1, 2. Vyuma muka veji kushinganyekanga vatu vamwe hali Kalunga?

VATU vavavulu vashinganyeka ngwavo Kalunga keshi kumona vilinga vyavoko. Kaha nawa ngwavo Kalunga keshi kuhaka muchima kuvyuma vyeji kusolokanga kuli vakikoko. Chakutalilaho, omu peho yanyamanganda yenyekele ngalila yayinene yalifuchi lyaPhilippines muNovember 2013, mukulwane wambaka ambile ngwenyi: “Halwola kana Kalunga pamo apwanga kuchihela cheka.”

² Vatu vamwe vashinganyeka ngwavo Kalunga keshi kuhasa kumona vyuma vali nakulingako. (Isaya 26:10, 11; WaYowano 3, 11) Namulwola ayoyelenga kaposetolo Paulu, vatu vamwe vashinganyekelenga mwomumwe. Ngocho ambile ngwenyi: “Kutachikiza Kalunga vachimwene kupwa chamokomoko.” Vatu kana vapwile navilinga vyakuhenga, vyakuhuka, nachipululu, naupi.—Wavaka-Loma 1:28, 29.

3. (a) Vihula muka twatela kulihulisa etu vavene? (b) MuMbimbiliya, ngolo jaKalunga kakavulu vajifwanyisa kuka?

³ Nyi ngachilihi etu makumbi ano? Twatachikiza ngwetu Yehova eji kumonanga vyuma vyosena tweji kulinganga. Kutala  twafwelela ngwetu Yehova atuzakama tahi? Uno tweji kumonanga omu ngolo jenyi jeji kutukafwanga mukuyoya chetu nyi? MuMbimbiliya, ngolo jaKalunga kakavulu vajifwanyisa ‘kulivoko’ lyenyi. Eji kuzachisanga ngolo jenyi mangana akafwe vangamba jenyi nakufungulula vaka-kole jenyi. (Tangenu Lushimbi lwamuchivali 26:8.) Yesu ambile ngwenyi, vatu vamwe “navakamumona Kalunga.” (Mateu 5:8) Uno nayetu twapwa hali ava vatu tahi? Uno tunahase ‘kumona ngachilihi Kalunga’? Tulinangulenu jino havatu vasoneka muMbimbiliya vaze vamwene omu Kalunga avakafwile mukuyoya chavo navaze kavamwene chuma kanako. Natulinangula nawa omu lufwelelo lunahase kutulingisa tumone omu ngolo jaKalunga jeji kutukafwanga.

4. Mwomwo ika vaka-kole javaIsalele vahonene kumona ngolo jaKalunga?

⁴ Kushikulu vatu vavavulu vahashile kumona nakwivwa omu Kalunga akafwile vaIsalele. Yehova alingile vyuma vyakukomwesa hakusokola vatu jenyi muEjipitu nakufungulula vamyangana vavavulu muLifuchi lyaLushiko. (Yoshuwa 9:3, 9, 10) Numba tuhu vamyangana vamwe vamwene nakwivwa omu Yehova ayowele vatu jenyi, oloze “valivwasanyine mangana valwenga jita naYoshuwa navaIsalele.” (Yoshuwa 9:1, 2) Omu valwile jita navaIsalele, vaze vamyangana vatelele kumona ngolo jaKalunga. Mwomwo yangolo jaYehova jajinene, “likumbi lyemanyine, kaha nakakweji nawa emanyine, palanga nomu vaIsalele vafungulwile vaka-kole javo.” (Yoshuwa 10:13) Yehova alingishile vaka-kole javaIsalele “vakaluhwise michima yavo,” mangana valwenga navo jita. (Yoshuwa 11:20) Vaka-kole javaIsalele vavafungulwile mwomwo vahonene kwitavila ngwavo Yehova ikiye alwililile vatu jenyi jita.

5. Vyuma muka akanyine kwitavila Mwangana Ahave?

⁵ Kufumaho, Mwangana wamupi Ahave naikiye atelelele kumona ngolo jaKalunga mapapa kakavulu. Elija ambile kuli ikiye ngwenyi: ‘Kakweshi kupwa lyume chipwe vulako kuvangomu nangukahanjika.’ (Vamyangana 1, 17:1) Chuma kana chatelele kusoloka mwomwo yangolo jaKalunga, oloze Ahave akanyine kwitavila mujimbu kana. Kufumaho, Elija alombele kuli Yehova amukafwe, kaha Kalunga akumbulwile kulomba chenyi nakutuma kakahya kufuma mwilu. Kaha Ahave amwene vyuma vyasolokele. Ngocho Elija alwezele Ahave ngwenyi Yehova mwakumisa changa nakunokesa vula yayinene. (Vamyangana 1, 18:22-45) Numba tuhu Ahave amwene vyuma vyosenevi vyakukomwesa, oloze ahonene kumona ngolo jaYehova. Vyuma muka natulinangula kuvyakutalilaho kanevi? Twatela kumona omu ngolo jaKalunga jeji kutukafwanga mukuyoya chetu.

