1, 2. MuVisoneka vyachiHepeleu, mazu akwamba ngwavo “chitwamo chakulyata mahinji” atalisa kuvyuma muka?

YEHOVA KALUNGA avilikile ngwenyi: “Melu anapu litanda lyami, mavu anapu chitwamo chakulyata mahinji ami.” (Isa. 66:1) Kutalisa ‘kuchitwamo chakulyata mahinji enyi,’ ambile cheka ngwenyi: “Nangukatohwesa chihela chakulyata mahinji ami.” (Isa. 60:13) Mujila muka? Kahechi chalumbununa vyuma muka kuli etu hakuwana nge twatwama ‘hachitwamo chakulyata mahinji’ aKalunga?

² Mazu akwamba ngwavo “chitwamo chakulyata mahinji” atalisa kumavu, kaha nawa vawazachisa mujila yachifwanyisa muVisoneka vyachiHepeleu kulumbununa tembele yakushikulu yize vazachishilenga vaIsalele. (Miji. 1, 28:2; Samu 132:7) Tembele yize yapwile hano hamavu vayizachishile kupwa hichihela chakulemesela Kalunga. Chikupu vene, tembele kana yapwile yamwaza kumeso aYehova, kaha kupwako chayo chatohwesele chihela chakulyata mahinji aYehova.

3. Tembele yayinene yaKalunga yakushipilitu yapwa ika, kaha yaputukile kupwako mumwaka uka?

³ Makumbi ano, katweshi natembele yivene hano hamavu, yize yapwa chihela chakulemesela Kalungako. Oloze kwatwama tembele yakushipilitu yize yeji kutohwesanga Yehova kuhambakana zuvo yakutunga. Eyi tembele yachifwanyisa yapwa vyuma alongesa Kalunga  mangana atuwanyise naikiye kuhichila mumilimo yaupilishitu nawana ahanyine Yesu Kulishitu. Echi kulongesa chavyuma kana chaputukile mu 29 C.E. omu Yesu vamumbapachishile nakumuwavisa kupwa Kapilishitu, Wakulitulaho watembele yayinene yaYehova yakushipilitu.—Hepe. 9:11, 12.

4, 5. (a) Mukanda waSamu 99 walumbununa ngachilihi vyuma vafwila kulinga vaka-kulemesa Yehova vamuchano? (b) Mutu himutu atela kulihulisa chihula muka?

⁴ Tunahase kusolola muchima wakusakwilila vyuma alongesa Yehova nge natumwalisa hakuvilika lijina lyenyi nakumuzezula helu mwomwo yakeke yenyi hakutuhana ndando yakusokola. Tweji kuwahililanga chikuma hakutachikiza nge vaka-Kulishitu vamuchano vakuhambakana jimiliyoni 8, vali nakutohwesa Yehova makumbi ano. Chipwe ngocho, vatu vamwe vamukwitava veji kushinganyekanga ngwavo navakalisa Kalunga omu navakafuma hano hamavu nakuya mwilu. Oloze Vinjiho jaYehova vosena vatachikiza ngwavo vatela kwalisa Kalunga oholyapwa hano vene hamavu.

⁵ Tweji kukavangizanga chakutalilaho chamwaza vasolwele vangamba jaYehova kunyima chize vasoneka hali Samu 99:1-3, 5. (Tangenu.) Ngana muze wasolola mukanda wajisamu, Mose, naAlone naSamwele vakundwijile chikuma vyuma alongesele Kalunga kupandama kukulemesa chamuchano mumakumbi avo. (Samu 99:6, 7) Makumbi ano, vasalaho hali vandumbu jaYesu vawavisa, veji kuzatanga nakashishi muchipango chahamavu chatembele yakushipilitu, shimbu kanda vayenga mwilu nakukazata milimo yavo yaupilishitu. “Mikoko veka” veji kuvakundwizanga nakashishi. (Yowa. 10:16) Numba tuhu awa mazavu atwama nalutalililo lwakulihandununa, oloze vosena valinunga hamwe nakulemesa Yehova hano hamavu, hachitwamo chamahinji enyi. Ngocho mutu himutu atela kulihulisa ngwenyi, ‘Uno ngweji kukundwizanga vyuma alongesa Yehova kupandama kukulemesa chamuchano tahi?’

