MIJIMBU YETU YAYILEMU YAKUNYIMA
“Yehova Aminehele Kuno kuFrance Mangana Mulinangule Muchano”
OMU Antoine Skalecki apwile kanyike, apwilenga nakavalu kenyi uze azangilenga chikuma. Atambukilenga nakavalu kenyi jitunda jajisuku mumena akumikochi kafwe jimita 500 mumavu, oku vanambate makala amavulu. Ise yaAntoine avulumukile omu mukochi washiukile, ngocho vatuminenga jino Antoine ayenga nakuzata kumukochi hajiola 9 hakumbi hakumbi. Likumbi limwe Antoine ambile kufwa mumukochi kwishi yamavu.
Vinoma vazachishilenga vaka-Poland vaze vazachilenga mumikochi, namukochi waDechy uze azachililenga Antoine Skalecki uze wapwilile kwakamwihi naSin-le-Noble
Antoine apwile havana vavavulu vaze vasemukilile muFrance, vaze vapwile navisemi javo vafumine kuPoland muji 1920 naji 1930. Mwomwo ika vaka-Poland vejilililenga kuFrance? Omu vaka-Poland vatambwile chiyulo chalifuchi lyavo hakukuma chaJita yaKaye I, vatu vavulile chikuma mulifuchi kana. Oloze vatu muFrance vakehele chikuma mwomwo vavavulu vafwile kujita, ngocho vasakilenga chikuma vatu vakuzata kumikochi yakufula makala. Shikaho muSeptember 1919, fulumende yaFrance yalivwasanyine nafulumende yaPoland mangana vatu vahase tuhu kwaluka nakutwama mulifuchi lyaFrance. Kuheta mumwaka wa 1931, vaka-Poland vavulile kuheta ku 507,800 muFrance, kaha veka vaputukile kutwama kuvihela vyakwakamwihi namikochi yakunote.
Vaka-Poland valukile navisemwa vyavo nakwitava chavo. Antoine uze jino ali namyaka yakusemuka 90 ambile ngwenyi: “Kaka Joseph ahanjikilenga chikuma haVisoneka Vyajila vize vamunangwile kuli ise.” HaSondo, jitanga javaka-Poland jize jatwaminenga kumikochi javwalilenga uvwalo wamwaza nakuya kuchachi ngana muze valingilenga kulifuchi lyavo, kahechi chevwishilenga kupihya venyalifuchi vaka-France.
Vaka-Poland vavavulu valiwanyine naVaka-Kulinangula Mbimbiliya muNord-Pas-de-Calais, vaze vambulwilenga natwima mungalila kana putu vene mu 1904. Kuputuka mu 1915, vaputukile kupulita Kaposhi Kakutalila mulilimi lyaPolish kakweji hikakweji, kaha mangazini yaThe Golden Age (yize vanakuvuluka jino ngwavo Tonenu!) vaputukile kuyalumuna mulilimi kana mu 1925. Jitanga jajivulu jetavilile vyuma vyamuVisoneka vize vasonekele mujimangazini kana, kuhakilako vene navyuma vasonekele mumukanda waThe Harp of God mulilimi lyaPolish.
Natu yaAntoine ikiye alwezele tanga yavo vyaVaka-Kulinangula Mbimbiliya, uze ayile kukukunguluka chatete mu 1924. Mumwaka vene uze, Vaka-Kulinangula Mbimbiliya vapwile nakukunguluka chachihanda chatete mulilimi lyaPolish muBruay-en-Artois. Omu mwahichile makumbi amandende kaha, munganda kana mwejile muka-kwimanyinako chikota chaVaka-Kulinangula
Mbimbiliya, Joseph F. Rutherford. Kaha vatu 2,000 vejile kukukunguluka kana. Ndumbwetu Rutherford hakumona lizavu lyalinene lyakungulukile, lize lyapwile navatu vakuPoland vavavulu, ambile ngwenyi: “Yehova aminehele kuno kuFrance mangana mulinangule muchano. Oholyapwa jino enu navana venu mwatela kukafwa vaka-France. Mulimo wakwambulula uchili lika nakusakiwa kuuzata, Yehova mwavulisa vaka-kwambulula mangana vazate ou mulimo.”Kaha Yehova Kalunga avulishile chikupu vaka-kwambulula. Ava vaka-Kulishitu vahanjika lilimi lyaPolish vazachilenga nangolo mulimo wakwambulula ngana muze vazachilenga nangolo kumikochi. Vamwe vakindulukile kulifuchi lyavo kuPoland mangana vakambulwileko vakwavo muchano wavyuma vyavilemu valinangwile. Ndumbwetu Teofil Piaskowski, naSzczepan Kosiak, naJan Zabuda navakiko vapwile hali vaze vafumine kuFrance nakukinduluka mangana vakatandakanyise mujimbu wamwaza mujingalila jajivulu jamuPoland.
Oloze vaka-kwambulula vavavulu vaze vazachishilenga lilimi lyaPolish vasalile muFrance, kaha vatwalileho lika kwambulula natwima hamwe kaha navandumbwavo muFrance. Hakukunguluka chize chapwileko mu 1926 muSin-le-Noble, vatu 1,000 vapwile kukukunguluka mulilimi lyaPolish, kaha vatu 300 mulilimi lyaFrench. Mukanda wa 1929 Yearbook wambile ngwawo: “Mumwaka kana, vandumbwetu vahanjika lilimi lyaPolish vakuheta ku 332 valihanyine nakuvambapachisa.” Shimbu kanda Jita yaKaye II yiputuke, muFrance mwapwile vikungulwilo 84, kaha hali evi vikungulwilo hapwile vikungulwilo 32 vyazachishilenga lilimi lyaPolish.
Vandumbwetu vaka-Poland muFrance vali nakuya kukukunguluka changalila. Chinjikizo chakwamba ngwacho “Vinjiho jaYehova”
Mu 1947, Vinjiho jaYehova vavavulu vetavilile kukinduluka kuPoland omu fulumende yalifuchi kana yavalwezele vakinduluke. Numba tuhu vavavulu vakindulukile kulifuchi lyavo, oloze kukilikita chavo hamwe kaha navandumbwavo vakuFrance chasolokele hatoma omu vaka-kwambulula Wangana vavulilileko najipaseti 10 mumwaka kana. Kaha mumwaka wa 1948 nakuheta ku 1950, vaka-kwambulula vavulilileko chikuma. Hakusaka kukafwa ava vaka-kwambulula vavahya, mutango wakuFrance watongwele tulama vakujinguluka vatanu vatete mu 1948. Kaha hali vaze tulama vakujinguluka vatanu vatongwele, vawana vapwile vaka-Poland, kaha hapwile naAntoine Skalecki.
Vinjiho jaYehova vavavulu muFrance vachili lika nakuzachisa majina avakakuluka javo vakuPoland vaze vazachilenga nangolo mumikochi namumulimo wakwambulula. Namakumbi ano nawa, vaka-Poland vali nakulinangula muchano muFrance. Numba tuhu vaka-kwambulula vakufuma kumafuchi eka navakinduluka kumafuchi avo nyi chiku, oloze veji kulondezezanga vakakuluka javo vakuPoland vaze vambulwilenga Wangana natwima.—Mijimbu yetu yayilemu yakunyima mu France.