6, 7. Vyuma muka vatachikijile vaka-Ngiveyone naLahave?

⁶ Vaka-Ngiveyone vapwile vakulihandununa navatu vaze vavajingilikile. Vamwene ngolo jaKalunga. Vaka-Ngiveyone kavalwile jita navaIsaleleko, oloze vatwamine navo mukuunda. Mwomwo ika? Mwomwo vevwile vyuma vyosena alingile Yehova. (Yoshuwa 9:3, 9, 10) Chapwile chamangana kutachikiza ngwavo Yehova ikiye apwile nakulwila vaIsalele jita.

⁷ Lahave naikiye amwene ngolo jaYehova. Numba tuhu ou pwevo kapwile kaIsaleleko, oloze evwile omu Yehova asokwele vatu jenyi muEjipitu. Omu vandoji vavali vavaIsalele vejile kuli ikiye, avalwezele ngwenyi: “Ngunatachikiza ngwami  Yehova mwamihana lifuchi lino.” Lahave afwelelele ngwenyi Yehova mwamulwila hohamwe navaka-tanga yenyi. Numba tuhu atachikijile ngwenyi chuma mwalinga nachimwingisa muponde, oloze ikiye afwelelele Yehova.—Yoshuwa 2:9-13; 4:23, 24.

8. VaIsalele vamwe vetavilile ngachilihi ngwavo vamwene ngolo jaKalunga?

⁸ VaIsalele vamwe vaze vamwene kakahya kaze kafumine mwilu mwomwo yakulomba chaElija, kavalingile ngana mwaMwangana wamupi Ahaveko. Vakiko vatachikijile ngwavo Kalunga ikiye alingile chuma kana. Ngocho vambile ngwavo: “Yehova napu Kalunga wamuchano!” (Vamyangana 1, 18:39) Vakiko vatachikijile ngwavo vanamono ngolo jaKalunga.

9. Tunahase kumona ngachilihi ngolo jaYehova makumbi ano?

⁹ Tunashimutwila havyakutalilaho vyamwaza navyevi vyavipi vize vinatukafwe twivwishise omu chalumbunukila “kumona Kalunga” chipwe kumona ngolo jenyi. Omu natutachikiza kanawa Yehova navilinga vyenyi, natumona ngolo jenyi ‘nameso amichima yetu.’ (Wavaka-Efwesu 1:18) Echi nachitukafwa tulondezeze vatu vakushishika vakushikulu navamakumbi ano vaze vanamono omu Yehova nakafwenga vatu jenyi. Uno tuli naunjiho wakusolola nge Kalunga ali nakukafwa vatu jenyi makumbi ano nyi?

10. Unjiho muka tuli nawo wakusolola nge Yehova achili lika nakukafwa vatu makumbi ano? (Talenu muvwimbimbi wakulivanga.)

¹⁰ Tuli naunjiho wauvulu wakusolola nge Yehova achili lika nakukafwa vatu makumbi ano. Tweji kwivwanga mijimbu yavatu vaze valombele kuli Kalunga mangana avakafwe mukuyoya  chavo, kaha Kalunga akumbulwile kulomba chavo. (Samu 53:2) Chakutalilaho, omu ndumbwetu Allan apwile nakwambulula mujimbu halitungu limwe muPhilippines, awanyine pwevo umwe uze aputukile kulila hakumumona. Ambile ngwenyi: “Chimene vene chize uze pwevo alombele kuli Yehova mangana atume Vinjiho jenyi vezenga kuli ikiye.” Halwola apwile kanyike, alinangwilenga Mbimbiliya naVinjiho, kaha omu asombokele nakwiza nakutwama halitungu kana, alitwaminyine kulinangula. Kalunga akumbulwile washi kulomba chenyi. Kamwahichile namwakako, alihanyine kuli Yehova.

11, 12. (a) Uno Yehova ali nakukafwa ngachilihi vangamba jenyi makumbi ano? (b) Lumbununenu omu Yehova akafwile ndumbwetu umwe wapwevo.

