1, 2. (a) Vyuma muka natukalivwisa kuwaha muPalachise yahamavu? (Talenu muvwimbimbi wakulivanga.) (b) Kutokwa muka natukapwa nacho mukaye kakahya?

“KUYOYA CHAMWENEMWENE.” Kuli etu vavavulu, mazu kana eji kutwanukisanga vyalutalililo lwakukayoya haya myaka yosena muPalachise hano hamavu. Kaposetolo Paulu afwanyishile mazu “kuyoya chahaya myaka yosena” “kukuyoya chamwenemwene.” (Tangenu WaChimoteu 1, 6:12, 19.) Tuli nakuvandamina kuyoya chize nachikelilanga, chize nawa natukalivwisa kuwaha haya myaka yosena. Chapwa chachikalu kutachikiza omu natukevwa hakuhinduka namijimba yakulikangula hakumbi hakumbi. (Isa. 35:5, 6) Achishinganyekenu ocho kuwaha natukevwa hakulikata navatu vaze twazanga namasepa, navatu vaze navakasanguka. (Yowa. 5:28, 29; Vili. 24:15) Natukapwa nawa nakutokwa chakuhotola uhashi wetu muvyuma vyasayasi, namumyaso, namumilimo yakufunjejeka, namumilimo yikwavo yize nayikapwako.

² Numba tuhu tuli nakutalilila vyuma kanevi vyamwaza, oloze natukatokwa chikumanyi kushipilitu. Natukasuuluka hakutachikiza ngwetu lijina lyaYehova vanalilingisa kupwa lyajila, kaha wata wenyi nawa vanauhakwila. (Mateu 6:9, 10) Natukawahilila hakumona vyuma ajinyine Yehova hakavanga kutalisa kuvatu nakukaye vinatesamo. Achishinganyekenu omu natukapandama chikuma kuli Yehova  nge hinatuya nakuswenya kukukupuka nomu natukakupuka jino mwosena.—Samu 73:28; Yako. 4:8.

3. Vyuma muka twatela kulinga oholyapwa?

³ Tunahase kukalivwisa kuwaha vyuma kanevi, mwomwo Yesu atufwelelesa ngwenyi, “kuli Kalunga vyuma vyosena vyapwa vyavyashi.” (Mateu 19:25, 26) Nge tuli nakusaka kukayoya mukaye kakahya nakutwalaho lika kuyoya kuhambakana haMyaka Likombakaji yaChiyulo chaKulishitu, kaha twatela kukilikita oholyapwa ‘nakulinjilila’ kukuyoya chahaya myaka yosena. Twatela kuvandamina kukuma chakatwamino kakapi kamyaka yino. Kaha nawa twatela kulinga vyuma vyamwaza oholyapwa mangana tukayoyele mukaye kakahya. Tunahase ngachilihi kulinga ngocho hakuwana nge tuchili lika nakuyoyela mukaye kano kakapi?

4. Lumbununenu vyuma twatela kulinga oholyapwa mangana tukayoye mukaye kakahya.

⁴ Vyuma muka twatela kulinga oholyapwa mangana tukayoye mukaye kakahya kaze ashika Kalunga? Chakutalilaho, achishinganyekenu nge tuli nakusaka kuya nakukatwama kulifuchi lyeka. Vyuma muka twatela kulinga? Tunahase kuputuka kulinangula lilimi lyavatu vakulifuchi kana nachisemwa chavo. Kaha nawa tunahase kumakila kuvyakulya vimwe veji kulyanga. Ngocho natuputuka jino kuyoya ngana muze veji kuyoyanga vatu vakulifuchi kana, mwomwo omu mukiko natukayoya nge tunahete lyehi kuze. Chochimwe nawa, makumbi ano twatela kuyoya mujila yize nayisolola nge tuli lyehi nakuyoyela mukaye kakahya. Talenu havyakutalilaho vino.

5, 6. Kwononoka kuvyuma nalongesa Kalunga muliuka lyenyi nachitukafwa ngachilihi mangana tukayoyele mukaye kakahya?

⁵ Mukaye kakahya, wata waKalunga navakaukundwiza chikuma. Oloze omu keshi mukiko vaumona mukaye kano kakulimanyina kaze katwama mungolo jaSatanako. Vatu vavavulu vasaka kulimanyina nakutakilika munayi michima yavo. Oloze jino vyuma muka vinafumumo? Hakuwana nge vatu vavavulu vanakane kuvatwaminyina kuli Kalunga, chuma kanechi chinanehe kuyanda, navihuli, navyuma vyeka vyavipi. (Yele. 10:23) Tuli nakutalilila kulwola luze vatu vosena navakaliluula kuwata waYehova.