6, 7. Ukalu muka vapwile nawo vaka-Kulishitu vakulivanga, kaha kufumaho vyuma muka vyasolokele?

⁶ Omu mwahichile myaka yakukokela ku 100 kufuma haze vaputukile chikungulwilo chavaka-Kulishitu, vatu vaputukile kulikanga kuli Kalunga, ngana muze vachihanjikile chimweza. (Vili. 20:28-30; Teso. 2, 2:3, 4) Ngocho chapwile jino chachikalu kutachikiza kanawa mutu uze apwile nakuzachila Kalunga hatembele yakushipilitu. Oloze omu mwahichile myaka yayivulu, lwola lwahetele jino luze Yehova awahishile kanawa vyuma kuzachisa Mwangana Yesu Kulishitu uze atongwele.

⁷ Kuheta mumwaka wa 1919, vatu vaze etavilile Yehova, vaze nawa vazachililenga mutembele yakushipilitu vavatachikijile jino kanawa. Vavatomesele kushipilitu mangana vahase kuzachila Kalunga mujila yize yamwivwishile kuwaha. (Isa. 4:2, 3; Mala. 3:1-4) Vyuma vize vamwenesele kaposetolo Paulu kunyima muchakumwenesa vyaputukile kutesamo jino.

8, 9. Lumbununenu ‘jipalachise’ jitatu jize amwene Paulu muchakumumwenesa.

⁸ Chakumwenesa vamumwenesele Paulu vachisoneka hali Wavaka-Kolinde 2, 12:1-4. (Tangenu.) Vyuma vamumwenesele Paulu vyapwile vyakukomwesa. Chakumwenesa kana chapwile chavyuma navikasoloka kulutwe, keshi vize vyapwileko mumakumbi enyiko. Uno Paulu amwene “palachise” muka omu “va[mu]hukwile nakumutwala kulilu lyamuchitatu”? Palachise yize ahanjikile Paulu nayikatesamo hamavu, nakushipilitu, namwilu, kaha vyuma kana navikapwako halwola lwolumwe kulutwe. Ngocho, yatalisa kuPalachise yahamavu yize nayikatesamo kulutwe. (Luka 23:43) Yatalisa nawa kupalachise yakushipilitu yize nayikapwako mukaye kakahya, “[naku]palachise yaKalunga,” yize navakalivwisa kuwaha mwilu.—Kuso. 2:7.

 ⁹ Mwomwo ika Paulu ambile ngwenyi “evwile mazu navahona kwambulula, aze nawa kavetavisa mutu kuwahanjikako”? Mwomwo kalwapwile lwola lwakutela kulumbununa vyuma vyakukomwesa amwene muchakumwenesa kanako. Oloze makumbi ano chinatemo kuhanjika vyuma vyamwaza vali nakulivwisa kuwaha vatu jaKalunga.

10. Mwomwo ika natwambila ngwetu ‘palachise yakushipilitu’ ‘natembele yakushipilitu’ kavyapwa vyovimweko?

¹⁰ Mazu akuvuluka ngwavo “palachise yakushipilitu” anapu hihanjikiso yize tuli nakuzachisanga mukwitava chetu. Yalumbununa vyuma vyakulipwila tweji kulivwisanga kuwaha vize vyatulingisa tupwenga mukuunda naKalunga navandumbwetu. Katwatela kukukulula ngwetu “palachise yakushipilitu” ‘natembele yakushipilitu’ vyapwa vyovimweko. Tembele yakushipilitu yapwa vyuma vize alongesa Kalunga mukulemesa chamuchano. Kaha palachise yakushipilitu yeji kusololanga hatoma vaze eji kwivwilanga Kalunga uselewa, vaze vali nakumuzachila mutembele yenyi yakushipilitu.—Mala. 3:18.