¹¹ Vangamba jaYehova vavavulu vanamononga omu Kalunga navakafwenga kuzachisa ngolo jenyi hakulitwamina tato yayipi yakufwana nge kunwa makanya namaundu akupendesa chipwe kutala mivwimbimbi yauselesele. Vamwe veji kwambanga ngwavo vasakile kulitwamina tato kana oloze kavahashileko. Chipwe ngocho valombele kuli Yehova avakafwe, kaha avahanyine “ngolo jakuhambakana jize javatu,” ngocho vahashile jino kulitwamina tato kana.—Wavaka-Kolinde 2, 4:7; Samu 37:23, 24.

¹² Yehova eji kukafwanga nawa vangamba jenyi vahase kumika muukalu vali nakumona. Omu mukiko chapwile nakuli ndumbwetu Amy. Vamuhanyine mulimo wakukafwa kutunga Zuvo yaWangana nazuvo yavamishonali halitungu limwe lyahakalungalwiji waPacific. Vatu vahalitungu kana vapwile nachisemwa chakulihandununa nachize chenyi, kaha kakavulu kakwapwilenga kakahya kakezi chipwe meyako. Mumikwakwa nawa mwapwilenga meya, kaha nawa atwaminenga mukapete kakandende kamuzuvo yavangeji, ngocho ashinganyekelenga chikuma tanga yenyi. Likumbi limwe atenukilile ndumbwetu umwe uze apwile nakuzata nenyi. Chuma alingile chamwivwishile chikuma kupihya kumuchima. Omu akindulukile kuze kukapete kenyi muze mwapwile milima, alombele kuli Yehova amukafwe. Kaha omu kamunyikile kakahya kakezi atangile chihande chamuKaposhi Kakutalila chize chahanjikile hali vaze vakumishile shikola yaNgileyate. Chihande kana chavulukile ukalu uze apwile nakuhitamo. Ngocho ambile ngwenyi: “Ngwevwile nge Yehova ikiye apwile nakuhanjika nayami ufuku kana, kahechi changukafwile ngutwaleho lika kuzata mulimo vanguhanyine.”—Samu 44:25, 26; Isaya 41:10, 13.

13. Unjiho muka twatwama nawo wakusolola nge Yehova nakafwenga vatu jenyi vahakwile lisesa lyavo lyakwambulula?

¹³ Yehova nakafwe nawa vatu jenyi vahakwile mujimbu wamwaza. (Wavaka-Fwilipi 1:7) Chakutalilaho, omu jifulumende jimwe jesekele kukanyisa mulimo wetu wakwambulula, twayile kuzango yakusopela milonga nakulihakwila etu vavene. Kufuma mumwaka wa 2000, tunasambe muvihande kafwe 268 mukaye kosena, kaha vihande 24 vyapwililile muZango Yayinene yamuEurope Yize Yatala haLisesa Vatwama Nalyo Vatu. Echi chasolola hatoma nge kakweshi mutu numba umwe nahase kuhonesa mulimo waKalungako.—Isaya 54:17; tangenu Isaya 59:1.

14. Unjiho muka ukwavo wasolola nge Kalunga ali nakukafwa vatu jenyi?

¹⁴ Mulimo wetu wakwambulula mujimbu wamwaza mukaye kosena unapu hiunjiho wakusolola nge Kalunga ali nakukafwa vatu jenyi.  (Mateu 24:14; Vilinga 1:8) Unjiho ukwavo wakusolola nge Yehova ali nakukafwa vangamba jenyi shina kulinunga hamwe mukaye kosena. Kulinunga kana chapwa chakulipwila. Navatu vaze kavalemesa Yehovako veji kwambanga ngwavo: “Chikupu vene Kalunga ali muli enu.” (Wavaka-Kolinde 1, 14:25) Eyo, twatwama naunjiho wauvulu wakusolola nge Kalunga ali hamwe navatu jenyi. (Tangenu Isaya 66:14.) Nyi ngachilihi enu? Uno mweji kumonanga ngolo jaYehova mukuyoya chenu tahi?

15. Mwomwo ika lwola lumwe tunahase kuhona kumona omu ngolo jaYehova jeji kutukafwanga mukuyoya chetu?

¹⁵ Lwola lumwe katweshi kuhasa kumona omu ngolo jaKalunga jeji kutukafwanga mukuyoya chetuko. Mwomwo ika chapwila ngocho? Nge tuli nakumona ukalu wauvulu, tunahase kuvulyama ngwetu Yehova atukafwile mapapa kakavulu kunyima. Omu mukiko chapwile nakuli Elija nawa. Ou mutu apwile wakuhamuka, oloze omu Mwangana wapwevo Yezevele asakile kumujiha, evwile woma chikuma. Kaha avulyamine omu Yehova amukafwile hakavanga. Mbimbiliya yahanjika ngwavo, Elija asakile nakufwa. (Vamyangana 1, 19:1-4) Uno iya atelelele kumukafwa nakumuzamikisa? Atelelele kupendamina hali Yehova.—Vamyangana 1, 19:14-18.

