli vatu vekako.—Loma 14:19; Koli. 2, 6:3.

14. Vyuma muka navikafwa muka-Kulishitu ahone kumona vakwavo ulumbi?

¹⁴ Uno jila vamilelelelemo nakuchihela mwapwile vyamilingisa mumone lifuchi lyenu nachihela kupwa vyavilemu kuhambakana vyavakwenu tahi? Kutala muchili nakushinganyeka vyuma kana tahi? Vaka-Kulishitu kavatela kumona vatu vamwe kupwa vavalemu kuhambakana vakwavo mwomwo yamafuchi vafumako. Uno mwatela kulinga ngachilihi nge muchili navishinganyeka vyavipi hali vatu vaze vafuma kumafuchi eka, chipwe kuchisemwa cheka, chipwe kumuyachi weka, chipwe vaze vahanjika lilimi lyeka? Nachipwa chamwaza nge namushinganyeka omu Yehova amona vatu vaze veji kumonanga vakwavo ulumbi. Nge namuhehwojola hachuma kana nahavyuma vyeka hachilongesa chahauka nahakulemesa Kalunga mwatanga, kaha namunganyala chikuma. Mwatela kulembelela Yehova amikafwe havyuma kanevi.—Tangenu Wavaka-Loma 12:2.

15, 16. (a) Vyuma muka vanahase kulinga vatu nge natupwa lika vakushishika kuli Kalunga? (b) Visemi vanahase kukafwa ngachilihi vana vavo mangana vapwenga lika vakushishika kuli Kalunga?

¹⁵ Kalinwomu ngana vangamba jaYehova vosena navapwa nalisesa lyakusakula kulinga vyuma vize navilihandununa kuvyuma veji kulinganga vakwavo muvazachila, navakwavo vaka-shikola, navakwavo vatunga navo, navausoko wavo, navatu veka. (Petu. 1, 2:19) Chipwe ngocho, twatela kupwa vakulihandununa kuvatu kana. Katwatela kulikomokela kachi nge vaka-kaye navatuhunga mwomwo yakulihandula kuli vakikoko. Yesu ahanjikile lyehi ngwenyi vaka-kaye navakatuhunga. Anukenu ngwenu vaka-kole jetu vavavulu kavatachikiza ovyo etu vaka-Kulishitu katwazanyina muvihande vyalifuchi nachiyuloko. Oloze etu vavene twamona chuma kana kupwa chachilemu chikuma.

¹⁶ Hakusaka tupwenga lika vakushishika kuli Yehova, twatela kuzama mbe namulwola navatufumbukila. (Ndanye. 3:16-18) Numba tuhu tuvosena tweji kwivwanga vatu woma, oloze vanyike vakiko vanahase kuchiwana kupwa chachikalu chikuma kuhonesa ukalu kanou.  Nge vana venu vali nakumona ukalu kushikola wakufwana nge kuvashinyinyika valifukule kulipandelo, chipwe vazane muvilika vyeka vyalifuchi, kaha mwatela kuvakafwa hahaze vene. Omu namupwa nachilongesa chaKulemesa Kalunga mwaTanga, kafwenu vana venu havihande vyakufwana ngana mangana vakahase kufungulula vyeseko kana. Vakafwenu vakahase kuhanjika nakumika, nakavumbi. (Loma 1:16) Hakusaka kukafwa chikuma vana venu, munahase kuya nakuhanjika navalongeshi javo hachihande kanechi.

17. Vyuma muka twatela kulihendako, kaha mwomwo ika?

¹⁷ Tweji kulivwisanga kuwaha kulya vyakulya vyamulifuchi lyetu, nakuhanjika lilimi lyetu, nachisemwa chetu, nakutwama mulifuchi lyetu. Oloze katwatela kushinganyeka ngwetu vyuma twazanga vikiko vyavilemu chikuma kuhambakana vize vazanga vakwetuko. Yehova atenga vyuma vyavivulu vize vinahase kutwivwisa kuwaha mukuyoya chetu. (Samu 104:24; Kuso. 4:11) Kahaze mwomwo ika natushinganyekela ngwetu vyuma vyetu vyapwa vyavilemu chikuma kuhambakana vyavakwetu?

18. Navatukisula ngachilihi nge natulondezeza muchima waYehova?

¹⁸ Kalunga asaka vatu vosena vapwenga nachinyingi chakwoloka chakutachikiza muchano mangana vakayoye haya myaka yosena. (Yowa. 3:16; Chimo. 1, 2:3, 4) Kupwa namuchima wakwitavila vyuma navatulweza vakwetu cheji kutukafwanga nakutulingisa tulinunge hamwe navakwetu vaka-Kulishitu. Hakusaka tupwenga lika vakushishika kuli Yehova, twatela kulihenda kuvihande vyalifuchi. Etu vaka-Kulishitu twatela kulinunga hamwe navandumbwetu vosena. Twasakwilila chikuma Yehova hakutusosolola kuvilinga vyavipi vize vyavula mukaye kaSatana. Shikaho, tufwilenu kupwa namuchima wakusaka kuneha kuunda ngana uze apwile nawo muka-kwimba jisamu hakwamba ngwenyi: “Talenu! Omwo chawaha nomwo chayema vatu muundumbwavo kutwama hamwe mukulinunga!”—Samu 133:1.