⁶ Natukalivwisa kuwaha vyuma mwakalongesa Yehova mukaye kakahya omu natukawahisa mavu, nakunangula vaze navakasanguka, nakulinga vyuma ajina Yehova. Uno natukalinga ngachilihi nge vanakatuhana kuzata mulimo uze katwazangileko? Kutala natukononoka nakulisuula kuuzata nangolo jetu josena tahi? Etu vavavulu tunahase kukumbulula ngwetu, eyo. Kutala oholyapwa tuli nakulisuula nakukavangiza vyuma vanakutulweza kuliuka lyaKalunga nyi? Nge natulinga ngocho, kaha nachisolola nge tuli nakusaka tukayoyele muchiyulo chaYehova haya myaka yosena.

7, 8. (a) Mwomwo ika twatela kupwa namuchima wakuzachila hamwe navandumbwetu? (b) Vyuma vimwe muka vinalumuka kuli vaka-Kulishitu vamwe? (c) Vyuma muka twatela kufwelela kutalisa kuchiyoyelo chetu hano hamavu mukaye kakahya?

⁷ Hakusaka tukayoyele mukaye kakahya, katwatela kaha kwononoka kuvyuma nalongesa Yehova oholyapwako, oloze twatela nawa kukilikita tupwenga namuchima wakusuuluka navyuma tuli navyo, nakuzachila hamwe navandumbwetu makumbi ano. Nge natuzachila hamwe navaze vali nakututwaminyina makumbi ano, nakusuuluka hakuzata milimo yeka navatuhana, kaha nachikapwa chachashi kukapwa namuchima kanou mukaye kakahya. (Tangenu WavaHepeleu 13:17.) VaIsalele vavapangilile uswana wavo muLifuchi lyaLushiko hakuzachisa tutachikijilo. (Kula. 26:52-56; Yoshu. 14:1, 2) Makumbi ano, katwatachikiza chihela mwakatwama mutu himutu mukaye kakahyako. Ngocho, kuzachila hamwe navandumbwetu nachikatukafwa tukasuuluke nakupwa vakuwahilila chikuma omu natukalinga mwaya muchima  waYehova kukala chihela natukatwama hano hamavu halwola luze.

⁸ Kutokwa chakukatwama muchiyulo chaWangana waKalunga chatela kutulingisa tuzachile hamwe naliuka lyaYehova nakuzata nangolo milimo navatuhana muliuka lyenyi. Tuyokutuyoku nawa, chiyoyelo chetu chinahase kwalumuka. Chakutalilaho, vandumbwetu vamwe vaze vazachililenga haMbetele yamuUnited States vavahanyine milimo yeka yakuya nakwambulula muwande, kaha oholili jino vali nakulivwisa kuwaha mulimo washimbu yosena muwande. Kaha veka nawa vaze vapwilenga tulama vakutambwojoka vanavalweze kuya nakuzata mulimo waupayiniya wakulipwila mwomwo yaushinakaji navyuma vyeka vize vinalumuka muchiyoyelo chavo. Nge natupwa namuchima wakusuuluka navyuma tuli navyo, nakulomba Kalunga atukafwe, nakuzata nangolo mulimo mwatuhana, kaha natupwa tuvatu vakusuuluka nakuwahilila muvyuma vyavivulu numba tuhu tuli nakutwama mumakumbi akukuminyina, amakalu. (Tangenu Vishimo 10:22.) Nyi ngachilihi vyuma twatalilila kulutwe? Tunahase kushinganyeka okwo tuli nakusaka kukatwama mukaye kakahya, oloze pamo vanahase kukatulweza kuya nakutwama kuchihela cheka. Kala milimo navakatuhana kuzata nakweshokwo natukazachila, chachinene shina kusolola muchima wakusakwilila nakusuuluka, nakupwa vakuwahilila havyuma kana.—Nehe. 8:10.

9, 10. (a) Muvyuma muka twatela kukapwa namuchima wakutalilila chikoki mukaye kakahya? (b) Natusolola ngachilihi nge tukwechi muchima wakutalilila chikoki?

⁹ Mukaye kakahya, twatela kukapwa namuchima wakutalilila chikoki. Chakutalilaho, tunahase kukevwa vatu vamwe navahanjika nakuwahilila ngwavo vausoko wavo namasepa javo vanavasangula kuvafu. Oloze etu pamo twatela kuvandamina kusanguka chavaze twazanga. Ngocho twatela kuwahilila navakwetu vaze vakwechi vausoko wavo vanasanguka, nakupwa namuchima wakutalilila chikoki. (Loma 12:15) Nge natupwa namuchima wakutalilila chikoki kutesamo chajishiko jaYehova oholyapwa, kaha nachikatukafwa kupwa namuchima wakutalilila chikoki namukaye kakahya.—Kwambu. 7:8.

