MUMWAKA wa 1991, Vinjiho jaYehova mulifuchi lyaRussia vawahililile chikuma omu vavetavishile vazate tuhu mulimo wavo wakwambulula uze vemikile hamyaka yayivulu. Halwola kana atela kwapwile kaha vatu vavandende vaze vashinganyekele ngwavo Vinjiho navakavula muRussia nakuheta kafwe 170,000 makumbi ano. Hakuvula chavava vandumbwetu vaka-kwambulula Wangana hapwile naVinjiho vaze vafumine kumafuchi akwakusuku nakwiza kuRussia mangana vakafwe vandumbwavo mumulimo wakwaha chakushipilitu. (Mateu 9:37, 38) Tuchishimutwilenu hali ava vandumbwetu vamwe.

Omu vetavishile mulimo wakwambulula muRussia, ndumbwetu walijina lyaMatthew wakufuma kuGreat Britain apwile namyaka yakusemuka 28. Kukunguluka changalila chapwileko mumwaka uze, chashindakanyine hakukafwa vikungulwilo vize vyapwile nakusakiwa vaka-kwambulula muEastern Europe. Chakutalilaho, muka-kuhana chihande ahanjikile ngwenyi chikungulwilo chimwe muSt. Petersburg, muRussia, chapwile kaha namuka-kuzachila umwe, kamwapwile kalamako. Chipwe ngocho, vaka-kwambulula vapwile navilongesa vyaMbimbiliya vyavivulu. Ndumbwetu Matthew ambile ngwenyi: “Omu chakumine chize chihande, ngwashinganyekelenga kaha lifuchi lyaRussia, kaha ngwalombele kuli Yehova nakumulweza vishinganyeka vyami vyakusaka kuya nakukafwa kulifuchi kana.” Ngocho aputukile kutulijeka tujimbongo twenyi, nakulanjisa nawa vyuma vyenyi vimwe, kaha kuheta mu 1992 ayile kuRussia. Uno vyuma muka vyasolokele kuze ayile?

Ambile ngwenyi: “Chapwile chachikalu kulinangula lilimi lyavo. Ngwahonenenga kushimutwila kanawa navatu vyuma vyakushipilitu.” Kaha ukalu ukwavo apwile nawo shina wakuwana chihela chakutwama. Ambile nawa ngwenyi: “Kangweshi kuhasa kwanuka mapapa kangahi ngwalukilenga kufuma muzuvo yimwe nakuya muzuvo yikwavoko.” Numba tuhu kwapwile ukalu wosenou, oloze Matthew ambile ngwenyi: “Kuya nakuzachila mulifuchi lyaRussia chapwile chuma chamwaza chize ngwasakwile kulinga mukuyoya chami.” Alumbunwine ngwenyi: “Kuzachila mulifuchi lino chinangukafwe ngupendamine chikuma hali Yehova nakumona omu nangukafwenga mujijila jajivulu.” Kutwala muze, Matthew vamutongwele kupwa mukulwane, nakupwa nawa payiniya wakulipwila, kaha oholili ali nakuzachila haofesi yamutango yize yatwama kwakamwihi naSt. Petersburg.

Mumwaka wa 1999, Hiroo apwile namyaka yakusemuka 25, kahomu akumishile Shikola Yakulinangula Milimo YamuLiuka  mumwaka vene uze mulifuchi lyaJapan, muka-kunangula umwe mushikola kaneyi amukolezezele ayenga nakuzata mulimo wakwambulula mulifuchi lyeka. Hiroo evwile ngwavo mulifuchi lyaRussia mwapwile nakusakiwa vaka-kwambulula, ngocho aputukile kulinangula lilimi lyaRussia. Kaha nawa ashinganyekele kulinga vyuma vikwavo. Ambile ngwenyi: “Ngwayile kuRussia nakukatwamako tukweji 6. Hakuwana nge mulifuchi kana kakweji waNovember apwa wachishika chikuma, ngocho ngwayile mukakweji vene uze mangana ngumone nge nanguhasa kutwama kuze mulwola lwachishika.” Omu lwola kana lwakumine, akindulukile kuJapan nakwashiwisa chiyoyelo chenyi mangana awaneko jimbongo ahase kukinduluka kuRussia nakukatwama vene kuze.