11. Kutokwa muka tuli nacho makumbi ano kutalisa kupalachise yakushipilitu?

¹¹ Tweji kwivwanga kuwaha kutachikiza nge kufuma vene mu 1919, Yehova etavisa vatu vakuhona kukupuka mwosena vazachile hamwe naikiye mulimo wakutunga, nakujikijisa, nakutohwesa palachise yakushipilitu hano hamavu. Kutala nayenu mweji kuzatanga nangolo mulimo kanou tahi? Kutala muli nakuzachilanga hamwe naYehova mumulimo wakutohwesa ‘chihela chakulyata mahinji enyi’ tahi?

12. Vyuma muka twafwelela tuvosena kupandama kumukanda waIsaya 60:17? (Talenu muvwimbimbi wakulivanga.)

¹² Mulimo wakukomwesa wakutalisa kukwalumuka chachihanda chahamavu chaliuka lyaYehova vauvulukile chimweza hali Isaya 60:17. (Tangenu.) Vanyike navaze vanapu vavahya mumuchano vanatange chipwe kwivwa vyuma vinalumuka muliuka. Oloze vandumbwetu vaze vanamono vyuma kana vatokwa chikuma. Ngocho vanakunyuka nakwitavila ngwavo Yehova natwaminyinanga liuka lyenyi kuhichila muli Mwangana ou naswanyisa halitanda. Vatachikiza ngwavo vakwechi lufwelelo lwakukola, kaha lufwelelo kana lukiko twatwama nalwo nayetu. Kwivwilila kuvyuma vanahichimo ava vandumbwetu navimikolezeza nakumilingisa mufwelele chikuma Yehova.

13. Mukanda waSamu 48:12-14 watulweza kulinga vyuma muka?

¹³ Twatela kulweza vatu vyaliuka lyaYehova chamokomoko namyaka tunatwame mumuchano. Kupwako chapalachise yakushipilitu mukaye kano kakapi kaze katwama navatu vakuzeneka zangi, hichuma chakukomwesa chikuma makumbi ano. Vyuma vyakukomwesa vize vyapandama kuliuka lyaYehova, chipwe “Zeyone,” namuchano wakupandama kupalachise yakushipilitu, twatela kuvyambulula “kuvisemunwino vyakulutwe.” —Tangenu Samu 48:12-14.

14, 15. Vyuma muka valumwine muliuka muji 1970, kaha vinatunganyalisa ngachilihi?

¹⁴ Hamyaka yayivulu, vandumbwetu vatushinakaji vanamono vyuma vimwe vinalumuka muliuka lyetu vize vinawahisa chihanda chahamavu chaliuka lyaYehova. Veji kwanukanga omu vikungulwilo vyapwilenga nangamba wachikungulwilo mukutela kupwa nalizavu lyavakulwane, nomu mutango himutango wapwilenga namuka-kutwaminyina mukutela kupwa naKomiti yaMutango, nomu nawa kwapwile twamina umwe uze atwaminyinyinenga liuka lyaWatch Tower Society mukutela kupwa naLizavu lyaKutwaminyina lyaVinjiho jaYehova. Numba tuhu ava vandumbwetu vakulisuula vosena vavakafwilenga kuli vandumbwetu vakushishika, oloze chikungulwilo hichikungulwilo,  namutango himutango, nakuchikota chetu mukaye kosena vyapwilenga namutu umwe kaha uze apwile nalisesa lyakusakula vyakulinga. Mumyaka yamuji 1970, valumwineko vyuma vimwe mangana mulimo wakutwaminyina upwenga walizavu lyavakulwane keshi mutu umwe kahako.

