Vandaminenunga!
“Numba nge nachishimbula, oloze chivandaminenga.”—HAMBA. 2:3.
MYASO: 128, 45
1, 2. Muchima muka vanapunga nawo vaka-kulemesa Yehova hamyaka yayivulu?
HAMYAKA YAYIVULU, vaka-kulemesa Yehova vanapunga namuchima wakuvandamina kutesamo chaupolofweto vahwima. Chakutalilaho, Yelemiya apolofwetele ngwenyi Yuta navakayinongesa, kaha chikupu vene vyuma kana vyasolokele omu vaka-Mbavilone vayilukukile mu 607 B.C.E. (Yele. 25:8-11) Isaya naikiye vamuhwiminyinyine kuli Yehova apolofwete vyakukindulwisa vaze vayile muundungo, ambile ngwenyi: “Vawahilila vaze veji kumuvandaminanga.” (Isa. 30:18) Mika nawa uze apolofwetelenga vyavangamba jaKalunga vakushikulu naikiye ambile ngwenyi: “Nangutalililanga Yehova.” (Mika 7:7) Hamyaka yayivulu, vangamba jaKalunga vanavandaminanga nawa kutesamo chaupolofweto wakutalisa kuli Meshiya, chipwe ngwetu Kulishitu.—Luka 3:15; Petu. 1, 1:10-12. *
2 Namakumbi ano nawa, vangamba jaKalunga navakiko vanavandaminanga kutesamo chaupolofweto wakuvuluka Meshiya uze uchili lika nakutesamo. Kuhichila muWangana wauMeshiya, Yehova kalinwomu akumise ukalu vali nakumona vatu hakunongesa vaka-kuhuka, nakuyovola vangamba jenyi mukaye kano ali nakuyula Satana. Yowa. 1, 5:19) Shikaho tupwenunga lika vakutona nakutachikiza ngwetu kukuma chakatwamino kamyaka yino chili chikuma hakamwihi.
(3. Chihula muka tunahase kulihulisa kachi nge tunavandaminanga kukuma chakano kaye hamyaka yayivulu?
3 Etu vangamba jaYehova twafwila kumona mwaya muchima waKalunga “mulingiwe mwilu, nahamavu nawa.” (Mateu 6:10) Omu tuli nakutalilila lika kukuma chakatwamino kamyaka yino kaze kali nakusoloka nge kali nakushimbula, vamwe vanahase kuhuhwasana nakuhulisa ngwavo, ‘Uno chakutamo kuvandaminanga lika tahi?’ Tuchitalenu jino.
MWOMWO IKA TWATELA KUVANDAMINANGA?
4. Mwomwo ika twatela kupwila lika vakutona?
4 Mbimbiliya yahanjika hatoma muchima twatela kupwa nawo omu tuli nakuvandamina kukuma chakatwamino kamyaka yino chize chili hakamwihi. Yesu alwezele vaka-kumukavangiza ngwenyi ‘vatonenga’ nakupwa ‘vakuvanguluka.’ (Mateu 24:42; Luka 21:34-36) Chikupu vene, twatela kupwa namuchima wakuvandamina, mwomwo Yesu atulweza tulinge ngocho. Liuka lyaYehova linahane chakutalilaho chamwaza hachuma kanechi. Mikanda vanasonekanga kuliuka lyetu yinatukolezeza tuvandamine “nakwanuka kupwako chalikumbi lyaYehova,” nakutalilila kaye kakahya kaze atushika Kalunga.—Tangenu WaPetulu 2, 3:11-13.
5. Mwomwo ika chapwila chachilemu chikuma kupwa vakutona makumbi ano?
5 Numba tuhu vaka-Kulishitu vakushikulu vatelele kupwa namuchima wakuvandamina, oloze chuma kana chachilemu chikumanyi kuli etu. Mwomwo ika? Mwomwo tuli nakuyoyela mumakumbi akupwako chaKulishitu. Vinjikizo vyakupwako chenyi vinasolokanga kuputuka vene mu 1914. Vyuma vyavipi vili nakuya nakupihilako lika, kaha nawa kwambulula mujimbu waWangana chinakutohwelako lika mukaye kosena, ngocho vyuma kana vili nakusolola nge tuli nakuyoyela “[mu]chikukulwishi chakatwamino kamyaka yino.” (Mateu 24:3, 7-14) Hakuwana nge Yesu kahanjikile lwola yatela kukuma yize tando shimbu kanda kukuma chamyaka yino chizengako, twatela kupwa vakuvanguluka nakutona.