16. Tunahase kumona ngachilihi Kalunga nge tuli muukalu?

¹⁶ Yopa naikiye ashinganyekelenga chikuma haukalu wenyi, ngocho ahonene kumona vyuma ngana muze avimwenenga Yehova. (Yopa 42:3-6) Nayetu nawa, lwola lumwe tunahase kuchiwana kupwa chachikalu kumona omu Kalunga eji kutukafwanga nge tuli nakumona ukalu. Vyuma muka vinahase kutukafwa tumone ovyo natulingila Kalunga? Twatela kushinganyeka havyuma yahanjika Mbimbiliya kutalisa kuukalu tweji kumonanga. Ngocho natumona  Yehova kupwa mutu nahenyi, kaha nayetu natwamba ngwetu: “Ngunakwivunga kaha, oloze jino ngunakumono nameso ami.”

17, 18. (a) Uno munahase kumona ngachilihi omu Yehova ali nakumikafwa mukuyoya chenu? (b) Hanenu vyakutalilaho vyakusolola omu Kalunga ali nakutukafwa makumbi ano.

¹⁷ Uno munahase kumona ngachilihi omu Yehova ali nakumikafwa mukuyoya chenu? Tuchishimutwilenu havyakutalilaho vitanu. Chatete, munahase kushinganyeka omu Yehova amikafwile mulinangule muchano. Chamuchivali, munahase kwanuka omu likumbi limwe mwayile kukukunguluka nakwivwilila kuchihande chize chamikwachile kumuchima nakumilingisa mwambenga ngwenu, “Awa mazu akiko vene ngwapwanga nakusaka kwivwa.” Chamuchitatu, pamo munamono omu Yehova namikafwe hakukumbulula kulomba chenu. Chamuchiwana, pamo mwafwililile chikuma kuzachila Yehova kaha mwamwene omu amikafwile mutesemo kulinga chuma kana. Chamuchitanu, pamo mwalitwaminyine kuzata mulimo mwomwo yakuhona kupwa nalwola lwakuzachila kanawa Yehova, kaha mwamwene omu Kalunga ateselemo lushiko lwenyi lwakwamba ngwenyi: “Kangweshi kukakumbilako.” (WavaHepeleu 13:5) Nge natupwa nausoko wakukola naYehova, kaha nachipwa chachashi kuli etu kumona omu Yehova ali nakutukafwa mukuyoya chetu.

¹⁸ Ndumbwetu Sarah wakulifuchi lyaKenya, ambile ngwenyi: “Ngwalombele kuli Kalunga nakumulweza omu ngwapwile nakwivwa hali mutu uze ngwanangwilenga Mbimbiliya, uze kapwile nakumona vyuma twalinangwilenga kupwa vyavilemuko. Ngwalwezele Yehova ngwami nangulitwamina kumunangula. Omu ngwakumishile kulomba, hahaze vene shinga yami yavumine. Mutu uze ngwanangwilenga Mbimbiliya ikiye angutuminyine shinga mangana ngwenyi tuyenga hamwe nayami kukukunguluka. Chuma kana changukomwesele chikuma.” Nge natushinganyeka havyuma natulingila Kalunga, kaha natumona omu ali nakutukafwa. Ndumbwetu wapwevo Rhonna wakuAsia ambile ngwenyi cheji kumbatanga lwola kumona omu Yehova eji kutukafwanga mukuyoya chetu. Ambile nawa ngwenyi: “Nge namulinga ngocho, kaha namuwana nge atuzakama chikuma.”

19. Vyuma vyeka muka twatela kulinga mangana tumone Kalunga?

¹⁹ Yesu ambile ngwenyi, vaze “navakamumona Kalunga” vatela kupwa “vatoma mumichima.” (Mateu 5:8) Uno echi chalumbununa ika? Twatela kupwa navishinganyeka vitoma nakulitwamina kulinga vyuma vyavipi. (Tangenu Wavaka-Kolinde 2, 4:2.) Muchihande chino, tunalinangula nge twatela kuzamisa usoko wetu naKalunga hakusaka mangana tumone ngolo jenyi. Muchihande nachikavangizaho natushimutwila omu lufwelelo lunahase kutukafwa tumone hatoma ngolo jaYehova mukuyoya chetu.