¹⁵ Kutala vyuma valumwine vinatunganyalisa tahi? Eyo. Mwomwo ika? Mwomwo vyuma kana vyapendaminyine hakuvula chachinyingi chavyuma vasoneka muVisoneka. Muchishishisa chakukavangiza vyuma najinyi mutu umwe kaha, vilinga vyamwaza ‘vyamalunga vosena vaze vapwa wana,’ vaze ahakako Yehova, vinanganyalisa liuka lyosena.—Efwe. 4:8; Vishi. 24:6.

16, 17. Vyuma muka vanalumuna vize vili nakumivwisa kuwaha makumbi ano, kaha nawa mwomwo ika?

¹⁶ Achishinganyekenu nawa havyuma vanalumuna kalinwaha, vyakufwana nge omu mikanda yetu yinakusolokanga, nakukehesako chavyuma vanasonekamo, najijila jakuyihanyinamo. Ocho kuwaha kana hakuhana eyi mikanda yetu yamwaza, yakuheta vatu kumichima, mumulimo wetu wakwambulula! Kutandakanyisa muchano wamuMbimbiliya hakuzachisa makina akufwana nge jikopyuta haze tuli nakusoneka keyala yetu ya jw.org, chili nakusolola muchima waYehova wakusaka kukafwa vatu mukaye kosena vaze vali nakusakiwa kuvatwaminyina mujila yamwaza.

¹⁷ Twatela nawa kushinganyeka havyuma valumwine vize vyatulingisa tupwenga naKulemesa Kalunga mwaTanga chipwe kupwa nalwola lwachilongesa chahauka. Twawahilila nawa havyuma vanalumuna kupandama kuvihande vyahakukunguluka chachihanda nachechi changalila. Vihande kana vyeji kuwahilangako mwaka himwaka. Kaha tweji kuwahilila nawa hamashikola amavulu ali muliuka. Tunamono omu Yehova ali nakutukafwa muvyuma vyosena evi vili nakwalumuka muliuka. Nawahisanga chindende chindende vyuma  muliuka lyenyi, navyuma vyamuPalachise yakushipilitu vize vili nakutwivwisa kuwaha makumbi ano.

18, 19. Mujila muka tunahase kukundwiza milimo yakuwahisa palachise yakushipilitu?

¹⁸ Chapwa hikutokwa chachinene hakutwitavisa kuli Yehova tuzate milimo yize nayikundwiza palachise yakushipilitu. Tweji kulinganga ngocho hakwazana mumulimo wakwambulula mujimbu wamwaza waWangana natwima nakunangula vatu vavavulu vapwenga tumbaji. Kala lwola natukafwa mutu azovoloke nakulihana kupwa muka-Kulishitu, tunazate milimo yakukundwiza palachise yakushipilitu.—Isa. 26:15; 54:2.

¹⁹ Tunahase nawa kuwahisa palachise yetu yakushipilitu hakutwalaho lika kwolola vilinga vyetu, vize vyatela vaka-Kulishitu. Nge natulinga ngocho, kaha vatu navamona palachise yetu yakushipilitu kupwa yamwaza chikuma. Mwomwo vilinga vyetu vyamwaza vikiko vyeji kulingisanga vatu vezenga muliuka lyetu nakupandama jino kuli Kalunga naKulishitu, keshi kupwa kaha nachinyingi chamuMbimbiliyako.

20. Kweseka namazu ahali Vishimo 14:35, vyuma muka twatela kufwila kulinga?

²⁰ Yehova naYesu veji kuwahililanga chikuma hakumona omu yinawahe palachise yetu yakushipilitu oholyapwa. Makumbi ano, tunawahilila hamilimo tuli nakuzata yakukundwiza kuwaha chili mupalachise yakushipilitu, kaha nawa natukawahilila chikuma kulutwe omu natukazata hakwalumuna mavu kupwa palachise. Kanda tuvulyama mazu ahali Vishimo 14:35, aze amba ngwawo: “Mwangana eji kwivwilanga kuwaha ngamba yenyi wakunangakana.” Ngocho, tutwalenuho lika kupwa vakunangakana hakuzata nangolo kukundwiza kuwaha chamupalachise yakushipilitu.