6. Mwomwo ika twatela kufwelela ngwetu vyuma navipihilangako lika omu tuli nakupandama kukukuma chakano kaye?
6 Tunahase kulihulisa ngwetu: Kutala “chikukulwishi chakatwamino kamyaka yino” kachatalisa kulwola lwakulutwe omu vyuma navikapihilako chikuma muno mukayeko nyi? Mbimbiliya yasolola hatoma nge “hamakumbi akukuminyina” vilinga vyavipi navikavulilako chikuma. (Chimo. 2, 3:1, 13; Mateu 24:21; Kuso. 12:12) Shikaho, twatela kufwelela ngwetu vyuma vinapihi lyehi chikuma nganomu tunamono, kaha nawa navipihilangako lika.
7. Mukanda waMateu 24:37-39 wahanjika vyuma muka kutalisa kumakumbi akukuminyina?
7 Uno munashinganyeka nge vyuma vyavipi vyatela kupwa ngachilihi shimbu kanda “luyando lwalunene” luputuke? (Kuso. 7:14) Chakutalilaho, uno mwashinganyeka ngwenu mumafuchi osena namukapwa jijita, vatu vosena nawa kaveshi kukawana vyakulyako, kaha nawa mujitanga josena namukapwa kuviza nyi? Nge nachikapwa ngocho, kaha navatu vaze kavafwelela Kalungako navaketavila hatoma ngwavo upolofweto wamuMbimbiliya uli nakutesamo. Oloze Yesu ambile ngwenyi vatu vavavulu kaveshi ‘kukahaka mangana’ kupwako chenyiko, navakatwalililaho kulizachila milimo yavo yahakumbi hakumbi palanga nomu kukuma nachikavawana. (Tangenu Mateu 24:37-39.) Ngocho, Visoneka kavyasolola nge hamakumbi akukuminyina vyuma mukaye navikapihya chikuma nakuheta jino haseteko yize nayikalingisa vatu vosena vaketavile ngwavo kukuma jino chili hakamwihiko, nduma.—Luka 17:20; Petu. 2, 3:3, 4.
8. Vyuma muka vatela kutachikiza vaze veji kwononokanga lushimbi lwaYesu lwakupwa ‘lika vakutona’?
8 Tuyokutuyoku nawa, kutesamo chavinjikizo vyakupwako chaYesu vyatela kukafwa Mateu 24:27, 42) Omu mukiko chinapunga putu vene mu 1914. Kufuma vene halwola kana, vinjikizo vyakusolola nge tuli mumakumbi akukuminyina vinapunga lika nakutesamo. Chikupu vene, tuli nakuyoyela mumakumbi “[a]chikukulwishi chakatwamino kamyaka yino,” kulumbununa katando kakutwala kukunonga chakatwamino kano kakapi.
vatu vaze veji kwononokanga Yesu vapwenga ‘lika vakutona.’ (9. Mwomwo ika twatela kuvandamina lika kukuma chakatwamino kamyaka yino?
9 Mwomwo ika vaka-Kulishitu makumbi ano vatela kuvandamina lika? Tweji kuvandaminanga lika mwomwo yakwononoka Yesu Kulishitu. Kaha nawa twatachikiza vinjikizo vyakupwako chenyi. Kuvandamina chetu kachapendamina hakufwelela kala vyuma vyakwivwa kahako, oloze chapendamina haVisoneka vize vyeji kutulingisanga tupwenga vakuvanguluka, vakutona, nakutalilila kukuma chakatwamino kamyaka yino.
KUVANDAMINA PALANGA NAKUMWAKA UKA?
10, 11. (a) Yesu asakile tumbaji twenyi valizange vyuma muka? (b) Yesu alwezele tumbaji twenyi valinge vyuma muka nge kukuma kachejile halwola luze vashinganyekele vakikoko? (Talenu muvwimbimbi wakulivanga.)
10 Etu vavavulu tunapunga lika vakutona kushipilitu hamyaka yayivulu. Ngocho kuvandamina halwola lwalusuku kachatela kutuzeyesa nakuhona kupwa vakutonako. Twatela kupwa vakutona nakuvandamina kwiza chaYesu, uze apwa Muka-kunongesa katwamino kamyaka yino. Anukenu ngwenu Yesu alwezele vaka-kumukavangiza ngwenyi: “Vangulukenunga, tonenunga, mwomwo kamwatachikijile oho nalukejila lwola vatongolako. Chinafwane nge mutu uze apwile nakuya kulifuchi lyeka, uze asezele zuvo yenyi nakuhana wata kuli vandungo jenyi. Mutu himutu amuhanyine mulimo wenyi, kaha alwezele muka-kulama kuchikolo atonenga. Shikaho tonenunga, mwomwo kamwatachikijile lwola mweza mwenyazuvoko, kwiji hamashikajamo, nyi mukachi kaufuku, nyi havandemba, nyi nachimenemene, mangana omu mweza mukumikasumuna, ahone kumiwana muli mutulo. Omu nguli nakwamba kuli enu mukiko munangwamba nakuli vosena ngwami: Tonenunga.”—Mako 13:33-37.