Ndumbwetu Hiroo natwame myaka 12 muRussia, kaha nawa nazachilanga muvikungulwilo vyavivulu. Lwola lumwe, napunga mukulwane uka wenyi nakuzakama vaka-kwambulula vakuhambakana 100. Muchikungulwilo chimwe, chalumingo hichalumingo, ahanjikilenga vihande haKukunguluka chaMulimo, kaha atetekelelenga Shikola yaMulimo waTeokalasi, naChilongesa chaKaposhi Kakutalila, naChilongesa chaMukanda chaChikungulwilo mumazavu atanu. Kaha nawa kakavulu ayilenga nakufunga vandumbwenyi. Hakwanuka vyuma kanevi, ndumbwetu Hiroo ambile ngwenyi: “Chapwile hikutokwa chachinene kukafwa vandumbwami vajikize kushipilitu.” Uno evwile ngachilihi hakuzachila kuchihela kuze kwapwile nakusakiwa vaka-kwambulula? Ambile ngwenyi: “Shimbu kanda nguyenga kuRussia, ngwapwile ngukalama muchikungulwilo, kaha nawa ngupayiniya, oloze hakwiza kuno nguli nakwivwa nge ngunatungu usoko wauhya naYehova. Ngunalinangula kufwelela chikuma Yehova mukuyoya chami chosena.” Kuheta mu 2005, Hiroo ambachile puwenyi Svetlana, kaha vosena vanatwaleho kuzata mulimo waupayiniya.

Matthew wamyaka yakusemuka 34, nandumbwenyi Michael wamyaka yakusemuka 28, vamulifuchi lyaCanada navakiko vayile nakuzachila kuRussia. Omu vahetele kuze, vawahililile chikuma hakumona kuvula chavatu vaze vejilenga kukukunguluka, oloze vandumbwetu vakunangula vatu kana vapwile vavandende. Ndumbwetu Matthew ambile ngwenyi: “Kuchikungulwilo chimwe kuze ngwayile, kwapwile vatu 200 vejile kukukunguluka, oloze kukunguluka chosena vachitetekelele kuli kalama umwe kaha, uze apwile nawa kashinakaji namuka-kuzachila umwe wamukweze. Omu ngwamwene vyuma kana changulingishile ngushinganyeke kuya nakuzachila kuchikungulwilo kana mangana ngukakafwe vandumbwami.” Kuheta mumwaka wa 2002 ayile kulifuchi lyaRussia.

Omu Michael afumine kuRussia, mwahichile myaka yiwana, kaha akindulukileko cheka, oloze akawanyine hanga kuli nakusakiwa lika kukafwa. Hakuwana nge apwile muka-kuzachila, ngocho vamuhanyine mulimo wakutala hajimbongo, namikanda, najingalila jakwambulwila. Vamuhanyine nawa mulimo uze atela kuzata kalama, muka-kusoneka muchikungulwilo, nakuhananga vihande vyalikungumbuwa, nakulongesa vyakukunguluka chachihanda navyakutunga jiZuvo jaWangana. Kaha noholili vene ngana, vikungulwilo vyavivulu vichili nakusakiwa kukafwa. Numba tuhu kuzata milimo yayivulu muchikungulwilo cheji kuzeyesanga chikuma, oloze Michael uze apwa jino hikalama ambile ngwenyi: “Kukafwa vandumbwetu cheji kusuulwisanga chikuma. Chikupu vene, eyi yinapu hijila yamwaza ngunazachisa kuyoya chami.”

Kutwala muze, Matthew ambachile puwenyi Marina, kaha Michael nawa ambachile puwenyi Olga. Eji jitanga jivali kuhakilako navandumbwetu veka vakulisuula, vanatwaleho lika kukafwa vikungulwilo vize vili nakusakiwa kukafwa.

Mumwaka wa 1994, omu Tatyana apwile namyaka yakusemuka 16, muchikungulwilo apwile muUkraine mwejile vapayiniya vakulipwila 6 vaze vafumine kuCzech Republic, naPoland, naSlovakia. Eji kuvanukanga chikuma nakwamba ngwenyi: “Ava vapayiniya vazachilenga natwima, vapwile vachisambo nalikoji, kaha nawa vatachikijile kanawa Mbimbiliya.” Amwene omu Yehova akiswile ava vapayiniya vamichima yakulisuula, ngocho ashinganyekele ngwenyi, ‘Nayami nguli nakusaka kupwa nge vakiko.’

