Vyuma Muka Natulinangula Kuli Yowana?
VATU vavavulu vatachikiza ngwavo Yesu apwile navaposetolo 12. Oloze pamo kavatachikiza ngwavo hali tumbaji twenyi hapwile namapwevoko. Yowana apwile hali ava mapwevo kana.—Mateu 27:55; Luka 8:3.
Vyuma muka alingile Yowana kutalisa kumulimo waYesu, kaha natulinangula ika kuli ikiye?
YOWANA APWILE IYA?
Yowana apwile “pwevo lyaKuza muka-kulama vyuma vyaHelote.” Kuza pamo apwile kaselwa wakutala kuvyuma vyaHelote Andepa. Yowana naikiye apwile hali mapwevo vavavulu vaze okile Yesu. Kaha nawa Yowana apwile hamwe namapwevo vaze vakavangijilenga Yesu navaposetolo jenyi.—Luka 8:1-3.
Valapi vavaYuleya vanangwilenga nge mapwevo kavatela kushimutwilanga namalunga vaze kavapwa vausoko wavo chipwe vene kutambukila hamwe navoko. Malunga vavaYuleya kavahanjikilenga chikuma namapwevoko. Oloze Yesu etavilile Yowana namapwevo veka vamukavangizenga, ngocho akanyine kwitavila vishinganyeka vyavaYuleya.
Yowana ahakile kuyoya chenyi muponde hakulikata naYesu navaposetolo jenyi. Vatu vosena vaze vasakile kumukavangiza vatelele kwalumunako vyuma vimwe mukuyoya chavo. Yesu ahanjikile kutalisa kuli ava vaka-kumukavangiza ngwenyi: “Mama navandumbwami shina ava veji kwivwililanga mazu aKalunga nakuwakavangiza.” (Luka 8:19-21; 18:28-30) Chikupu vene, cheji kumikolezezanga hakutachikiza ngwenu Yesu eji kupandamanga kuli vaze veji kulisuulanga nakumukavangiza.
AZACHISHILENGA VYUMA VYENYI HAKUZACHILA VAKWAVO
Yowana namapwevo veka vavavulu vazachishilenga “vyuma vyavo” hakuzachila Yesu navaposetolo jenyi 12. (Luka 8:3) Muka-kusoneka umwe ambile ngwenyi: “Luka kalumbunwine nge vaze mapwevo vawahishilenga vyakulya, nakukosa malonga, nakutongatonga uvwaloko, nduma. Numba nge vazachile milimo kana . . . , oloze omu keshi mukiko atalikishile Lukako.” Chasoloka nge mapwevo kana vazachishilenga jimbongo javo, navikumba vyavo mangana vakafwe masepa javo.
Halwola Yesu navaposetolo jenyi vazachilenga mulimo wakwambulula, kavazachilenga milimo yeka yakumujimbako. Ngocho kavahashile pamo kuwana jimbongo jakulanda vyakulyako navyuma vyeka vize vyasakiwile kulizavu lyavatu kafwe 20. Numba tuhu vavatambwilenga nalikoji, oloze Kulishitu navaposetolo jenyi vambachilenga “chikasha chajimbongo,” kulumbununa nge kavapendaminyinenga kaha hakuvakafwa kuli vandumbwavoko. (Yowa. 12:6; 13:28, 29) Yowana namapwevo veka atela vahanyinenga wana uze wakafwilenga Yesu navaposetolo jenyi.
Vatu vamwe vakana ngwavo mapwevo vavaYuleya kaveshi kuhasa kupwa navikumba vize vyavahanyinenga jimbongoko. Oloze mijimbu vasonekele kuli vatu vaze vapwilengako mumakumbi aYowana yasolola nge mapwevo vamwe vavaYuleya atela vawanyinenga jimbongo mujijila jino: (1) nge ise kapwile navana vamalungako, kaha amusezelele uswana hakufwa chenyi, (2) nge valingile jakumuhana, (3) nge natambula jimbongo jize vamutomenene kumufweta nge vanamulukulula kuli lunga lyenyi, (4) nge vanamusela jimbongo kuli lunga lyenyi uze nafu, chipwe (5) nge najiwane muvyuma azachilenga.