11 Omu vaka-kukavangiza Yesu vatachikijile ngwavo kupwako chenyi chaputukile mu 1914, hahaze vene vaputukile kulizanga vyakwiza chenyi. Valingile ngocho hakutohwesako mulimo wavo wakwambulula Wangana. Yesu asolwele hatoma nge nahase kwiza “havandemba, nyi nachimenemene” chipwe kala lwola. Nge chapwile ngocho, kaha vaka-kumukavangiza vatelelele kulinga ngachilihi? Yesu ambile ngwenyi: “Tonenunga.” Ngocho, kuvandamina halwola lwalusuku kachatela kulingisa mutu ashinganyeke nge kukuma chili hahasuku, chipwe kukukulula ngwenyi kukuma kacheshi kukezako.
12. Vyuma muka Hambakuke ahulishile Yehova, kaha Kalunga amukumbulwile ngachilihi?
12 Achishinganyekenu hali kapolofweto Hambakuke uze valwezele avilike kunongesa chaYelusalema. Halwola aputukile kuzata ou mulimo, awanyine vakwavo vapolofweto vanauvilika lyehi hamyaka yayivulu. Awanyine vyuma vinapihi lyehi, ‘vaka-kuhuka vapwile nakushinyinyika vaka-kwoloka, nakuhingika chiyulo.’ Evi vikiko vyalingishile Hambakuke ahulise ngwenyi: “Ove Yehova, nangutwanga kawelele palanga nakumwaka uka?” Muchishishisa chakukumbulula chihula kana, Yehova akolezezele kapolofweto kenyi wakushishika ngwenyi kunongesa chize vanavuluka “kacheshi kukakotokelako.” Kaha amulwezele nawa ngwenyi, “chivandaminenga.”—Tangenu Hambakuke 1:1-4; 2:3.
13. Hambakuke kachi alingile vyuma muka, kaha mwomwo ika chuma kana kachi chapwililile chakuhenga?
13 Achishinganyekenu nge Hambakuke azeyele kuvandamina nakwamba ngwenyi: ‘Ngunevunga chihande chakunongesa Yelusalema hamyaka yayivulu. Kaha ngachilihi nge kuchili kwakusuku nakuyinongesa? Ngwamono kacheshi kupwa chakutamoko kutwalaho lika
nakuvilika kunongesa kana kwijiva nge nachiza hamene. Ngwafwelela nangulitwamina kuzata mulimo kana mangana vauzate kuli vakwetu veka.’ Nge Hambakuke ashinganyekele vyuma kana, kachi ajimbalishile uselewa apwile nawo kumeso aYehova, nakuhichikisamo mwono wenyi halwola vanongesele Yelusalema kuli vaka-Mbavilone.14. Mwomwo ika twatela kufwelela ngwetu vyuma vyosena twavandamina navikatesamo chikupu?
14 Omu natukapwa mukaye kakahya, natukatachikiza ngwetu vyuma vyosena vize vavulukile nge navikasoloka kupandama kuchikukulwishi chakatwamino kamyaka yino vinatesamo chikupu. Kaha kushinganyeka omu vinatesamo vyuma vashikile, nachikatukolezeza tukafwelele chikuma Yehova najishiko jenyi jikwavo jize mwakatesamo mukaye kakahya. (Tangenu Yoshuwa 23:14.) Chikupu vene, natukamusakwilila Kalunga, uze ‘atongola lwola chipwe jingonde mungolo jenyi,’ uze atukafwile tutachikize ngwetu “kukuma chavyuma vyosena chinapandama kwakamwihi.”—Vili. 1:7; Petu. 1, 4:7.
ZATENU NANGOLO SHIMBU MULI NAKUVANDAMINA
Kutala muli nakwazana natwima mumulimo wakwambulula mujimbu wamwaza tahi? (Talenu palangalafu 15)
15, 16. Mwomwo ika twatela kwambulula namuchima wakwanguhwa mumakumbi ano tuli nakuyoyelamo?
15 Twatela kufwelela ngwetu liuka lyaYehova nalitwanukisanga lwola lwosena mangana tutwaleho lika kuzachila Kalunga namuchima wakwanguhwa. Vyuma kanevi kavyeshi kutukafwa kaha tuzate nangolo mumilimo yaKalungako, oloze navitukafwa tutachikize ngwetu chinjikizo chakupwako chaKulishitu chili nakutesamo oholyapwa. Vyuma muka vyavilemu chikuma twatela kulinga mulwola luno tuli nakuyoyelamo? Twatela kutwalaho lika kutondanga chatete Wangana waKalunga nakwoloka chenyi hakwazana natwima mumulimo wakwambulula mujimbu wamwaza.—Mateu 6:33; Mako 13:10.
