Iya Eji Kumonanga Milimo Yenu?
MBEZALELE naOholyave vatachikijile milimo yakutunga. Omu vapwile muundungo muEjipitu, atela vatungilenga tumenga vavavulu vaze kavahashile kwanukako. Oloze vyuma kana vyahita lyehi. Vapwile jino hivaka-kufunjejeka vakwipangweji omu vavalwezele kutetekela mulimo wakutunga tavanaku. (Kulo. 31:1-11) Chipwe ngocho, vatu vavavulu kavamwene mulimo wamwaza vazachile ava malungako. Uno vevwile kupihya hakuwana nge vatu vavavulu kavatachikijile mulimo vazachileko tahi? Uno iya chikupu amwene milimo yavo? Nyi enu iya eji kumonanga milimo yenu?
MILIMO YAYILEMU YIZE VAMWENE KUVATU VAVANDENDE
Milimo yimwe yakufunjejeka yize yapwile kutavanaku yapwile yamwaza chikuma. Chakutalilaho, shinganyekenu havakeluve vaulu vaze vatungilile helu lyachikasha chalushiko. Kaposetolo Paulu ahanjikile kutalisa kuli vaze vakeluve ngwenyi vapwile “vaupahu.” (Hepe. 9:5) Achishinganyekenu havyuma kanevi vyamwaza vyaulu vafulile.—Kulo. 37:7-9.
Makumbi ano, nge vatu navawana vyuma vize vafulile vaMbezalele naOholyave kachi navavihaka mujizuvo jamwaza valamina vyuma vyakushikulu mangana vatu vavavulu vavimone. Oloze halwola luze vafulile vyuma kanevi vyamwaza, vatu vangahi vamwene upahu wavyuma kana? Vakeluve kana vavahakile Muze Mwajila Chikuma, kaha vavamwenenga kaha kuli kapilishitu wakulitulaho uze engililenga muchihela kana kamwe mumwaka, haLikumbi lyaKulinga Chakufwika haShili. (Hepe. 9:6, 7) Ngocho, vatu vavandende kaha vakiko vamwene vaze vakeluve.
MWATELA KUSUULUKA NAMILIMO YENU NUMBA TUHU VATU KAVAYITACHIKIJILEKO
Nge yenu mwapwile Mbezalele chipwe Oholyave nakukilikita milimo yayilemu ngana, kachi mwevwile ngachilihi hakuwana nge vatu vavavulu kavayimweneko? Makumbi ano, vatu vavavulu veji kusuulukanga nge vakwavo navevwa kuwaha hamilimo vanazate nakuvasangejeka. Yikiko jila yimwe veji kumwenangamo vatu vamwe nge milimo yavo yapwa yayilemu. Oloze etu vangamba jaYehova katwapwa ngochoko. Ngana mwaMbezalele naOholyave, nayetu tweji kusuulukanga nge natulinga mwaya muchima waYehova nakutwivwila uselewa kuli ikiye.
Mumakumbi aYesu, vatwamina vamukwitava valombelenga mwomwo yakusaka kaha kwivwisa vatu kuwaha. Yesu etavishile kulomba chakuzeneka kufwila vatu vatwalise. Vyuma muka navifumamo? Yesu ambile ngwenyi: “Senu uze eji kumonanga kupenge mwakamifweta.” (Mateu 6:5, 6) Chuma chachilemu shina omu Yehova eji kumonanga kulomba chetu, keshi omu veji kuchimonanga vatuko. Vishinganyeka vyaYehova vyeji kulingisanga kulomba chetu kupwa chachilemu. Kahomu mukiko chapwa hakala mulimo wajila uze natuzata. Katweshi kumona milimo yetu kupwa yayilemu mwomwo yakutwalisa kuli vatuko, oloze Yehova “uze eji kumonanga kupenge” ikiye eji kuyivwilanga kuwaha.
Omu tavanaku vakumishile kuyitunga, livwi “lyaputukile kufwika yize mbalaka yakuliwanyina, kaha upahu waYehova wazalile muze mutavanaku.” (Kulo. 40:34) Echi chasolwele hatoma nge Yehova etavilile milimo yavo. Achishinganyekenu omu Mbezalele naOholyave vevwile hakumona vyuma kana. Numba tuhu kavasonene majina avo havyuma vize vatungileko, oloze chasoloka nge vasuulukile hakutachikiza ngwavo Kalunga akiswile milimo yavo. (Vishi. 10:22) Hamyaka yakavangijileho, atela vevwile kuwaha hakumona vyuma vatungile vapwile lika nakuvizachisa kumulimo waYehova. Omu navakavasangula mukaye kakahya, Mbezalele naOholyave atela navakawahilila chikuma hakutachikiza ngwavo tavanaku vayizachishile hakulemesa Kalunga hamyaka 500.
Numba tuhu kakweshi mutu mwamona milimo munazateko, oloze fwelelenu ngwenu Yehova nayimono
Muliuka lyaYehova makumbi ano, vaka-kutunga jivindiyo javyuma vyamalengeso, navaka-kufunjejeka, navaka-kwimba, navaka-kukopa mivwimbimbi, navaka-kwalumuna mikanda, navaka-kusoneka, vosena veji kuzatanga milimo yavo chakuzeneka kusoneka majina avo kumilimo kana. Ngocho nou atachikiza vyuma veji kulinganga wauchi. Omu mukiko chapwa namilimo vazata vandumbwetu muvikungulwilo vyakuhambakana 110,000 mukaye kosena. Iya eji kumonanga muka-kuzachila kujimbongo omu eji kusonejekanga mapapilo aze eji kusakiwanga kusongo yakakweji? Iya eji kumonanga muka-kusoneka muchikungulwilo omu eji kusonekanga milimo yamuwande? Iya eji kumonanga vyuma veji kulinganga vandumbwetu hakuwahisa Zuvo yaWangana?
Mbezalele naOholyave vafwile chakuzeneka kutambula wana wakusakwilila hamilimo yavo yamwaza vazachile. Oloze Yehova avevwililile uselewa, kaha echi chikiko chuma chachilemu vatambwile. Tunafwelela ngwetu Yehova amwene milimo vazachile. Shikaho, tulondezezenu chakutalilaho chavo chamwaza chakupwa namuchima wakulinyisa nakulisuula mumilimo yetu.