Chakutalilaho chavava vapayiniya chakolezezele Tatyana, ngocho azachishile makumbi enyi akunoka kushikola nakuyanga navakwavo nakwambulwila kuvihela vyakwakusuku muUkraine naBelarus kuze kanda vambulwilengaho lyehi Vinjiho. Alivwishilenga chikuma kuwaha kuya nakwambulwila  kuvihela kana, ngocho asakile jino kutohwesa mulimo wenyi hakuya nakuzachila kuRussia. Chakavanga, ayileko hatukweji vavandende akamone ndumbwenyi wapwevo apwile nakuzachila kuze, nakutonda milimo yakumukafwa atwaleho kuzata upayiniya. Kuheta mumwaka wa 2000, ayile nakwambulwila kuRussia. Kutala kuze ayile chiyoyelo chamukaluhwilile tahi?

Tatyana ambile ngwenyi: “Hakuwana nge kangwahashile kulifwetela zuvo ukawamiko, ngocho ngwatwaminenga mukapete kakufwetela kamuzuvo yize yatwaminenga vatu veka. Kachapwile chachashi kutwama mujila kaneyiko. Lwola lumwe ngwashinganyekele kukinduluka. Oloze Yehova angukafwile ngumone nge nangunganyala chikuma kachi nge nangutwalaho lika kuzata mulimo wami.” Makumbi ano, Tatyana ali nakuzata mulimo waumishonali muRussia. Kaha akukulwile ngwenyi: “Hamyaka yoseneyi ngunatwame kulifuchi lyeka ngunamono vyuma vyamwaza vyavivulu, kaha nawa ngunatungu masepa vavavulu. Chikumanyi, myaka yoseneyi yinangukolezeza ngupwenga nalufwelelo lwakukola.”

Ndumbwetu Masako wakuJapan uze ali mumyaka yamuji 50, mukuyoya chenyi chosena afwililile kuzata mulimo waumishonali, oloze kuvizaviza chamuhonesele kuzata mulimo kana. Omu alivwileko kanawa, ashinganyekele kuya kuRussia akakafwe vandumbwenyi kuzata mulimo wakwaha chakushipilitu. Numba tuhu chapwile chachikalu kuwana zuvo yamwaza yakutwamamo namilimo yamwaza yakumujimba, oloze ahashile kuwana jimbongo jakulikafwa najo hakunangula vatu lilimi lyachiJapanese nakuzatako milimo yakukombakomba mangana atwaleho lika naupayiniya wenyi. Vyuma muka vinamukafwe atwaleho lika kuzata mulimo wenyi wakwambulula?

Ndumbwetu Masako hakushinganyeka hamyaka yakuzomboka 14 nazachila muRussia, ambile ngwenyi: “Kuwahilila ngunamono mumulimo wakwambulula chinahambakana haukalu ngunamononga. Kwambulwila kuvihela kuli nakusakiwa vaka-kwambulula Wangana cheji kukolezezanga mutu nakumulingisa asuuluke mukuyoya chenyi.” Ambile nawa ngwenyi: “Ami ngunamononga chikupu vyuma vyakukomwesa omu Yehova nanguhanenga vyakulya, nakunguvwika, nakunguhana kwakutwama mukuyoya chami.” Ndumbwetu Masako kazachilile kaha mulifuchi lyaRussiako, oloze nazate nawa mulimo wakwaha chakushipilitu mulifuchi lyaKyrgyzstan. Ou ndumbwetu nakafwe nawa mazavu aze azachisa malimi eka akufwana nge Chingeleshi, naChinese, naUighur. Oholyapwa jino ali nakuzata mulimo waupayiniya muSt. Petersburg.

Jitanga jimwe jeji kuyanga kumafuchi eka mwomwo yakusaka jimbongo mangana vawahise chiyoyelo chavo. Oloze jitanga jimwe jeji kuyanga kumafuchi eka mangana vakazachile Kalunga, ngana muze alingile Apalahama naSala vakushikulu. (Kupu. 12:1-9) Achishinganyekenu nawa hali Mikhail napuwenyi Inga vakuUkraine vaze vayile nakuzachila kuRussia mu 2003. Omu vahetele kuze, vawanyine vatu vaze vapwile nakusaka kuvanangula muchano wamuMbimbiliya.