Chakuzeneka kuhuhwasana, vaka-kukavangiza Yesu navakiko vahanyinenga kala wana uze vapwile nawo. Atela havatu vaze vamukavangijilenga hapwile namapwevo valuheto. Hakuwana nge Yowana apwile pwevo lyakaselwa kaHelote, vatu vamwe vakukulula ngwavo apwile naluheto. Pamo ikiye ahanyine Yesu uvwalo wandando yayinene wakuhona munungo. Muka-kusoneka umwe ahanjikile ngwenyi uvwalo kana “kaveshi kuhasa kuulanda kuli pwevo lyamuka-kuta vaishiko.”—Yowa. 19:23, 24.
Visoneka kavyasolola hatoma nge Yowana ahanyine jimbongo kupwa wanako. Oloze alingile vyuma vize ahashile kweseka nangolo jenyi, kaha tunahase kulinangulako vyuma vimwe. Chili kuli yetu kusaka kuhana mawana akukundwiza Wangana chipwe chiku. Chuma chachilemu kuli Kalunga shina kulinga vyuma vize tunahase namuchima wakusuuluka.—Mateu 6:33; Mako 14:8; Koli. 2, 9:7.
HAKUFWA CHAYESU NAHAKUSANGUKA CHENYI
Chasoloka nge omu vajihile Yesu, naYowana kwapwile hamwe namapwevo “vaze vamukavilenga nakumuzachila omu apwile muNgalileya, namapwevo veka vavavulu vaze vakandukile nenyi kuYelusalema.” (Mako 15:41) Kahomu vafumishile mujimba waYesu hachitondo chakuyanjishila mangana vakaufunde, “mapwevo vaze vejile nenyi hakufuma kuNgalileya, vakavangijile munyima, kaha vamwene chize chimbumbe, nomu vasavalikile mujimba wenyi, kaha vakindulukile vakawahise vyuma vyalivumba lyamwaza namaji alivumba.” Ava mapwevo vakindulukile kuchimbumbe hanyima yasambata, kaha vamwene vangelo vaze vavalwezele vyakusanguka chaYesu. Luka avulukile majina avo ngwenyi vapwile “Maliya Mangatala, naYowana, naMaliya naye yaYakova.”—Luka 23:55–24:10.
Yowana namapwevo veka vaka-kwitava vazachililenga Mwata wavo kweseka noho hakuminyinyine ngolo javo
Chasoloka nge Yowana apwile hamwe natumbaji, nanaye yaYesu, navandumbwenyi vamalunga vaze valikungulwilile hamwe kuYelusalema haPendekoseta 33 C.E. (Vili. 1:12-14) Hakuwana nge Yowana vamumbachile kuli lunga uze azachililenga kuchipango chamwangana, atela ikiye alwezele Luka mijimbu yakuvuluka Helote Andepa, mwomwo Luka kaha ikiye avuluka lijina lyaYowana muMikanda yaMujimbu Wamwaza.—Luka 8:3; 9:7-9; 23:8-12; 24:10.
Mujimbu waYowana watunangula vyuma vyavilemu. Azachilile Yesu kweseka noho hakuminyinyine ngolo jenyi. Atela Yowana awahililile chikuma hakutachikiza ngwenyi mawana ahanyinenga akafwile Yesu, navaposetolo jenyi 12, natumbaji veka vahase kuheta kuvihela kuze vambulwililenga mujimbu. Yowana azachililenga Yesu, kaha nawa apwile wakushishika kuli ikiye nahalwola ahichilenga muvyeseko. Mapwevo vaka-Kulishitu vatela kulondezeza muchima wenyi wamwaza wakusaka kukundwiza vyuma vyaKalunga.