¹⁰ Hakusaka tukayoyele mukaye kakahya, twatela kupwa namuchima wakutalilila chikoki kutalikisa kumuchano vali nakulumbununa oholyapwa. Kutala tukwechi muchima wakutalilila chikoki omu vali nakulumbununa muchano wamuMbimbiliya chindende chindende makumbi ano nyi? Nge mukiko, kaha natukachiwana kupwa chachashi kusolola muchima kanou mukaye kakahya omu Yehova mwakatulweza vyuma navikasakiwa.—Vishi. 4:18; Yowa. 16:12.

11. Vyuma muka ali nakutunangula Yehova makumbi ano hakutwama navakwetu, kaha chuma kana nachikatunganyalisa ngachilihi mukaye kakahya?

¹¹ Hakusaka kukayoyela mukaye kakahya, twatela nawa kupwa namuchima wakukonekelanga vakwetu. Omu natukayoyela muChiyulo chaKulishitu chaMyaka Likombakaji, vaka-kwoloka navaka-kuhenga navakakupukanga chindende chindende. (Vili. 24:15) Kutala natukahasa kukalikonekelanga navakwetu halwola luze tahi? Nge oholyapwa tuli namuchima wakukonekela vakwetu nakuhona kuvalamina koko, kaha nachikapwa chachashi kulinga ngocho halwola kana.—Tangenu Wavaka-Kolose 3:12-14.

12. Lumbununenu omu kuyoya chetu oholyapwa chakwata hakuyoya chetu chakulutwe.

¹² Kuyoyela mukaye kakahya kachalumbununa nge lwola lwosena tunahase kukapwa navyuma vize natukasaka kupwa navyoko. Oloze kala mweshomwo navikapwa vyuma, twatela kukapwa namuchima wakusakwilila nakusuuluka navyuma navakatuhana hakuliluula chetu kuwata waYehova. Ngocho twatela kwitavila vyuma kanevi ali nakutunangula Yehova makumbi ano. Kuyoya oholyapwa mujila yize nayisolola omu natukayoya mukaye kakahya, nachitukafwa tupwenga navilinga vize navikasakiwa haya myaka yosena. Tujikijisenu lufwelelo lwetu oholyapwa kutalisa  “[ku]kaye kaze nakakeza kulutwe.” (Hepe. 2:5; 11:1) Kaha nawa tusololenu muchima wakufwila kukatwama mukaye kakahya katwamiso yakwoloka hano hamavu. Chikupu vene, twatela kulinga vyuma kana mangana tukayoyele mukaye kakahya kaKalunga haya myaka yosena.

13. Vyuma muka natukamona kupwa vyavilemu chikuma mukaye kakahya?

¹³ Tuchishimutwilenu hachakutalilaho chikwavo chize nachisolola vyuma twatela kulinga mangana tukapwe nakuyoya chamwenemwene kulutwe. Chakutalilaho, numba tuhu vatushika kukapwa navyakulya vyavivulu navyuma vyeka mukaye kakahya, oloze natukalivwisa chikuma kuwaha vyuma vyakushipilitu. (Mateu 5:3) Natukamona vyuma vyakushipilitu kupwa vyavilemu chikuma mukuyoya chetu, kaha nawa natukasolola nge twevwila kuwaha Yehova. (Samu 37:4) Kumona vyuma vyakushipilitu kupwa vyavilemu chikuma makumbi ano, nachitukafwa tutalilile kuyoya chamwenemwene chakulutwe.—Tangenu Mateu 6:19-21.

14. Vyuma muka vyakushipilitu vize vakweze vanahase kulinga mangana vatalilile kuyoya chahaya myaka yosena?

¹⁴ Mujila muka tunahase kusolola nge twazanga chikuma milimo yakushipilitu? Jila yimwe shina kufwila kulinga vyuma vyakushipilitu. Nge uchili umukweze, kaha uli nakushinganyeka kuzachila Yehova, hituluka muvihande vimwe vize vyasolola vyuma vyakulisezaseza vize unahase kulinga mumulimo washimbu yosena. * Unahase kuhanjika kuli vatu vamwe vaze vanazate myaka yayivulu mumulimo washimbu yosena. Nge naufwila kuzata mulimo wakwambulula, kaha uli nakufwila kukazata mulimo waKalunga mukaye kakahya muze naukanganyala chikuma havyuma unalinangula.

