MBIMBILIYA yasolola nge jingalila jimwe muLifuchi lyaLushiko japwile namitondo ‘yayivulu.’ (Vamya. 1, 10:27; Yoshu. 17:15, 18) Hakuwana nge makumbi ano, jingalila jajivulu mulifuchi kana kajeshi namitondoko, vatu vamwe vanahase kuhuhwasana numba nge mujingalila kana mwapwile chikupu mitondo yayivulu.

Mukanda vavuluka ngwavo Life in Biblical Israel wahanjika ngwawo, “muIsalele yakushikulu mwapwilenga mitondo yayivulu chikuma kuhambakana makumbi ano.” Hamilundu yayivulu hapwilenga chikuma mitondo yaAleppo pine (Pinus halepensis), namitondo yakujika chikuma mafwo vavuluka ngwavo oak (Quercus calliprinos), namitondo vavuluka ngwavo terebinth (Pistacia palaestina). Kaha Shefwelu, chihela chize chapwile chatuumbu chize chapwilile mukachi kangalila yajipili nakungenge yakalungalwiji waMendetelenya, chapwile nawa mitondo yamisukumole (Ficus sycomorus) yayivulu.

Mukanda vavuluka ngwavo Plants of the Bible wahanjika ngwawo makumbi ano jingalila jimwe muIsalele kajeshi namitondoko. Mwomwo ika? Ou mukanda wavuluka nge vyuma kana vyasolokelenga chindende chindende. Wamba ngwawo: “Vatu vakiko vanakumisa mitondo kana mwomwo yakusaka kulima mande amavulu, nakusaka vihela vyakulamina vimuna javo, nakuchava jikunyi, nakuteta mitondo yakutungisa jizuvo.”