16 Ndumbwetu umwe wapwevo ambile ngwenyi: “Kwambulula mujimbu wamwaza waWangana waKalunga . . . nachitukafwa tuyovole vatu kukufwa chize chili nakwiza kulutwe.” Ou ndumbwetu atachikiza omu chalumbunukila kuyovola mutu, mwomwo ikiye nalunga lyenyi vayovokele kuponde yayinene chikuma hakalungalwiji, omu mbopolo yaulangaji vavuluka ngwavo Wilhelm Gustloff yavombele mu 1945. Namulwola lwalukalu ngana, vatu vamwe vanahase kuhona kutachikiza vyuma vyavilemu vatela kulinga mukuyoya chavo. Ou ndumbwetu anukile omu pwevo umwe apwile nakulinyenga nakutambakana ngwenyi: “Enu vakwetu ngonga yami mama! Ngonga yami! Mama yami vimbilingwa vyami vilimo omu vyawaha! Vimbilingwa vyami vinengila mumeya. Ngunatokesa vyuma vyami vyosena!” Oloze vatu vamwe vaze vapwile muze mumbopolo vahakile kuyoya chavo muponde nakuzata nangolo hakuyovola vakwavo vaze vapwile nakulondomana mumeya. Ngana mwavatu vaze vakafwile vakwavo, nayetu nawa tuli nakufwila kukafwa
vatu. Tuli nakuzata mulimo wakwambulula namuchima wakwanguhwa shimbu kuchili lwola, mangana tukafwe vatu vakayovoke kuponde yize yili nakwiza kulutwe.Kutala mweji kusakulanga vyuma vyamwaza mangana mutwaleho lika kupwa namuchima wakwanguhwa tahi? (Talenu palangalafu 17)
17. Vyuma muka vyatela kutulingisa tufwelele ngwetu kukuma chakatwamino kano chinahase kwiza kala lwola?
17 Vyuma vili nakusoloka muno mukaye vili nakusolola nge upolofweto wamuMbimbiliya uli nakutesamo, kaha kukuma chakatwamino kakapi kamyaka yino chili chikuma hakamwihi. Shikaho, katwatela kushinganyeka ngwetu lwola kuluchili lwalunene mwomwo jize “jimbinga 10” nauze “chisuma” vavuluka hali Kusoloka 17:16 kanda vachifumbukile Mbavilone Yayinene, yize yapwa chiyulo chakaye chakwitava chamakuliko. Twatela kwijiva nge Kalunga ikiye mwakachihaka “mumichima yavo” mangana vakalinge vyuma kana, ngocho chuma kana chinahase kulingiwa washi washi, kaha nawa hakala lwola. (Kuso. 17:17) Kukuma chakatwamino kamyaka yino kacheshi hahasukuko. Shikaho, twatela kukavangiza mazu ahuhumwine Yesu ngwenyi: “Lilamenunga enu vavene mangana michima yenu yizeneke kulema mwomwo yakulya chikuma, nakunwa chikuma nakulizakamina havyuma vyamukuyoya, kuchina likumbi lize nalikeza hali enu mukumikasumuna nge kusovoka chamuheto.” (Luka 21:34, 35; Kuso. 16:15) Tufwilenu kuzachila Yehova namuchima wakwanguhwa nakufwelela ngwetu mwatwalaho lika kukafwa “vatu vaze veji kumutalililanga.”—Isa. 64:4.
18. Chihula muka natukumbulula muchihande chinakavangizaho?
18 Omu tuli nakuvandamina kukuma chakatwamino kakapi kamyaka yino, tukavangizenu mazu vahwiminyinyine kambaji Yuta omu asoneke ngwenyi: “Enu ngwazanga, litungenu mulufwelelo lwenu lwajila chikuma, nakulomba nashipilitu yajila, mangana mutwamenga muzangi yaKalunga oku muli nakutalilila kutetela chaMwata wetu Yesu Kulishitu nakuvandamina kuyoya chahaya myaka yosena.” (Yuta 20, 21) Tunahase kusolola ngachilihi ngwetu twavandamina kaye kakahya kaze ashika Kalunga? Chihula kana natuchikumbulula muchihande chinakavangizaho.
^ par. 1 Nge muli nakusaka kumona mukana waupolofweto wamuMbimbiliya wakuvuluka Meshiya nakutesamo chawo, kaha talenu mukanda waUno Chikupu Mbimbiliya Yanangula Vyuma Muka? halifwo 200.