15. Vyuma muka vyakushipilitu vize vanahase kulinga vaka-kwambulula Wangana?

¹⁵ Hakupwa tuvaka-kwambulula Wangana, vyuma muka vyakushipilitu twatela kulinga? Tunahase kufwila kuhotola uhashi wetu mujila yimwe yakwambulwilamo. Chipwe tunahase kuwahisa uhashi wetu wakufwila kwivwishisa jindongi jamuMbimbiliya namwakujizachishila. Kaha nawa tunahase kuhotola uhashi wetu wakutanga kuvatu vavavulu, nakuhanjika vihande hautenda nakuhanjikaho hakukunguluka. Munahase nawa kushinganyekako jijila jikwavo enu vavene. Chishina tuli nakushindakanya shina echi: Kufwila kulinga vyuma vyakushipilitu nachimijikijisa mupwenga natwima yakufwila kuzata milimo yamuliuka lyaKalunga, kahechi nachikamikafwa mukaye kakahya.

16. Mwomwo ika natwambila ngwetu kuzachila Yehova chikiko chuma chachilemu mukuyoya chetu?

¹⁶ Uno kuzachisa lwola lwetu kumilimo yakushipilitu  mangana tukayoyele mukaye kakahya kaKalunga chalumbununa nge tuli nakwenyeka chiyoyelo chamwaza chamakumbi ano tahi? Nduma. Kuzachila Yehova mukuyoya chetu chosena chikiko chuma chachilemu chikuma. Katweshi nakuzachila Kalunga kaha mangana tukayovoke kuluyando lwaluneneko, nduma. Oloze vatutenga tuzachilenga Kalunga mangana tuwahilile mukuyoya chetu chosena. Chapwa chachilemu kututwaminyina kuli Yehova nakutusolwela zangi yenyi yakwilila, kuhambakana kuliyoyela kaha etu vavene. (Tangenu Samu 63:1-3.) Oloze katwatela kuvandamina kaha kaye kakahya numba vakatukisule kushipilituko, mwomwo noholyapwa vene vali nakutukisula. Chikupu vene, kuzachila Yehova namuchima wetu wosena cheji kulingisanga vatukisule. Etu vamwe vanatukisula hamyaka yayivulu mwomwo yakuzachila Kalunga, ngocho tunatachikiza ngwetu kakweshi chuma cheka tunahase kulinga chize chinahase kutusuulwisa chikuma mukuyoya chetuko.—Samu 1:1-3; Isa. 58:13, 14.

17. Vyuma muka natukalinga muPalachise hakusaka tukalihizumune nakulinga vyuma twafwila?

¹⁷ Vyuma twafwila mukuyoya chetu navize vyeji kutwivwisanga kuwaha navikiko navikapwamo mukaye kakahya kaKalunga. Chikupu vene, vyuma kana navikapwako mwomwo Yehova atutenga namuchima wakufwila kutesamo vyuma twasaka nakulihizumuna. Nge kasaka tulivwise kuwaha vyuma kanako, kachi katutengele namuchima kanouko. (Kwambu. 2:24) Omu mukiko nachikapwa namuvyuma vyeka, mwomwo Yehova lwola lwosena asaka “kwikuchisa vyuma vyakuyoya vyosena.” (Samu 145:16) Kulihizumuna nakulivwisa kuwaha hivyuma vize vinahase kutusuulwisa mukuyoya chetu, chikumanyi nge twatwama nausoko wamwaza naYehova. Omu mukiko nachikapwa namuPalachise yahamavu. Ngocho, kulihizumuna nakulinga vyuma vize twafwila mukuyoya chetu kachapwa chakuhengako, chikalu kaha kutunavangila kutondatonda Wangana nakuhaka muchima kuvyuma vyakushipilitu vili muliuka lyaYehova.—Mateu 6:33.

18. Mujila muka tunahase kuliwahisa mangana tukayoye haya myaka yosena muPalachise?

¹⁸ MuPalachise, natukawahilila chikuma mujila yize kanda tuwahililengaho lyehi mukuyoya chetu chosena. Shikaho, jila tuli nakuliwahishilamo oholyapwa nayisolola nge tuli namuchima wakufwila kukapwa nakuyoya chamwenemwene. Tufwilenu kulondezeza vilinga vyaKalunga nakupwa vakuwahilila omu tuli nakwazana natwima mumulimo wakwambulula Wangana uze vatuhana kuzata. Twatela kuwahilila chikuma hakupwa namuchima wakufwila kulinga vyuma vyakushipilitu. Ngocho tufwelelenu chikuma vyuma atushika Yehova nakutwama mujila yize nayisolola nge tuli nakuvandamina kukayoyela mukaye kakahya.