Mikhail ambile ngwenyi: “Lwola lumwe, twambulwilile mungalila muze kanda vambulwilengamo lyehi Vinjihoko. Kashinakaji umwe walunga asokolwele kuchikolo nakutuhulisa ngwenyi, ‘Uno enu mwapwa muvaka-kwambulula mujimbu tahi?’ Omu twetavile ngwetu eyo, ikiye ambile ngwenyi: ‘Ngwatachikijile ngwami likumbi limwe namukeza. Kacheshi kuhasa kupwa chakutamo mazu aYesu kuhona kutesamoko.’ Kaha uze lunga ahanjikile mazu atwama hali Mateu 24:14.” Mikhail atwalileho lika ngwenyi: “Mungalila kana twawanyinemo nawa mapwevo 10 vakuchachi vavuluka ngwavo Baptist vaze vasakilenga chikuma kulinangula muchano. Vapwile namukanda vavuluka ngwavo Live Forever, kaha kusongo yachalumingo hichalumingo vauzachishilenga kulinangula Mbimbiliya. Twakumbulwile vihula vyavo halwola lwalusuku, nakwimbila navo hamwe myaso yaWangana, nakulila navo hamwe vyakulya. Ungeji kana wapwile hichuma chize kangweshi kukavulyama mukuyoya chamiko.” Mikhail napuwenyi Inga vahanjikile ngwavo kuzachila kuze kuli nakusakiwa vaka-kwambulula Wangana chavakafwile vapandame chikuma kuli Yehova, nakuvalingisa vazange chikuma vatu, kaha Kalunga navakisula vasuuluke mukuyoya chavo. Makumbi ano jino vali nakuzata mulimo wakutambwojoka.

Mumwaka wa 2007, Yury napuwenyi Oksana vakuUkraine, vaze vali mumyaka yamuji 30, namwanavo Aleksey wamyaka yakusemuka 13 vatambukilile mutango wamulifuchi lyaRussia. Omu vahetele kuze, vamwene mapu yalifuchi lyaRussia yili nangalila yayinene yize kayapwile navaka-kuzata mulimo wakwambululako. Oksana ambile ngwenyi: “Omu twamwene ngalila kana, twatachikijile ngwetu yili nakusakiwa chikuma vaka-kwambulula Wangana. Ngocho, twalivwasanyine mangana tuyenga kulifuchi lyaRussia.” Vyuma vyeka muka vyavakafwile? Yury ambile ngwenyi: “Kutanganga vihande vyamumikanda yetu vize vyahanjika havyakuya nakuzachila kumafuchi eka chatukafwile chikuma. Twayile kuRussia mungalila yize vatulwezele kuofesi yamutango kuya nakwambulwila mangana tukatonde zuvo namilimo.” Kaha mu 2008, vayile kuRussia.

Kachapwile chachashi kuwana milimoko, kaha nawa kakavulu valukilenga mujizuvo jajivulu jakufwetela. Yury ambile ngwenyi: “Twalombelenga lwola lwosena mangana tuhone kuhomba, kaha twatwalilileho kuzata mulimo wetu wakwambulula hakufwelela ngwetu Yehova mwatukafwa. Twamwene omu Yehova atuzakaminenga hakuhaka Wangana wenyi kulutwe. Mulimo kanou wakolezezele tanga yetu.” (Mateu 6:22, 33) Uno kuya nakuzachila kuze kwapwile nakusakiwa vaka-kwambulula chakafwile ngachilihi mukweze Aleksey? Oksana ambile ngwenyi: “Kuya kuchihela kana chamukafwile chikuma. Alihanyine kuli Yehova nakumumbapachisa omu apwile namyaka yakusemuka 9. Omu amwene ngwenyi kuli nakusakiwa vaka-kwambulula Wangana vavavulu, alisuwile nakuputuka kulinga upayiniya wakukafwa hamakumbi akunoka kushikola. Tweji kwivwanga chikuma kuwaha hakumona omu azanga mulimo wakwambulula nakuuzata natwima.” Makumbi ano, Yury naOksana vapwa vapayiniya vakulipwila.

Nganomu vanahanjika ava vandumbwetu, kuya kujingalila jili nakusakiwa vaka-kwambulula chasakiwa mutu kufwelela chikuma Yehova. Chikupu vene, vandumbwetu vaze vanakuzata mulimo wakwambulula kuvihela kuze kuli nakusakiwa vaka-kwambulula, veji kumonanga ukalu wauvulu mujingalila jaungeji, oloze veji kuwahililanga chikuma hakwambulula mujimbu wamwaza kuvatu vaze vali nakwakula kanawa kumujimbu kana. Kutala muli nakusaka kuya nakukafwa vandumbwenu mulimo wakwaha kujingalila kuze kuli nakusaka chikuma vaka-kwambulula Wangana nyi? Nge namulinga ngocho, kaha nayenu namwivwa nge muze evwile ndumbwetu Yury, uze ahanjikile havyuma asakwile vyakuya nakuzachila kuchihela kuze kwapwile nakusakiwa vaka-kwambulula, ambile ngwenyi: “Vyuma ngweji kuliveyanga shina kukotokela kuputuka kuzata mulimo kanou.”